ການຄ້າສອງປະເທດຫວຽດນາມ-ລາວ ດີຂຶ້ນຢ່າງບໍ່ຢຸດຢັ້ງ

ໃນຊຸມປີຜ່ານມາ, ການພົວພັນຮ່ວມມືດ້ານເສດຖະກິດ, ການຄ້າລະຫວ່າງຫວຽດນາມ ແລະລາວ ນັບມື້ນັບດີຂຶ້ນ ແລະເຕີບໂຕຢ່າງແຂງແຮງ. ດ້ວຍຄວາມສາມາດບົ່ມຊ້ອນພັດທະນາທີ່ມີຢູ່ແລ້ວ, ໃນຊຸມປີມໍ່ໆມານີ້, ລັດຖະບານຂອງສອງປະເທດຍາມໃດກໍ່ຕັ້ງເປົ້າໝາຍວົງເງິນການຄ້າຫວຽດນາມ - ລາວ ບໍ່ພຽງແຕ່ເພີ່ມຂຶ້ນແຕ່ 10% – 15%/ປີ ເທົ່ານັ້ນຫາກຍັງມຸ່ງໄປເຖິງການພັດທະນາຢ່າງໝັ້ນຄົງ ແລະຍືນຍົງອີກດ້ວຍ.

ຕາມກົມນຳເຂົ້າ-ສົ່ງອອກ - ກະຊວງອຸດສາຫະກຳ ແລະການຄ້າແລ້ວ, ຫວຽດນາມ ແລະລາວ ມີພູມສັນຖານທີ່ໃກ້ຄຽງກັນ, ມີທ່າໄດ້ປຽບໃນການຄົມມະນາຄົມທີ່ສະດວກ, ກໍ່ຄືການໃກ້ຊິດຕິດແທດທາງດ້ານວັດທະນະທຳ ແລະການບໍລິໂພກ. ສອງປະເທດມີເສັ້ນຊາຍແດນຮ່ວມກັນຍາວກວ່າ 2.300 ກິໂລແມັດ, ໄປຜ່ານ 10 ແຂວງ, ນະຄອນຂອງແຕ່ລະຝ່າຍ, ນີ້ແມ່ນເຂດທີ່ມີທ່າແຮງພັດທະນາ ແລະເປັນທີ່ຕັ້ງຍຸດທະສາດຕາມແລວເສດຖະກິດຕາເວັນອອກ-ຕາເວັນຕົກ. ທົ່ວເສັ້ນຊາຍແດນຫວຽດນາມ-ລາວມີດ່ານຊາຍແດນສາກົນ 9 ດ່ານ, ດ່ານຊາຍແດນທ້ອງຖິ່ນ 6 ດ່ານ, ດ່ານຊາຍແດນປະເພນີ 18 ດ່ານ, ທາງຮ່ອມ, ທາງນ້ອຍ 27 ທາງ  ແລະໄດ້ສ້າງຕັ້ງເຂດເສດຖະກິດດ່ານຊາຍແດນ 9 ແຫ່ງ...

leftcenterrightdel
ດ່ານສາກົນ ລາວບາວ ເຊື່ອມຕໍ່ການຄ້າສອງປະເທດຫວຽດນາມ - ລາວ. ພາບ: ສໍານັກຂ່າວສານຫວຽດນາມ

ຕົວເລກສະຖິຕິຂອງກົມພາສີຫວຽດນາມ ໃຫ້ຮູ້ວ່າ: ໃນ 9 ເດືອນຕົ້ນປີ 2024, ຍອດວົງເງິນການຄ້ານໍາເຂົ້າ-ສົ່ງອອກຂອງຫວຽດນາມ ບັນລຸ 1,5 ຕື້ໂດລາສະຫະລັດ, ເພີ່ມຂຶ້ນ 25,5% ເມື່ອທຽບໃສ່ໄລຍະດຽວກັນຂອງປີ 2023. ລາວ ສືບຕໍ່ຮັກສາທ່າວົງເງິນການຄ້າເກີນດຸນກັບຫວຽດນາມ. ການສົ່ງອອກໄປລາວ ບັນລຸ 491,9 ລ້ານໂດລາສະຫະລັດ, ເພີ່ມຂຶ້ນ 24% ເມື່ອທຽບໃສ່ໄລຍະດຽວກັນໃນປີ 2023; ການນໍາເຂົ້າຈາກລາວ ບັນລຸ 1 ຕື້ໂດລາສະຫະລັດ, ເພີ່ມຂຶ້ນ 26,2% ເມື່ອທຽບໃສ່ໄລຍະດຽວກັນຂອງປີ 2023. ນີ້ກໍ່ແມ່ນລະດັບການເຕີບໂຕທີ່ດີຫຼາຍໃນສະພາບການທີ່ພື້ນຖານເສດຖະກິດຂອງລາວ ຍັງປະສົບກັບຄວາມຫຍຸ້ງຍາກຫຼາຍດ້ານ.

