ຍົກລະດັບການພົວພັນຫວຽດນາມ - ສ. ເຊັກ ຂຶ້ນເປັນຄູ່ຮ່ວມມືຍຸດທະສາດ
ທີ່ການພົບປະ, ການນຳສອງທ່ານໄດ້ສະແດງຄວາມປິຕິຊົມຊື່ນຕໍ່ການພັດທະນາຢ່າງຕັ້ງໜ້າໃນການພົວພັນລະຫວ່າງສອງປະເທດ, ພິເສດແມ່ນການເມືອງ - ການທູດ, ການປ້ອງກັນຊາດ, ປ້ອງກັນຄວາມສະຫງົບ, ການຄ້າ - ການລົງທຶນ, ການສຶກສາ. ສອງຝ່າຍເຫັນດີເພີ່ມທະວີການແລກປ່ຽນຄະນະຜູ້ແທນທຸກຂັ້ນ, ພິເສດແມ່ນຂັ້ນສູງຜ່ານບັນດາຊ່ອງທາງພັກ, ລັດ, ລັດຖະບານ, ສະພາແຫ່ງຊາດ.
ການນຳສອງທ່ານໄດ້ເຫັນດີເປັນເອກະສັນຍົກລະດັບການພົວພັນຫວຽດນາມ-ສ.ເຊັກ ຂຶ້ນເປັນຄູ່ຮ່ວມມືຍຸດທະສາດ ແລະສ້າງໂຄງການດໍາເນີນງານໂດຍໄວ ເພື່ອຜັນຂະຫຍາຍຂອບເຂດຄູ່ຮ່ວມມືຍຸດທະສາດ ຫວຽດນາມ- ສ.ເຊັກ ໃຫ້ເຂົ້າສູ່ລວງເລິກ, ແທດຈິງ, ເໝາະສົມກັບຂອບເຂດການຮ່ວມມື ລະຫວ່າງສອງປະເທດໃນສະພາບການໃໝ່.
    |
 |
|
ທ່ານ ຟ້າມມິງຈິ໊ງ ນາຍົກລັດຖະມົນຕີຫວຽດນາມ ພົບປະກັບທ່ານ Petr Fiala ນາຍົກລັດຖະມົນຕີ ສ.ເຊັກ. ພາບ: ສໍານັກຂ່າວສານຫວຽດນາມ |
ສອງຝ່າຍເຫັນດີເປັນເອກະສັນຍູ້ແຮງການຮ່ວມມືໃນຂອບເຂດຄູ່ຮ່ວມມືຍຸດທະສາດ, ລວມມີບັນດາຂໍ້ຕົກລົງທີ່ໄດ້ລົງນາມລະຫວ່າງສອງປະເທດ, ຍູ້ແຮງການຮ່ວມມືໃນຂົງເຂດ, ຄື: ການປ້ອງກັນຊາດ, ປ້ອງກັນຄວາມສະຫງົບ, ການຄ້າ ແລະການລົງທຶນ, ວິທະຍາສາດ - ເຕັກໂນໂລຢີ, ການສຶກສາ-ກໍ່ສ້າງ, ວັດທະນະທໍາ-ການທ່ອງທ່ຽວ ແລະການພົບປະແລກປ່ຽນປະຊາຊົນ, ພ້ອມທັງເປີດກວ້າງການຮ່ວມມືໄປສູ່ຂົງເຂດທີ່ສ້າງກໍາລັງດັນໃຫ້ການເຕີບໂຕໃໝ່, ຄື: ພະລັງງານທົດແທນ, ນະວັດຕະກໍາ, ການຫັນເປັນດີຈີຕອນ, ເສດຖະກິດສີຂຽວ ແລະເສດຖະກິດໝູນວຽນ…; ຢັ້ງຢືນຄຳໝັ້ນສັນຍາຂອງການນຳຂັ້ນສູງສອງປະເທດ ໃນການຍູ້ແຮງການຮ່ວມມືໃຫ້ຫຼາຍກວ່າອີກໃນຂົງເຂດ ເຊິ່ງສອງຝ່າຍມີທ່າແຮງ ແລະມີຄວາມຕ້ອງການ, ເພື່ອຜົນປະໂຫຍດຂອງປະຊາຊົນສອງປະເທດ, ເພື່ອສັນຕິພາບ, ສະຖຽນລະພາບ ແລະການພັດທະນາແບບຍືນຍົງ ຢູ່ແຕ່ລະພາກພື້ນ ກໍ່ຄືທົ່ວໂລກ.
