ປະທານສະພາແຫ່ງຊາດ ພົບປະກັບຄະນະຜູ້ແທນທີ່ມີຄຸນງາມຄວາມດີ ກອງພັນໃຫຍ່ 271

ທ່ານ ເຈິ່ນແທັງເໝິນ ປະທານສະພາແຫ່ງຊາດຫວຽດນາມ ພ້ອມກັບຜູ້ແທນເຂົ້າຮ່ວມການພົບປະ. ພາບ: ເລິມຮ່ຽນ

ທີ່ການພົບປະ, ທ່ານປະທານສະພາແຫ່ງຊາດ ເຈິ່ນແທັງເໝິນ ໄດ້ສະແດງຄວາມຮູ້ສຶກຕໍ່ການພົບປະກັບນັກຮົບເກົ່າ, ຜູ້ທີ່ມີຄຸນງາມຄວາມດີ ກອງພັນໃຫຍ່ 271 ໃນໂອກາດທີ່ມີຄວາມໝາຍທີ່ສຸດເມື່ອທົ່ວປະເທດພ້ອມກັນສະເຫຼີມສະຫຼອງ 80 ປີແຫ່ງວັນສ້າງຕັ້ງກອງທັບປະຊາຊົນຫວຽດນາມ ແລະ 35 ປີແຫ່ງວັນບຸນປ້ອງກັນຊາດທົ່ວປວງຊົນ ແລະພວມກະກຽມຕ້ອນຮັບປີໃໝ່ສາກົນ 2025. ຫວນຄືນປະຫວັດສາດການຕໍ່ສູ້ ແລະໄຊຊະນະຂອງກອງພັນໃຫຍ່ 271, ທ່ານປະທານສະພາແຫ່ງຊາດ ໄດ້ເນັ້ນໜັກເຖິງຄວາມພາກພູມໃຈຕໍ່ມູນເຊື້ອວິລະຊົນ ກໍ່ຄືຄວາມທຸກຍາກລຳບາກ, ການເສຍສະຫຼະຊີວິດຂອງກອງພັນໃຫຍ່ 271 ທະຫານເຂດຈິທຽນ ໃນພາລະກິດຕໍ່ສູ້ປົດປ່ອຍປະເທດຊາດ. ທ່ານປະທານສະພາແຫ່ງຊາດ ເຈິ່ນແທັງເໝິນ ສະແດງວ່າ: "ດ້ວຍປະຫວັດສາດຕໍ່ສູ້ວິລະຊົນ, ວິລະກຳອັນມີຊື່ສຽງໂດ່ງດັງ, ກອງພັນໃຫຍ່ 271 ໄດ້ປະກອບສ່ວນຍົກໃຫ້ເຫັນປະຫວັດສາດອັນສະຫງ່າລາສີຂອງຊົນຊາດເຮົາ, ປະເທດເຮົາ, ກອງທັບເຮົາ".

ປີ 2025 ແມ່ນປີແຫ່ງການເລັ່ງຄວາມໄວ, ບຸກທະລຸເພື່ອປະເທດກ້າວເຂົ້າສູ່ສັງກາດໃໝ່-ສັງກາດບືນຕົວຂຶ້ນຂອງຊາດຫວຽດນາມ. ທ່ານປະທານສະພາແຫ່ງຊາດ ເຈິ່ນແທັງເໝິນ ປາດຖະໜາວ່າ ບັນດານັກຮົບເກົ່າ, ຜູ້ທີ່ມີຄຸນງາມຄວາມດີ ກອງພັນໃຫຍ່ 271 ທະຫານເຂດຈິທຽນ ຈະສືບຕໍ່ເສີມຂະຫຍາຍຄຸນທາດ, ມູນເຊື້ອອັນສະຫງ່າງາມຂອງທະຫານລຸງໂຮ່, ເປັນແບບຢ່າງໃນການອອກແຮງງານ, ເຮັດໃຫ້ຄອບຄົວ, ບ້ານເກີດເມືອງນອນອຸດົມຮັ່ງມີ ແລະປະກອບສ່ວນກໍ່ສ້າງ ແລະພັດທະນາປະເທດຊາດ...

ໂດຍ: ເຈິ່ນຮວ່ຽນ