ທ່ານເລຂາທິການໃຫຍ່ ໂຕເລິມ ໂອ້ລົມທາງໂທລະສັບກັບທ່ານ ສີຈິ້ນຜິງ ເລຂາທິການໃຫຍ່, ປະທານປະເທດຈີນ
ກປ.ອອນໄລ - ວັນທີ 15 ມັງກອນ, ຢູ່ສຳນັກງານສູນກາງພັກ, ທ່ານ ໂຕເລິມ ເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຫວຽດນາມ ໄດ້ໂອ້ລົມທາງໂທລະສັບກັບທ່ານ ສີຈິ້ນຜິງ ເລຂາທິການໃຫຍ່, ປະທານປະເທດຈີນ ເນື່ອງໃນໂອກາດສະເຫຼີມສະຫຼອງ 75 ປີແຫ່ງວັນສ້າງຕັ້ງການພົວພັນທາງການທູດລະຫວ່າງສອງປະເທດ (18-1-1950 / 18-1-2025) ແລະໃນທ່າມກາງບັນຍາກາດຟົດຟື້ນທີ່ສອງປະເທດພວມກະກຽມຕ້ອນຮັບບຸນປີໃໝ່ປະຈຳຊາດປີປີມະເສັງ 2025.
ທີ່ການໂອ້ລົມທາງໂທລະສັບ, ທ່ານ ໂຕເລິມ ເນັ້ນໜັກວ່າ, ພັກ, ລັດ ແລະປະຊາຊົນຫວຽດນາມ ຍາມໃດກໍ່ເຄົາລົບການສະໜັບສະໜູນ, ການຊ່ວຍເຫຼືອອັນລ້ຳຄ່າ ເຊິ່ງພັກ, ລັດ ແລະປະຊາຊົນຈີນ ໄດ້ສະຫງວນໃຫ້ຫວຽດນາມ ໃນຫຼາຍໄລຍະປະຫວັດສາດ; ຢືນຢັນວ່າ ຫວຽດນາມ ຍາມໃດກໍ່ຖືການພັດທະນາການພົວພັນກັບຈີນ ແມ່ນບຸລິມະສິດອັນດັບໜຶ່ງໃນນະໂຍບາຍການຕ່າງປະເທດລວມຂອງຕົນແມ່ນເອກະລາດ, ເປັນເຈົ້າຕົນເອງ, ຫັນເປັນຫຼາຍຝ່າຍ ແລະຫຼາຍຮູບຫຼາຍແບບ. ສ່ວນທ່ານ ສີຈິ້ນຜິງ ກໍ່ຢືນຢັນວ່າ ພັກ ແລະລັດຈີນ ໃຫ້ບຸລິມະສິດພັດທະນາການພົວພັນກັບຫວຽດນາມ ໃນນະໂຍບາຍການຕ່າງປະເທດຂອງປະເທດບ້ານໃກ້ເຮືອນຄຽງ.
ເນື່ອງໃນໂອກາດນີ້, ທ່ານ ໂຕເລິມ ແລະທ່ານ ສີຈິ້ນຜິງ ໄດ້ຮ່ວມກັນຖະແຫຼງເປີດປີແລກປ່ຽນມະນຸດສະທຳ ຫວຽດນາມ - ຈີນ 2025; ເຫັນດີເປັນເອກະພາບກັນສົມທົບການຈັດຕັ້ງບັນດາການເຄື່ອນໄຫວສະເຫຼີມສະຫຼອງ 75 ປີແຫ່ງວັນສ້າງຕັ້ງການພົວພັນທາງການທູດ ແລະປີແລກປ່ຽນມະນຸດສະທໍາ ຫວຽດນາມ - ຈີນ 2025; ຍູ້ແຮງການໂຄສະນາເຜີຍແຜ່, ສຶກສາອົບຮົມໃນໝູ່ປະຊາຊົນທຸກຊັ້ນວັນນະ, ພິເສດແມ່ນລຸ້ນໜຸ່ມຂອງສອງປະເທດກ່ຽວກັບສາຍພົວພັນມິດຕະພາບທີ່ເປັນມູນເຊື້ອອັນດີງາມລະຫວ່າງຫວຽດນາມ - ຈີນ.