ສິນຄ້ານໍາເຂົ້າຈາກລາວ ຕົ້ນຕໍແມ່ນ ຢາງພາລາ, ໄມ້ ແລະຜະລິດຕະພັນໄມ້, ບໍ່ແຮ່ ແລະແຮ່ທາດ. ໃນທິດກົງກັນຂ້າມ, ຜະລິດຕະພັນສິນຄ້າສົ່ງອອກຕົ້ນຕໍໄປຍັງລາວ ລວມມີຜະລິດຕະພັນເຫຼັກກ້າ, ພາຫະນະ ແລະເຄື່ອງອາໄຫຼ່, ເຄື່ອງຈັກ, ອຸປະກອນ, ເຄື່ອງມື...

ເຖິງຢ່າງໃດກໍໍ່ຕາມ, ປະຈຸບັນ, ວົງເງິນການຄ້າສອງປະເທດຫວຽດນາມ - ລາວ ບັນລຸຂະໜາດ 1,65 ຕື້ໂດລາສະຫະລັດ, ເທົ່າແຕ່ 10% ຂອງຍອດວົງເງິນການຄ້າຕ່າງປະເທດຂອງລາວ ແລະ 0,2% ຂອງວົງເງິນການຄ້າຕ່າງປະເທດຂອງຫວຽດນາມ ເທົ່ານັ້ນ. ຕາມກະຊວງອຸດສາຫະກຳ ແລະການຄ້າແລ້ວ, ໝາກຜົນນີ້ບໍ່ສົມກັບຄວາມສາມາດບົ່ມຊ້ອນ ແລະການພົວພັນແບບພິເສດລະຫວ່າງຫວຽດນາມ ແລະລາວ.

ສະນັ້ນ, ເພື່ອສືບຕໍ່ຊຸກຍູ້ການຮ່ວມມືດ້ານການຄ້າ, ເສດຖະກິດລະຫວ່າງສອງປະເທດ, ລັດຖະບານຫວຽດນາມ - ລາວ ໄດ້ມອບໝາຍໃຫ້ກະຊວງອຸດສາຫະກຳ ແລະການຄ້າຂອງສອງປະເທດເຈລະຈາ, ປັບປຸງ ແລະເພີ່ມເຕີມ ເພື່ອສ້າງສັນຍາການຄ້າຫວຽດນາມ - ລາວ ສະບັບໃໝ່ທີ່ເໝາະສົມກັບສະພາບການໃນປັດຈຸບັນ. ພາຍຫຼັງດຳເນີນການເຈລະຈາເປັນເວລາ 3 ປີ, ສັນຍາການຄ້າຫວຽດນາມ - ລາວ ສະບັບໃໝ່ໄດ້ຮັບການລົງນາມໂດຍລັດຖະມົນຕີກະຊວງອຸດສາຫະກຳ ແລະການຄ້າ 2 ປະເທດໃນນາມລັດຖະບານສອງປະເທດໃນວັນທີ 8 ເມສາ 2024. ສັນຍາດັ່ງກ່າວກວມເອົາບັນດາບັນຫາສຳຄັນໃນການຮ່ວມມືດ້ານການຄ້າລະຫວ່າງສອງປະເທດ, ລວມມີ: ລະບຽບການກ່ຽວກັບການເຂົ້າເຖິງຕະຫຼາດຂອງສິນຄ້າ ແລະການບໍລິການ; ສ້າງເງື່ອນໄຂສະດວກທາງດ້ານການຄ້າ; ...

ເພີ່ມທະວີການຄ້າຊາຍແດນ, ຍູ້ແຮງການຄ້າສອງຝ່າຍ

ເພື່ອແນໃສ່ເພີ່ມທະວີການຄ້າຫວຽດນາມ - ລາວ, ພິເສດແມ່ນການຄ້າຊາຍແດນ, ກະຊວງອຸດສາຫະກຳ ແລະການຄ້າຫວຽດນາມ ຊີ້ແຈ້ງວ່າ: ໃນໄລຍະຈະມາເຖິງ, ບັນດາຫົວໜ່ວຍຕ້ອງສຸມໃສ່ປະຕິບັດການໂຄສະນາ, ເຜີຍແຜ່ ແລະປະຕິບັດບັນດາສົນທິສັນຍາສາກົນ ແລະບັນດາເອກະສານນິຕິກຳທີ່ກ່ຽວຂ້ອງສະບັບຕ່າງໆ, ພິເສດແມ່ນບັນດາເອກະສານສະບັບໃໝ່ທີ່ໄດ້ ປະກາດໃຊ້.

