ຂ້ຽວຂາດໃນການສັບຊ້ອນພະນັກງານ, ກົງຈັກການຈັດຕັ້ງ
ໂດຍຊາບຊຶມຕາມຄວາມຮຽກຮ້ອງຂອງທ່ານເລຂາທິການໃຫຍ່ ຫງວຽນຝູຈ້ອງ ທີ່ກອງປະຊຸມຄັ້ງທີ 8 ຂອງຄະນະພັກການທະຫານສູນກາງ ສະໄໝ 2020-2025, ໃນວັນທີ 25 ທັນວາ 2023: “ຕັດສິນໃຈປະຕິບັດ ແລະປະຕິບັດໃຫ້ໄດ້ການສັບຊ້ອນພະນັກງານ, ກົງຈັກການຈັດຕັ້ງຂອງກອງທັບ ປີ 2024 ດ້ວຍຄວາມຮຽກຮ້ອງຈັດຕັ້ງກຳລັງຕາມທິດກະທັດຮັດ, ຮັດກຸມ, ແຂງແຮງ ເພື່ອຮອດປີ 2025 ສຳເລັດໃຫ້ໄດ້ເປົ້າໝາຍກະທັດຮັດ, ຮັດກຸມ, ແຂງແຮງ ແລະສ້າງປະຖົມປັດໄຈໝັ້ນແກ່ນເພື່ອສູ້ຊົນເຖິງປີ 2030 ກໍ່ສ້າງກອງທັບປະຊາຊົນປະຕິວັດ, ກຳລັງຫຼວງ, ຍອດຢ້ຽມ, ທັນສະໄໝ. ວິວັດທະນາການປະຕິບັດຕ້ອງເຄັ່ງຄັດ, ຢ່າຂາດຄວາມລະມັດລະວັງ, ໃຈຮ້ອນ. ການສັບຊ້ອນພະນັກງານ, ກົງຈັກການຈັດຕັ້ງຕ້ອງສ້າງຄວາມໄວ້ເນື້ອເຊື່ອໃຈ, ບັນຍາກາດ, ກຳລັງແຮງໃໝ່ເພື່ອກອງທັບສຳເລັດທຸກໜ້າທີ່ຢ່າງມີໄຊ”. ປະຕິບັດຕາມການຊີ້ນຳ, ຄະນະພັກການທະຫານສູນກາງ, ກະຊວງປ້ອງກັນປະເທດ ໄດ້ຊີ້ນຳນຳພາການສັບຊ້ອນພະນັກງານ, ກົງຈັກການຈັດຕັ້ງຢູ່ທຸກຂັ້ນຢ່າງຂ້ຽວຂາດ. ຕາມນັ້ນແລ້ວ, ປີ 2024, ທົ່ວກອງທັບດຳເນີນການສັບຊ້ອນ, ປະກາດຮ່າງການຈັດຕັ້ງເກືອບ 1.100 ອົງການຈັດຕັ້ງ, ຮັບປະກັນເຂັ້ມງວດ, ເຄັ່ງຄັດ, ຖືກຕາມຂັ້ນຕອນ, ຕອບສະໜອງຕາມຄວາມຮຽກຮ້ອງຕ້ອງການກະທັດຮັດ, ຮັດກຸມ, ແຂງແຮງ.
