    |
 |
|
ທ່ານພົນເອກ ຟານວັນຢາງ, ລັດຖະມົນຕີກະຊວງປ້ອງກັນປະເທດຫວຽດນາມ ແລະທ່ານ Jean-Pierre Lacroix, ຮອງເລຂາທິການໃຫຍ່ ສປຊ. ພາບ: qdnd.vn |
ທ່ານລັດຖະມົນຕີ ຟານວັນຢາງ ສະແດງຄວາມປິຕິຊົມຊື່ນທີ່ໄດ້ມາຢ້ຽມຢາມສຳນັກງານ ສປຊ ແລະ ພົບປະກັບທ່ານ Jean-Pierre Lacroix ຮອງເລຂາທິການໃຫຍ່ ສປຊ; ຕີລາຄາສູງບົດບາດຂອງ ສປຊ ໃນການສ້າງລະບົບກົດໝາຍສາກົນ, ຮັກສາສັນຕິພາບ, ສະກັດກັ້ນການປະທະກັນ ແລະຮັບມືກັບສິ່ງທ້າທາຍໃນທົ່ວໂລກ; ຢືນຢັນວ່າ ໃນຖານະທີ່ເປັນປະເທດສະມາຊິກຂອງ ສປຊ, ຫວຽດນາມ ຍາມໃດກໍ່ປະຕິບັດຕາມກົດບັດ, ມະຕິ ແລະໂຄງການດໍາເນີນງານຂອງ ສປຊ.
ທ່ານລັດຖະມົນຕີ ຟານວັນຢາງ ເນັ້ນໜັກວ່າ ໃນຂົງເຂດປ້ອງກັນຊາດ, ປ້ອງກັນຄວາມສະຫງົບ, ຫວຽດນາມ ຕັ້ງໜ້າເຂົ້າຮ່ວມຄວາມມານະພະຍາຍາມລວມຂອງ ສປຊ ໃນການແກ້ໄຂສິ່ງທ້າທາຍຄວາມໝັ້ນຄົງທີ່ບໍ່ແມ່ນການທະຫານ, ປະກອບສ່ວນຮັກສາສັນຕິພາບ, ຄວາມໝັ້ນຄົງຢູ່ພາກພື້ນ ແລະສາກົນ, ພິເສດແມ່ນການເຄື່ອນໄຫວຮັກສາສັນຕິພາບ, ຫຼຸດຜ່ອນອາວຸດ, ຕ້ານ ແລະສະກັດກັ້ນອາດຊະຍາກຳຂ້າມຊາຍແດນ. ນອກຈາກນັ້ນ, ໃນຖານະເປັນສະມາຊິກຂອງສົນທິສັນຍາສາກົນກ່ຽວກັບການຫຼດຜ່ອນອາວຸດ, ຫວຽດນາມ ໄດ້ປະຕິບັດບັນດາມະຕິຂອງສະພາຄວາມໝັ້ນຄົງສະຫະປະຊາຊາດ ກ່ຽວກັບການປ້ອງກັນ, ຕ້ານການເຜີຍແຜ່ອາວຸດລ້າງຜານ, ເປັນເຈົ້າການ ແລະຕັ້ງໜ້າເຂົ້າຮ່ວມທຸກການເຄື່ອນໄຫວໃນຂອບເຂດບັນດາສົນທິສັນຍາຢ່າງເຂັ້ມງວດ.
