ຊຸກຍູ້ການພົວພັນດ້ານປ້ອງກັນຊາດລະຫວ່າງຫວຽດນາມ ແລະກູບາ, ມົງໂກລີ ໃຫ້ນັບມື້ນັບພັດທະນາ

ທີ່ການພົບປະກັບທ່ານພົນໂທ Alvaro Lopez Miera, ທ່ານພົນເອກ ຟານວັນຢາງ ເນັ້ນໜັກວ່າ ການພົວພັນຮ່ວມມືດ້ານປ້ອງກັນຊາດຍາມໃດກໍ່ແມ່ນໜຶ່ງໃນບັນດາເສົາຄ້ຳສຳຄັນໃນການພົວພັນຫວຽດນາມ - ກູບາ. ໃນໄລຍະຜ່ານມາ, ການພົວພັນຮ່ວມມືດ້ານປ້ອງກັນຊາດໄດ້ຮັບການຜັນຂະຫຍາຍຢ່າງມີປະສິດທິຜົນ, ບັນລຸໄດ້ໝາກຜົນອັນດີງາມໃນຫຼາຍຂົງເຂດຄື: ການແລກປ່ຽນຄະນະຜູ້ແທນ; ວຽກງານພັກ, ວຽກງານການເມືອງ; ອຸດສາຫະກຳການປ້ອງກັນຊາດ..., ປະກອບສ່ວນຍົກສູງກຳລັງຄວາມສາມາດປົກປັກຮັກສາປະເທດຂອງກອງທັບແຕ່ລະປະເທດ, ປະກອບສ່ວນຢ່າງຕັ້ງໜ້າເຂົ້າໃນສັນຕິພາບ, ສະຖຽນລະພາບ, ການພັດທະນາລວມຂອງພາກພື້ນ ແລະໂລກ.

ໃນໄລຍະຈະມາເຖິງ, ທ່ານພົນເອກ ຟານວັນຢາງ ສະເໜີກະຊວງປ້ອງກັນປະເທດສອງປະເທດສືບຕໍ່ຜັນຂະຫຍາຍບັນດາເນື້ອໃນທີ່ໄດ້ຕົກລົງຢ່າງມີປະສິດທິຜົນ, ເຮັດໃຫ້ການພົວພັນຮ່ວມມືດ້ານປ້ອງກັນຊາດສອງຝ່າຍນັບມື້ນັບແທດຈິງ, ເຂົ້າສູ່ລວງເລິກ, ພິເສດແມ່ນໃນສະພາບທີ່ສອງປະເທດພວມກະກຽມສະເຫຼີມສະຫຼອງ 65 ປີແຫ່ງວັນສ້າງຕັ້ງການພົວພັນທາງການທູດ (2 ທັນວາ 1960 / 2 ທັນວາ 2025) ແລະການນຳຂັ້ນສູງ 2 ປະເທດ ໄດ້ເຫັນດີເປັນເອກະພາບຖືປີ 2025 ແມ່ນປີມິດຕະພາບຫວຽດນາມ - ກູບາ.

