ຫວຽດນາມ - ຈີນ ປັບປຸງຄວາມໄວ້ເນື້ອເຊື່ອໃຈດ້ານການເມືອງ, ຊຸກຍູ້ການຮ່ວມມືທີ່ແທດຈິງ

ທີ່ການຕ້ອນຮັບ, ທ່ານ ຫວັງອີ້ ແລະທ່ານ ຫງວຽນມິງຫວູ ເຫັນດີສືບຕໍ່ສົມທົບກັນຢ່າງແໜ້ນແຟ້ນໃນການຊຸກຍູ້ການພົວພັນສອງຝ່າຍຕາມການກໍານົດທິດ “6 ກວ່າ” ທີ່ການນໍາຂັ້ນສູງໄດ້ເຫັນດີເປັນເອກະພາບ ກໍຄືໝາກຜົນລະອຽດຂອງກອງປະຊຸມ ຄັ້ງທີ 16 ຄະນະກໍາມະການຊີ້ນໍາການຮ່ວມມືສອງຝ່າຍ ຫວຽດນາມ-ຈີນ ທີ່ຈັດຂຶ້ນໃນເດືອນທັນວາ 2024 ທີ່ຜ່ານມາ.

ກ່ຽວກັບການຮ່ວມມືໃນຕໍ່ໜ້າ, ທ່ານ ຫງວຽນມິງຫວູ ສະເໜີສອງຝ່າຍເພີ່ມທະວີການແລກປ່ຽນຍຸດທະສາດ ແລະຄວາມໄວ້ເນື້ອເຊື່ອໃຈດ້ານການເມືອງກວ່າອີກຜ່ານການຮັກສາການພົບປະຂັ້ນສູງ ແລະທຸກຂັ້ນ, ຍູ້ແຮງການເຊື່ອມຕໍ່ສອງພື້ນຖານເສດຖະກິດ, ຍົກສູງຄຸນນະພາບ, ປະສິດທິຜົນການຮ່ວມມື, ໂດຍສະເພາະແມ່ນສຸມໃສ່ຜັນຂະຫຍາຍບັນດາໂຄງການໃຫຍ່, ມີລັກສະນະທີ່ເປັນສັນຍາລັກ ແລະສົມກັບການພົວພັນຄູ່ຮ່ວມມືຍຸດທະສາດຮອບດ້ານ, ໃນນັ້ນ, ສະຫງວນບຸລິມະສິດສູງ ເພື່ອຜັນຂະຫຍາຍເສັ້ນທາງລົດໄຟ 3 ສາຍທີ່ເຊື່ອມຕໍ່ສອງປະເທດ, ສູ້ຊົນລົງມືກໍ່ສ້າງເສັ້ນທາງລົດໄຟ ລາວກາຍ-ຮ່າໂນ້ຍ-ຫາຍຟ່ອງ ໃນປີ 2025.

ທ່ານ ຫງວຽນມິງຫວູ ຮອງລັດຖະມົນຕີຜູ້ປະຈໍາການກະຊວງການຕ່າງປະເທດຫວຽດນາມ ເຂົ້າຢ້ຽມຂໍ່ານັບທ່ານ ຫວັງອີ້ ກໍາມະການກົມການເມືອງ, ຫົວໜ້າຫ້ອງວ່າການຄະນະກໍາມະການວຽກງານພົວພັນຕ່າງປະເທດສູນກາງພັກ, ລັດຖະມົນຕີກະຊວງການຕ່າງປະເທດ ຈີນ. ພາບ: ກະຊວງການຕ່າງປະເທດ.

ກ່ຽວກັບບັນຫາຢູ່ທະເລ, ທ່ານ ຫງວຽນມິງຫວູ ສະເໜີສອງຝ່າຍສືບຕໍ່ປະຕິບັດຂໍ້ຕົກລົງ ແລະຄວາມຮັບຮູ້ລວມຂັ້ນສູງໃຫ້ເປັນຢ່າງດີ, ເຄົາລົບຜົນປະໂຫຍດອັນຊອບທໍາ, ຖືກກົດໝາຍຂອງກັນທີ່ສອດຄ່ອງກັບກົດໝາຍສາກົນ, ໃນນັ້ນມີສົນທິສັນຍາຂອງສະຫະປະຊາຊາດ ກ່ຽວກັບກົດໝາຍວ່າດ້ວຍທະເລ ປີ 1982, ແກ້ໄຂບາງບັນຫາກ່ຽວກັບຊາວປະມົງ, ເຮືອຫາປາໃຫ້ສອດຄ່ອງກັບການພົວພັນມິດຕະພາບລະຫວ່າງສອງປະເທດໂດຍໂວ, ພ້ອມກັນຮັກສາສັນຕິພາບ, ສະຖຽນລະພາບ, ແກ້ໄຂບັນຫາທະເລຕາເວັນອອກໃຫ້ສົມເຫດສົມຜົນໃນສະພາບການສັບສົນໃນປັດຈຸບັນ.

ທ່ານ ຫວັງອີ້ ຕີລາຄາສູງເລື່ອງສອງຝ່າຍດໍາເນີນການປຶກສາຫາລືຍຸດທະສາດຂັ້ນຮອງລັດຖະມົນຕີຜູ້ປະຈໍາການລະຫວ່າງສອງກະຊວງການຕ່າງປະເທດ, ສະແດງໃຫ້ເຫັນບາດກ້າວໃໝ່ ແລະຄວາມໄວ້ເນື້ອເຊື່ອໃຈໃນການຮ່ວມມືລະຫວ່າງສອງປະເທດ. ທ່ານ ຫວັງອີ້ ຢັ້ງຢືນວ່າ ຈີນ ຖືເປັນສໍາຄັນການພົວພັນກັບຫວຽດນາມ; ພ້ອມແລ້ວທີ່ຈະພ້ອມກັບຫວຽດນາມ ຮັກສາການພົບປະຂັ້ນສູງ, ປັບປຸງຄວາມໄວ້ເນື້ອເຊື່ອໃຈດ້ານການເມືອງ, ຊຸກຍູ້ການຮ່ວມມືທີ່ແທດຈິງ, ປັບປຸງພື້ນຖານຄວາມເຫັນຂອງປະຊາຊົນໃນການພົວພັນສອງປະເທດ.

ກ່ອນໜ້ານັ້ນ, ວັນທີ 13 ມັງກອນ, ໂດຍປະຕິບັດຂໍ້ຕົກລົງຮ່ວມມືລະຫວ່າງສອງກະຊວງການຕ່າງປະເທດ, ຫວຽດນາມ ແລະຈີນ ໄດ້ດໍາເນີນກອງປະຊຸມປຶກສາຫາລືຍຸດທະສາດຂັ້ນຮອງລັດຖະມົນຕີຜູ້ປະຈໍາການກະຊວງການຕ່າງປະເທດ ຄັ້ງທີໜຶ່ງ ພາຍໃຕ້ການເປັນປະທານຮ່ວມຂອງທ່ານ ຫງວຽນມິງຫວູ ຮອງລັດຖະມົນຕີຜູ້ປະຈໍາການກະຊວງການຕ່າງປະເທດຫວຽດນາມ ແລະທ່ານ Ma Zhaoxu ຮອງລັດຖະມົນຕີຜູ້ປະຈໍາການກະຊວງການຕ່າງປະເທດ ຈີນ.

ໂດຍ: ໄຊຊະນະ