ໃນບັນຍາກາດມິດຕະພາບ ແລະເປີດອົກເປີດໃຈ, ການນຳສອງທ່ານໄດ້ຢືນຢັນຄວາມໝາຍຂອງການຢ້ຽມຢາມຂັ້ນສູງຄັ້ງທຳອິດນັບແຕ່ຫວຽດນາມ ແລະສາທາລະນະລັດ ໂດມິນິກ ສ້າງຕັ້ງການພົວພັນທາງການທູດ (7 ກໍລະກົດ 2005), ຖືວ່ານີ້ແມ່ນຂີດໝາຍປະຫວັດສາດ ແລະເປັນກຳລັງໜູນສຳຄັນເພື່ອນຳການພົວພັນສອງຝ່າຍກ້າວເຂົ້າສູ່ໄລຍະພັດທະນາໃໝ່ຢ່າງເລິກເຊິ່ງ ແລະແທດຈິງກວ່າອີກ.
    |
 |
|
ທ່ານນາຍົກລັດຖະມົນຕີ ຟ້າມມິງຈິ້ງ ມີການພົບປະເຈລະຈາກັບທ່ານປະທານາທິບໍດີ Luis Abinader. ພາບ: ສໍານັກຂ່າວສານຫວຽດນາມ |
ທີ່ການພົບປະເຈລະຈາ, ສອງຝ່າຍໄດ້ສະແດງຄວາມເພິ່ງພໍໃຈຕໍ່ການພັດທະນາຢ່າງຕັ້ງໜ້າຂອງການພົວພັນມິດຕະພາບ ແລະການຮ່ວມມືສອງຝ່າຍ, ພິເສດແມ່ນໃນຂົງເຂດການເມືອງ - ການທູດ, ເສດຖະກິດ, ການຄ້າ ແລະການຮ່ວມມືພັດທະນາ, ເປັນຕົ້ນແມ່ນການຮ່ວມມື ແລະສະໜັບສະໜູນເຊິ່ງກັນ ແລະກັນຢູ່ບັນດາເວທີປາໄສຫຼາຍຝ່າຍ.
ສອງຝ່າຍເຫັນດີເປັນເອກະພາບຊຸກຍູ້ການເປີດກວ້າງ ແລະເຮັດໃຫ້ການຮ່ວມມືສອງຝ່າຍໃນທຸກຂົງເຂດຢ່າງເລິກເຊິ່ງ, ພິເສດແມ່ນດ້ານເສດຖະກິດ, ການຄ້າ ແລະການລົງທຶນ, ການຫຼີກລ້ຽງການເສຍພາສີສອງເທົ່າ, ກະສິກຳ, ວິທະຍາສາດ-ເຕັກໂນໂລຊີ, ການປ່ຽນແປງໃໝ່ປະດິດຄິດສ້າງ, ການຫັນເປັນດີຈີຕອນ, ການຫັນເປັນສີຂຽວ, ເສດຖະກິດດີຈີຕອນ, ໂທລະຄົມມະນາຄົມ, ພະລັງງານທົດແທນ, ຄວາມໝັ້ນຄົງ ແລະສະກັດກັ້ນ, ຕ້ານອາດຊະຍາກຳ, ການພັດທະນາການທ່ອງທ່ຽວແບບຍືນຍົງ, ວັດທະນະທຳ, ການສຶກສາ, ການປົກປັກຮັກສາສິ່ງແວດລ້ອມ ແລະຮັບມືກັບການປ່ຽນແປງຂອງດິນຟ້າອາກາດ...; ຈັດກອງປະຊຸມຄັ້ງທຳອິດຂອງຄະນະກຳມະການປະສົມກ່ຽວກັບການຮ່ວມມືດ້ານເສດຖະກິດ, ການຄ້າ ແລະອຸດສາຫະກຳ.
|
|
 |
|
ທ່ານນາຍົກລັດຖະມົນຕີ ຟ້າມມິງຈິ້ງ ແລະທ່ານ Luis Abinader Corona ປະທານາທິບໍດີໂດມິນິກ ໄດ້ມີການພົບປະວົງແຄບກ່ອນທີ່ນຳພາຄະນະຜູ້ແທນສອງປະເທດດຳເນີນການພົບປະເຈລະຈາຢ່າງເປັນທາງການ. ພາບ: ສໍານັກຂ່າວສານຫວຽດນາມ |
ການນຳສອງທ່ານເນັ້ນໜັກເຖິງຄວາມຈຳເປັນ ແລະຄວາມສາມາດບົ່ມຊ້ອນໃນການເປີດກວ້າງການຮ່ວມມືດໍາເນີນທຸລະກິດ ແລະການລົງທຶນລະຫວ່າງສອງປະເທດ, ພິເສດແມ່ນໃນຂົງເຂດຄົມມະນາຄົມ, ພະລັງງານ - ນໍ້າມັນອາຍແກັສ, ກໍ່ສ້າງ, ກະສິກຳ ແລະການທ່ອງທ່ຽວ. ສອງຝ່າຍໄດ້ແບ່ງປັນເຖິງຄວາມຈຳເປັນຕ້ອງເພີ່ມທະວີບັນດາການເຄື່ອນໄຫວສົ່ງເສີມການຄ້າ ແລະການລົງທຶນ, ການເຊື່ອມຕໍ່ບັນດາວິສາຫະກິດ, ສ້າງເງື່ອນໄຂເພື່ອໃຫ້ບັນດາຜະລິດຕະພັນສົ່ງອອກທີ່ມີທ່າແຮງຂອງສອງປະເທດເຂົ້າເຖິງຕະຫຼາດ, ແລະຜ່ານແຕ່ລະປະເທດເພື່ອເຂົ້າເຖິງຕະຫຼາດຂອງສອງພາກພື້ນອາຊີຕາເວັນອອກສຽງໃຕ້ ແລະອາເມລິກາລາຕິນ-ຄາຣິບຽນ.
ສິ້ນສຸດການພົບປະເຈລະຈາ, ທ່ານ ຟ້າມມິງຈິ້ງ ນາຍົກລັດຖະມົນຕີ ແລະທ່ານ Luis Abinader Corona ປະທານາທິບໍດີ ໄດ້ມີການປະຊຸມຂ່າວ ແລະປະກາດຖະແຫຼງການຮ່ວມຫວຽດນາມ - ສາທາລະນະລັດ ໂດມິນິກ, ຢືນຢັນຄວາມຕັດສິນໃຈຂອງລັດຖະບານສອງປະເທດ ແລະປະກາດບັນດາທິດທາງ, ມາດຕະການທີ່ສອງຝ່າຍໄດ້ເຫັນດີເປັນເອກະພາບແນໃສ່ເພີ່ມທະວີການພົວພັນສາມັກຄີ, ມິດຕະພາບ ແລະການຮ່ວມມືອັນດີງາມລະຫວ່າງ ຫວຽດນາມ ແລະສາທາລະນະລັດ ໂດມິນິກ ໃນອະນາຄົດ.
ໂດຍ: ຈາງຫງວຽນ