ຫວຽດນາມ ສະໜັບສະໜູນການຕໍ່ສູ້ອັນເປັນທຳຂອງປະຊາຊົນປາແລັດສະຕິນ

ທີ່ການຕ້ອນຮັບ, ທ່ານ ເລຮວ່າຍຈູງ ສະແດງຄວາມປິຕິຊົມຊື່ນຕໍ່ການພັດທະນາອັນດີງາມຂອງການພົວພັນສາມັກຄີ, ມິດຕະພາບທີ່ເປັນມູນເຊື້ອຫວຽດນາມ-ປາແລັດສະຕິນ; ຢືນຢັນຫຼັກໝັ້ນສະເໝີຕົ້ນສະເໝີປາຍຂອງພັກ, ລັດ ແລະປະຊາຊົນຫວຽດນາມ ແມ່ນສະໜັບສະໜູນການຕໍ່ສູ້ອັນເປັນທຳຂອງປະຊາຊົນປາແລັດສະຕິນ ເພື່ອສິດພື້ນຖານຂອງຊາດຕົນ, ຢຶດໝັ້ນສະໜັບສະໜູນມາດຕະການສອງລັດ, ໃນນັ້ນມີການສ້າງຕັ້ງລັດປາແລັດສະຕິນ ເອກະລາດ, ບົນພື້ນຖານມະຕິຂອງສະຫະປະຊາຊາດ ແລະຮັບປະກັນຜົນປະໂຫຍດອັນຊອບທຳຂອງບັນດາຝ່າຍທີ່ກ່ຽວຂ້ອງ; ສະແດງຄວາມວິຕົກກັງວົນຢ່າງເລິກເຊິ່ງ ແລະແບ່ງປັນກ່ຽວກັບຄວາມຫຍຸ້ງຍາກ, ການສູນເສຍອັນໃຫຍ່ຫຼວງ ເຊິ່ງປະຊາຊົນປາແລັດສະຕິນ ໄດ້ຮັບຄວາມເສຍຫາຍຍ້ອນການໃຊ້ຄວາມຮຸນແຮງເພີ່ມຂຶ້ນຢູ່ເຂດ Gaza ໃນກວ່າໜຶ່ງປີຜ່ານມາ; ຮຽກຮ້ອງໃຫ້ບັນດາຝ່າຍທີ່ກ່ຽວຂ້ອງລະງັບໃຈ, ອົດກັ້ນ, ຊຸກຍູ້ການເຈລະຈາໂດຍສັນຕິວິທີ; ຢືນຢັນວ່າ ຫວຽດນາມ ສະໜັບສະໜູນ ແລະພ້ອມແລ້ວທີ່ຈະເຂົ້າຮ່ວມຄວາມມານະພະຍາຍາມລວມນີ້ຂອງປະຊາຄົມສາກົນເພື່ອຊຸກຍູ້ການເຈລະຈາ, ແກ້ໄຂການປະທະກັນໂດຍສັນຕິວິທີ.

ທ່ານ ເລຮວ່າຍຈູງ, ເລຂາທິການສູນກາງພັກ, ຫົວໜ້າຄະນະພົວພັນຕ່າງປະເທດສູນກາງພັກ ຕ້ອນຮັບທ່ານ Riad Malki, ທູດພິເສດ, ທີ່ປຶກສາປະທານາທິບໍດີປາແລັດສະຕິນ.  ພາບ: nhandan.vn

ສ່ວນທ່ານ Riad Malki ກໍ່ໄດ້ແຈ້ງໃຫ້ຊາບກ່ຽວກັບສະພາບການປາແລັດສະຕິນ ໃນປະຈຸບັນ, ຄວາມເສຍຫາຍອັນໃຫຍ່ຫຼວງກ່ຽວກັບມະນຸດ ແລະຄວາມເສຍຫາຍຢ່າງໜັກໜ່ວງຕໍ່ພື້ນຖານໂຄງລ່າງເສດຖະກິດ-ສັງຄົມຢູ່ ເຂດ Gaza; ສະແດງຄວາມປາດຖະໜາວ່າ ປະຊາຄົມສາກົນ, ໃນນັ້ນມີ ຫວຽດນາມ, ຈະສະໜັບສະໜູນຄວາມມານະພະຍາຍາມໄກ່ເກ່ຍ, ບັນລຸໄດ້ສັນຍາຢຸດຍິງໂດຍໄວ, ຢຸດຕິການປະທະກັນຢູ່ເຂດ Gaza. ທ່ານ Riad Malki ຢືນຢັນວ່າ ລັດ ແລະປະຊາຊົນປາແລັດສະຕິນ ຍາມໃດກໍ່ຖືເປັນສໍາຄັນການພົວພັນສາມັກຄີ, ອ້າຍນ້ອງກັບພັກ, ລັດ ແລະປະຊາຊົນຫວຽດນາມ; ເນັ້ນໜັກວ່າ ປາແລັດສະຕິນ ຈະສືບຕໍ່ຮັກສາ ແລະເຮັດຈົນສຸດຄວາມສາມາດຂອງຕົນ ເພື່ອເພີ່ມພູນຄູນສ້າງການພົວພັນອັນດີງາມລະຫວ່າງຫວຽດນາມ ແລະປາແລັດສະຕິນ.

ໂດຍ: ເຈິ່ນຮວ່ຽນ