ຂະແໜງພາຍໃນສອງປະເທດຫວຽດນາມ-ລາວ ຮ່ວມມືກ່ຽວກັບການບໍາລຸງສ້າງແຫຼ່ງພະນັກງານ, ລັດຖະກອນ
ກປ.ອອນໄລ - ຕອນເຊົ້າວັນທີ 9 ກໍລະກົດ, ທີ່ຮ່າໂນ້ຍ, ພາຍໃຕ້ການເປັນສັກຂີພິຍານຂອງລັດຖະມົນຕີກະຊວງພາຍໃນສອງປະເທດຫວຽດນາມ ແລະລາວ, ມະຫາວິທະຍາໄລພາຍໃນຮ່າໂນ້ຍ (ກະຊວງພາຍໃນ) ໄດ້ລົງນາມບົດບັນທຶກຊ່ວຍຈໍາການຮ່ວມມືກ່ຽວກັບການສຶກສາ, ບໍາລຸງສ້າງ ແລະຄົ້ນຄວ້າກັບກົມຕີລາຄາ ແລະພັດທະນາລັດຖະກອນ (ກະຊວງພາຍໃນລາວ).
ທີ່ພິທີລົງນາມ, ທ່ານ ຫງວຽນບ໊າຈ໊ຽນ, ອະທິການບໍດີມະຫາວິທະຍາໄລພາຍໃນຮ່າໂນ້ຍ ໃຫ້ຮູ້ວ່າ, ຫວຽດນາມ ແລະ ລາວ ແມ່ນສອງປະເທດທີ່ມີມູນເຊື້ອມິດຕະພາບ ແລະການຮ່ວມມືແບບພິເສດ; ມີເປົ້າໝາຍ, ອຸດົມການອັນດຽວກັນ, ໃນການກໍ່ສ້າງປະເທດຊາດຕາມເສັ້ນທາງສັງຄົມນິຍົມ, ມີລະບອບການເມືອງ ແລະລັດ ຄ້າຍຄືກັນ, ພວມພ້ອມກັນດໍາເນີນກິດຈະການປ່ຽນແປງໃໝ່ ແລະພັດທະນາ.
|
|
ພິທີລົງນາມດໍາເນີນພາຍໃຕ້ການເປັນສັກຂີພິຍານຂອງລັດຖະມົນຕີກະຊວງພາຍໃນສອງປະເທດ ຫວຽດນາມ-ລາວ. ພາບ: anninhthudo.vn. |
ທ່ານ ຫງວຽນບ໊າຈ໊ຽນ ໄດ້ກ່າວວ່າ “ສາຍພົວພັນຫວຽດນາມ-ລາວ ແມ່ນສາຍພົວພັນມິດຕະພາບທີ່ເປັນມູນເຊື້ອ, ຄວາມສາມັກຄີແບບພິເສດ ແລະການຮ່ວມມືຮອບດ້ານ. ການພົວພັນດ້ານການເມືອງລະຫວ່າງສອງປະເທດໄດ້ ແລະພວມພັດທະນາບົນພື້ນຖານເລິກເຊິ່ງ ແລະກວ້າງຂວາງ ແລະນັບມື້ນັບໝັ້ນຄົງ”.
ສ່ວນທ່ານ ບຸນຈັນ ນິຍະວົງ ຫົວໜ້າກົມຕີລາຄາ ແລະພັດທະນາລັດຖະກອນ, ຜູ້ຕາງໜ້າກະຊວງພາຍໃນແຫ່ງ ສປປ ລາວ ໄດ້ຂອບໃຈພັກ, ລັດ ແລະກະຊວງພາຍໃນຫວຽດນາມ ໃນການສ້າງເງື່ອນໄຂເພື່ອຊຸກຍູ້ສາຍພົວພັນນີ້. ທ່ານ ບຸນຈັນ ນິຍະວົງ ເນັ້ນໜັກວ່າ: “ນີ້ແມ່ນຂີດໝາຍທີ່ດີງາມໃຫ້ສາຍພົວພັນການຮ່ວມມືຍາວນານລະຫວ່າງມະຫາວິທະຍາໄລພາຍໃນຮ່າໂນ້ຍ, ກະຊວງພາຍໃນຫວຽດນາມ ແລະກົມຕີລາຄາ ແລະພັດທະນາລັດຖະກອນ, ກະຊວງພາຍໃນລາວ”.
ໃນຂອບເຂດຂອງພິທີລົງນາມ, ສອງຝ່າຍເຫັນດີເປັນເອກະພາບສາຍພົວພັນການຮ່ວມມືອັນຍາວນານໃນຂົງເຂດສຶກສາ, ບໍາລຸງສ້າງ, ພັດທະນາ ແລະຍົກສູງຄວາມສາມາດໃຫ້ແຫຼ່ງຊັບພະຍາກອນມະນຸດ ເພື່ອຜົນປະໂຫຍດຂອງສອງຝ່າຍ; ຍົກອອກຂອບເຂດໜຶ່ງ ເພື່ອກໍານົດບັນດາຂົງເຂດການຮ່ວມມື, ຜ່ານນັ້ນເຫັນດີເປັນເອກະພາບ ແລະພັດທະນາບັນດາການເຄື່ອນໄຫວຮ່ວມມືລະອຽດ.
ໂດຍ: ໄຊນີດາ