ຊຸກຍູ້ການພົບປະແລກປ່ຽນປະຊາຊົນລະຫວ່າງ ຫວຽດນາມ-ເຊັກ
ຕອນບ່າຍວັນທີ 18 ມັງກອນ, ຢູ່ນະຄອນຫຼວງ Praha, ທ່ານ ຟ້າມມິງຈິ໊ງ ນາຍົກລັດຖະມົນຕີຫວຽດນາມ ໄດ້ມີການພົບປະກັບທ່ານ Milos Kusy ປະທານສະມາຄົມມິດຕະພາບ ເຊັກ-ຫວຽດນາມ.
    |
 |
|
ທ່ານ ຟ້າມມິງຈິ໊ງ ນາຍົກລັດຖະມົນຕີຫວຽດນາມ ແລະທ່ານ Milos Kusy ປະທານສະມາຄົມມິດຕະພາບ ເຊັກ-ຫວຽດນາມ. ພາບ: ສໍານັກຂ່າວສານຫວຽດນາມ |
ຕີລາຄາສູງການເຄື່ອນໄຫວຂອງສະມາຄົມມິດຕະພາບ ເຊັກ-ຫວຽດນາມ ແລະປະທານສະມາຄົມທີ່ຍາມໃດກໍ່ສະໜັບສະໜູນປະຊາຄົມຊາວຫວຽດນາມ ອາໄສຢູ່ ເຊັກ, ກໍ່ຄື ຕັ້ງໜ້າໃນການເຄື່ອນໄຫວພົບປະແລກປ່ຽນ, ເຊື່ອມຕໍ່ລະຫວ່າງປະຊາຊົນສອງປະເທດ, ທ່ານນາຍົກລັດຖະມົນຕີ ຟ້າມມິງຈິ໊ງ ຢືນຢັນວ່າ ລັດຫວຽດນາມ ຍາມໃດກໍ່ສະໜັບສະໜູນ ແລະສ້າງເງື່ອນໄຂສະດວກໃຫ້ສະມາຄົມສືບຕໍ່ເຄື່ອນໄຫວ ແລະຄຽງບ່າຄຽງໄຫຼ່ພ້ອມກັບປະຊາຊົນຫວຽດນາມ.
ທ່ານນາຍົກລັດຖະມົນຕີ ຟ້າມມິງຈິ໊ງ ໃຫ້ຮູ້ວ່າ ການຢ້ຽມຢາມເຊັກ ຄັ້ງນີ້ຂອງທ່ານ ແນໃສ່ເພີ່ມທະວີການພົວພັນມິດຕະພາບທີ່ເປັນມູນເຊື້ອລະຫວ່າງ ຫວຽດນາມ-ເຊັກ ໃນທຸກຂົງເຂດ ແລະຮັດແໜ້ນນໍ້າໃຈມິດຕະພາບລະຫວ່າງປະຊາຊົນສອງປະເທດ; ສະເໜີໃຫ້ສະມາຄົມສືບຕໍ່ສະໜັບສະໜູນ ແລະຊຸກຍູ້ການພົວພັນ ຫວຽດນາມ-ເຊັກ ໃຫ້ນັບມື້ນັບເຂົ້າສູ່ເລິກເຊິ່ງ, ແທດຈິງ ແລະມີປະສິດທິຜົນ.
|
|
 |
|
ທ່ານ ຟ້າມມິງຈິ໊ງ ນາຍົກລັດຖະມົນຕີຫວຽດນາມ ຕ້ອນຮັບທ່ານ Milos Kusy ປະທານສະມາຄົມມິດຕະພາບ ເຊັກ-ຫວຽດນາມ. ພາບ: ສໍານັກຂ່າວສານຫວຽດນາມ |
ສະແດງຄວາມນິຍົມນັບຖືຕໍ່ການພັດທະນາກະໂດດຂັ້ນຂອງຫວຽດນາມ, ທ່ານ Milos Kusy ໃຫ້ຮູ້ວ່າ ສະມາຄົມໄດ້ສົມທົບຢ່າງແໜ້ນແຟ້ນກັບສະຖານທູດຫວຽດນາມ ປະຈຳ ເຊັກ, ບັນດາສະມາຄົມຂອງຊາວຫວຽດນາມ ປະຈຳ ເຊັກ ແລະສະມາຄົມມິດຕະພາບ ຫວຽດນາມ-ເຊັກ, ປະກອບສ່ວນຊຸກຍູ້ການພົວພັນ ຫວຽດນາມ-ເຊັກ ເວົ້າລວມ ແລະລະຫວ່າງບັນດາກະຊວງ, ຂະແໜງການ ແລະທ້ອງຖິ່ນສອງປະເທດ.
