ການປຶກສາຫາລືດ້ານການເມືອງ ຫວຽດນາມ - ອີຕາລີ ຄັ້ງທີ 6

ທີ່ການເຮັດວຽກ, ທ່ານນາງ ເລທິທູຮັ່ງ ແລະທ່ານນາງ Maria Tripodi ໄດ້ແຈ້ງໃຫ້ກັນຊາບກ່ຽວກັບສະພາບການພັດທະນາເສດຖະກິດ - ສັງຄົມຂອງແຕ່ລະປະເທດ, ກວດຄືນສະພາບການຮ່ວມມື ແລະວາງອອກການກໍານົດທິດໃຫ້ແກ່ການພົວພັນ ຫວຽດນາມ - ອີຕາລີ ໃນຫຼາຍຂົງເຂດ.

ບັນຍາກາດທີ່ການປຶກສາຫາລືດ້ານການເມືອງຫວຽດນາມ - ອີຕາລີ ຄັ້ງທີ 6 ຢູ່ຮ່າໂນ້ຍ. ພາບ: ກະຊວງປ້ອງກັນປະເທດຫວຽດນາມ.

ສອງຝ່າຍໄດ້ເຫັນດີເປັນເອກະພາບຍູ້ແຮງການແລກປ່ຽນ, ພົບປະທຸກຂັ້ນ, ພິເສດແມ່ນຂັ້ນສູງ, ປະກອບສ່ວນເພີ່ມທະວີຄວາມໄວ້ເນື້ອເຊື່ອໃຈດ້ານການເມືອງ, ສ້າງພື້ນຖານທີ່ສະດວກໃຫ້ແກ່ການຊຸກຍູ້ການຮ່ວມມືໃນຂົງເຂດອື່ນ; ຕັ້ງໜ້າຜັນຂະຫຍາຍຂໍ້ຕົກລົງ, ຄຳໝັ້ນສັນຍາທີ່ບັນລຸໄດ້ຜ່ານການຢ້ຽມຢາມ, ພິເສດແມ່ນຖະແຫຼງການຮ່ວມກ່ຽວກັບການເພີ່ມທະວີການພົວພັນຄູ່ຮ່ວມມືຍຸດທະສາດ ຫວຽດນາມ - ອີຕາລີ (ເດືອນກໍລະກົດ 2023); ເພີ່ມທະວີການປຶກສາຫາລື ແລະສືບຕໍ່ຜັນຂະຫຍາຍບັນດາກົນໄກຮ່ວມມືສອງຝ່າຍຢ່າງມີປະສິດທິຜົນໃນດ້ານການທູດ, ປ້ອງກັນຊາດ, ເສດຖະກິດ, ວິທະຍາສາດ ແລະເຕັກໂນໂລຢີ, ພິເສດແມ່ນການປຶກສາຫາລືດ້ານການເມືອງລະຫວ່າງສອງກະຊວງການຕ່າງປະເທດ.

ທີ່ການພົບປະ, ຮອງລັດຖະມົນຕີສອງທ່ານນາງໄດ້ປຶກສາຫາລື ແລະເຫັນດີເປັນເອກະພາບກ່ຽວກັບທິດທາງຍູ້ແຮງບັນດາເສົາຄ້ຳສຳຄັນຂອງການຮ່ວມມືລະຫວ່າງສອງປະເທດໃນຂົງເຂດປ້ອງກັນຊາດ, ປ້ອງກັນຄວາມສະຫງົບ, ວິທະຍາສາດເຕັກໂນໂລຢີ, ການຮ່ວມມືພັດທະນາ, ພະລັງງານ, ສິ່ງແວດລ້ອມ, ວັດທະນະທຳ, ການສຶກສາ, ການທ່ອງທ່ຽວ. ທ່ານນາງ Maria Tripodi ຢືນຢັນວ່າ ອີຕາລີ ຈະຕັ້ງໜ້າຮ່ວມມືກັບຫວຽດນາມ ໃນຂົງເຂດວັດທະນະທຳ, ເພີ່ມທະວີຈຳນວນທຶນການສຶກສາໃຫ້ນັກສຶກສາຫວຽດນາມ. ສອງຝ່າຍເນັ້ນໜັກວ່າ ຈະສືບຕໍ່ສົມທົບກັນຢ່າງແໜ້ນແຟ້ນ, ສະໜັບສະໜູນເຊິ່ງກັນ ແລະກັນຢູ່ບັນດາເວທີປາໄສຫຼາຍຝ່າຍ ແລະອົງການຈັດຕັ້ງສາກົນ, ພິເສດແມ່ນສະຫະປະຊາຊາດ; ເພີ່ມທະວີການຮ່ວມມືໃນຂອບເຂດອາຊຽນ - ອີຕາລີ ແລະ ອາຊຽນ - ອີຢູ.

ໂດຍ: ຈາງຫງວຽນ