ທ່ານພົນເອກ ຟານວັນຢາງ ແລະທ່ານພົນໂທ Alvaro Lopez Miera. ພາບ: ວັນຫຽວ

ເຫັນດີຕໍ່ການຕີລາຄາ, ຂໍ້ສະເໜີຂອງທ່ານພົນເອກ ຟານວັນຢາງ, ທ່ານພົນໂທ Alvaro Lopez Miera ຢືນຢັນວ່າ ການພົວພັນອັນດີງາມລະຫວ່າງສອງປະເທດເວົ້າລວມ ແລະສອງກະຊວງປ້ອງກັນປະເທດເວົ້າສະເພາະໄດ້ ແລະພວມສືບທອດບັນດາຜົນງານຂອງປະທານ ໂຮ່ຈີມິນ ແລະປະທານ Fidel Castro ໄດ້ສ້າງພື້ນຖານ ແລະການນຳລຸ້ນຕ່າງໆ ແລະປະຊາຊົນ 2 ປະເທດໄດ້ເພີ່ມພູນຄູນສ້າງ. ທ່ານພົນໂທ Alvaro Lopez Miera ປາດຖະໜາວ່າ ໃນໄລຍະຈະມາເຖິງ, ກອງທັບສອງປະເທດສາມາດຮ່ວມມືໃນຫຼາຍຂົງເຂດກວ່າອີກ, ຜ່ານນັ້ນປະກອບສ່ວນຊຸກຍູ້ການພົວພັນສອງຝ່າຍໃຫ້ນັບມື້ນັບພັດທະນາ; ຫວັງວ່າ ຈະໄດ້ຕ້ອນຮັບທ່ານພົນເອກ ຟານວັນຢາງ ມາຢ້ຽມຢາມກູບາ ຢ່າງເປັນທາງການໂດຍໄວ.

*ຕອນບ່າຍວັນດຽວກັນ, ທ່ານພົນເອກ ຟານວັນຢາງ ໄດ້ມີການພົບປະກັບທ່ານ Byambatsogt Sandag, ລັດຖະມົນຕີກະຊວງປ້ອງກັນປະເທດ ມົງໂກລີ.

ທ່ານພົນເອກ ຟານວັນຢາງ ຕີລາຄາວ່າ ໃນໄລຍະຜ່ານມາ, ການພົວພັນຮ່ວມມືດ້ານປ້ອງກັນຊາດ ຫວຽດນາມ - ມົງໂກລີ ໄດ້ຮັບຄວາມເອົາໃຈໃສ່ຊຸກຍູ້ຈາກສອງຝ່າຍ ແລະບັນລຸໄດ້ໝາກຜົນແທດຈິງຫຼາຍຢ່າງ. ລະອຽດແມ່ນສອງຝ່າຍຮັກສາການເຄື່ອນໄຫວແລກປ່ຽນຄະນະຜູ້ແທນທຸກຂັ້ນ; ເພີ່ມທະວີການເຄື່ອນໄຫວພົບປະຂັ້ນສູງຢູ່ນອກບັນດາເຫດການຫຼາຍຝ່າຍ;  ການສຶກສາ-ກໍ່ສ້າງ; ແລກປ່ຽນຄະນະໄປທັດສະນະສຶກສາ ແລະພັກຜ່ອນບຳລຸງສຸຂະພາບ; ການຮ່ວມມືດ້ານອຸດສາຫະກຳປ້ອງກັນຊາດ...

ທ່ານພົນເອກ ຟານວັນຢາງ ມອບຂອງຂວັນທີ່ລະນຶກໃຫ້ແກ່ທ່ານລັດຖະມົນຕີ Byambatsogt Sandag. ພາບ: ວັນຫຽວ

ໃນໄລຍະຈະມາເຖິງ, ທ່ານພົນເອກ ຟານວັນຢາງ ສະເໜີສອງຝ່າຍສືບຕໍ່ຊຸກຍູ້ການແລກປ່ຽນຄະນະຜູ້ແທນທຸກຂັ້ນ, ຮ່ວມມືໃນຂົງເຂດອຸດສາຫະກຳປ້ອງກັນຊາດ, ການສຶກສາ-ກໍ່ສ້າງ, ຮັກສາສັນຕິພາບສະຫະປະຊາຊາດ, ພົບປະແລກປ່ຽນວັດທະນະທຳ, ແຂ່ງຂັນກິລາການທະຫານ... ກໍ່ຄືຂົງເຂດອື່ນໆທີ່ເໝາະສົມກັບຄວາມຕ້ອງການ, ຄວາມສາມາດ ແລະຜົນປະໂຫຍດຂອງແຕ່ລະຝ່າຍ.

ໂດຍ: ຈາງຫງວຽນ