ຈຸດນັດພົບແຫ່ງນໍ້າໃຈມິດຕະພາບ, ຊຸກຍູ້ຄວາມໄວ້ເນື້ອເຊື່ອໃຈ, ຮ່ວມມືພ້ອມກັນພັດທະນາ

20 ທັນວາ 2024 19:2

ກປ.ອອນໄລ - ຕອນເຊົ້າວັນທີ 19 ທັນວາ, ຢູ່ຮ່າໂນ້ຍ, ກະຊວງປ້ອງກັນປະເທດຫວຽດນາມ ໄດ້ຈັດຕັ້ງພິທີເປີດງານວາງສະແດງປ້ອງກັນຊາດສາກົນຫວຽດນາມ 2024 ຢູ່ສະໜາມບິນ ຢາເລິມ. ທ່ານ ຟ້າມມິງຈິ໊ງ ນາຍົກລັດຖະມົນຕີຫວຽດນາມ ເປັນປະທານພິທີ.

ກ່າວຄຳເຫັນເປີດງານວາງສະແດງ, ທ່ານ ຟ້າມມິງຈິ໊ງ ໄດ້ສະແດງຄວາມຍິນດີຕ້ອນຮັບຢ່າງສຸດໃຈ ແລະຂອບໃຈຢ່າງຈິງໃຈມາຍັງບັນດາແຂກເຊີນສາກົນ, ກຸ່ມບໍລິສັດ, ວິສາຫະກິດທີ່ມາເຂົ້າຮ່ວມງານວາງສະແດງປ້ອງກັນຊາດສາກົນຫວຽດນາມ 2024; ໂດຍ ໄດ້ເນັ້ນໜັກເຖິງສານ “ສັນຕິພາບ, ມິດຕະພາບ, ການຮ່ວມມື ແລະພັດທະນາ” ຂອງງານວາງສະແດງຄັ້ງທີ 2 ທີ່ຈັດຂຶ້ນຢູ່ຫວຽດນາມ ວ່າແມ່ນເຫດການສາກົນພົ້ນເດັ່ນທີ່ມີຄວາມໝາຍພິເສດກົງກັບໂອກາດສະເຫຼີມສະຫຼອງ 80 ປີແຫ່ງວັນສ້າງຕັ້ງກອງທັບປະຊາຊົນຫວຽດນາມ ແລະ 35 ປີແຫ່ງວັນບຸນປ້ອງກັນຊາດທົ່ວປວງຊົນ, ປະກອບສ່ວນຊຸກຍູ້ການພົວພັນຕ່າງປະເທດ ແລະການຮ່ວມມືດ້ານປ້ອງກັນຊາດໃນທຸກຂົງເຂດ, ເພື່ອສັນຕິພາບ, ສະຖຽນລະພາບ, ການຮ່ວມມື ແລະພັດທະນາຢູ່ພາກພື້ນ ແລະໃນໂລກ.

ທ່ານ ຟ້າມມິງຈີ໊ງ ນາຍົກລັດຖະມົນຕີຫວຽດນາມ ພ້ອມດ້ວຍບັນດາຜູ້ແທນພາຍໃນ ແລະຕ່າງປະເທດ ກົດປຸ່ມເປີດງານວາງສະແດງ. ພາບ: qdnd.vn

ງານວາງສະແດງປ້ອງກັນຊາດສາກົນຫວຽດນາມ 2024 ແມ່ນການຢືນຢັນບົດບາດ ແລະການປະກອບສ່ວນຂອງຫວຽດນາມ ເຂົ້າໃນການຮ່ວມມືດ້ານປ້ອງກັນຊາດສາກົນ; ເປັນສັນຍາລັກແຫ່ງຄວາມໄວ້ເນື້ອເຊື່ອໃຈ, ຄວາມເຄົາລົບ ແລະເຈດຕະນາດີຕໍ່ການຮ່ວມມືລະຫວ່າງບັນດາປະເທດເພື່ອໂລກສັນຕິພາບ, ສະຖຽນລະພາບ ແລະວັດທະນາຖາວອນ; ແມ່ນພະຍານຫຼັກຖານທີ່ມີຊີວິດຊີວາໃຫ້ແກ່ການສະໜັບສະໜູນ ແລະຄວາມຮັກແພງທີ່ມີຄວາມໝາຍຂອງເພື່ອນມິດສາກົນທີ່ມີຕໍ່ປະເທດ, ປະຊາຊົນ ແລະກອງທັບປະຊາຊົນຫວຽດນາມ - ກອງທັບວິລະຊົນຍາມໃດກໍ່ສະແດງໃຫ້ເຫັນຄວາມຈິງໃຈ, ຄວາມໄວ້ເນື້ອເຊື່ອໃຈ ແລະຄວາມຮັບຜິດຊອບຕໍ່ເພື່ອນມິດສາກົນ.

ທ່ານ ຟ້າມມິງຈີ໊ງ ນາຍົກລັດຖະມົນຕີຫວຽດນາມ ແລະຜູ້ແທນໄປຢ້ຽມຊົມຮ້ານວາງສະແດງຜະລິດຕະພັນອຸດສາຫະກຳປ້ອງກັນຊາດ. ພາບ: qdnd.vn

ເນື່ອງໃນໂອກາດເປີດງານວາງສະແດງ, ທ່ານພົນເອກ ຟານວັນຢາງ, ກຳມະການກົມການເມືອງ, ຮອງເລຂາຄະນະພັກການທະຫານສູນກາງ, ລັດຖະມົນຕີກະຊວງປ້ອງກັນປະເທດຫວຽດນາມ ໄດ້ສົ່ງຈົດໝາຍສະແດງຄວາມຍິນດີຕ້ອນຮັບ, ໃນນັ້ນຢືນຢັນວ່າ ງານວາງສະແດງປ້ອງກັນຊາດສາກົນຫວຽດນາມ 2024 ແມ່ນເຫດການສຳຄັນເພື່ອແນໃສ່ປະຕິບັດແຜນນະໂຍບາຍເຊື່ອມໂຍງເຂົ້າກັບສາກົນຢ່າງຄົບຊຸດ, ຮອບດ້ານ, ເລິກເຊິ່ງກວ້າງຂວາງໃນທຸກຂົງເຂດ; ເພີ່ມທະວີການພົວພັນຕ່າງປະເທດດ້ານປ້ອງກັນຊາດ, ພັດທະນາການຮ່ວມມືກັບທຸກໆປະເທດ. ແມ່ນຈຸດນັດພົບທີ່ເຊື່ອມຕໍ່ບັນດາວິສາຫະກິດ, ກົມກອງຄົ້ນຄວ້າ, ຜະລິດ, ນຳໃຊ້ອາວຸດຍຸດໂທປະກອນກັບບັນດາຄູ່ຮ່ວມມືທີ່ມີຄວາມສາມາດບົ່ມຊ້ອນໃນຂົງເຂດປ້ອງກັນຊາດ; ໝັ້ນໝາຍວ່າ ຈະນຳເອົາກາລະໂອກາດຮ່ວມມືດ້ານການສົ່ງອອກ ແລະຖ່າຍທອດເຕັກໂນໂລຊີມາໃຫ້ໝົດທຸກຝ່າຍ.