ງານບຸນ ຫວຽດນາມ 2024 ຢູ່ Osaka (ຍີ່ປຸ່ນ)
ກປ.ອອນໄລ - ສະຖານກົງສຸນໃຫຍ່ຫວຽດນາມ ປະຈໍາ Osaka (ຍີ່ປຸ່ນ) ໄດ້ສົມທົບກັບອຳນາດການປົກຄອງບັນດາແຂວງ, ສະມາຄົມຊາວຫວຽດນາມ ຢູ່ເຂດ Kansai ຈັດຕັ້ງ ງານບຸນຫວຽດນາມ 2024 ຢູ່ Osaka ເປັນເວລາ 2 ວັນ ແຕ່ວັນທີ 27 – 28 ເມສາ. ນີ້ແມ່ນຄັ້ງທີ 2 ທີ່ເຫດການນີ້ໄດ້ຈັດຕັ້ງຢູ່ແຂວງ Osaka, ພາຍຫຼັງຜົນສຳເລັດຂອງຄັ້ງທຳອິດໃນປີ 2023, ເນື່ອງໃນໂອກາດສະເຫຼີມສະຫຼອງ 50 ປີແຫ່ງວັນສ້າງຕັ້ງການພົວພັນທາງການທູດຫວຽດນາມ - ຍີ່ປຸ່ນ.
    |
 |
|
ບັນດາເຈົ້າໜ້າທີ່ຂອງສອງປະເທດຕັດແຖບຜ້າເປີດງານບຸນຫວຽດນາມ ຢູ່ ຍີ່ປຸ່ນ. ພາບ: ສໍານັກຂ່າວສານຫວຽດນາມ |
ກ່າວຄຳເຫັນຊົມເຊີຍເຫດການ, ທ່ານເອກອັກຄະລັດຖະທູດ ຟ້າມກວາງຫ້ຽວ ເນັ້ນໜັກວ່າ: ງານບຸນສະແດງໃຫ້ເຫັນຄຸນຄ່າວັດທະນະທຳຫວຽດນາມ ເຖິງເພື່ອນມິດຍີ່ປຸ່ນ ແລະສາກົນ, ຜ່ານນັ້ນໄດ້ເພີ່ມທະວີຄວາມເຂົ້າອົກເຂົ້າໃຈ, ຊຸກຍູ້ການພົວພັນລະຫວ່າງສອງຝ່າຍໃຫ້ສືບຕໍ່ພັດທະນາ. ເນື່ອງໃນໂອກາດນີ້, ທ່ານເອກອັກຄະລັດຖະທູດໄດ້ສະແດງຄວາມຂອບໃຈຕໍ່ການນຳອຳນາດການປົກຄອງບັນດາແຂວງ, ນະຄອນຢູ່ເຂດ Kansai ທີ່ຍາມໃດກໍ່ຮ່ວມເດີນທາງ ແລະໜູນຊ່ວຍປະຊາຄົມຊາວຫວຽດນາມ ໃນການດໍາລົງຊີວິດ ແລະການເຮັດວຽກ, ຊ່ວຍເຫຼືອເຂົາເຈົ້າໃຫ້ເຊື່ອມໂຍງເຂົ້າກັບປະຊາຊົນປະເທດປະຈໍາຖິ່ນເປັນຢ່າງດີ.
ສ່ວນທ່ານເອກອັກຄະລັດຖະທູດຮັບຜິດຊອບພາກພື້ນ Kansai Himeno ສະແດງຄວາມປິຕິຊົມຊື່ນເມື່ອໄດ້ເຫັນການພົວພັນລະຫວ່າງຫວຽດນາມ ກັບ ຍີ່ປຸ່ນ ເວົ້າລວມ ແລະເຂດ Kansai ເວົ້າສະເພາະພວມພັດທະນາຢ່າງຈົບງາມ, ພ້ອມທັງຫວັງວ່າ 2 ປະເທດຈະຮ່ວມແຮງຮ່ວມໃຈປະກອບສ່ວນສ້າງໂລກໃຫ້ມີຄວາມຜາສຸກ.
ງານບຸນຫວຽດນາມ ຢູ່ Osaka 2024 ດຳເນີນເປັນເວລາ 2 ວັນແຕ່ວັນທີ 27 – 28 ເມສາ, ໄດ້ດຶງດູດແຂກມາຢ້ຽມຢາມ ແລະລະຫຼິ້ນປະມານ 100.000 ຄົນ.
ໂດຍ: ໄຊນີດາ