ສໍາເລັດວຽກງານກະກຽມພິທີສະເຫຼີມສະຫຼອງ 80 ປີແຫ່ງວັນສ້າງຕັ້ງກອງທັບປະຊາຊົນຫວຽດນາມ

ທ່ານພົນໂທ ຮີ່ງຈ໊ຽນທັ໊ງ ກ່າວຄໍາເຫັນທີ່ການກວດກາ. ພາບ: qdnd.vn

ຜ່ານການກວດກາ, ທ່ານພົນໂທ ຮີ່ງຈ໊ຽນທັ໊ງ ໄດ້ຕີລາຄາສູງວຽກງານຈັດຕັ້ງ, ປະສານສົມທົບລະຫວ່າງບັນດາກໍາລັງໃນການກະກຽມຮັບປະກັນຄວາມສະຫງົບ, ປອດໄພໃຫ້ຄະນະຜູ້ແທນພາຍໃນ ແລະຕ່າງປະເທດ. ທ່ານພົນໂທ ຮີ່ງຈ໊ຽນທັ໊ງ ຮຽກຮ້ອງມາຍັງກົມສູ້ຮົບ, ກົມພົວພັນຕ່າງປະເທດ, ກອງບັນຊາການທະຫານນະຄອນຫຼວງຮ່າໂນ້ຍ ແລະບັນດາກົມກອງວິຊາການ ຜັນຂະຫຍາຍແຜນງານຢ່າງແໜ້ນແຟ້ນ, ລະດົມກໍາລັງ, ພາຫະນະ, ຮັກສາຄວາມສະຫງົບຄວາມເປັນລະບຽບຮຽບຮ້ອຍ, ຮັບປະກັນຄວາມປອດໄພຢ່າງແທ້ຈິງ ກ່ອນ, ໃນ ແລະພາຍຫຼັງພິທີສະເຫຼີມສະຫຼອງ, ສ້າງຂີດໝາຍອັນດີງາມໃຫ້ບັນດາການນຳພັກ, ລັດ, ແຂກຖືກເຊີນສາກົນ ແລະພີ່ນ້ອງຮ່ວມຊາດ, ນັກຮົບໃນທົ່ວປະເທດ.

ທ່ານພົນຕີ ເຈືອງທຽນໂຕ ກ່າວຄໍາເຫັນທີ່ການກວດກາ. ພາບ: qdnd.vn

* ຕອນບ່າຍວັນດຽວກັນ, ຢູ່ຫໍປະຊຸມແຫ່ງຊາດ (ຮ່າໂນ້ຍ), ທ່ານພົນຕີ ເຈືອງທຽນໂຕ ຮອງຫົວໜ້າກົມໃຫຍ່ການເມືອງກອງທັບປະຊາຊົນຫວຽດນາມ ໄດ້ເປັນປະທານກວດກາວຽກງານກະກຽມໃຫ້ແກ່ການສະເຫຼີມສະຫຼອງ 80 ປີແຫ່ງວັນສ້າງຕັ້ງກອງທັບປະຊາຊົນຫວຽດນາມ ແລະ 35 ປີແຫ່ງວັນບຸນປ້ອງກັນຊາດທົ່ວປວງຊົນ.

ພາຍຫຼັງການກວດກາ, ຮັບຟັງການລາຍງານຈາກບັນດາອົງການ, ທ່ານພົນຕີ ເຈືອງທຽນໂຕ ສະເໜີໃຫ້ອົງການທີ່ກ່ຽວຂ້ອງຂອງກະຊວງປ້ອງກັນປະເທດ ສົມທົບກັບຫໍປະຊຸມແຫ່ງຊາດ ເຮັດສໍາເລັດວຽກງານກະກຽມທຸກດ້ານ, ເອົາໃຈໃສ່ເປັນພິເສດເຖິງວຽກງານຕ້ອນຮັບ, ຮັບປະກັນຄວາມສະຫງ່າຜ່າເຜີຍ, ຮອບຄອບຖີ່ຖ້ວນ; ພິທີຕ້ອນຮັບຕ້ອງສະແດງໃຫ້ເຫັນ ແລະເຮັດໃຫ້ພົ້ນເດັ່ນທາງດ້ານຂະໜາດ ແລະລັກສະນະຂອງເຫດການ... ພະນັກງານ, ພາລະກອນ, ນັກຮົບທີ່ເຂົ້າຮ່ວມພິທີຕ້ອງກໍາແໜ້ນແຜນການ, ຍົກສູງຄວາມຮັບຜິດຊອບ, ຮັບປະກັນພິທີໃຫ້ປະສົບຜົນສຳເລັດຢ່າງຈົບງາມ, ປອດໄພຢ່າງເດັດຂາດໃນທຸກດ້ານ.

ໂດຍ: ເຈິ່ນຮວ່ຽນ