|
|
 |
|
ທ່ານ Jean-Pierre Lacroix, ຮອງເລຂາທິການໃຫຍ່ ສປຊ ແລະທ່ານພົນເອກ ຟານວັນຢາງ, ລັດຖະມົນຕີກະຊວງປ້ອງກັນປະເທດຫວຽດນາມ ຖ່າຍຮູບກັບບັນດາຜູ້ແທນ ແລະນາຍທະຫານ ກອງທັບປະຊາຊົນຫວຽດນາມ ທີ່ພວມປະຕິບັດໜ້າທີ່ ຢູ່ສໍານັກງານ ສປຊ. ພາບ: qdnd.vn |
ເນັ້ນໜັກວ່າ ຫວຽດນາມ ປະຕິບັດແນວທາງການຕ່າງປະເທດເອກະລາດ, ເປັນເຈົ້າຕົນເອງ, ເພື່ອສັນຕິພາບ, ການຮ່ວມມື ແລະການພັດທະນາ, ເປັນເພື່ອນມິດ ແລະເປັນຄູ່ຮ່ວມມືທີ່ໄວ້ເນື້ອເຊື່ອໃຈ ແລະເປັນສະມາຊິກທີ່ມີຄວາມຮັບຜິດຊອບຂອງປະຊາຄົມສາກົນຢ່າງສະເໝີຕົ້ນສະເໝີປາຍ, ທ່ານລັດຖະມົນຕີ ຟານວັນຢາງ ໃຫ້ຮູ້ວ່າ: ຫວຽດນາມ ປາດຖະໜາຢາກສືບຕໍ່ເພີ່ມທະວີເຂົ້າຮ່ວມການເຄື່ອນໄຫວຮັກສາສັນຕິພາບຂອງສະຫະປະຊາຊາດ ທັງຮູບການ ແລະຂອບຂະໜາດການຜັນຂະຫຍາຍ; ພ້ອມກັນນັ້ນ, ເພີ່ມທະວີການຈັດສົ່ງພະນັກງານເຂົ້າຮ່ວມບັນດາການເຄື່ອນໄຫວໂດຍ ສປຊ ຈັດຕັ້ງ ກໍຄືໄດ້ຮັບການສະໜັບສະໜູນ, ການໜູນຊ່ວຍ, ອຳນວຍຄວາມສະດວກຂອງ ສປຊ ໃຫ້ແກ່ທູດທະຫານ ແລະພະນັກງານຂອງກອງທັບປະຊາຊົນຫວຽດນາມ ປະຈຳ ສປຊ.
ສ່ວນທ່ານ Jean-Pierre Lacroix ກໍ່ຕີລາຄາສູງການເຂົ້າຮ່ວມ ທີ່ນັບມື້ນັບຕັ້ງໜ້າ ແລະມີປະສິດທິຜົນຂອງຫວຽດນາມ ໃນການເຄື່ອນໄຫວຮັກສາສັນຕິພາບ ສປຊ, ໃນນັ້ນ, ນາຍທະຫານ, ຕໍາຫຼວດຂອງຫວຽດນາມ ໄດ້ສະແດງໃຫ້ເຫັນຄວາມສາມາດ, ລະດັບຄວາມຮູ້, ລັກສະນະເປັນມືອາຊີບ ແລະຈິດໃຈຮັບຜິດຊອບ ໃນວິວັດການປະຕິບັດໜ້າທີ່ຢູ່ບັນດາຄະນະປະຕິບັດງານ.
ຢືນຢັນວ່າ ຈະສືບຕໍ່ເອົາໃຈໃສ່, ສະໜັບສະໜູນຝ່າຍຫວຽດນາມ ເພີ່ມທະວີກໍາລັງຄວາມສາມາດ, ເປີດກວ້າງການເຂົ້າຮ່ວມການເຄື່ອນໄຫວຮັກສາສັນຕິພາບໃນໄລຍະຈະມາເຖິງ, ທ່ານ Jean-Pierre Lacroix ເຊື່ອໝັ້ນວ່າ ກະຊວງປ້ອງກັນປະເທດຫວຽດນາມ ເວົ້າສະເພາະ ແລະຫວຽດນາມ ເວົ້າລວມ ຈະສືບຕໍ່ປະກອບສ່ວນຢ່າງມີປະສິດທິຜົນເຂົ້າໃນການເຄື່ອນໄຫວດັ່ງກ່າວ, ຜ່ານນັ້ນຢັ້ງຢືນພັນທະ ແລະຄວາມຮັບຜິດຊອບຂອງຕົນຕໍ່ກັບສັນຕິພາບ ແລະ ຄວາມໝັ້ນຄົງສາກົນ, ພ້ອມທັງເພີ່ມທະວີສາຍພົວພັນທີ່ໄວ້ເນື້ອເຊື່ອໃຈ ແລະການຮ່ວມມືກັບ ສປຊ ກໍຄືຄູ່ຮ່ວມມືຕ່າງໆ.
ໂດຍ: ທູຈາງ