ທ່ານ Milos Kusy ສະເໜີຫວຽດນາມ ສົມທົບກັບ ເຊັກ ຊຸກຍູ້ການພົບປະແລກປ່ຽນປະຊາຊົນ, ສ້າງເງື່ອນໄຂເພື່ອໃຫ້ປະຊາຊົນສອງປະເທດເຂົ້າໃຈກວ່າກ່ຽວກັບປະເທດ, ປະຊາຊົນ, ວັດທະນະທຳຂອງກັນ, ໃນນັ້ນມີການກໍ່ສ້າງສູນວັດທະນະທຳຫວຽດນາມ ປະຈໍາ ເຊັກ; ຢືນຢັນວ່າ, ສະມາຄົມມິດຕະພາບ ເຊັກ-ຫວຽດນາມ ຈະເຮັດຈົນສຸດຄວາມສາມາດຂອງຕົນ, ຄຽງບ່າຄຽງໄຫຼ່ພ້ອມກັບຫວຽດນາມ ໃນວິວັດການພັດທະນາ ແລະເພີ່ມພູນຄູນສ້າງໃຫ້ການພົວພັນສອງປະເທດ.
ເພີ່ມທະວີການຮ່ວມມືລະຫວ່າງພັກກອມມູນິດຫວຽດນາມ ແລະພັກກອມມູນິດເຊັກ - Morava
ຕອນບ່າຍວັນດຽວກັນ, ຢູ່ນະຄອນຫຼວງ Praha, ທ່ານ ຟ້າມມິງຈິ໊ງ ນາຍົກລັດຖະມົນຕີຫວຽດນາມ ໄດ້ໃຫ້ການຕ້ອນຮັບທ່ານນາງ Katerina Konecna ປະທານພັກກອມມູນິດເຊັກ - Morava.
|
|
 |
|
ທ່ານ ຟ້າມມິງຈິ໊ງ ນາຍົກລັດຖະມົນຕີຫວຽດນາມ ແລະທ່ານນາງ Katerina Konecna ປະທານພັກກອມມູນິດເຊັກ - Morava. ພາບ: ສໍານັກຂ່າວສານຫວຽດນາມ |
ທ່ານນາຍົກລັດຖະມົນຕີ ຟ້າມມິງຈິ໊ງ ຢືນຢັນວ່າ ໃນແນວທາງການພົວພັນຕ່າງປະເທດຂອງຕົນ, ຫວຽດນາມ ຖືເປັນສຳຄັນ ແລະປາດຖະໜາຢາກເພີ່ມທະວີການພົວພັນມິດຕະພາບທີ່ເປັນມູນເຊື້ອ ແລະການຮ່ວມມືທີ່ດີຫຼາຍດ້ານກັບເຊັກ, ສະໜັບສະໜູນຈິດໃຈມະຫາສາມັກຄີຂອງປະຊາຊົນ ແລະບັນດາພັກຝ່າຍຂອງເຊັກ, ປະກອບສ່ວນເຂົ້າໃນສະພາບແວດລ້ອມແຫ່ງສັນຕິພາບ, ສະຖຽນລະພາບ, ການຮ່ວມມື ແລະພັດທະນາຢູ່ສອງພາກພື້ນ ແລະໃນໂລກ.
ທ່ານໃຫ້ຮູ້ວ່າ, ພ້ອມກັບພັກກອມມູນິດ ແລະພັກຝ່າຍຊ້າຍ, ພັກກອມມູນິດຫວຽດນາມ ມີແຜນນະໂຍບາຍຊຸກຍູ້ການພົວພັນກັບພັກກຳອຳນາດບັນດາປະເທດ, ທ່ານນາຍົກລັດຖະມົນຕີ ຟ້າມມິງຈິ໊ງ ສະເໜີໃຫ້ສອງພັກ ເພີ່ມທະວີການແບ່ງປັນຂໍ້ມູນຂ່າວສານ, ແລກປ່ຽນຄະນະຜູ້ແທນ, ປະກອບສ່ວນຍູ້ແຮງຄວາມເຂົ້າໃຈ, ຄວາມໄວ້ເນື້ອເຊື່ອໃຈດ້ານການເມືອງ, ແລກປ່ຽນບັນຫາທິດສະດີ, ພຶດຕິກຳຕົວຈິງ, ວຽກງານກໍ່ສ້າງ ແລະພັດທະນາພັກ; ຫວັງວ່າ ພັກກອມມູນິດເຊັກ - Morava ຈະສືບຕໍ່ສະໜັບສະໜູນຫວຽດນາມ ໃນກິດຈະການສ້າງສາ ແລະປົກປັກຮັກສາປະເທດສັງຄົມນິຍົມ, ກໍ່ຄື ເພີ່ມທະວີສາຍພົວພັນມິດຕະພາບທີ່ເປັນມູນເຊື້ອອັນດີງາມລະຫວ່າງສອງປະເທດ.