    |
 |
|
ຫັດແອບປະສານສົມທົບ ລະຫວ່າງກໍາລັງປ້ອງກັນອາກາດ-ທະຫານອາກາດ ກັບທະຫານເຮືອ ປີ 2024. ພາບ: ຕ໊ວນຮຸຍ |
ວັນທີ 15 ທັນວາ 2024, ກອງບັນຊາການກອງພົນໃຫຍ່ 34 ຈັດຕັ້ງພິທີປະກາດຂໍ້ຕົກລົງສ້າງຕັ້ງກອງພົນໃຫຍ່ ບົນພື້ນຖານໂຮມກອງພົນໃຫຍ່ 3 ແລະກອງພົນໃຫຍ່ 4 ເຂົ້າກັນ. ນີ້ແມ່ນເຫດການທີ່ມີຄວາມໝາຍສຳຄັນທີ່ສຸດ, ເປັນຂີດໝາຍແຫ່ງການເຕີບໂຕ, ພັດທະນາຂອງກອງທັບປະຊາຊົນຫວຽດນາມ, ຫັນມະຕິກອງປະຊຸມໃຫຍ່ຄັ້ງທີ XIII ຂອງພັກວ່າດ້ວຍການກໍ່ສ້າງກອງທັບປະຕິວັດ, ກຳລັງຫຼວງ, ຍອດຢ້ຽມ, ທັນສະໄໝເປັນເທື່ອລະກ້າວ, ບາງເຫຼົ່າທັບ, ເຫຼົ່າຮົບ, ກຳລັງກ້າວຂຶ້ນເປັນທັນສະໄໝໃຫ້ປະກົດຜົນເປັນຈິງ. ທ່ານພົນຈັດຕະວາ ຫງວຽນບ໊າລຶກ, ຜູ້ບັນຊາການກອງພົນໃຫຍ່ 34 ໃຫ້ຮູ້ວ່າ: “ຊາບຊຶມມະຕິຂອງພັກຢ່າງເລິກເຊິ່ງ, ໃກ້ຊິດຕິດແທດຕາມແຜນການຂອງກະຊວງປ້ອງກັນປະເທດ, ການຊີ້ນຳ, ມອບໜ້າທີ່ຂອງລັດຖະມົນຕີກະຊວງປ້ອງກັນປະເທດ, ກອງພົນໃຫຍ່ 34 ເປັນເຈົ້າການ, ຕັ້ງໜ້າໃນການສັບຊ້ອນພະນັກງານ, ກົງຈັກການຈັດຕັ້ງ, ສຸມໃສ່ກໍ່ສ້າງກຳລັງ, ເປັນປົກກະຕິໂດຍໄວ, ຈັດຕັ້ງປະຕິບັດໜ້າທີ່ທີ່ໄດ້ມອບໝາຍໃຫ້ນັບແຕ່ຊຸມວັນທຳອິດພາຍຫຼັງໄດ້ຮັບການສ້າງຕັ້ງ ຢ່າງມີໄຊ, ສ້າງປະຖົມປັດໄຈໝັ້ນແກ່ນສຳລັບໄລຍະປະຫວັດສາດພັດທະນາໃໝ່ຂອງກອງພົນໃຫຍ່ 34”.
ຜັນຂະຫຍາຍປະຕິບັດມະຕິສະບັບເລກທີ 05-NQ/TW ລົງວັນທີ 17 ມັງກອນ 2022 ຂອງກົມການເມືອງ; ມະຕິສະບັບເລກທີ 230-NQ/QUTW ລົງວັນທີ 2 ເມສາ 2022 ຂອງຄະນະພັກການທະຫານສູນກາງ ແລະແຜນການສະບັບເລກທີ 1228/KH-BQP ລົງວັນທີ 25 ເມສາ 2022 ຂອງກະຊວງປ້ອງກັນປະເທດ ວ່າດ້ວຍການຈັດຕັ້ງກອງທັບປະຊາຊົນຫວຽດນາມ ໄລຍະ 2021-2030 ແລະຊຸມປີຕໍ່ໄປ, ຄະນະພັກ, ການນໍາທຸກຂັ້ນໃນທົ່ວກອງທັບ ໄດ້ຜັນຂະຫຍາຍປະຕິບັດແຜນການສັງລວມ, ມາດຕະການດຳເນີນຢ່າງເຄັ່ງຄັດ, ວິທະຍາສາດ, ດ້ວຍຂັ້ນຕອນ, ບາດກ້າວເດີນລະອຽດ, ສັບຊ້ອນເພີ່ມ, ຫຼຸດຈຳນວນພະນັກງານສອດຄ່ອງກັບລັກສະນະສະເພາະ, ໜ້າທີ່ຂອງແຕ່ລະອົງການ, ກົມກອງ. ໃນແຜນການສັບຊ້ອນພະນັກງານ, ກົງຈັກການຈັດຕັ້ງ, ສືບຕໍ່ຈັດຕັ້ງບາງກົມກອງສຳຮອງຍຸດທະສາດ ຕາມຄວາມຕັດສິນໃຈປົກປັກຮັກສາປະເທດຫວຽດນາມ ສັງຄົມນິຍົມ. ສ້າງກຳລັງສຳຮອງລະດົມກໍາລັງໃຈແຂງແຮງ, ກຳລັງທະຫານລາດທີ່ມີຄວາມເຂັ້ມແຂງ, ຮັບປະກັນກອງທັບມີຄວາມສາມາດເປັນກຳລັງຫຼັກແຫຼ່ງຢ່າງພຽງພໍເພື່ອພ້ອມກັບທົ່ວກອງທັບສຳເລັດໜ້າທີ່ປົກປັກຮັກສາປະເທດຊາດໃນທຸກກໍລະນີຢ່າງມີໄຊ.
