ໄປກ່ອນກັບມາຊ້າ
ແນ່ນອນວ່າ ເປັນທະຫານແລ້ວ, ໂດຍສະເພາະແມ່ນທະຫານຕີພິເສດ ເມື່ອມີຄໍາສັ່ງແມ່ນຕ້ອງເດີນທາງ, ບໍ່ວ່າກາງເວັນ ຫຼື ກາງຄືນ, ເງື່ອນໄຂສະພາບດິນຟ້າອາກາດຄືແນວໃດ. ແຕ່ສໍາລັບໜ້າທີ່ຄັ້ງນີ້, ນອກຈາກຮັບປະກັນກ່ຽວກັບເວລາ ແລະລັກສະນະເປັນເຈົ້າການແລ້ວນັ້ນເລື່ອງ “ໄປກ່ອນກັບມາຊ້າ” ຍັງມີຈຸດປະສົງສໍາຄັນອື່ນອີກ...
ຕອນບ່າຍວັນທີ 16 ທັນວາ, ພາຍຫຼັງສິ້ນສຸດການຝຶກຊ້ອມຢູ່ສະໜາມບິນຢາເລິມ, ກໍາລັງເຂົ້າຮ່ວມການສະແດງຂອງເຫຼົ່າຮົບຕີພິເສດໄດ້ເກັບມ້ຽນພາຫະນະວັດຖຸຢ່າງວ່ອງໄວ ເພື່ອເຄື່ອນທັບກັບຄືນໂຮງຮຽນນາຍທະຫານຕີພິເສດ. ເວລາ 17 ໂມງ 15 ນາທີ, ຂະບວນລົດອອກ. ຮອດສີ່ແຍກໜອງໄຊ່ດົ່ງ (ລະຫວ່າງທາງຫຼວງເລກ 5 ແລະທາງເຂົ້າສະໜາມບິນຢາເລິມ), ຂະນະລໍຖ້າສັນຍານໄຟສີແດງ, ທ່ານພັນເອກ ຟານຢຸຍເໝິດ ຮອງຫົວໜ້າຫ້ອງອົບຮົມ-ໂຮງຮຽນ, ກົມເສນາທິການ, ເຫຼົ່າຮົບຕີພິເສດ ພ້ອມກັບບາງສະຫາຍລົງລົດແຈ້ງໃຫ້ຊາບ ແລະແນະນໍາໃຫ້ປະຊາຊົນບຸລິມະສິດເພື່ອໃຫ້ຂະບວນລົດໄປຜ່ານ. ຕ້ອງເສຍເວລາ 10 ກວ່ານາທີ, ຂະບວນລົດ ຈຶ່ງໄປຜ່ານເຂດນີ້ໄດ້.
ທ່ານພັນເອກ ຟານຢຸຍເໝິດ ໃຫ້ຮູ້ວ່າ “ເຖິງວ່າ ທ້ອງຟ້າມືດແລ້ວ ແລະຕ້ອງລໍ່ຖ້າເວລາດົນສົມຄວນ ແຕ່ພໍ່ແມ່ປະຊາຊົນຍັງເຫັນດີ, ບຸລິມະສິດໃຫ້ຂະ ບວນລົດໄປຜ່ານ”. ທ່ານພັນໂທ ໂຮ່ຊຸງ ຮອງຫົວໜ້າຫ້ອງໂຄສະນາອົບຮົມ, ພະແນກການເມືອງ, ເຫຼົ່າຮົບຕີພິເສດ ໃຫ້ຮູ້ຕື່ມອີກວ່າ “ເຫຼົ່າຮົບມີພະນັກງານ, ນັກຮົບກວ່າ 2.200 ຄົນຮັບໃຊ້ການສະແດງທີ່ງານວາງສະແດງປ້ອງກັນຊາດສາກົນຫວຽດນາມ 2024, ແມ່ນຈຳນວນຫຼາຍທີ່ສຸດໃນບັນດາກໍາລັງເຂົ້າຮ່ວມ. ເມື່ອເຄື່ອນຍ້າຍກໍາລັງ, ວັດຖຸຈາກໂຮງຮຽນນາຍທະຫານຕີພິເສດເຖິງສະໜາມບິນຢາເລິມ ຕ້ອງມີລົດໂອໂຕ 54 ຄັນ ທີ່ແກ່ຍາວປະມານ 4-5 ກິໂລແມັດ. ເພາະສະນັ້ນ, ເມື່ອຝຶກຊ້ອມຮ່ວມໃນຕອນເຊົ້າ, ຂະບວນລົດ ຕ້ອງອອກຈາກໂຮງຮຽນ ແຕ່ເວລາ 3 ໂມງ ຫຼື 3 ໂມງ 30 ນາທີ ເພື່ອຫຼຸດຜ່ອນການສົ່ງຜົນສະທ້ອນ ເຖິງການຈະລາຈອນ ແລະຊີວິດຂອງປະຊາຊົນ”. ກໍຍ້ອນຂະບວນລົດຫຼາຍຄັນ ສະນັ້ນໄລຍະທາງພຽງ 50 ກິໂລແມັດ ແຕ່ການເຄື່ອນຍ້າຍພັດເສຍເວລາດົນສວມຄວນ.
