ຫຼາຍປະເທດ ອີຢູ ຢັ້ງຢືນຄືນໃໝ່ຄຳໝັ້ນສັນຍາກັບ ຢູແກຼນ
ວັນທີ 25 ສິງຫາ, ບັນດາປະເທດ ເອີຣົບ ມີບັນດາການກະທຳໃໝ່ທີ່ກ່ຽວຂ້ອງເຖິງການຊ່ວຍເຫຼືອ ແລະ ຮັບປະກັນຄວາມໝັ້ນຄົງໃຫ້ແກ່ ຢູແກຼນ, ໃນສະພາບການສົງຄາມຍັງບໍ່ທັນມີສັນຍານຫຼຸດຜ່ອນຄວາມເຄັ່ງຕຶງເທື່ອ.
ທ່ານ Jonas Gahr Store ນາຍົກລັດຖະມົນຕີ ນອກແວ ແຈ້ງໃຫ້ຊາບວ່າ ລັດຖະບານຈະສະເໜີຮັກສາລະດັບການຊ່ວຍເຫຼືອ 8,4 ຕື້ USD ໃຫ້ແກ່ ຢູແກຼນ ໃນປີໜ້າ. ຖ້າຫາກສະພາແຫ່ງຊາດຮັບຮອງເອົາ, ການຊ່ວຍເຫຼືອພົນລະເຮືອນ ແລະ ການທະຫານຂອງ ນອກແວ ໃຫ້ແກ່ ຢູແກຼນ ໃນໄລຍະ 2023 – 2030 ຈະຂຶ້ນເຖິງກວ່າ 27 ຕື້ USD. ກ່ອນໜ້ານັ້ນ, ນອກແວ ພ້ອມກັບ ເຢຍລະມັນ ໄດ້ໃຫ້ຄຳໝັ້ນສັນຍາ ເບີກຈ່າຍປະມານ 694 ລ້ານ USD ເພື່ອເພີ່ມທະວີການປ້ອງກັນທາງອາກາດໃຫ້ແກ່ ຢູແກຼນ, ໃນນັ້ນ ມີແຜນການຊື້ 2 ລະບົບປ້ອງກັນລູກສອນໄຟ Patriot.
ສ່ວນທ່ານ Volodymyr Zelensky ປະທານາທິບໍດີ ຢູແກຼນ ໃຫ້ຮູ້ວ່າ Kiev ຕັ້ງເປົ້າໝາຍລະດົມເງິນຈາກບັນດາພັນທະມິດ ຢ່າງໜ້ອຍສຸດ 1 ຕື້ USD ຕໍ່ເດືອນ ເພື່ອຊື້ອາວຸດ ອາເມລິກາ, ໂດຍຖືນີ້ແມ່ນເງື່ອນໄຂຈຳເປັນເພື່ອຮັກສາຄວາມສາມາດປ້ອງກັນຕົວ. ໃນຖະແຫຼງການທີ່ໄດ້ຍົກອອກມາໃນການປະຊຸມຂ່າວຮ່ວມກັບທ່ານ Jonas Gahr Store ນາຍົກລັດຖະມົນຕີ ນອກແວ ຢູ່ Kiev, ທ່ານ Volodymyr Zelensky ສະເໜີ ນອກແວ ອາດສາມາດປະກອບສ່ວນເຂົ້າໃນການຮັບປະກັນຄວາມໝັ້ນຄົງໃຫ້ແກ່ ຢູແກຼນ ໃນຂົງເຂດປ້ອງກັນອາກາດ ແລະ ປ້ອງກັນຄວາມສະຫງົບໃນການເດີນທະເລ.
ແຫຼ່ງຄັດຈາກ vovworld.vn