ຫວຽດນາມ ເພີ່ມທະວີການພົວພັນກັບການາດາ ແລະສິງກະໂປ ໃນຂອບເຂດ CPTPP

ໃນຂອບເຂດການເຄື່ອນໄຫວທີ່ກອງປະຊຸມສັນຍາຄູ່ຮ່ວມມືຮອບດ້ານ ແລະກ້າວໜ້າປາຊີຟິກ (CPTPP) ໄດ້ດຳເນີນຢູ່ນະຄອນ Vancouver (ການາດາ) ໃນຕອນເຊົ້າວັນທີ 28 ພະຈິກ, ທ່ານ ຫງວຽນຮົ່ງຢຽນ ໄດ້ມີການພົບປະສອງຝ່າຍກັບລັດຖະມົນຕີກະຊວງການຄ້າສາກົນການາດາ ແລະຮອງນາຍົກລັດຖະມົນຕີ ທັງເປັນລັດຖະມົນຕີການຄ້າ ແລະອຸດສາຫະກໍາສິງກະໂປ.

ທ່ານ ຫງວຽນຮົ່ງຢຽນ (ຢູ່ເຄິ່ງກາງ) ໃນການພົບປະສອງຝ່າຍກັບທ່ານຮອງນາຍົກລັດຖະມົນຕີ, ລັດຖະມົນຕີກະຊວງການຄ້າ ແລະອຸດສາຫະກຳສິງກະໂປ. ພາບ: ຮ່າລິງ

ທີ່ການພົບປະກັບທ່ານນາງ Mary Ng ລັດຖະມົນຕີກະຊວງການຄ້າສາກົນການາດາ, 2 ຝ່າຍໄດ້ປຶກສາຫາລືກ່ຽວກັບການເພີ່ມທະວີການພົວພັນທາງການທູດ ແລະການຄ້າ, ການພົວພັນຄູ່ຮ່ວມມືເສດຖະກິດ ແລະການພົວພັນຄູ່ຮ່ວມມືຮອບດ້ານຫວຽດນາມ - ການາດາ. ທ່ານ ຫງວຽນຮົ່ງຢຽນ ຢືນຢັນວ່າ ຫວຽດນາມ ພ້ອມແລ້ວທີ່ຈະສົມທົບກັບ ການາດາ ແລະບັນດາສະມາຊິກອື່ນໃນທຸກການເຄື່ອນໄຫວເພື່ອນຳເອົາຜົນປະໂຫຍດມາໃຫ້ປະຊາຊົນ ແລະວິສາຫະກິດ, ພ້ອມທັງຊ່ວຍຍົກລະດັບສັນຍາ CPTPP, ປະກອບສ່ວນບົດບາດສຳຄັນກວ່າເຂົ້າໃນການຄ້າຂອງພາກພື້ນ ແລະໂລກ. ກ່ຽວກັບການຮ່ວມມືສອງຝ່າຍ, ຫວຽດນາມ ຮຽກຮ້ອງໃຫ້ການາດາ ສົມທົບກັນຢ່າງແໜ້ນແຟ້ນ ເພື່ອຜັນຂະຫຍາຍເນື້ອໃນຖະແຫຼງການວ່າດ້ວຍການຫັນການຄ້າ ແລະການລົງທຶນເປັນອັນສະດວກ, ຫັນປ່ຽນພະລັງງານຮັບມືກັບການປ່ຽນແປງຂອງດິນຟ້າອາກາດ.

ທ່ານນາງ Mary Ng ລັດຖະມົນຕີການຄ້າສາກົນການາດາ ກ່າວຄຳເຫັນທີ່ກອງປະຊຸມຂ່າວສິ້ນສຸດກອງປະຊຸມ CPTPP. ພາບ: ຮ່າລິງ

ທີ່ການພົບປະກັບທ່ານ Gan Kim Yong ຮອງນາຍົກລັດຖະມົນຕີ, ລັດຖະມົນຕີກະຊວງການຄ້າ ແລະອຸດສາຫະກຳສິງກະໂປ, ທ່ານ ຫງວຽນຮົ່ງຢຽນ ສະເໜີໃຫ້ສິງກະໂປ ສືບຕໍ່ສ້າງເງື່ອນໄຂເພີ່ມທະວີການນໍາເຂົ້າສິນຄ້າຂອງຫວຽດນາມ, ພິເສດແມ່ນຜະລິດຕະພັນກະເສດ, ສິນໃນນໍ້າ, ສະບຽງອາຫານ. 2 ຝ່າຍໄດ້ເຫັນດີເປັນເອກະພາບສົມທົບກັນຢ່າງແໜ້ນແຟ້ນໃນບັນດາການເຄື່ອນໄຫວປະຕິບັດ ແລະຜັນຂະຫຍາຍສັນຍາ CPTPP ເພື່ອແນໃສ່ຍົກສູງປະສິດທິຜົນການປະຕິບັດຂອບການຮ່ວມມືນີ້ໃນໄລຍະຈະມາເຖິງ.

ໂດຍ: ໄຊນີດາ