ການປະສານສົມທົບຢ່າງໜັກແໜ້ນ ແລະມີປະສິດທິຜົນ
ສະຫາຍ ເຈິ່ນຟ້າມຫວູຢຸຍ, ຫົວໜ້າໝວດທະຫານລາດປະຈໍາເຂດອຸດສາຫະກໍາ ໝີເຝຶອກ (ນະຄອນ ເບັ້ນກາດ, ແຂວງບິ່ງເຢືອງ) ໃຫ້ຮູ້ວ່າ “ໝວດທະຫານລາດ ໄດ້ເຄື່ອນໄຫວພາຍໃຕ້ການນໍາພາ, ບັນຊາໂດຍກົງຂອງຄະນະພັກ, ກອງບັນຊາການທະຫານນະຄອນເບັ້ນກາດ ແລະຕາມລະບຽບການສົມທົບກັບກໍາລັງປະຕິບັດໜ້າທີ່ປ້ອງກັນຄວາມໝັ້ນຄົງດ້ານການເມືອງ, ຄວາມເປັນລະບຽບຮຽບຮ້ອຍ, ຄວາມປອດໄພໃນສັງຄົມ, ໜ້າທີ່ການປ້ອງກັນຊາດ. ໃນປີ 2024, ທາງກົມກອງ ໄດ້ເປັນເຈົ້າການສົມທົບກັນຄົ້ນພົບ, ແກ້ໄຂບາງກໍລະນີລັກຊັບສິນ, ການຂັດແຍ້ງດ້ານພົນລະເຮືອນ”.
    |
 |
|
ການນໍາກົມໃຫຍ່ເສນາທິການກອງທັບປະຊາຊົນຫວຽດນາມ ລົງຢ້ຽມຢາມ, ກວດກາສໍານັກງານຮູບແບບທະຫານລາດປະຈໍາ ຢູ່ແຂວງບິ່ງເຢືອງ ໃນເດືອນມິຖຸນາ ປີ 2023. ພາບ: qdnd.vn |
ອ້າຍ ຫງວຽນວັນລົກ, ຫົວໜ້າໜ່ວຍປ້ອງກັນຕົວເຂດອຸດສາຫະກໍາ ໝີເຝຶອກ ແບ່ງປັນວ່າ “ແຕ່ກ່ອນ, ເຂດອຸດສາຫະກໍາ ມີແຕ່ກໍາລັງປ້ອງກັນລາດຕະເວນ, ບໍ່ມີຄວາມສາມາດພຽງພໍທີ່ຈະຄົ້ນພົບ, ແກ້ໄຂບັນດາກໍລະນີທີ່ສັບສົນຢ່າງທັນການ. ນັບແຕ່ມີກໍາລັງທະຫານລາດປະຈໍາ ສົມທົບກັນລາດຕະເວນ, ພວກຂ້າພະເຈົ້າ ເຮັດໜ້າທີ່ດ້ວຍຄວາມໝັ້ນໃຈຕົນເອງ, ພ້ອມແລ້ວທີ່ຈະສະກັດກັ້ນ, ປາບປາມ, ແກ້ໄຂກໍລະນີຂາດຄວາມບໍ່ສະຫງົບ, ຄວາມບໍ່ເປັນລະບຽບຮຽບຮ້ອຍຢ່າງວ່ອງໄວ”.
ໃນໄລຍະຜ່ານມາ, ບັນດາໝວດທະຫານລາດປະຈໍາເຂດອຸດສາຫະກໍາຢູ່ບິ່ງເຢືອງ ໄດ້ເສີມຂະຫຍາຍພາລະບົດບາດ, ໜ້າທີ່ເປັນຢ່າງດີ; ຈັດຕັ້ງການລາດຕະເວນ, ຄວບຄຸມເສັ້ນທາງເຂດອຸດສາຫະກໍາສາຍຕ່າງໆ, ທາງອ້ອມຮອບ, ປະຕູໂຂງຂອງບັນດາວິສາຫະກິດ, ເຂດອ້ອມຂ້າງ, ເຂດຕິດຕໍ່ກັນເປັນປະຈໍາ... ສະກັດກັ້ນ, ປາບປາມບັນດາເປົ້າໝາຍປຸ້ນຊິງຊັບ, ກໍ່ຄວາມບໍ່ສະຫງົບຢ່າງທັນການ. ບັນດາໝວດທະຫານລາດປະຈໍາເຂດອຸດສາຫະກໍາ ຍາມໃດກໍເປັນເຈົ້າການປະສານສົມທົບຢ່າງແໜ້ນແຟ້ນກັບກໍາລັງແກ້ໄຂບັນດາບັນຫາທີ່ເກີດຂຶ້ນດ້ານຄວາມໝັ້ນຄົງ, ຄວາມເປັນລະບຽບຮຽບຮ້ອຍ ຮັບປະກັນຖືກຫຼັກການ, ສິດອໍານາດ.