ພິເສດ, ທ່ານນາຍົກລັດຖະມົນຕີ ຟ້າມມິງຈິ໊ງ ສະເໜີວ່າ, ໂດຍແມ່ນສະມາຊິກລັດຖະສະພາເອີລົບ, ທ່ານນາງ Katerina Konecna ຈະມີການກະທົບເພື່ອໃຫ້ບັນດາປະເທດທີ່ຍັງເຫຼືອໃນສະຫະພາບເອີລົບ ໃຫ້ສັດຕະຍາບັນສັນຍາປົກປ້ອງການລົງທຶນລະຫວ່າງຫວຽດນາມ ແລະສະຫະພາບເອີລົບ (EVIPA), ກໍ່ຄືມີການກະທົບເພື່ອໃຫ້ຄະນະກຳມະການເອີລົບ (EC) ຍົກເລີກບັດເຫຼືອງ IUU ສຳລັບສິນໃນນ້ຳຫວຽດນາມ.
|
|
 |
|
ທ່ານ ຟ້າມມິງຈິ໊ງ ນາຍົກລັດຖະມົນຕີຫວຽດນາມ ຕ້ອນຮັບທ່ານນາງ Katerina Konecna ປະທານພັກກອມມູນິດເຊັກ - Morava. ພາບ: ສໍານັກຂ່າວສານຫວຽດນາມ |
ທ່ານນາງ Katerina Konecna ສະແດງອາລົມຈິດອັນເລິກເຊິ່ງ ແລະຕີລາຄາທີ່ດີຕໍ່ຫວຽດນາມ, ກ່ຽວກັບການພົວພັນລະຫວ່າງສອງປະເທດ, ສອງພັກ; ທ່ານກ່າວວ່າ, ຈະສະໜັບສະໜູນນະໂຍບາຍຂອງ ເຊັກ ກັບຫວຽດນາມ ແລະຈະສືບຕໍ່ຊຸກຍູ້ເພື່ອໃຫ້ການພົວພັນມິດຕະພາບ, ການຮ່ວມມືລະຫວ່າງພັກກອມມູນິດຫວຽດນາມ ແລະພັກກອມມູນິດເຊັກ - Morava ນັບມື້ນັບແໜ້ນແຟ້ນ, ປະກອບສ່ວນຍູ້ແຮງການພົວພັນສອງປະເທດໃຫ້ນັບມື້ນັບເຂົ້າສູ່ລວງເລິກ, ພັດທະນາຢ່າງມີປະສິດທິຜົນໃນທຸກຂົງເຂດ, ເພື່ອຜົນປະໂຫຍດຂອງປະຊາຊົນສອງປະເທດ, ເພື່ອສັນຕິພາບ, ການຮ່ວມມື ແລະພັດທະນາຢູ່ສອງພາກພື້ນ ແລະໃນໂລກ.
ທ່ານນາງ Katerina Konecna ໄດ້ເຫັນດີເປັນເອກະພາບສູງຕໍ່ຄຳເຫັນຂອງທ່ານຟ້າມມິງຈິ໊ງ, ພ້ອມແລ້ວທີ່ຈະໜູນຊ່ວຍຫວຽດນາມ ໃນທຸກຄວາມສາມາດ, ໃນນັ້ນມີການຊຸກຍູ້ເພື່ອໃຫ້ສັດຕະຍາບັນ EVIPA ແລະຍົກເລີກບັດເຫຼືອງ IUU ສຳລັບສິນໃນນ້ຳຫວຽດນາມ ສໍາເລັດໂດຍໄວ.
ໂດຍ: ເຈິ່ນຮວ່ຽນ