ກ່ຽວກັບການຄ້າ-ການລົງທຶນ, ສອງຝ່າຍເຫັນດີສືບຕໍ່ຜັນຂະຫຍາຍກົນໄກຮ່ວມມືດ້ານເສດຖະກິດທີ່ມີຢູ່ແລ້ວ; ສົ່ງເສີມໃຫ້ບັນດາວິສາຫະກິດຂອງ ເຊັກ ຍູ້ແຮງການລົງທຶນ ຢູ່ ຫວຽດນາມ, ພິເສດແມ່ນບັນດາຂົງເຂດທີ່ ສ.ເຊັກ ມີທ່າແຮງຄື: ອຸດສາຫະກຳສໍາຮອງລົດໂອໂຕ, ພະລັງງານທົດແທນ, ການປະດິດສ້າງເຄື່ອງຈັກ, ຂຸດຄົ້ນ ແລະປຸງແຕ່ງແຮ່ທາດ, ເຄມີ, ປຸງແຕ່ງທັນຍາຫານ...; ສົມທົບກັນຜັນຂະຫຍາຍສັນຍາການຄ້າເສລີ ຫວຽດນາມ - ສະຫະພາບເອີລົບ (EVFTA) ຢ່າງມີປະສິດທິຜົນ.
|
|
 |
|
ທ່ານ ຟ້າມມິງຈິ໊ງ ນາຍົກລັດຖະມົນຕີຫວຽດນາມ ພົບປະສອງຝ່າຍກັບທ່ານ Petr Fiala ນາຍົກລັດຖະມົນຕີ ສ.ເຊັກ. ພາບ: ສໍານັກຂ່າວສານຫວຽດນາມ |
ສອງຝ່າຍຢັ້ງຢືນວ່າ ຈະສືບຕໍ່ສົມທົບກັນຢ່າງແໜ້ນແຟ້ນ ແລະສະໜັບສະໜູນ ເຊິ່ງກັນ ແລະກັນຢູ່ບັນດາເວທີປາໄສຫຼາຍຝ່າຍ ກໍ່ຄືບັນດາອົງການຈັດຕັ້ງສາກົນ, ປະກອບສ່ວນຮັບປະກັນສັນຕິພາບ, ຄວາມໝັ້ນຄົງ, ການຮ່ວມມື ແລະ ພັດທະນາຢູ່ພາກພື້ນ ແລະໃນໂລກ.
ເມື່ອແລກປ່ຽນກ່ຽວກັບບັນຫາພາກພື້ນ ແລະສາກົນທີ່ຕ່າງຝ່າຍຕ່າງມີຄວາມສົນໃຈ, ໃນນັ້ນມີບັນຫາທະເລຕາເວັນອອກ, ສອງຝ່າຍໄດ້ເຫັນດີເປັນເອກະພາບວ່າ ການຂັດແຍ້ງ, ການປະທະກັນໃນໂລກຄວນໄດ້ຮັບການແກ້ໄຂໂດຍສັນຕິວິທີ, ບົນພື້ນຖານຫຼັກການຂອງກົດບັດສະຫະປະຊາຊາດ ແລະກົດໝາຍສາກົນ. ພາຍຫຼັງການພົບປະ, ນາຍົກລັດຖະມົນຕີສອງທ່ານໄດ້ເປັນສັກຂີພິຍານພິທີແລກປ່ຽນເອກະສານຮ່ວມມືບາງສະບັບລະຫວ່າງສອງປະເທດໃນຂົງເຂດການສຶກສາ ແລະການບິນ.
ຍູ້ແຮງການເຊື່ອມຕໍ່ລະຫວ່າງວິສາຫະກິດຂອງສອງປະເທດ
ຕອນເຊົ້າວັນທີ 20 ມັງກອນ (ຕາມເວລາທ້ອງຖິ່ນ), ຢູ່ນະຄອນຫຼວງ Praha, ທ່ານ ຟ້າມມິງຈິ໊ງ ນາຍົກລັດຖະມົນຕີຫວຽດນາມ ໄດ້ເຂົ້າຮ່ວມເວທີປາໄສວິສາຫະກິດ ຫວຽດນາມ -ສ.ເຊັກ.
ທີ່ເວທີປາໄສ, ສອງຝ່າຍໄດ້ຢໍ້າຄືນສະພາບການຮ່ວມມືດ້ານເສດຖະກິດລະຫວ່າງ ຫວຽດນາມ ແລະ ສ.ເຊັກ, ໃນນັ້ນໃຫ້ຂໍ້ສັງເກດວ່າ ການພົວພັນດ້ານເສດຖະກິດ, ການຄ້າ ແລະການລົງທຶນລະຫວ່າງ ຫວຽດນາມ - ສ.ເຊັກ ຍັງບໍ່ທັນເໝາະສົມກັບການພົວພັນດ້ານການເມືອງ, ລະຫວ່າງສອງປະເທດ ກໍຄືບໍ່ສົມກັບຄວາມປາດຖະໜາ, ຄວາມສາມາດບົ່ມຊ້ອນ, ທ່າແຮງ, ກາລະໂອກາດທີ່ພົ້ນເດັ່ນ ແລະທ່າໄດ້ປຽບໃນການແກ່ງແຍ້ງຂອງແຕ່ລະປະເທດ.