ຕາມທ່ານພັນເອກ ບຸ່ຍວັນຈຸ, ພະນັກງານການເມືອງກອງບັນຊາການທະຫານນະຄອນ ໃຫ້ຮູ້ວ່າ, ເບັ້ນກາດ ມີ 8 ເຂດອຸດສາຫະກໍາ ແລະກຸ່ມອຸດສາຫະກໍາດ້ວຍ 6.400 ກວ່າໂຄງການລົງທຶນ, 210.000 ກວ່າແຮງງານ, ໃນນັ້ນມີກວ່າ 80% ແຮງງານແມ່ນຄົນຕ່າງແຂວງ, ອາດຈະເກີດກໍລະນີທີ່ສັບສົນໄດ້ງ່າຍ ກ່ຽວກັບຄວາມໝັ້ນຄົງດ້ານການເມືອງ, ຄວາມເປັນລະບຽບຮຽບຮ້ອຍ, ຄວາມປອດໄພໃນສັງຄົມ. ໝວດທະຫານລາດປະຈໍາເຂດອຸດສາຫະກໍາ ໝີເຝຶອກ ໄດ້ຮັບການສ້າງຕັ້ງແຕ່ປີ 2012 ແລະກໍາລັງປ້ອງກັນຕົວ ຢູ່ວິສາຫະກິດ ໄດ້ສົມທົບຢ່າງແໜ້ນແຟ້ນ, ທັນການກັບອົງການທະຫານ, ຕໍາຫຼວດ, ປະກອບສ່ວນສໍາຄັນຮັບປະກັນຄວາມສະຫງົບສຸກ, ຄວາມປອດໄພ ຢູ່ເຂດອຸດສາຫະກໍໍາ ແລະເຂດຕິດຕໍ່ກັນ.
ບໍລິເວນປອດໄພ, ວິສາຫະກິດ, ທ້ອງຖິ່ນພັດທະນາ
ບິ່ງເຢືອງ ມີລະດັບການພັດທະນາເສດຖະກິດ, ຫັນເປັນຕົວເມືອງໄວ, ຫຼາຍເຂດອຸດສາຫະກໍາ, ກຸ່ມອຸດສາຫະກໍາ ໄດ້ສ້າງຕັ້ງຂຶ້ນດ້ວຍຈໍານວນຜູ້ອອກແຮງງານຂະໜາດໃຫຍ່. ກໍ່ສ້າງໝວດທະຫານລາດປະຈໍາເຂດອຸດສາຫະກໍາ ແລະກໍາລັງປ້ອງກັນຕົວ ໃນບັນດາປະເພດວິສາຫະກິດແມ່ນມາດຕະການ, ຮູບການເພີ່ມທະວີການຮັບປະກັນຄວາມໝັ້ນຄົງ, ຄວາມເປັນລະບຽບຮຽບຮ້ອຍຢ່າງມີປະສິດທິຜົນ, ສ້າງສະພາບແວດລ້ອມສະຖຽນລະພາບ, ຄວາມປອດໄພ ເພື່ອໃຫ້ວິສາຫະກິດມີຄວາມອຸ່ນອ່ຽນໃຈຜະລິດ, ດໍາເນີນທຸລະກິດ, ຕິດພັນຢ່າງຍາວນານກັບການພັດທະນາຂອງແຂວງ. ໃນຊຸມປີຜ່ານມາ, ກໍາລັງທະຫານລາດປະຈໍາຢູ່ຕາມເຂດອຸດສາຫະກໍາ ໄດ້ສົມທົບກັນລາດຕະເວນ, ແກ້ໄຂຫຼາຍກໍລະນີກ່ຽວກັບຄວາມໝັ້ນຄົງ, ຄວາມເປັນລະບຽບຮຽບຮ້ອຍ; ກໍາລັງປ້ອງກັນຕົວ ຍັງຄົ້ນພົບ, ສະກັດກັ້ນ 67 ກໍລະນີຢຸດງານ ຢ່າງທັນການ.
