ປະທານສະພາແຫ່ງຊາດຫວຽດນາມ ເລີ່ມຕົ້ນການຢ້ຽມຢາມ ສິງກະໂປ ຢ່າງເປັນທາງການ

ພາຍຫຼັງໄປຮອດສິງກະໂປ, ທ່ານ ເຈິ່ນແທັງເໝິ້ນ ປະທານສະພາແຫ່ງຊາດຫວຽດນາມ ພ້ອມດ້ວຍພັນລະຍາໄດ້ພົບປະກັບພະນັກງານ, ພາລະກອນສະຖານທູດ ແລະຜູ້ຕາງໜ້າປະຊາຄົມຊາວຫວຽດນາມ ອາໄສຢູ່ ສິງກະໂປ.

ຜູ້ຕາງໜ້າປະຊາຄົມຊາວຫວຽດນາມ ອາໄສຢູ່ ສິງກະໂປ ຕ້ອນຮັບທ່ານ ເຈິ່ນແທັງເໝິ້ນ ປະທານສະພາແຫ່ງຊາດຫວຽດນາມ ແລະພັນລະຍາ. ພາບ: ສໍານັກຂ່າວສານຫວຽດນາມ

ທ່ານປະທານສະພາແຫ່ງຊາດ  ໄດ້ສະແດງຄວາມປິຕິຊົມຊື່ນເມື່ອໄດ້ມາຢ້ຽມຢາມສະຖານທູດ, ພົບປະກັບພະນັກງານ, ລັດຖະກອນສະຖານທູດ, ຜູ້ຕາງໜ້າບັນດາສະມາຄົມ, ຜູ້ຕາງໜ້າປະຊາຄົມຊາວຫວຽດນາມ ອາໄສ ຢູ່ສິງກະໂປ; ຊົມເຊີຍໝາກຜົນການເຄື່ອນໄຫວຂອງສະຖານທູດຫວຽດນາມ ແລະປະຊາຄົມຊາວຫວຽດນາມ ຢູ່ສິງກະໂປ. ກ່າວຄຳເຫັນທີ່ກອງປະຊຸມ, ທ່ານປະທານສະພາແຫ່ງຊາດ ເນັ້ນໜັກວ່າ, ພັກ ແລະ ລັດ ໄດ້ຕີລາຄາສູງບົດບາດຂອງປະຊາຄົມຊາວຫວຽດນາມ ອາໄສຢູ່ສິງກະໂປ, ຖືວ່າ ນີ້ແມ່ນຂົວຕໍ່ສຳຄັນໃນການຊຸກຍູ້ການພົວພັນມິດຕະພາບ ແລະການຮ່ວມມືຮອບດ້ານລະຫວ່າງ ຫວຽດນາມ - ສິງກະໂປ; ພ້ອມທັງ ຢືນຢັນວ່າ ນະໂຍບາຍສະເໝີຕົ້ນສະເໝີປາຍຂອງພັກ ແລະລັດ ແມ່ນຍາມໃດກໍ່ເອົາໃຈໃສ່ ແລະເບິ່ງແຍງປະຊາຄົມຊາວຫວຽດນາມ ຢູ່ຕ່າງປະເທດ.

ຮັບຟັງການປະກອບຄຳເຫັນຂອງບັນດານັກຄົ້ນຄວ້າ, ຜູ້ຕາງໜ້ານັກສຶກສາຫວຽດນາມ ທີ່ພວມຮໍ່າຮຽນ ແລະເຮັດວຽກຢູ່ປະເທດເພື່ອນ,  ແລກປ່ຽນກັບປະຊາຄົມ, ທ່ານປະທານສະພາແຫ່ງຊາດ ຮັບຮູ້ຄວາມປາດຖະໜາ ແລະຄໍາສະເໜີ; ໂດຍໃຫ້ຮູ້ວ່າ, ຄະນະຈະສັງລວມ ແລະສະເໜີຕໍ່ລັດຖະບານ ແລະບັນດາກະຊວງ, ຂະແໜງການທີ່ກ່ຽວຂ້ອງຄົ້ນຄວ້າ ແລະຮັບຮູ້ ເພື່ອຫັນເປັນລະອຽດເຂົ້າໃນກົນໄກ ແລະນະໂຍບາຍ. ທ່ານປະທານສະພາແຫ່ງຊາດ ເຊື່ອໝັ້ນວ່າ: ປະຊາຄົມຊາວຫວຽດນາມ ຢູ່ ສິງກະໂປ ຈະນັບມື້ນັບພັດທະນາ, ສາມັກຄີ, ມານະພະຍາຍາມກໍ່ສ້າງປະຊາຄົມ ແລະຍາມໃດກໍ່ອວ່າຍໜ້າເມືອຫາບ້ານເກີດເມືອງນອນ, ເຂົ້າຮ່ວມກິດຈະການສ້າງສາປະເທດຊາດ.

ໂດຍ: ທະນາພອນ