ສ້າງກໍາລັງໜູນພັດທະນາການພົວພັນສອງຝ່າຍລະຫວ່າງ ຫວຽດນາມ-ສິງກະໂປ

ນໍາການພົວພັນລະຫວ່າງສອງປະເທດ ໃຫ້ຂຶ້ນສູ່ລະດັບສູງໃໝ່ໂດຍໄວ

ທີ່ການພົບປະ, ການນຳສອງທ່ານ ໄດ້ສະແດງຄວາມເພິ່ງພໍໃຈຕໍ່ໝາກຜົນແຫ່ງການຮ່ວມມືດ້ານເສດຖະກິດສອງຝ່າຍ, ພົ້ນເດັ່ນແມ່ນເລື່ອງປະເທດ ສິງກະໂປ ຮັກສາຖານະເປັນນັກລົງທຶນໃຫຍ່ອັນດັບ 2 ຢູ່ ຫວຽດນາມ ດ້ວຍກ່ວາ 3.800 ໂຄງການ, ຍອດຈຳນວນເງິນລົງທຶນສະສົມກວ່າ 81 ຕື້ໂດລາສະຫະລັດ; ມີ 18 ເຂດອຸດສາຫະກຳຫວຽດນາມ-ສິງກະໂປ (VSIP)  ຢູ່ 13 ແຂວງ, ນະຄອນຂອງຫວຽດນາມ, ແມ່ນສັນຍາລັກແຫ່ງການຮ່ວມມືດ້ານເສດຖະກິດສຳເລັດຜົນລະຫວ່າງສອງປະເທດ.

ທ່ານ ເຈີ່ນແທັງເໝິນ ປະທານສະພາແຫ່ງຊາດຫວຽດນາມ  ພົບປະກັບທ່ານ Lawrence Wong ນາຍົກລັດຖະມົນຕີສິງກະໂປ. ພາບ: ຫວູຢູງ

ດ້ວຍພື້ນຖານອັນໜັກແໜ້ນນັ້ນ, ການນຳສອງທ່ານ ໄດ້ຢັ້ງຢືນຄວາມຕັດສິນໃຈຊຸກຍູ້ເສົາຄໍ້າການຮ່ວມມືອັນສຳຄັນນີ້ຕື່ມອີກ, ຜ່ານການເພີ່ມທະວີການແລກປ່ຽນຂໍ້ມູນຂ່າວສານ, ແບ່ງປັນບົດຮຽນປະສົບການໃນການແກ້ໄຂບັນຫາໃໝ່ໃນການພັດທະນາເສດຖະກິດ-ສັງຄົມ; ຊຸກຍູ້ການລົງທຶນບົນພື້ນຖານເສີມຂະຫຍາຍທ່າແຮງຂອງແຕ່ລະປະເທດ, ພິເສດແມ່ນໃນການພັດທະນາລະບົບ VSIP2.0 ແບບຍືນຍົງ, ສະຫຼາດສະຫຼຽວ, ສ້າງບາດກ້າວບຸກທະລຸໃນຂົງເຂດເຕີບໂຕໃໝ່, ຄື: ໂລຢິກສະຕິກສີຂຽວ, ກໍ່ສ້າງສູນດາຕາ, ຜະລິດຊິບເຄື່ອງເຄິ່ງຊັກນຳໄຟຟ້າ, ດັດຊະນີກາກບອນ, ການຄ້ຳປະກັນດ້ານສະບຽງອາຫານ, ການເງິນສີຂຽວ...

ການນຳສອງທ່ານ ຍັງເຫັນດີເປັນເອກະສັນນໍາກັນວ່າ ຕ້ອງຊຸກຍູ້ ແລະເປີດກວ້າງການເຄື່ອນໄຫວຮ່ວມມືດ້ານປ້ອງກັນຊາດ-ປ້ອງກັນຄວາມສະຫງົບຕາມທິດແທດຈິງ, ມີປະສິດທິຜົນ; ພ້ອມທັງແລກປ່ຽນມາດຕະການເພື່ອຍູ້ແຮງການຮ່ວມມືໃນຂົງເຂດສຳຄັນ, ຄື: ການສຶກສາ-ບໍາລຸງສ້າງ, ວັດທະນະທຳ, ການພົບປະແລກປ່ຽນປະຊາຊົນ, ປະກອບສ່ວນເພີ່ມທະວີຄວາມເຂົ້າໃຈຂອງປະຊາຊົນສອງປະເທດ.

