ຫວຽດນາມ - ອົດສະຕາລີ ສືບຕໍ່ຊຸກຍູ້ການພົວພັນຮ່ວມມື

ຍິນດີທີ່ໄດ້ພົບປະກັບທ່ານເອກອັກຄະລັດຖະທູດ, ທ່ານປະທານສະພາແຫ່ງຊາດ ເຈິ່ນແທງເໝິນ ຊົມເຊີຍທ່ານເອກອັກຄະລັດຖະທູດໄດ້ປະຕິບັດສໍາເລັດໜ້າທີ່ການທູດຢູ່ຫວຽດນາມ; ຕີລາຄາສູງການປະກອບສ່ວນຢ່າງຕັ້ງໜ້າຂອງທ່ານເອກອັກຄະລັດຖະທູດ ໃນໄລຍະທີ່ຜ່ານມາ, ໃນນັ້ນມີການກະກຽມ ແລະຈັດຕັ້ງການຢ້ຽມຢາມຂັ້ນສູງຂອງບັນດາການນຳ 2 ປະເທດ, ພິເສດແມ່ນຊຸກຍູ້ການຍົກລະດັບການພົວພັນລະຫວ່າງ 2 ປະເທດຂຶ້ນເປັນຄູ່ຮ່ວມມືຍຸດທະສາດຮອບດ້ານ.

ທ່ານປະທານສະພາແຫ່ງຊາດ ໄດ້ຂອບໃຈທ່ານເອກອັກຄະລັດຖະທູດ Andrew Goledzinowski ຍາມໃດກໍ່ສະໜັບສະໜູນພາລະກິດປ່ຽນແປງໃໝ່ຂອງຫວຽດນາມ; ມີການເຄື່ອນໄຫວແທດຈິງຫຼາຍຢ່າງ ເພື່ອແຜ່ຂະຫຍາຍບັນດາຜົນງານທີ່ຫວຽດນາມ ບັນລຸໄດ້ໃນພາລະກິດປ່ຽນແປງໃໝ່ປະເທດຊາດ.

ທ່ານ ເຈິ່ນແທງເໝິນ ປະທານສະພາແຫ່ງຊາດຫວຽດນາມ ຕ້ອນຮັບທ່ານ Andrew Goledzinowski ເອກອັກຄະລັດຖະທູດອົດສະຕາລີ ປະຈໍາ ຫວຽດນາມ. ພາບ: ເລິມຮ່ຽນ

ທ່ານປະທານສະພາແຫ່ງຊາດ ເຈິ່ນແທງເໝິນ ຊີ້ແຈ້ງວ່າ: ຫວຽດນາມ ຍາມໃດກໍ່ຖືເປັນສຳຄັນການຊຸກຍູ້ການພົວພັນມິດຕະພາບ ແລະຄູ່ຮ່ວມມືຍຸດທະສາດຮອບດ້ານຫວຽດນາມ-ອົດສະຕາລີ. ຫວຽດນາມ ຍາມໃດກໍ່ຖືວ່າ ອົດສະຕາລີ ແມ່ນໜຶ່ງໃນບັນດາຄູ່ຮ່ວມມືສຳຄັນແຖວໜ້າ. ທ່ານປະທານສະພາແຫ່ງຊາດ ຢືນຢັນວ່າ ສະພາແຫ່ງຊາດຫວຽດນາມ ຍາມໃດກໍ່ເຮັດຈົນສຸດຄວາມສາມາດຂອງຕົນເພື່ອແກ້ໄຂຄວາມຫຍຸ້ງຍາກ, ສິ່ງທີ່ຄົງຄ້າງໃນການພັດທະນາເສດຖະກິດ-ສັງຄົມ ເພື່ອດຶງດູດການລົງທຶນຈາກຕ່າງປະເທດເຂົ້າຫວຽດນາມ; ພ້ອມທັງປາດຖະໜາວ່າ ດ້ວຍອາລົມຈິດຄວາມຮັກແພງຕໍ່ຫວຽດນາມ,  ໃນໄລຍະຈະມາເຖິງ, ທ່ານເອກອັກຄະລັດຖະທູດ Andrew Goledzinowski ຈະສືບຕໍ່ປະກອບສ່ວນຢ່າງຕັ້ງໜ້າເຂົ້າໃນການຊຸກຍູ້ການພົວພັນລະຫວ່າງ 2 ປະເທດ, ພິເສດແມ່ນໃນຂົງເຂດຮ່ວມມືເສດຖະກິດ, ການຄ້າ ແລະການທ່ອງທ່ຽວ, ວັດທະນະທໍາ, ພະລັງງານ ...

