ຮັດແໜ້ນຄວາມສາມັກຄີລະຫວ່າງປະຊາຊົນສອງປະເທດຫວຽດນາມ-ລາວ
ກປ.ອອນໄລ - ຕອນບ່າຍວັນທີ 27 ທັນວາ, ທີ່ຮ່າໂນ້ຍ, ສູນກາງສະມາຄົມມິດຕະພາບຫວຽດນາມ-ລາວ ໄດ້ຈັດຕັ້ງງານພົບປະສັງສັນລະຫວ່າງບັນດາຜູ້ທີ່ເຄີຍເຄື່ອນໄຫວ, ຮັບໃຊ້ປະທານໄກສອນ ພົມວິຫານ, ປະທານ ສຸພານຸວົງ ກັບຄະນະສະມາຄົມມິດຕະພາບລາວ-ຫວຽດນາມ ແລະພະນັກງານຫໍພິພິທະພັນໄກສອນ ພົມວິຫານ, ຫໍພິພິທະພັນສຸພານຸວົງ ເນື່ອງໃນໂອກາດຄະນະມາຢ້ຽມຢາມ ແລະເຮັດວຽກຢູ່ ຫວຽດນາມ ໃນລະຫວ່າງວັນທີ 24-30 ທັນວາ 2018.
ທີ່ການພົບປະ, ບັນດານາຍທະຫານອາສາສະໝັກ ແລະນັກຊ່ຽວຊານຫວຽດນາມ ໄດ້ແບ່ງປັນບັນດາຂໍ້ມູນທີ່ມີປະໂຫຍດຫຼາຍຢ່າງກ່ຽວກັບບັນດາເຫດການສໍາຄັນໃນພາລະກິດການປະຕິວັດຂອງປະທານໄກສອນ ພົມວິຫານ ແລະປະທານ ສຸພານຸວົງ ພ້ອມກັບສາຍພົວພັນສາມັກຄີຮ່ວມສໍາພັນສູ້ຮົບລະຫວ່າງທະຫານ ແລະປະຊາຊົນສອງປະເທດຫວຽດນາມ-ລາວ.
|
|
ບັນຍາກາດທີ່ການພົບປະສັງສັນ. ພາບ: dangcongsan.vn. |
|
|
ຜູ້ແທນສອງປະເທດຫວຽດນາມ-ລາວ ທີ່ງານພົບປະສັງສັນ. ພາບ: dangcongsan.vn. |
ທ່ານ ທອງວັນ ທອງດີ, ຫົວໜ້າພະແນກໂຄສະນາ ແລະນໍາທ່ຽວຫໍພິພິທະພັນໄກສອນ ພົມວິຫານ, ໃຫ້ຮູ້ວ່າ: ນອກຈາກຢູ່ ຮ່າໂນ້ຍ ແລ້ວ, ຄະນະຜູ້ແທນລາວ ກໍ່ໄດ້ໄປຢ້ຽມຢາມ ແລະຊອກຮູ້ຢູ່ບັນດາສະຖານທີ່ເຊິ່ງປະທານ ໄກສອນ ພົມວິຫານ, ປະທານ ສຸພານຸວົງ ເຄີຍຮໍ່າຮຽນ ແລະເຄື່ອນໄຫວຢູ່ບັນດາແຂວງ, ນະຄອນ: ເຊີນລາ, ຮວ່າບິ່ງ, ໄທງວຽນ, ຕວຽນກວາງ ຕື່ມອີກ. ບັນດາການເຄື່ອນໄຫວນີ້ຊ່ວຍໃຫ້ບັນດາສະມາຊິກໃນຄະນະມີຄວາມເຂົ້າໃຈກ່ຽວກັບວິວັດການເຄື່ອນໄຫວ, ຮໍ່າຮຽນຂອງປະທານ ໄກສອນ ພົມວິຫານ, ປະທານ ສຸພານຸວົງ ຢູ່ປະເທດເພື່ອນມິດຫວຽດນາມ, ສາຍພົວພັນສະໜິດຕິດພັນລະຫວ່າງສອງປະເທດຫວຽດນາມ-ລາວ ຢ່າງເລິກເຊິ່ງກວ່າອີກ, ປະກອບສ່ວນເພີ່ມທະວີນໍ້າໃຈສາມັກຄີແບບພິເສດລະຫວ່າງສອງປະເທດ.
ໂດຍ: ທະນາພອນ