    |
 |
|
ຄາບເຂົ້າຂອງພະນັກງານ, ນັກຮົບເຫຼົ່າຮົບຕີພິເສດ ກ່ອນທີ່ການຝຶກຊ້ອມຮ່ວມໃນຕອນເຊົ້າວັນທີ 17 ທັນວາ 2024. ພາບ: qdnd.vn |
ໃນຕະຫຼອດໄລຍະເດີນທາງ, ແອັບ Google Maps ໃນໂທລະສັບມືຖືໄດ້ເປີດຢູ່ສະເໝີ ເພື່ອຕິດຕາມສະພາບການຈະລາຈອນໃນເສັ້ນທາງສາຍຕ່າງໆ, ຊ່ວຍໃຫ້ໂຊເຟີລົດນໍາທາງດັດປັບຄວາມໄວໃຫ້ເໝາະສົມ ແລະລົດເບື້ອງຫຼັງແລ່ນທັນຕາມຂະບວນລົດ... ເລີ່ມອອກຈາກສະໜາມບິນຢາເລິມ ເວລາ 17 ໂມງ 15 ນາທີ, ຂະບວນລົດມາຮອດໂຮງຮຽນນາຍທະຫານຕີພິເສດ ໃນເວລາ 20 ໂມງ 17 ນາທີ. ຫຼັງຈາກນັ້ນ, ຜູ້ບັນຊາບັນດາກົມກອງ ຮີບຮ້ອນກວດກາຈໍານວນພົນ ແລະວັດຖຸ, ຈັດຕັ້ງໃຫ້ທະຫານກິນເຂົ້າ, ພັກຜ່ອນ, ເຮັດວຽກງານກະກຽມ ເພື່ອໃຫ້ຮຸ່ງເຊົ້າມື້ຕໍ່ໄປສືບຕໍ່ເຄື່ອນທັບເຂົ້າຮ່ວມການຝຶກຊ້ອມຮ່ວມ.
3 ໂມງຂອງວັນທີ 17 ທັນວາ, ສຽງແກດັ່ງຂຶ້ນ. 3 ໂມງ 15 ນາທີ, ກໍາລັງເຂົ້າຮ່ວມການສະແດງ ໄດ້ມີໜ້າຢູ່ເດີ່ນເຄົາລົບທຸງຊາດ ເຂດ B, ໂຮງຮຽນນາຍທະຫານຕີພິເສດ, ນໍາເອົາບາໂລ, ອາຫານ, ລຽນແຖວລໍ່ຖ້າຂຶ້ນລົດ. 3 ໂມງ 30 ນາທີ, ພາຍຫຼັງຮັບຟັງການນໍາບັນດາກົມກອງ ລາຍງານສະພາບການ, ຈໍານວນພົນ, ທ່ານພັນເອກ ຟານຢຸຍເໝິດ ຂໍຄໍາເຫັນຈາກຂັ້ນເທິງ ແລະອອກສົ່ງຄໍາສັ່ງເດີນທາງ. ການຈະລາຈອນໃນຕອນເຊົ້າສະດວກດີສະນັ້ນຂະບວນລົດເຄື່ອນຍ້າຍສະດວກ ແລະເສຍເວລາພຽງ 5 ຊົ່ວໂມງກວ່າໄດ້ໄປເຖິງສະໜາມບິນຢາເລິມ. ພະນັກງານ, ນັກຮົບແຕ່ລະກຸ່ມສັບຊ້ອນບ່ອນນັ່ງຢ່າງຮຽບຮ້ອຍ, ແລ້ວກິນເຂົ້າເຊົ້າ...