ເພື່ອຊຸກຍູ້ການຄ້າຊາຍແດນລະຫວ່າງສອງປະເທດ, ທ່ານ ບຸ່ຍແທງເຊີນ ຮອງນາຍົກລັດຖະມົນຕີ ຫາກໍ່ໄດ້ລົງນາມຂໍ້ຕົກລົງເລກທີ 1247/QD-TTg ລົງວັນທີ 23 ຕຸລາ 2024 ປະກາດໃຊ້ແຜນການປະຕິບັດບົດບັນທຶກຊ່ວຍຈໍາວ່າດ້ວຍການພັດທະນາ ແລະເຊື່ອມຕໍ່ພື້ນຖານໂຄງລ່າງດ້ານການຄ້າຊາຍແດນລະຫວ່າງລັດຖະບານແຫ່ງ ສາທາລະນະລັດ ສັງຄົມນິຍົມ ຫວຽດນາມ ແລະລັດຖະບານ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ (ແຜນການ).

ເປົ້າໝາຍຂອງແຜນການ ແມ່ນເພື່ອຜັນຂະຫຍາຍບົດບັນທຶກຊ່ວຍຈໍາວ່າດ້ວຍການພັດທະນາ ແລະເຊື່ອມຕໍ່ພື້ນຖານໂຄງລ່າງດ້ານການຄ້າຊາຍແດນລະຫວ່າງລັດຖະບານແຫ່ງ ສາທາລະນະລັດ ສັງຄົມນິຍົມ ຫວຽດນາມ ແລະລັດຖະບານ ແຫ່ງສາທາລະນະລັດ ປະຊາທິປະໄຕ ປະຊາຊົນລາວ (ບົດບັນທຶກຊ່ວຍຈໍາ).

ພ້ອມກັນນັ້ນ, ກໍ່ສ້າງຄວາມສະດວກໃນວຽກງານສົມທົບກັນລະຫວ່າງບັນດາກະຊວງ, ຂະແໜງການ, ທ້ອງຖິ່ນຊາຍແດນຫວຽດນາມ ແລະລະຫວ່າງບັນດາອົງການທີ່ມີສິດອໍານາດຂອງຫວຽດນາມ ກັບບັນດາອົງການທີ່ມີສິດອໍານາດຂອງລາວ ໃນການຜັນຂະຫຍາຍປະຕິບັດບົດບັນທຶກຊ່ວຍຈຳຜ່ານອົງການທີ່ເປັນຂົວເຊື່ອມຕໍ່ຂອງສອງປະເທດ.

ປະກອບສ່ວນຊຸກຍູ້ການພັດທະນາພື້ນຖານໂຄງລ່າງການຄ້າຊາຍແດນລະຫວ່າງສອງປະເທດ. ເປັນພື້ນຖານໃຫ້ບັນດາແຂວງຊາຍແດນຫວຽດນາມ ສ້າງແຜນການພັດທະນາພື້ນຖານໂຄງລ່າງການຄ້າຊາຍແດນຢູ່ບັນດາທ້ອງຖິ່ນໃນບໍລິເວນແຂວງຊາຍແດນ.

ແຜນການດັ່ງກ່າວຊີ້ແຈ້ງວ່າ ການຈັດຕັ້ງໂຄສະນາເຜີຍແຜ່ບັນດາເນື້ອໃນບົດບັນທຶກຊ່ວຍຈຳ ແລະລະບຽບກົດໝາຍທີ່ກ່ຽວຂ້ອງຂອງຫວຽດນາມ - ລາວ ໃຫ້ແກ່ບັນດາສ່ວນບຸກຄົນ, ອົງການຈັດຕັ້ງ ແລະນັກທຸລະກິດຫວຽດນາມ - ລາວ ໃນພາຫະນະສື່ມວນຊົນ, ສື່ສິ່ງພິມ, ເວັບໄຊທີ່ກ່ຽວຂ້ອງເຖິງການພັດທະນາພື້ນຖານໂຄງລ່າງການຄ້າຊາຍແດນ; ກອງປະຊຸມ, ກອງປະຊຸມສໍາມະນາ, ການໂອ້ລົມສົນທະນາ,... ກ່ຽວຂ້ອງກັບເນື້ອໃນຂອງບົດບັນທຶກຊ່ວຍຈໍາ.

