ກະຊວງປ້ອງກັນປະເທດຫວຽດນາມ ພົບປະສັງສັນນັກຮົບເກົ່າ ລັດເຊຍ

ພິທີຖະຫວາຍດອກໄມ້ຢູ່ອະນຸສາວະລີປະທານ ໂຮ່ຈີມິນ ໄດ້ດຳເນີນໃນບັນຍາກາດເຄັ່ງຂຶມ ແລະຕື້ນຕັນໃຈ. ທ່ານພົນໂທ ຮວ່າງຊວນຈ໊ຽນ ສະແດງຄວາມຂອບອົກຂອບໃຈຕໍ່ການນຳ ແລະປະຊາຊົນລັດເຊຍ ທີ່ໄດ້ສະຫງວນອາລົມຈິດ ແລະຄວາມຮັກແພງໃຫ້ແກ່ຜູ້ນຳທີ່ແສນເຄົາລົບຮັກຂອງປະຊາຊົນຫວຽດນາມ; ເຊື່ອໝັ້ນວ່າ ອະນຸສາວະລີປະທານ ໂຮ່ຈີມິນ ຢູ່ Saint Petersburg ຈະກາຍເປັນສະຖານທີ່ວັດທະນະທໍາໃຫ້ປະຊາຊົນສອງປະເທດ, ຕັກເຕືອນຮຸ່ນຕ່າງໆມານະພະຍາຍາມກວ່າອີກ ເພື່ອເພີ່ມພູນຄູນສ້າງນ້ຳໃຈມິດຕະພາບຫວຽດນາມ - ລັດເຊຍ.

ທ່ານພົນໂທ ຮວ່າງຊວນຈ໊ຽນ ກ່າວຄຳເຫັນທີ່ການພົບປະສັງສັນກັບບັນດານັກຮົບເກົ່າລັດເຊຍ ພ້ອມດ້ວຍຍາດຕິພີ່ນ້ອງ. ພາບ: ກ່ຽວຈິງ

ທີ່ການພົບສັງສັນກັບນັກຮົບເກົ່າ ພ້ອມດ້ວຍຍາດຕິພີ່ນ້ອງຂອງນະຄອນ Saint Petersburg, ທ່ານພົນໂທ ຮວ່າງຊວນຈ໊ຽນ ແບ່ງປັນວ່າ ປະຫວັດສາດໃຫ້ເຫັນວ່າການພົວພັນລະຫວ່າງຫວຽດນາມ ກັບ ໂຊວຽດ ໃນເມື່ອກ່ອນ, ສະຫະພັນລັດເຊຍ ໃນປະຈຸບັນ ຍາມໃດກໍ່ອົບອຸ່ນ, ໄວ້ເນື້ອເຊື່ອໃຈ, ຜ່ານຜ່າການທົດສອບທຸກປະການຂອງການເວລາ ແລະການຜັນແປຂອງປະຫວັດສາດ. ບົນພື້ນຖານຄວາມໝັ້ນແກ່ນຂອງນ້ຳໃຈມິດຕະພາບ ແລະການຮ່ວມມືສະໜິດຕິດພັນລະຫວ່າງສອງປະເທດ ຫວຽດນາມ-ສະຫະພັນລັດເຊຍ ທີ່ໄດ້ສ້າງຂຶ້ນໃນການຕໍ່ສູ້ອັນທຸກຍາກລຳບາກນາໆປະການ ເພື່ອຍາດເອົາເອກະລາດ ແລະເສລີພາບຂອງປະຊາຊົນຫວຽດນາມ. ນີ້ແມ່ນຊັບສົມບັດອັນລ້ຳຄ່າ, ແມ່ນພື້ນຖານອັນໝັ້ນແກ່ນໃຫ້ການພົວພັນຄູ່ຮ່ວມມືຍຸດທະສາດຮອບດ້ານຫວຽດນາມ-ສະຫະພັນລັດເຊຍ ໃນໄລຍະປະຈຸບັນ. ໃນໄລຍະມໍ່ໆມານີ້, ກະຊວງປ້ອງກັນປະເທດຫວຽດນາມ ໄດ້ເຊີນບັນດາຄະນະນັກຮົບເກົ່າໂຊວຽດ ມາຢ້ຽມຢາມຫວຽດນາມ.

ບັນດາຜູ້ແທນທີ່ການພົບປະສັງສັນກັບບັນດານັກຮົບເກົ່າ ພ້ອມດ້ວຍຍາດຕິພີ່ນ້ອງຂອງນະຄອນ Saint Petersburg. ພາບ: ກ່ຽວຈິງ

ທ່ານພົນໂທ ຮວ່າງຊວນຈ໊ຽນ ມອບຂອງຂວັນໃຫ້ແກ່ບັນດານັກຮົບເກົ່າລັດເຊຍ. ພາບ: ກ່ຽວຈິງ

ທ່ານພົນໂທ ຮວ່າງຊວນຈ໊ຽນ ຢັ້ງຢືນວ່າ ທັງສອງປະເທດຈະຈົດຈຳບັນດານັກຮົບສາກົນກອມມູນິດ, ບັນດາລູກຜູ້ປະເສີດຂອງຫວຽດນາມ ທີ່ໄດ້ເສຍສະຫຼະຊີວິດເພື່ອປົກປ້ອງ Moscow ໃຫ້ຫຼຸດພົ້ນອອກຈາກລະບອບຟາດຊິດ ເຢຍລະມັນ ໃນຊຸມວັນເດືອນທີ່ດຸເດືອດຂອງລະດູໜາວປີ 1941, ກໍ່ຄືຍາມໃດກໍ່ຈົດຈຳການສະໜັບສະໜູນ ແລະການຊ່ວຍເຫຼືອຢ່າງສຸດຈິດສຸດໃຈທີ່ປະຊາຊົນ ໂຊວຽດ ໄດ້ສະຫງວນໃຫ້ແກ່ຫວຽດນາມ ໃນການຕໍ່ສູ້ຍາດເອົາເອກະລາດ ແລະທ້ອນໂຮມປະເທດເປັນເອກະພາບ, ປົກປັກຮັກສາປະເທດຊາດ.

ໂດຍ: ແສງເດືອນ