|
|
 |
|
ກໍາລັງທະຫານລາດ ລາດຕະເວນຢູ່ເຂດອຸດສາຫະກໍາ VSIP 1 (ນະຄອນຖ້ວນອານ, ແຂວງບິ່ງເຢືອງ). ພາບ: qdnd.vn |
ມາຮອດປັດຈຸບັນ, ແຂວງບິ່ງເຢືອງ ໄດ້ດຶງດູດເກືອບ 4.400 ໂຄງການ FDI ດ້ວຍທຶນລົງທະບຽນທັງໝົດແມ່ນ 42 ຕື້ໂດລາສະຫະລັດ. ສະຫາຍ ເຈືອງວັນຟອງ, ຮອງຫົວໜ້າຄະນະຄຸ້ມຄອງບັນດາເຂດອຸດສາຫະກໍາແຂວງບິ່ງເຢືອງ ໃຫ້ຮູ້ວ່າ ບັນດາເຂດອຸດສາຫະກໍາຂອງແຂວງມີອັດຕາການເພີ່ມເຕີມແມ່ນ 93,7% ດ້ວຍ 3.200 ກວ່າໂຄງການເຄື່ອນໄຫວ; ໃນນັ້ນມີກວ່າ 80% ແມ່ນໂຄງການ FDI. ໝາກຜົນນີ້ມີການປະກອບສ່ວນອັນໃຫຍ່ຫຼວງຈາກປະສິດທິຜົນການເຄື່ອນໄຫວຂອງກໍາລັງປ້ອງກັນຕົວ, ຊ່ວຍປັບປຸງ, ຮັກສາຄວາມປອດໄພ, ຄວາມໝັ້ນຄົງດ້ານສະພາບແວດລ້ອມແຫ່ງການລົງທຶນ.
ຕາມສະຫາຍ ດວ່ານຮົ່ງເຕືອຍ, ປະທານຄະນະກໍາມະການປະຊາຊົນນະຄອນ ເຕິນອວຽນ, ປະສິດທິຜົນຂອງໝວດທະຫານລາດປະຈໍາເຂດອຸດສາຫະກໍາ ແລະກໍາລັງປ້ອງກັນຕົວ ໃນບັນດາວິສາຫະກິດໄດ້ພິສູດໃຫ້ເຫັນຢ່າງຈະແຈ້ງລັກສະນະຖືກຕ້ອງຂອງແຜນນະໂຍບາຍກໍ່ສ້າງບັນດາກໍາລັງນີ້, ສ້າງຄວາມປະທັບໃຈອັນດີງາມຕໍ່ຄະນະພັກ, ອໍານາດການປົກຄອງ, ເຈົ້າຂອງວິສາຫະກິດ ແລະປະຊາຊົນ. ຄວາມສະຫງົບ, ຄວາມເປັນລະບຽບຮຽບຮ້ອຍ ຢູ່ເຂດອຸດສຫາະກໍາ ມີສະຖຽນລະພາບ ໄດ້ສ້າງສະພາບແວດລ້ອມທີ່ສະດວກ ເພື່ອຜະລິດ, ດໍາເນີນທຸລະກິດ, ດຶງດູດການລົງທຶນ, ຊຸກຍູ້ການພັດທະນາເສດຖະກິດ-ສັງຄົມ ແລະປັບປຸງການປ້ອງກັນຊາດ, ປ້ອງກັນຄວາມສະຫງົບ.