ບັນຍາກາດທີ່ການພົບປະ. ພາບ: ຫວູຢູງ

ທ່ານ ເຈິ່ນແທັງເໝິນ ຕີລາຄາສູງ ແລະສະເໜີໃຫ້ລັດຖະບານສິງກະໂປ ສືບຕໍ່ເອົາໃຈໃສ່ ແລະສ້າງເງື່ອນໄຂສະດວກໃຫ້ບັນດາວິສາຫະກິດ, ນັກລົງທຶນ ແລະຊາວຫວຽດນາມ ອາໄສຢູ່ສິງກະໂປ ປະມານ 25.000 ຄົນໄດ້ດຳລົງຊີວິດ, ເຮັດວຽກ ແລະຮ່ຳຮຽນຢ່າງສະດວກສະບາຍ, ປະກອບສ່ວນພັດທະນາການພົວພັນລະຫວ່າງສອງປະເທດ ກໍ່ຄືປະກອບສ່ວນຢ່າງຕັ້ງໜ້າເຂົ້າໃນການພັດທະນາເສດຖະກິດ-ສັງຄົມຂອງສິງກະໂປ.

ກ່ຽວກັບບັນຫາສາກົນ ແລະພາກພື້ນ, ສອງຝ່າຍເຫັນດີຈະສືບຕໍ່ສົມທົບກັນຢ່າງແໜ້ນແຟ້ນ, ສະໜັບສະໜູນເຊິ່ງກັນ ແລະກັນຢູ່ບັນດາເວທີປາໄສ ແລະອົງການຈັດຕັ້ງຫຼາຍຝ່າຍ, ມານະພະຍາຍາມຮັກສາຄວາມສາມັກຄີ, ເປັນເອກະພາບຕໍ່ບົດບາດໃຈກາງຂອງອາຊຽນ ໃນບັນຫາຍຸດທະສາດ, ໃຫ້ມີການກະທົບເຖິງຄວາມໝັ້ນຄົງ ແລະການພັດທະນາຂອງປະຊາຄົມອາຊຽນ ແລະບັນດາປະເທດໃນພາກພື້ນ, ໃນນັ້ນມີບັນຫາທະເລຕາເວັນອອກ.

ຊຸກຍູ້ການຮ່ວມມືຢ່າງແທດຈິງ, ຍືນຍົງລະຫວ່າງສອງສະພາແຫ່ງຊາດ

ຕອນເຊົ້າວັນດຽວກັນ, ພາຍຫຼັງພິທີຕ້ອນຮັບຢ່າງເປັນທາງການຢູ່ຫໍສະພາແຫ່ງຊາດ, ທ່ານ ເຈີ່ນແທັງເໝິນ ປະທານສະພາແຫ່ງຊາດຫວຽດນາມ ໄດ້ມີການພົບປະສອງຝ່າຍກັບທ່ານ Seah Kian Peng ປະທານສະພາແຫ່ງຊາດສິງກະໂປ.

