ໃນຂອບເຂດການຢ້ຽມຢາມ, ທ່ານ ເລຮວາຍຈຸງ ໄດ້ມີການພົບປະກັບ ທ່ານ ຮຸນແຊນ ປະທານພັກປະຊາຊົນກໍາປູເຈຍ (CPP), ປະທານສະພາສູງ; ເຮັດວຽກກັບທ່ານ Prak Sokhonn ຫົວໜ້າຄະນະພົວພັນຕ່າງປະເທດ CPP, ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ແລະຮ່ວມມືສາກົນກໍາປູເຈຍ ແລະພົບປະກັບທ່ານ Neth Savoeun, ຮອງນາຍົກລັດຖະມົນຕີ ກໍາປູເຈຍ.

leftcenterrightdel
ທ່ານ ຮຸນແຊນ ປະທານພັກປະຊາຊົນກໍາປູເຈຍ (CPP), ປະທານສະພາສູງກໍາປູເຈຍ ຕ້ອນຮັບທ່ານ ເລຮວ່າຍຈຸງ ຫົວໜ້າຄະນະພົວພັນຕ່າງປະເທດສູນກາງພັກ ຢູ່ສໍານັກງານສູນກາງ CPP, ນະຄອນຫຼວງພະນົມເປັນ. ພາບ: ສໍານັກຂ່າວສານຫວຽດນາມ.

ທີ່ການພົບປະກັບທ່ານ ຮຸນແຊນ, ທ່ານ ເລຮວ່າຍຈຸງ ຊົມເຊີຍບັນດາຜົນງານອັນໃຫຍ່ຫຼວງທຸກດ້ານ ເຊິ່ງ ກໍາປູເຈຍ ບັນລຸໄດ້ພາຍໃຕ້ການນໍາພາຂອງ CPP ໂດຍ ທ່ານ ຮຸນແຊນ ເປັນປະທານ ແລະທ່ານ ຮຸນ ມາແນດ ເປັນນາຍົກລັດຖະມົນຕີ, ເຮັດໃຫ້ປະເທດກໍາປູເຈຍ ມີສັນຕິພາບ, ພັດທະນາຢ່າງແຂງແຮງໃນທຸກຂົງເຂດ, ຊີວິດການເປັນຢູ່ຂອງປະຊາຊົນ ນັບມື້ນັບໄດ້ຮັບການປົວແປງ, ຖານະຂອງກໍາປູເຈຍ ນັບມື້ນັບໄດ້ຮັບການຍົກສູງຂຶ້ນໃນເວທີສາກົນ.

ທ່ານ ຮຸນແຊນ ສະແດງຄວາມປິຕິຊົມຊື່ນ ແລະເຊື່ອໝັ້ນວ່າ ການຢ້ຽມຢາມຂອງຄະນະ ຈະປະກອບສ່ວນເພີ່ມພູນຄູນສ້າງ ແລະເພີ່ມທະວີການພົວພັນຮ່ວມມືຮອບດ້ານລະຫວ່າງສອງພັກ ແລະສອງປະເທດ. ທ່ານ ຮຸນແຊນ ໃຫ້ຮູ້ວ່າ ກໍາປູເຈຍ ໄດ້ຮັກສານໍ້າໃຈມິດຕະພາບທີ່ເປັນມູນເຊື້ອອັນດີງາມກັບຫວຽດນາມ ນັບແຕ່ສະໄໝທີ່ບັນດາການນໍາຮຸ່ນກ່ອນ ແລະສືບຕໍ່ຮັກສາ, ເສີມຂະຫຍາຍການພົວພັນນີ້ໃຫ້ໝັ້ນຄົງຂະໜົງແກ່ນໄປຊົ່ວກາລະນານ; ຢັ້ງຢືນຄວາມຕັດສິນໃຈພ້ອມກັນປັບປຸງ ແລະພັດທະນາການພົວພັນ ຫວຽດນາມ-ກໍາປູເຈຍ ບົນເນື້ອໃນຈິດໃຈ “ບ້ານໃກ້ເຮືອນຄຽງທີ່ດີ, ມິດຕະພາບທີ່ເປັນມູນເຊື້ອ, ການຮ່ວມມືຮອບດ້ານ, ຍືນຍົງຍາວນານ” ແລະຄວາມໄວ້ເນື້ອເຊື່ອໃຈເຊິ່ງກັນແລະກັນ ທີ່ນັບມື້ນັບເຂັ້ມແຂງ. 

ໂດຍ: ໄຊຊະນະ