ສ້າງກອບນິຕິກຳສຳລັບໜ້າທີ່ການທະຫານ, ການປ້ອງກັນຊາດ
ປີ 2024, ກະຊວງປ້ອງກັນປະເທດ ໄດ້ຕັ້ງໜ້າ, ເປັນເຈົ້າການປະສານສົບທົບກັບອົງການກ່ຽວຂ້ອງຂອງກະຊວງຍຸຕິທຳ, ຫ້ອງວ່າການນາຍົກລັດຖະມົນຕີ ຢ່າງແໜ້ນແຟ້ນໃນການສະເໜີສ້າງຮ່າງກົດໝາຍ, ກົດໝາຍ. ພິເສດ, ສະພາແຫ່ງຊາດ ພິຈາລະນາ, ຮັບຮອງເອົາຮ່າງກົດໝາຍ 3 ສະບັບທີ່ມີຄວາມສຳຄັນ, ລວມມີ, ກົດໝາຍວ່າດ້ວຍອຸດສາຫະກຳປ້ອງກັນຊາດ, ປ້ອງກັນຄວາມສະຫງົບ ແລະລະດົມອຸດສາຫະກຳ; ກົດໝາຍວ່າດ້ວຍປະຊາຊົນປ້ອງກັນອາກາດ; ກົດໝາຍວ່າດ້ວຍການປັບປຸງ, ເພີ່ມເຕີມບາງມາດຕາຂອງກົດໝາຍນາຍທະຫານກອງທັບປະຊາຊົນຫວຽດນາມ ດ້ວຍການສະໜັບສະໜູນຢ່າງສູງຈາກສະມາຊິກສະພາແຫ່ງຊາດ.
ໝາກຜົນດັ່ງກ່າວໄດ້ຢັ້ງຢືນປະສິດທິຜົນໃນການຊີ້ນຳ, ນຳພາຂອງຄະນະພັກການທະຫານສູນກາງ, ກະຊວງປ້ອງກັນປະເທດ ໃນການກໍ່ສ້າງ ແລະປັບປຸງລະບົບກົດໝາຍການທະຫານ, ການປ້ອງກັນຊາດ, ສ້າງພື້ນຖານນິຕິກຳຢ່າງຄົບຊຸດ, ເປັນເອກະພາບ, ມີປະສິດທິພາບ, ປະສິດທິຜົນໃນການຄຸ້ມຄອງແຫ່ງລັດກ່ຽວກັບການທະຫານ, ການປ້ອງກັນຊາດ; ພ້ອມທັງກໍ່ເປັນການຢືນຢັນຄວາມຮູ້, ຄວາມສາມາດ, ຄວາມຮັບຜິດຊອບຂອງຖັນແຖວພະນັກງານເຮັດວຽກງານສ້າງກົດໝາຍຂອງກອງທັບ.
