ຮຸງກາຣີ ປະດັບຫຼຽນໄຊໃຫ້ນັກການທູດຫວຽດນາມ

ທີ່ສໍານັກງານກະຊວງການຕ່າງປະເທດ ແລະການທູດເສດຖະກິດຮຸງກາຣີ ຢູ່ນະຄອນຫຼວງ Budapest, ທ່ານນາງ ຫງວຽນທິບິກຖາວ ເອກອັກຄະລັດຖະທູດວິສາມັນຜູ້ມີອໍານາດເຕັມແຫ່ງ ສສ ຫວຽດນາມ ປະຈໍາ ຮຸງກາຣີ ຫາກໍ່ໄດ້ຮັບປະດັບຫຼຽນໄຊກາກະບາດຮຸງກາຣີ, ຍ້ອນມີການປະກອບສ່ວນອັນໃຫຍ່ຫຼວງເຂົ້າໃນການເຄື່ອນໄຫວເພີ່ມພູນຄູນສ້າງ ແລະພັດທະນາການພົວພັນສອງຝ່າຍ. ນີ້ແມ່ນລາງວັນອັນສູງສົ່ງຂອງລັດຮຸງກາຣີ ມອບໃຫ້ບັນດາບຸກຄົນທີ່ມີການປະກອບສ່ວນແບບແຜນໃນການເຄື່ອນໄຫວວັດທະນະທໍາ, ວິທະຍາສາດ, ສິລະປະ ຫຼື ໃນຂົງເຂດວິຊາສະເພາະ, ເພື່ອຊຸກຍູ້ຜົນປະໂຫຍດຂອງຮຸງກາຣີ ແລະຍົກສູງບັນດາຄຸນຄ່າຂອງມວນມະນຸດ.

ທ່ານນາງເອກອັກຄະລັດຖະທູດ ຫວຽນທິບິກຖາວ ຮັບປະດັບຫຼຽນໄຊກາກະບາດ ຮຸງກາຣີ. ພາບ: vov.vn

ທີ່ພິທີຕ້ອນຮັບ, ຜູ້ຕາງໜ້າຝ່າຍຮຸງກາຣີ ຕີລາຄາສູງບັນດາປະກອບສ່ວນຂອງທ່ານນາງ ຫງວຽນທິບິກຖາວ ໃນການພົວພັນລະຫວ່າງສອງປະເທດກ່ຽວກັບບັນດາຂົງເຂດການພົວພັນຕ່າງປະເທດ, ເສດຖະກິດ, ການສຶກສາ ແລະບໍາລຸງສ້າງ. ນອກຈາກນັ້ນ, ທ່ານນາງ ກໍ່ມີການປະກອບສ່ວນຫຼາຍຢ່າງໃນການສ້າງຕັ້ງການພົວພັນຢ່າງແໜ້ນແຟ້ນກັບສະພາແຫ່ງຊາດ ແລະບັນດາຄະນະ, ຂະແໜງການ ຂຶ້ນກັບລັດຖະບານ ແລະທ້ອງຖິ່ນຂອງຮຸງກາຣີ; ຕັ້ງໜ້າຈັດຕັ້ງຫຼາຍການເຄື່ອນໄຫວໂຄສະນາ, ແນະນໍາພື້ນຖານວັດທະນະທໍາທີ່ເປັນມູນເຊື້ອຫວຽດນາມ ກໍ່ຄືການພົວພັນທີ່ເປັນມູນເຊື້ອລະຫວ່າງສອງປະເທດ ເພື່ອໃຫ້ປະຊາຊົນປະເທດປະຈໍາຖິ່ນເຂົ້າໃຈ ແລະໃຫ້ຄວາມເຄົາລົບກວ່າອີກ, ຜ່ານນັ້ນເປັນຂົວເຊື່ອມຕໍ່ທີ່ສະໜິດຕິດພັນລະຫວ່າງສອງປະເທດ, ສອງຊາດ.

ສ່ວນທ່ານນາງ ຫງວຽນທິບິກຖາວ ກໍ່ສະແດງຄວາມເປັນກຽດ, ເອກອ້າງທະນົງໃຈ ແລະຕື້ນຕັນໃຈເມື່ອໄດ້ຮັບລາງວັນອັນສູງສົ່ງຂອງລັດຮຸງກາຣີ. ທ່ານນາງ ໃຫ້ຄໍາໝັ້ນສັນຍາວ່າ ເຖິງວ່າຢູ່ໃນຖານະຕຳແໜ່ງໃດກໍ່ຈະມານະພະຍາຍາມເພື່ອເພີ່ມພູນຄູນສ້າງໃຫ້ນໍ້າໃຈມິດຕະພາບ, ຄວາມໄວ້ເນື້ອເຊື່ຶອໃຈ ແລະການພັດທະນາຢ່່າງແຂງແຮງໃນທຸກຂົງເຂດຂອງສອງປະເທດ.

ໂດຍ: ໄຊນີດາ