ສະຫາຍ ນາງ ຮວ່າງອ໊ຽນ, ຜູ້ອໍານວຍການຮ່ວມຝ່າຍບໍລິຫານບໍລິສັດ Rochdale Spears ຈໍາກັດ (ຕາແສງແທ້ງເຝຶອກ, ນະຄອນ ເຕິນອວຽນ) ສະແດງວ່າ “ບໍລິສັດ ຜະລິດເຄື່ອງເຟີນີເຈີ, ດ້ວຍ 100% ເງິນລົງທຶນມາຈາກລາຊະອານາຈັກອັງກິດ. ຄະນະນໍາ ເຫັນໄດ້ຢ່າງຈະແຈ້ງປະສິດທິຜົນຂອງກໍາລັງປ້ອງກັນຕົວ, ໂດຍສະເພາະແມ່ນສະພາບການຫຼິ້ນການພະນັນ, ໄພສັງຄົມໃນບໍລິສັດຫຼຸດລົງຫຼາຍ. ພວກຂ້າພະເຈົ້າ ຍາມໃດກໍສະໜັບສະໜູນແຜນນະໂຍບາຍເບິ່ງແຍງດູແລກໍ່ສ້າງກໍາລັງປ້ອງກັນຕົວ ແລະຫວັງວ່າ ຮູບແບບນີ້ຈະໄດ້ຮັບການແຜ່ຂະຫຍາຍ, ທະວີຄູນ, ສ້າງໂອກາດໃຫ້ແກ່ກໍາລັງປ້ອງກັນຕົວເຂົ້າຮ່ວມການເຄື່ອນໄຫວແຂ່ງຂັນເພື່ອຍົກສູງດ້ານວິຊາສະເພາະ, ວິຊາການ.
ແກ້ໄຂຂໍ້ຕິດຂັດ, ທະວີຄູນຮູບແບບ
ດ້ວຍບັນດາໝາກຜົນພົ້ນເດັ່ນໃນການກໍ່ສ້າງກໍາລັງປະກອບອາວຸດທ້ອງຖິ່ນໝັ້ນຄົງເຂັ້ມແຂງຮອບດ້ານຈາກຂັ້ນຮາກຖານ, ໃນນັ້ນມີຮູບແບບໝວດທະຫານລາດປະຈໍາເຂດອຸດສາຫະກໍາ ແລະກໍາລັງປ້ອງກັນຕົວ ໃນວິສາຫະກິດ, ກອງບັນຊາການທະຫານແຂວງບິ່ງເຢືອງ ເປັນກຽດໄດ້ຮັບການຄັດເລືອກຈັດຕັ້ງກອງປະຊຸມສະຫຼຸບ ແລະໄປທັດສະນະສຶກສາໃນການສ້າງຮູບແບບທົດລອງກ່ຽວກັບວຽກງານປ້ອງກັນຊາດທ້ອງຖິ່ນ, ທະຫານລາດ, ປ້ອງກັນຕົວ (ເດືອນມິຖຸນາ ປີ 2023) ຈາກກະຊວງປ້ອງກັນປະເທດ ແລະຄະນະພັກ, ກອງບັນຊາການທະຫານເຂດ 7.
|
|
 |
|
ກໍາລັງທະຫານລາດ ສົມທົບກັນລາດຕະເວນ, ປ້ອງກັນເຂດອຸດສາຫະກໍາ ໝີເຝຶອກ (ນະຄອນເບັ້ນກາດ, ແຂວງບິ່ງເຢືອງ). ພາບ: qdnd.vn |
ຕາມທ່ານພັນເອກພິເສດ ຫງວຽນຮວ່າງມິງ, ຫົວໜ້າການທະຫານກອງບັນຊາການທະຫານແຂວງບິ່ງເຢືອງ, ທະຫານລາດ ແລະປ້ອງກັນຕົວ ໃນວິສາຫະກິດ, ເຂດອຸດສາຫະກໍາ ແມ່ນກໍາລັງຢູ່ກັບທີ່ມີການຕອບໂຕ້ໄວ, ຄ້າຍຄືເສື້ອຜືນໜຶ່ງເພື່ອປ້ອງກັນວິສາຫະກິດ, ແກ້ໄຂບັນດາບັນຫາທີ່ສັບສົນກ່ຽວກັບຄວາມໝັ້ນຄົງ, ຄວາມເປັນລະບຽບຮຽບຮ້ອຍຢ່າງທັນການ, ສະກັດກັ້ນ ແລະຕ້ານອາດຊະຍາກໍາ, ອັກຄີໄພ. ໃນໄລຍະຈະມາເຖິງ, ກອງບັນຊາການທະຫານແຂວງບິ່ງເຢືອງ ຈະສ້າງຕັ້ງແຕ່ 2 ເຖິງ 3 ກອງບັນຊາການທະຫານຂອງກໍາລັງປ້ອງກັນຕົວ ເພື່ອດຶງດູດການເອົາໃຈໃສ່ຂອງເຈົ້າຂອງວິສາຫະກິດ ຕໍ່ກັບກໍາລັງນີ້ ແລະວຽກງານການທະຫານ, ການປ້ອງກັນຊາດ, ປະກອບສ່ວນກໍ່ສ້າງພື້ນຖານປ້ອງກັນຊາດທົ່ວປວງຊົນຕິດພັນກັບປ້ອງກັນຄວາມສະຫງົບປະຊາຊົນໃນເຂດປ້ອງກັນໄວ້ຢ່າງໝັ້ນແກ່ນ.
