ປະທານສະພາແຫ່ງຊາດຫວຽດນາມ ຕ້ອນຮັບເອກອັກຄະລັດຖະທູດຍີ່ປຸ່ນ ປະຈຳຫວຽດນາມ
ກປ.ອອນໄລ - ຕອນບ່າຍວັນທີ 20 ມັງກອນ, ຢູ່ນະຄອນເກີນເທີ, ທ່ານ ເຈິ່ນແທງເໝິນ ປະທານສະພາແຫ່ງຊາດຫວຽດນາມ ໄດ້ໃຫ້ການຕ້ອນຮັບທ່ານ Ito Naoki ເອກອັກຄະລັດຖະທູດຍີ່ປຸ່ນ ປະຈໍາ ຫວຽດນາມ.
ທີ່ການຕ້ອນຮັບ, ທ່ານປະທານສະພາແຫ່ງຊາດຫວຽດນາມ ຖືວ່າ: ຫວຽດນາມ ປາດຖະໜາຢາກຮ່ວມມືຢ່າງແໜ້ນແຟ້ນກັບຍີ່ປຸ່ນ ເພື່ອສືບຕໍ່ເຮັດໃຫ້ການພົວພັນສອງປະເທດເລິກເຊິ່ງກວ່າອີກ ບົນຈິດໃຈຂອບເຂດຄູ່ຮ່ວມມືຍຸດທະສາດຮອບດ້ານ; ສະເໜີທ່ານ Ito Naoki ເອົາໃຈໃສ່ເຖິງການຊຸກຍູ້ການຮ່ວມມືລະຫວ່າງສະພາແຫ່ງຊາດສອງປະເທດ.
    |
 |
|
ບັນຍາກາດທີ່ການຕ້ອນຮັບ. ພາບ: qdnd.vn |
ທ່ານປະທານສະພາແຫ່ງຊາດ ຫວັງວ່າ ຍີ່ປຸ່ນ ຈະສືບຕໍ່ມີບັນດາໂຄງການໜູນຊ່ວຍຫວຽດນາມ ໃນການກໍ່ສ້າງ ແລະຜັນຂະຫຍາຍຍຸດທະສາດຫັນເປັນອຸດສາຫະກຳ ແລະທັນສະໄໝໃນຂອບເຂດການຮ່ວມມື ຫວຽດນາມ - ຍີ່ປຸ່ນ ໄລຍະ 2023-2030 ແລະຜັນຂະຫຍາຍບ້ວງເງິນກູ້ຢືມບຸລິມະສິດລຸ້ນໃໝ່, ສຸມໃສ່ບາງໂຄງການພື້ນຖານໂຄງລ່າງຈຸດສຸມ; ຊຸກຍູ້ການລົງທຶນຂອງ ຍີ່ປຸ່ນ ເຂົ້າຫວຽດນາມ ຕື່ມອີກ, ໃນນັ້ນເອົາໃຈໃສ່ລົງທຶນທີ່ມີຄຸນນະພາບສູງ, ມີການແຜ່ຂະຫຍາຍ ແລະການຖ່າຍທອດເຕັກໂນໂລຢີ.
ສ່ວນທ່ານເອກອັກຄະລັດຖະທູດຍີ່ປຸ່ນ ປາດຖະໜາວ່າ ໃນບົດບາດຂອງຕົນ, ທ່ານ ເຈິ່ນແທງເໝິນ ຈະເອົາໃຈໃສ່ເຖິງການຊຸກຍູ້ ແລະປັບປຸງບັນດານະໂຍບາຍກົດໝາຍໃຫ້ສົມບູນແບບ, ປະຕິຮູບລະບຽບການບໍລິຫານ ເພື່ອແນໃສ່ສ້າງເງື່ອນໄຂສະດວກກວ່າເພື່ອໃຫ້ບັນດາວິສາຫະກິດ ຍີ່ປຸ່ນ ລົງທຶນເຂົ້າ ຫວຽດນາມ.
ໂດຍ: ທະນາພອນ