ເລື່ອງເຮືອນຄົວ
21 ໂມງ 50 ນາທີຂອງວັນທີ 16 ທັນວາ, ໜ່ວຍງານອ້າຍລ້ຽງຂອງກອງພັນທີ 3, ໂຮງຮຽນນາຍທະຫານຕີພິເສດຍັງເກັບມ້ຽນ, ລ້າງອຸປະກອນແຕ່ງກິນ, ເຮືອນຄົວ. ທ່ານພັນຕີ ຫງວຽນບ໊າເລືອງ ຜູ້ແຕ່ງກິນຂອງກອງພັນທີ 3 ພວມຂົ້ວຊີ້ນຟັກກັບພິກໄທເພື່ອກະກຽມໃຫ້ແກ່ຄາບເຊົ້າມື້ຕໍ່ໄປ. ຕາມອ້າຍ ເລືອງ, ເພື່ອຮັບປະກັນໃຫ້ບັນດາຄາບເຂົ້າໃນວັນຖືກຕາມອັດຕາ, ມາດຕະຖານ, ມີຄຸນນະພາບ, ອາຫານມີຫຼາຍເຍື່ອງນັ້ນ, ແມ່ນຕ້ອງຈັດເມນູລະອຽດກ່ອນນີ້ໜຶ່ງອາທິດ, ຊ່ວຍໃຫ້ການກະກຽມ ແລະເປັນເຈົ້າການໃນການຮັກສາອາຫານ. ສົມມຸດຄື ຊີ້ນຂົ້ວພິກໄທ, ເຮືອນຄົວຮັບຊີ້ນແຕ່ເຊົ້າ ແລະຮັກສາໃນຕູ້ເຢັນ. ທ່ານພັນຕີ ຫງວຽນບ໊າເລືອງ ແບ່ງປັນວ່າ “ວັນປົກກະຕິ, ໜ່ວຍງານອ້າຍລ້ຽງ ຕື່ນແຕ່ 2 ໂມງ 45 ນາທີ ເພື່ອແຕ່ງອາຫານເຊົ້າ. ໃນຊຸມວັນທີ່ກົມກອງເຄື່ອນທັບແຕ່ຮຸ່ງເຊົ້າ, ພວກຂ້າພະເຈົ້າ ຕ້ອງກະກຽມແຕ່ຄໍ່າມື້ກ່ອນເພື່ອຮອດເວລາ 3 ໂມງເຊົ້າມີອາຫານເພື່ອໃຫ້ທະຫານເອົາໄປນໍາ. ເຖິງວ່າ ເມື່ອຍຫຼາຍແຕ່ພວກຂ້າພະເຈົ້າ ຍາມໃດກໍກໍານົດຢ່າງຈະແຈ້ງຄວາມຮັບຜິດຊອບ ແລະພະຍາຍາມປະຕິບັດສໍາເລັດໜ້າທີ່ ທີ່ໂຮງຮຽນ ມອບໝາຍໃຫ້”.
23 ໂມງ 10 ນາທີ, ໜ່ວຍງານອ້າຍລ້ຽງຂອງກອງພັນທີ 3 ເລີ່ມແບ່ງອາຫານ. ເຂົ້າໄດ້ແບ່ງ ແລະໃສ່ໃນກ່ອງໂຟ່ງນັບຮ້ອຍກ່ອງພ້ອມກັບ, ຖົ່ວດິນຂົ້ວເກືອ, ຊີ້ນຂົ້ວພິກໄທ... ນອກນັ້ນ, ແຕ່ລະພູດຍັງມີໄຂ່ຕົ້ມໜ່ວຍໜຶ່ງ ແລະນົມກ່ອງໜຶ່ງ 180ml ຕື່ມອີກ. ວຽກງານແບ່ງອາຫານສຳເລັດ ກໍຮອດເວລາ 1 ໂມງເຊົ້າຂອງມື້ຕໍ່ມາ.
ຕາມທ່ານພັນໂທ ໂຮ່ຊຸງ, ອີງຕາມຄວາມປາດຖະໜາຂອງທະຫານທາງເຮືອນຄົວຈະແຕ່ງກິນ ຫຼື ຊື້ເຂົ້າໜຽວ. ອາຫານເຊົ້າແມ່ນຄືແນວນັ້ນ, ການຮັບປະກັນອາຫານທ່ຽງໃຫ້ແກ່ພະນັກງານ, ນັກຮົບ 2.200 ຄົນ ກໍສັບສົນບໍ່ໜ້ອຍ ດ້ວຍ 2 ແຜນການ: ທີ 1 ແມ່ນຈັດຕັ້ງການແຕ່ງກິນ ແລະແບ່ງອາຫານຢູ່ກອງພົນນ້ອຍຕີພິເສດ 1 ແລ້ວ ສົ່ງເຖິງສະໜາມບິນຢາເລິມ ຮັບໃຊ້ທະຫານ. ທີ 2 ແມ່ນພົວພັນກັບກອງພົນນ້ອຍ 918 (ເຫຼົ່າທັບປ້ອງກັນອາກາດ - ທະຫານອາກາດ) ແຕ່ງກິນໂດຍກົງ, ຮັບໃຊ້ສ່ວນໜຶ່ງຂອງກອງພົນນ້ອຍຕີພິເສດ 113, ສ່ວນທີ່ຍັງເຫຼືອແມ່ນຕາມແຜນການທີ 1.
ຜ່ານເລື່ອງລາວເລັກໆໜ້ອຍໆຢູ່ເບື້ອງຫຼັງການສະແດງຂອງທະຫານຕີພິເສດ ໃຫ້ເຫັນວ່າ, ໃນສະພາບການໃດ, ພະນັກງານ, ນັກຮົບ ກໍເຊີດຊູເຈດຈໍານົງຕັດສິນໃຈຜ່ານຜ່າຄວາມຫຍຸ້ງຍາກ, ປະຕິບັດສໍາເລັດໜ້າທີ່ທີ່ໄດ້ຮັບມອບໝາຍ; ກອງທັບຍາມໃດກໍເບິ່ງແຍງດູແລໃຫ້ປະຊາຊົນ ແລະເພື່ອປະຊາຊົນ...
ໂດຍ: ໄຊຊະນະ