ຄຽງຄູ່ກັນນັ້ນ, ຄົ້ນຄວ້າສະເໜີບັນດານະໂຍບາຍພັດທະນາພື້ນຖານໂຄງລ່າງການຄ້າຊາຍແດນໃຫ້ສອດຄ່ອງກັບຄວາມສາມາດບົ່ມຊ້ອນຂອງບັນດາແຂວງຊາຍແດນ ຫວຽດນາມ - ລາວ; ໜູນຊ່ວຍນັກທຸລະກິດນຳສິນຄ້າເຂົ້າສູ່ລະບົບຈຳໜ່າຍພາຍໃຕ້ຮູບແບບການຄ້າຊາຍແດນ. ຍູ້ແຮງການພັດທະນາພື້ນຖານໂຄງລ່າງການຄ້າຊາຍແດນຫຼາຍປະເພດຢູ່ບັນດາແຂວງຊາຍແດນຫວຽດນາມ - ລາວ.

ກວດກາຄືນບັນດາປະເພດພື້ນຖານໂຄງລ່າງດ້ານການຄ້າຊາຍແດນທີ່ຕ້ອງໄດ້ຮັບການຍົກລະດັບ, ບູລະນະ ແລະລາຍການພື້ນຖານໂຄງລ່າງການຄ້າຊາຍແດນທີ່ໃຫ້ບຸລິມະສິດການລົງທຶນກໍ່ສ້າງ.

ແຜນການດັ່ງກ່າວ ກໍ່ຊີ້ໃຫ້ເຫັນວ່າ, 2 ຝ່າຍຈະສືບຕໍ່ແລກປ່ຽນ, ເຫັນດີເພີ່ມທະວີການເຄື່ອນໄຫວຈັດຕັ້ງ ແລະສົ່ງເສີມການລົງທຶນກໍ່ສ້າງພື້ນຖານໂຄງລ່າງການຄ້າຊາຍແດນຢູ່ເຂດຊາຍແດນສອງປະເທດຫວຽດນາມ - ລາວ ຢ່າງໜ້ອຍ 1 ຄັ້ງ ຕໍ່ 1 ປີ.

ຜັນຂະຫຍາຍສົ່ງເສີມການເຄື່ອນໄຫວຂອງນັກທຸລະກິດຫວຽດນາມ ແລະ ລາວ ເຂົ້າຮ່ວມລົງທຶນກໍ່ສ້າງພື້ນຖານໂຄງລ່າງການຄ້າຊາຍແດນຕາມລະບຽບການໃນປະຈຸບັນ.

ສ້າງກົນໄກເຊື່ອມຕໍ່ຂໍ້ມູນຂ່າວສານລະຫວ່າງນັກທຸລະກິດກັບປະຊາຊົນຢູ່ເຂດຊາຍແດນທີ່ເຄື່ອນໄຫວຢູ່ເຂດຊາຍແດນ; ເຊື່ອມຕໍ່ນັກທຸລະກິດຫວຽດນາມ ກັບທຸລະກິດລາວ.

ເພີ່ມທະວີການແລກປ່ຽນຂໍ້ມູນຂ່າວສານ, ບຳລຸງສ້າງ ແລະພັດທະນາແຫຼ່ງຊັບພະຍາກອນມະນຸດໃຫ້ບັນດາອົງການຄຸ້ມຄອງລັດ; ພັດທະນາຖັນແຖວ ນັກທຸລະກິດໃຫ້ລົງທຶນ ແລະດຳເນີນທຸລະກິດຢູ່ເຂດຊາຍແດນ; ກະຊວງອຸດ ສາຫະກຳ ແລະການຄ້າຫວຽດນາມ ກັບກະຊວງອຸດສາຫະກຳ ແລະການຄ້າລາວ ເປັນອົງການເຊື່ອມຕໍ່ຂອງ 2 ຝ່າຍສົມທົບກັບບັນດາກະຊວງ, ຂະແໜງການ ແລະບັນດາແຂວງຊາຍແດນຂອງ 2 ຝ່າຍປະຕິບັດບົດບັນທຶກຊ່ວຍຈໍາ.

ໂດຍ: ທະນາພອນ