ທີ່ການພົບປະສອງຝ່າຍ, ທ່ານ Seah Kian Peng ປະທານສະພາແຫ່ງຊາດສິງກະໂປ ແລະທ່ານ ເຈີ່ນແທັງເໝິນ ປະທານສະພາແຫ່ງຊາດຫວຽດນາມ ໄດ້ແລກປ່ຽນຢ່າງເລິກເຊິ່ງກວ້າງຂວາງກ່ຽວກັບທິດທາງໃຫຍ່ ແລະມາດຕະການເພື່ອແນໃສ່ເພີ່ມທະວີການຮ່ວມມື ແລະຍົກການພົວພັນໃນໄລຍະຈະມາເຖິງຂຶ້ນສູ່ລະດັບສູງໃໝ່. ການນຳສອງທ່ານໄດ້ເຫັນດີນໍາກັນວ່າ ການຮ່ວມມືດ້ານການເມືອງ ແລະການທູດຈະສືບຕໍ່ສວມບົດບາດຫຼັກແຫຼ່ງ, ກໍານົດທິດທາງໃຫ້ສາຍພົວພັນລະຫວ່າງສອງປະເທດ ໂດຍຜ່ານການເພີ່ມທະວີການແລກປ່ຽນຄະນະຜູ້ແທນ ແລະການພົບປະຂັ້ນສູງ ແລະທຸກຂັ້ນ. ທ່ານ ເຈີ່ນແທັງເໝິນ ສະແດງຄວາມຂອບອົກຂອບໃຈ ແລະສະເໜີໃຫ້ຝ່າຍສິງກະໂປ ສືບຕໍ່ໜູນຊ່ວຍການບຳລຸງກໍ່ສ້າງພະນັກງານຂັ້ນຍຸດທະສາດໃຫ້ແກ່ຫວຽດນາມ, ໃນນັ້ນມີພະນັກງານໃນແຜນຈະເປັນກໍາມະການສູນກາງພັກ ຊຸດທີ 14.

ທ່ານ ເຈີ່ນແທັງເໝິນ ປະທານສະພາແຫ່ງຊາດຫວຽດນາມ ພົບປະສອງຝ່າຍກັບທ່ານ Seah Kian Peng ປະທານສະພາແຫ່ງຊາດສິງກະໂປ. ພາບ: ຢວ໊ານເຕິນ

ບັນຍາກາດທີ່ການພົບປະສອງຝ່າຍ. ພາບ: ຢວ໊ານເຕິນ

ການນຳສອງທ່ານ ຢືນຢັນວ່າ ການຮ່ວມມືດ້ານເສດຖະກິດ-ການຄ້າສືບຕໍ່ແມ່ນເສົາຄ້ຳສຳຄັນໃນການພົວພັນສອງຝ່າຍ; ເຫັນດີສ້າງກອບນິຕິກໍາສະດວກ ແລະຍູ້ແຮງການຕິດຕາມກວດກາບັນດາກະຊວງ, ຂະແໜງການ, ທ້ອງຖິ່ນ, ບັນດາວິສາຫະກິດໃນການຜັນຂະຫຍາຍບັນດາສັນຍາ, ຂໍ້ຕົກລົງທີ່ໄດ້ລົງນາມ, ເປັນຕົ້ນແມ່ນໃນຂົງເຂດເຕີບໂຕໃໝ່, ຄື: ເສດຖະກິດສີຂຽວ, ເສດຖະກິດດີຈີຕອນ, ພະລັງງານສະອາດ, ຄວາມໝັ້ນຄົງທາງເຄືອຂ່າຍອິນເຕີແນັດ, ປ່ຽນແປງໃໝ່ປະດິດສ້າງ... ກໍຄືບັນດາຂົງເຂດຫຼັກແຫຼ່ງອື່ນໆຂອງສັນຍາແມ່ກ່ຽວກັບການເຊື່ອມຕໍ່ສອງພື້ນຖານເສດຖະກິດ. ສອງຝ່າຍກໍ່ເຫັນດີເປັນເອກະສັນເພີ່ມທະວີການຮ່ວມມືໃນຂົງເຂດ, ຄື: ພັດທະນາພື້ນຖານໂຄງລ່າງ ແລະການເຊື່ອມຕໍ່ທາງຄົມມະນາຄົມ, ການທ່ອງທ່ຽວ, ການພົບປະແລກປ່ຽນປະຊາຊົນ. ເມື່ອແລກປ່ຽນກ່ຽວກັບການຮ່ວມມືດ້ານປ້ອງກັນຊາດ-ປ້ອງກັນຄວາມສະຫງົບ, ສອງຝ່າຍຕີລາຄາວ່າ ນີ້ແມ່ນຂົງເຂດສຳຄັນ, ຍັງມີຄວາມສາມາດບົ່ມຊ້ອນຫຼາຍຢ່າງເພື່ອຊຸກຍູ້, ຄື: ເສີມຂະຫຍາຍບັນດາກົນໄກເຈລະຈາ, ການພົບປະແລກປ່ຽນລະຫວ່າງທະຫານເຮືອ, ທະຫານບົກ, ທະຫານອາກາດ, ການກູ້ໄພ-ກູ້ຊີບ, ການແພດທະຫານ, ຍູ້ແຮງການເຊື່ອມຕໍ່ທາງທະເລ, ປົກປັກຮັກສາສິ່ງແວດລ້ອມ ແລະຊີວະພາບທະເລຜ່ານການໝູນໃຊ້ເຕັກໂນໂລຢີໃໝ່.

