ຫ້ອງການການຄ້າຫວຽດນາມ ປະຈຳ ຟີລິບປິນ ໃຫ້ຮູ້ວ່າ: ຍອດວົງເງິນນຳເຂົ້າ-ສົ່ງອອກລະຫວ່າງຫວຽດນາມ ແລະຟີລິບປິນ ໃນປີນີ້ອາດຈະບັນລຸ 8,5 ຕື້ໂດລາສະຫະລັດ, ໃນນັ້ນສົ່ງອອກເກີນດຸນບັນລຸກວ່າ 3 ຕື້ໂດລາສະຫະລັດ.

leftcenterrightdel
ພາບປະກອບຄັດຈາກ: congthuong.vn

ຕາມຕົວເລກສະຖິຕິຂອງກົມນຳເຂົ້າ - ສົ່ງອອກ - ກະຊວງອຸດສາຫະກຳ ແລະການຄ້າຫວຽດນາມ, ຍອດວົງເງິນນຳເຂົ້າ - ສົ່ງອອກລະຫວ່າງ ຫວຽດນາມ ແລະຟີລິບປິນ ຮອດທ້າຍເດືອນ ພະຈິກ 2024 ບັນລຸກວ່າ 8 ຕື້ໂດລາສະຫະລັດ. ນີ້ແມ່ນການເຕີບໂຕທີ່ໜ້າປະທັບໃຈໃນສະພາບທີ່ຫວຽດນາມ ພວມຊອກຫາທິດທາງໃໝ່ໃນການສົ່ງອອກສິນຄ້າ, ຊ່ວຍຫລຸດຜ່ອນຄວາມຫຍຸ້ງຍາກ ແລະຄວາມກົດດັນໃຫ້ບັນດາວິສາຫະກິດຜະລິດພາຍໃນປະເທດ. ປະກອບສ່ວນເຮັດໃຫ້ວົງເງິນສົ່ງອອກຂອງຫວຽດນາມ ໄປຍັງຕະຫຼາດຟີລິບປີນ ໃນປີນີ້ເຕີບໂຕເປັນໜ້າປະທັບໃຈ, ທຳອິດແມ່ນເຂົ້າສານດ້ວຍວົງເງິນສົ່ງອອກໃນ 11 ເດືອນຂອງປີນີ້ບັນລຸເກືອບ 2,5 ຕື້ໂດລາສະຫະລັດ, ເພີ່ມຂຶ້ນ 57,2% ເມື່ອທຽບໃສ່ໄລຍະດຽວກັນຂອງປີ 2023.

ທ່ານ ຟຸ່ງວັນແທ່ງ ທີ່ປຶກສາການຄ້າຫວຽດນາມ ປະຈຳ ຟີລິບປິນ ຖືວ່າ: “ສືບຕໍ່ສ້າງ ແລະຮັກສາຄວາມໄວ້ເນື້ອເຊື່ອໃຈ ແລະອິດທິພົນຊື່ສຽງກັບຄູ່ຄ້າຢູ່ຕະຫຼາດຟີລິບປິນ, ມີຍຸດທະສາດຍາວນານ ເພື່ອສືບຕໍ່ຮັກສາການພົວພັນກັບຄູ່ຄ້າທີ່ມີຢູ່ແລ້ວ, ພ້ອມທັງຊອກຫາກາລະໂອກາດ ແລະເປີດກວ້າງການຮ່ວມມືກັບບັນດາຄູ່ຮ່ວມມືໃໝ່. ທີສອງ, ສືບຕໍ່ຫັນຜະລິດຕະພັນເປັນຫຼາຍຮູບຫຼາຍແບບ, ບໍ່ພຽງແຕ່ສຸມໃສ່ສົ່ງອອກເຂົ້າສານທີ່ມີຄຸນນະພາບສູງ ເພື່ອຮັບໃຊ້ຄວາມຕ້ອງການຂອງຜູ້ມີລາຍຮັບສູງເທົ່ານັ້ນ, ຫາກຍັງເອົາໃຈໃສ່ເປີດກວ້າງເຖິງເປົ້າໝາຍທີ່ມີລາຍຮັບຕໍ່າ ແລະປານກາງອີກດ້ວຍ.

ສິນຄ້າບາງປະເພດທີ່ມີວົງເງິນສົ່ງອອກຕະຫຼາດຟີລິບປິນ ບັນລຸລະດັບສູງ, ລວມມີ: ເຄື່ອງຈັກ, ອຸປະກອນ, ເຄື່ອງມື ແລະເຄື່ອງອາໄຫຼ່... ໃນຂະນະນັ້ນ, ສິນຄ້າບາງປະເພດທີ່ນຳເຂົ້າຈາກຕະຫຼາດຟີລິບປິນ ບັນລຸວົງເງິນສູງ, ລວມມີ: ຄອມພິວເຕີ, ຜະລິດຕະພັນເອເລັກໂຕນິກ ແລະເຄື່ອງອາໄຫຼ່...

ໂດຍ: ໄຊນີດາ