    |
 |
|
ທ່ານເລຂາທິການໃຫຍ່ ໂຕເລິມ ໂອ້ລົມທາງໂທລະສັບກັບທ່ານ ສີຈິ້ນຜິງ ເລຂາທິການໃຫຍ່, ປະທານປະເທດຈີນ. ພາບ: qdnd.vn |
ການນໍາ 2 ທ່ານໄດ້ເຫັນດີເປັນເອກະພາບສືບຕໍ່ເພີ່ມທະວີການພົວພັນແລກປ່ຽນຍຸດທະສາດລະຫວ່າງ 2 ພັກ, 2 ລັດ, ພິເສດແມ່ນບັນດາການພົບປະຂັ້ນສູງທີ່ມີຄວາມໝາຍຍຸດທະສາດລວມໃຫ້ແກ່ການພົວພັນລວມສອງຝ່າຍ; ຍົກສູງປະສິດທິຜົນຂອງກົນໄກຮ່ວມມືກ່ຽວກັບຊ່ອງພັກ, ລັດຖະບານ, ສະພາແຫ່ງຊາດ/ສະພາຜູ້ແທນປະຊາຊົນທົ່ວປະເທດຈີນ, ແນວໂຮມປະເທດຊາດ/ສະພາປຶກສາການເມືອງແຫ່ງຊາດຈີນ; ຊຸກຍູ້ການຮ່ວມມືດ້ານປ້ອງກັນຊາດ-ປ້ອງກັນຄວາມສະຫງົບ ໃຫ້ສົມກັບບົດບາດເປັນໜຶ່ງໃນບັນດາເສົາຄ້ຳສຳຄັນຂອງການພົວພັນສອງປະເທດ; ສ້າງບາດກ້າວບຸກທະລຸໃໝ່ໃນການຮ່ວມມືດ້ານເສດຖະກິດ, ໃຫ້ບຸລິມະສິດຍູ້ໄວການເຊື່ອມຈອດ 3 ເສັ້ນທາງລົດໄຟທີ່ໄດ້ມາດຕະຖານລະຫວ່າງສອງປະເທດ, ເປີດກວ້າງການຮ່ວມມືດ້ານການຄ້າ ແລະການລົງທຶນໃນຂົງເຂດທີ່ຫາກໍ່ພົ້ນເດັ່ນ.
ການນຳສອງທ່ານກໍ່ໄດ້ແລກປ່ຽນຂໍ້ມູນກ່ຽວກັບສະພາບການຂອງແຕ່ລະພັກ ແລະແຕ່ລະປະເທດ; ເຫັນດີເພີ່ມທະວີການແລກປ່ຽນປະສົບການ ແລະທິດສະດີກໍ່ສ້າງສັງຄົມນິຍົມ; ສົມທົບກັນໃນບັນດາບັນຫາສາກົນ ແລະພາກພື້ນ, ປະກອບສ່ວນຊຸກຍູ້ສັນຕິພາບ, ສະຖຽນລະພາບ ແລະການພັດທະນາຢູ່ພາກພື້ນ ແລະໃນໂລກ.
ທ່ານ ໂຕເລິມ ໄດ້ເຊື້ອເຊີນທ່ານ ສີຈິ້ນຜິງ ແລະພັນລະຍາມາຢ້ຽມຢາມຫວຽດນາມ ອີກຄັ້ງໜຶ່ງໃນປີ 2025. ທ່ານ ສີຈິ້ນຜິງ ໄດ້ຂອບໃຈ ແລະຕອບຮັບຄຳເຊີນດ້ວຍຄວາມຍິນດີ.
ໂດຍ: ທະນາພອນ