ທ່ານ ເຈີ່ນແທັງເໝິນ ປະທານສະພາແຫ່ງຊາດຫວຽດນາມ ແລະທ່ານ Seah Kian Peng ປະທານສະພາແຫ່ງຊາດສິງກະໂປ ຢ້ຽມຢາມສໍານັກງານສະພາແຫ່ງຊາດສິງກະໂປ. ພາບ: ຢວ໊ານເຕິນ

ທ່ານ ເຈີ່ນແທັງເໝິນ ປະທານສະພາແຫ່ງຊາດຫວຽດນາມ ແລະທ່ານ Seah Kian Peng ປະທານສະພາແຫ່ງຊາດສິງກະໂປ ພ້ອມດ້ວຍຜູ້ແທນສອງປະເທດ. ພາບ: ຢວ໊ານເຕິນ

ເພື່ອຊຸກຍູ້ການຮ່ວມມືແທດຈິງລະຫວ່າງສອງສະພາແຫ່ງຊາດ, ການນຳສອງທ່ານເຫັນດີເປັນເອກະພາບວ່າ ຄວນສືບຕໍ່ຜັນຂະຫຍາຍຂໍ້ຕົກລົງຮ່ວມມືລະຫວ່າງສະພາແຫ່ງຊາດຂອງສອງປະເທດຢ່າງມີປະສິດທິຜົນ, ປະກອບສ່ວນເຮັດໃຫ້ການພົວພັນຄູ່ຮ່ວມມືຍຸດທະສາດ ຫວຽດນາມ-ສິງກະໂປ ນັບມື້ນັບພັດທະນາ ແລະຂຶ້ນສູ່ລະດັບສູງໃໝ່ໂດຍໄວ; ເພີ່ມທະວີການແລກປ່ຽນຂໍ້ມູນຂ່າວສານ, ແບ່ງປັນປະສົບການຂອງແຕ່ລະປະເທດໃນການປັບປຸງ ລະບອບລະບຽບການ, ນະໂຍບາຍ, ລະບົບກົດໝາຍໃຫ້ສົມບູນ, ຮັບປະກັນສະຖຽນລະພາບດ້ານເສດຖະກິດມະຫາພາກ, ເປີດກວ້າງການພົວພັນຕ່າງປະເທດ, ຍົກສູງປະສິດທິຜົນການເຊື່ອມໂຍງເຂົ້າກັບສາກົນ; ຜັນຂະຫຍາຍການເຄື່ອນໄຫວຮ່ວມມືລະຫວ່າງບັນດາຄະນະກຳມາທິການ ແລະອົງການຂອງສະພາແຫ່ງຊາດ, ລະຫວ່າງບັນດາສະມາຊິກລັດຖະສະພາຂອງສອງປະເທດ, ໃນນັ້ນມີສະມາຊິກລັດຖະສະພາໜຸ່ມ ແລະສະມາຊິກລັດຖະສະພາຍິງ...

ໂດຍ: ທູຈາງ