ການພົບປະສອງຝ່າຍລະຫວ່າງກອງບັນຊາການທະຫານແຂວງເຊກອງ ກັບທະຫານຊາຍແດນບັນດາແຂວງກວາງນາມ, ເທື່ອທຽນເຫວ້, ກອນຕູມ

ຕາງໜ້າບັນດາກົມກອງເຊັນບົດບັນທຶກການພົບປະສອງຝ່າຍ. ພາບ: ງອັກບິ່ງ

ຄະນະຜູ້ແທນກອງບັນຊາການທະຫານແຂວງເຊກອງ ນໍາໂດຍທ່ານພົນຈັດຕະວາ ທອງສີ ກຸນສະນະ ຫົວໜ້າການທະຫານກອງບັນຊາການທະຫານແຂວງເຊກອງ. ຄະນະຜູ້ແທນຫວຽດນາມ ນໍາໂດຍທ່ານພັນເອກພິເສດ ຮວ່າງວັນເໝິ໊ນ ຫົວໜ້າການເມືອງທະຫານຊາຍແດນແຂວງກວາງນາມ; ຍັງເຂົ້າຮ່ວມມີທ່ານພັນເອກພິເສດ ຟ້າມຕຸ່ງເລິມ ຫົວໜ້າການເມືອງທະຫານຊາຍແດນແຂວງເທື່ອທຽນເຫວ້ ແລະທ່ານພັນເອກພິເສດ ເລມິງຈ໊ິງ ຫົວໜ້າການເມືອງທະຫານຊາຍແດນແຂວງກອນຕູມ.

ທີ່ການພົບປະ, ສອງຝ່າຍໄດ້ຕີລາຄາສູງໝາກຜົນວຽກງານສົມທົບກັນປົກປັກຮັກສາຊາຍແດນແຕ່ເດືອນ ກໍລະກົດ 2023 ມາຮອດປະຈຸບັນ, ກອງບັນຊາການທະຫານຊາຍແດນສາມແຂວງກວາງນາມ, ເທື່ອທຽນເຫວ້, ກອນຕູມ ໄດ້ສົມທົບກັນຢ່າງແໜ້ນແຟ້ນກັບກອງບັນຊາການທະຫານຊາຍແດນແຂວງເຊກອງ ໃນການຄຸ້ມຄອງ, ປົກປັກຮັກສາຊາຍແດນ, ຮັກສາລະບົບຫຼັກໝາຍຊາຍແດນໃຫ້ຢູ່ໃນສະພາບເດີມ; ສົມທົບກັນຮັກສາຄວາມໝັ້ນຄົງດ້ານການເມືອງ, ຄວາມເປັນລະບຽບຮຽບຮ້ອຍທາງສັງຄົມຢູ່ສອງຟາກຊາຍແດນ ແລະການລາດຕະເວນ, ຄວບຄຸມ, ສະກັດກັ້ນບັນດາການເຄື່ອນໄຫວເຂົ້າອອກເມືອງຜິດກົດໝາຍຢ່າງມີປະສິດທິຜົນ; ຮັກສາການປະຕິບັດອະນຸສັນຍາກ່ຽວກັບຊາຍແດນ ແລະບັນດາຫຼັກໝາຍຊາຍແດນ, ສັນຍາກ່ຽວກັບລະບຽບການຄຸ້ມຄອງຊາຍແດນທາງບົກ ແລະດ່ານຊາຍແດນທາງບົກຫວຽດນາມ-ລາວຢ່າງເຂັ້ມງວດ; ສ້າງເງື່ອນໄຂສະດວກໃຫ້ແກ່ການພັດທະນາເສດຖະກິດ-ສັງຄົມ; ເພີ່ມທະວີການພົວພັນສາມັກຄີ, ມິດຕະພາບແບບພິເສດລະຫວ່າງອໍານາດການປົກຄອງ, ກໍາລັງປະກອບອາວຸດ ແລະປະຊາຊົນທີ່ຢູ່ສອງຟາກຊາຍແດນ.

ທ່ານພັນເອກພິເສດ ຟ້າມຕຸ່ງເລິມ ຫົວໜ້າການເມືອງທະຫານຊາຍແດນແຂວງເທື່ອທຽນເຫວ້ມອບຂອງຂວັນໃຫ້ກອງບັນຊາການທະຫານຊາຍແດນແຂວງເຊກອງ, ລາວ. ພາບ: ງອັກບິ່ງ

ເນື່ອງໃນໂອກາດວັນຊາດແຫ່ງ ສປປ ລາວ, ບຸນປີໃໝ່ຫວຽດນາມ, ບຸນປີໃໝ່ລາວ ປີ 2024, ກອງບັນຊາການທະຫານສາມແຂວງກວາງນາມ, ເທື່ອທຽນເຫວ້, ກອນຕູມ ແລະບັນດາຄ້າຍທະຫານຊາຍແດນທາງບົກໄດ້ມອບຂອງຂວັນໃຫ້ກອງບັນຊາການທະຫານແຂວງເຊກອງ, ກໍາລັງປົກປັກຮັກສາຊາຍແດນ ແລະອໍານາດການປົກຄອງທ້ອງຖິ່ນທີ່ຢູ່ຕິດກັບຊາຍແດນ, ດ້ວຍເງິນຈໍານວນເກືອບ 200 ລ້ານດົ່ງ. ນອກຈາກນັ້ນ, ບັນດາກົມກອງຍັງໄດ້ເປັນເສນາທິການໃຫ້ຄະນະກໍາມະການບັນດາເມືອງ, ແຂວງ, ປຸກລະດົມວິສາຫະກິດມອບຂອງຂວັນໃຫ້ອໍານາດການປົກຄອງ, ກໍາລັງປົກປັກຮັກສາຊາຍແດນ, ດ່ານຊາຍແດນທີ່ຢູ່ເຊິ່ງໜ້າມີມູນຄ່າທັງໝົດກວ່າ 80 ລ້ານດົ່ງ; ຊີ້ນໍາບັນດາຄ້າຍທະຫານຊາຍແດນທາງບົກສືບຕໍ່ຮັກສາລາຍການ “ຊ່ວຍນ້ອງໄປຮຽນ”, ໜູນຊ່ວຍພວກນ້ອງນັກຮຽນຢູ່ບັນດາບ້ານຕິດກັບຊາຍແດນດ້ວຍເງິນຊ່ວຍເຫຼືອຈຳນວນ 500 ແສນດົ່ງ/ນ້ອງ/ເດືອນ.

ສອງຝ່າຍເຫັນດີເປັນເອກະພາບທິດທາງສົມທົບກັນປີ 2025, ສຸມໃສ່ເຂົ້າບັນດາເນື້ຶອໃນຈຸດສຸມແມ່ນ: ຕັ້ງໜ້າເປັນເສນາທິການໃຫ້ອໍານາດການປົກຄອງທຸກຂັ້ນຂອງສອງຝ່າຍໃນການພັດທະນາເສດຖະກິດ, ສັງຄົມເຂດຊາຍແດນ, ສ້າງຊາຍແດນສັນຕິພາບ, ສະຖຽນລະພາບ ແລະພັດທະນາ; ຮັກສາວຽກງານລາດຕະເວນສອງຝ່າຍເພື່ອປົກປັກຮັກສາຊາຍແດນ; ສືບຕໍ່ຮັກສາແຈ້ງການ, ແລກປ່ຽນສະພາບການ, ສົມທົບກັນແກ້ໄຂ.

ໂດຍ: ໄຊນີດາ