ຕາມການຕີລາຄາຂອງບັນດາສະມາຊິກສະພາແຫ່ງຊາດ, ຄະນະປະຈຳສະພາແຫ່ງຊາດ, ບັນດາອົງການກ່ຽວຂ້ອງຂອງກະຊວງຍຸຕິທຳແລ້ວ, ວິວັດທະນາການສ້າງຮ່າງກົດໝາຍຂອງກະຊວງປ້ອງກັນປະເທດ ຮັບປະກັນເຄັ່ງຄັດ, ຖືກຕາມຂັ້ນຕອນ, ລະບຽບການ; ຄຸນນະພາບໃນການສ້າງນະໂຍບາຍໃນບັນດາຮ່າງກົດໝາຍ, ລັດຖະບັນຍັດ ແລະເອກະສານນິຕິກຳ ຍາມໃດກໍ່ໃກ້ຊິດຕິດແທດ ແລະຫັນແຜນນະໂຍບາຍ, ແນວທາງຂອງພັກ, ການຊີ້ນຳຂອງຄະນະບໍລິຫານງານສູນກາງພັກ, ກົມການເມືອງ, ສະພາແຫ່ງຊາດ, ຄະນະປະຈຳສະພາແຫ່ງຊາດ, ລັດຖະບານ, ນາຍົກລັດຖະມົນຕີ ແລະຄວາມຮຽກຮ້ອງໃນການປະຕິບັດໜ້າທີ່ສ້າງສາ ແລະປົກປັກຮັກສາປະເທດຊາດໃນສະພາບການໃໝ່.
ບັນດາໝາກຜົນຕັ້ງໜ້າໃນການກໍ່ສ້າງ, ປັບປຸງລະບົບເອກະສານກົດໝາຍ ໄດ້ຊ່ວຍໃຫ້ການນຳກະຊວງປ້ອງກັນປະເທດ ແລະການນຳບັນດາອົງການ, ກົມກອງປະຕິບັດການຄຸ້ມຄອງແຫ່ງລັດດ້ວຍກົດໝາຍ ແລະການຄຸ້ມຄອງ, ຊີ້ນຳນຳພາ ແລະບໍລິຫານກອງທັບ ຮັບປະກັນປະຕິບັດຕາມຂໍ້ກຳນົດຂອງກົດໝາຍ, ຕອບສະໜອງຕາມຄວາມຮຽກຮ້ອງຕ້ອງການ, ໜ້າທີ່ໃນສະພາບການໃໝ່. ເຖິງຢ່າງໃດກໍ່ຕາມ, ເພື່ອປະກອບສ່ວນນຳກົດໝາຍວ່າດ້ວຍການທະຫານ, ການປ້ອງກັນຊາດ ເຂົ້າສູ່ຕົວຈິງໂດຍໄວ, ຕ້ອງຍູ້ແຮງການເຜີຍແຜ່, ສຶກສາກົດໝາຍດ້ວຍຫຼາຍຮູບແບບ, ສອດຄ່ອງກັບບັນດາເປົ້າໝາຍ, ລັກສະນະສະເພາະໜ້າທີ່ຂອງບັນດາອົງການ, ກົມກອງ. ເອົາໃຈໃສ່ຈັດຕັ້ງປະຕິບັດບັນດາແຜນຮ່າງ, ລາຍການ, ແຜນການເຜີຍແຜ່, ສຶກສາກົດໝາຍຂອງກະຊວງປ້ອງກັນປະເທດ; ຈັດຕັ້ງການຮຽບຮຽງ ແລະຈຳໜ່າຍເອກະສານ, ຂໍ້ມູນຂ່າວສານກ່ຽວກັບກົດໝາຍເຖິງແຕ່ລະອົງການ, ກົມກອງ. ສືບຕໍ່ຮັກສາຮູບແບບ “ຕູ້ປື້ມກົດໝາຍ” ຢ່າງມີປະສິດທິຜົນ; ປະສານສົມທົບກັບບັນດາອົງການສື່ມວນຊົນ ຈັດຕັ້ງບັນດາກິດຈະກຳ, ລາຍການ, ການແຂ່ງຂັນໂຄສະນາເຜີຍແຜ່ກົດໝາຍໃຫ້ແກ່ທົ່ວກອງທັບ, ທົ່ວປວງຊົນ... ຜ່ານນັ້ນ, ສ້າງການຫັນປ່ຽນຢ່າງຮອບດ້ານໃນການປະຕິບັດກົດໝາຍ ແລະໝູນໃຊ້ໃນການຄຸ້ມຄອງ, ຊີ້ນຳນຳພາ ແລະບໍລິຫານວຽກງານຢູ່ແຕ່ລະອົງການ, ກົມກອງ.
ໂດຍ: ແສງເດືອນ