ທ່ານ ຟ້າມມິງຈິ້ງ ຖືວ່າ, ຄວາມສາມາດບ່ົມຊ້ອນໃນການຮ່ວມມືພັດທະນາຂອງວິສາຫະກິດ ແລະ ນັກລົງທຶນຂອງສອງຝ່າຍແມ່ນຍັງໃຫຍ່ຫຼວງຢູ່; ທ່ານສະເໜີໃຫ້ວິສາຫະກິດສອງປະເທດຮ່ວມມື ແລະ ເຊື່ອມຕໍ່ເພື່ອສືບຕໍ່ຫັນຜະລິດຕະພັນ, ລະບົບຕ່ອງໂສ້ການຜະລິດ ແລະລະບົບຕ່ອງໂສ້ການສະໜອງ ເປັນຫຼາຍຮູບຫຼາຍແບບ, ພິເສດແມ່ນໃນຂະແໜງການທີ່ຫາກໍ່ພົ້ນເດັ່ນຂື້ນຄື: ຊິບເຄິ່ງຊັກນໍາໄຟຟ້າ, big data, ອິນເຕີແນັດສັບພະສິ່ງ, cloud computing, ຄວາມໝັ້ນຄົງທາງເຄືອຂ່າຍອິນເຕີແນັດ, ການແພດຊີວະວິທະຍາ, ແສງວິທະຍາ... ໝູນໃຊ້ສັນຍາ EVFTA ແລະກົນໄກຮ່ວມມືອື່ນໆຢ່າງສຸດຂີດ, ຍົກວົງເງິນການຄ້າສອງສົ້ນຂຶ້ນເປັນລະດັບ 5 ຕື້ USD ໂດຍໄວ ແລະ ຍົກເງິນລົງທຶນຂອງ ເຊັກ ຢູ່ ຫວຽດນາມ ຂຶ້ນເປັນໃນລະດັບ 2-3 ຕື້ USD ໃນໄລຍະຈະມາເຖິງ.
|
|
 |
|
ທ່ານ ຟ້າມມິງຈິ໊ງ ນາຍົກລັດຖະມົນຕີຫວຽດນາມ ເຂົ້າຮ່ວມເວທີປາໄສວິສາຫະກິດ ຫວຽດນາມ - ສ.ເຊັກ. ພາບ: ສໍານັກຂ່າວສານຫວຽດນາມ |
ທ່ານນາຍົກລັດຖະມົນຕີ ຫວັງວ່າ ໃນໄລຍະຈະມາເຖິງ, ຂົງເຂດລົງທຶນລະຫວ່າງສອງປະເທດ ຈະມີບາດກ້າວບຸກທະລຸຍຸດທະສາດ, ເປັນຕົ້ນແມ່ນຂົງເຂດສຳຄັນ ເຊິ່ງສອງຝ່າຍມີຄວາມສົນໃຈ ແລະໃຫ້ບຸລິມະສິດ ຄື: ອຸດສາຫະກຳລົດໂອໂຕ, ອຸດສາຫະກຳທີ່ມີລັກສະນະພື້ນຖານ, ຄົມມະນາຄົມຂົນສ່ົງ, ພະລັງງານ; ຫວັງວ່າ ວິສາຫະກິດສອງປະເທດຈະຍູ້ແຮງການເຊື່ອມຕໍ່ສອງພື້ນຖານເສດຖະກິດ, ການລົງທຶນ-ການຄ້າ, ປະກອບສ່ວນນໍາການພົວພັນລະຫວ່າງຫວຽດນາມ - ເຊັກ ໃຫ້ນັບມື້ນັບເຂົ້າສູ່ລວງເລິກ, ແທດຈິງ ແລະມີປະສິດທິຜົນ.
ພາຍຫຼັງເວທີປາໄສ, ທ່ານນາຍົກລັດຖະມົນຕີ ໄດ້ເປັນສັກຂີພິຍານພິທີລົງນາມໃນບັນດາຂໍ້ຕົກລົງການຮ່ວມມືກ່ຽວກັບການບໍາລຸງສ້າງ ແລະການສະແດງດົນຕີ; ຂໍ້ຕົກລົງການຮ່ວມມືຍຸດທະສາດລະຫວ່າງສະໂມສອນຕຳຫຼວດນະຄອນຮ່າໂນ້ຍ ແລະ ສະໂມສອນ ສະລາ ເວຍປຣາຮາ ກ່ຽວກັບການບໍາລຸງສ້າງນັກເຕະໜຸ່ມແໜ້ນ, ແລກປ່ຽນວິຊາສະເພາະດ້ານເຕັກນິກ ແລະຈັດຕັ້ງການແຂ່ງຂັນກິລາມິດຕະພາບສາກົນ.
ໂດຍ: ທູຈາງ