ເພື່ອຍົກສູງຄຸນນະພາບຮູບແບບ ແລະເສີມຂະຫຍາຍພາລະບົດບາດ, ໜ້າທີ່ຂອງກໍາລັງທະຫານລາດ, ປ້ອງກັນຕົວໃຫ້ເປັນຢ່າງດີ, ອົງການທີ່ກ່ຽວຂ້ອງຂອງແຂວງບິ່ງເຢືອງ ເຫັນໄດ້ວ່າ ເອກະສານນິຕິກໍາຈໍານວນໜຶ່ງຍັງບໍ່ທັນ ໄດ້ຮັບການປັບປຸງ, ເພີ່ມເຕີມເທື່ອ ສະນັ້ນ ວຽກງານກໍ່ສ້າງກໍາລັງທະຫານລາດ, ປ້ອງກັນຕົວຍັງປະສົບຂໍ້ຕິດຂັດ, ພາໃຫ້ເກີດຄວາມຫຍຸ້ງຍາກໃນການຈັດຕັ້ງປະຕິບັດນະໂຍບາຍໃຫ້ແກ່ກໍາລັງນີ້.
ບົດຮຽນຕົວຈິງຢູ່ແຂວງບິ່ງເຢືອງ ໄດ້ຊີ້ໃຫ້ເຫັນວ່າ ຢາກຂະຫຍາຍຮູບແບບໝວດທະຫານລາດປະຈໍາເຂດອຸດສາຫະກໍານັ້ນ ການສ້າງ, ອອກໃບອະນຸຍາດການຈັດສັນເຂດອຸດສາຫະກໍາໃໝ່ ຕ້ອງມີກອງທຶນທີ່ດິນທີ່ສະຫງວນໃຫ້ແກ່ການປ້ອງກັນຊາດ, ປ້ອງກັນຄວາມສະຫງົບເພື່ອກໍ່ສ້າງສໍານັກງານໃຫ້ແກ່ກໍາລັງນີ້. ພ້ອມກັນນັ້ນ, ອົງການທະຫານ ຕ້ອງເອົາໃຈໃສ່ຝຶກຝົນຫຼໍ່ຫຼອມ, ສຶກສາອົບຮົມຂະຫຍາຍສະມາຊິກພັກ ຕໍ່ກັບກໍາລັງທະຫານລາດ, ສະເໜີລະບອບ, ນະໂຍບາຍພິເສດທີ່ສອດຄ່ອງກັບທ້ອງຖິ່ນ ເພື່ອໃຫ້ກໍາລັງ ມີຄວາມອຸ່ນອ່ຽນໃຈປະຕິບັດງານ. ປະສິດທິຜົນການກໍ່ສ້າງກໍາລັງ ທະຫານລາດ, ປ້ອງກັນຕົວຢູ່ເຂດອຸດສາຫະກໍາ, ວິສາຫະກິດ FDI ແມ່ນການເຮັດທີ່ມີຫົວຄິດປະດິດສ້າງ, ສອດຄ່ອງກັບຄວາມຮຽກຮ້ອງຕ້ອງການຂອງວຽກງານປ້ອງກັນຊາດ, ການທະຫານທ້ອງຖິ່ນໃນປັດຈຸບັນ. ຂັ້ນຕອນການປະຕິບັດຕ້ອງມີຂອບນິຕິກໍາ ເພື່ອທະວີຄູນ, ຍົກສູງຄຸນນະພາບການເຄື່ອນໄຫວ, ເປັນພື້ນຖານເພື່ອກໍ່ສ້າງທະຫານລາດ, ປ້ອງກັນຕົວໃຫ້ໝັ້ນຄົງເຂັ້ມແຂງ, ປະກອບສ່ວນປັບປຸງການປ້ອງກັນຊາດ, ສ້າງກໍາລັງໜູນພັດທະນາເສດຖະກິດ-ສັງຄົມ.
ໂດຍ: ໄຊຊະນະ