ທ່ານເອກອັກຄະລັດຖະທູດ Andrew Goledzinowski ໄດ້ສະແດງຄວາມສະເທືອນໃຈ ແລະຂອບໃຈທ່ານປະທານສະພາແຫ່ງຊາດທີ່ໄດ້ສະຫຼະເວລາຕ້ອນຮັບ. ທ່ານເອກອັກຄະລັດຖະທູດ ໃຫ້ຮູ້ວ່າ, ໃນໄລຍະທີ່ຜ່ານມາ, ການພົວພັນອົດສະຕາລີ - ຫວຽດນາມ ໄດ້ມີບາດກ້າວພັດທະນາຢ່າງແທດຈິງໃນຫຼາຍຂົງເຂດ, ບັນລຸໄດ້ໝາກຜົນທີ່ຕັ້ງໜ້າ. ຕີລາຄາສູງໝາກຜົນຂອງສະພາແຫ່ງຊາດຫວຽດນາມ ທີ່ກອງປະຊຸມຄັ້ງທີ 8 ຜ່ານມາ, ໃນນັ້ນ, ສະພາແຫ່ງຊາດໄດ້ຮັບຮອງເອົາກົດໝາຍວ່າດ້ວຍໄຟຟ້າ, ກົດໝາຍວ່າດ້ວຍທໍລະນີ ແລະບໍ່ແຮ່, ທ່ານເອກອັກຄະລັດຖະທູດ Andrew Goledzinowski ໃຫ້ຮູ້ວ່າ, ນີ້ຈະແມ່ນພື້ນຖານເພື່ອສ້າງສະພາບແວດລ້ອມແຫ່ງການຮ່ວມມືດ້ານເສດຖະກິດ - ການຄ້າລະຫວ່າງ ອົດສະຕາລີ ແລະຫວຽດນາມ ໃຫ້ສະດວກກວ່າອີກ. ທ່ານເອກອັກຄະລັດຖະທູດ ແຈ້ງວ່າ ອົດສະຕາລີ ຈະສືບຕໍ່ສະໜັບສະໜູນຫວຽດນາມ ຜ່ານບັນດາໂຄງການພັດທະນາ ແລະໜູນຊ່ວຍຫວຽດນາມ ໃນວິວັດການຫັນປ່ຽນ, ນີ້ກໍ່ແມ່ນກາລະໂອກາດຊຸກຍູ້ການເພີ່ມທະວີການຮ່ວມມືດ້ານການຄ້າ ແລະການລົງທຶນລະຫວ່າງ 2 ປະເທດ.

ທ່ານເອກອັກຄະລັດຖະທູດ Andrew Goledzinowski ໃຫ້ຮູ້ວ່າ, ປະຊາຊົນອົດສະຕາລີ ຮັກແພງຫວຽດນາມ ທີ່ສຸດ ແລະຢືນຢັນວ່າ ໃນໄລຍະຈະມາເຖິງ, ບໍ່ວ່າໃນຖານະຕຳແໜ່ງໃດກໍ່ຕາມ, ທ່ານຈະສືບຕໍ່ຊຸກຍູ້ການພົວພັນລະຫວ່າງສອງປະເທດ, ພິເສດແມ່ນການຮ່ວມມືໃນຂົງເຂດສຶກສາ, ເສດຖະກິດ ແລະປະກອບສ່ວນເຮັດໃຫ້ປະຊາຊົນຊາວອົດສະຕາລີ ເຂົ້າໃຈປະເທດຊາດ ແລະປະຊາຊົນຫວຽດນາມ ຫຼາຍກວ່າອີກ.

ໂດຍ: ທະນາພອນ