ກອງຊ່າງແສງ, ແພດທະຫານຫວຽດນາມ ແລະອິນເດຍ ຝຶກແອບທັກສະກ່ຽວກັບການຮັກສາສັນຕິພາບ
ກປ.ອອນໄລ - ໃນຂອບເຂດການຝຶກຊ້ອມສອງຝ່າຍລະຫວ່າງຫວຽດນາມ ແລະອິນເດຍ ກ່ຽວກັບການຮັກສາສັນຕິພາບຂອງສະຫະປະຊາຊາດ ປີ 2024 (VINBAX 2024) ດ້ວຍຫົວຂໍ້ “ຜັນຂະຫຍາຍການເຄື່ອນໄຫວ ແລະປະຕິບັດໜ້າທີ່ຂອງກອງຊ່າງແສງ ສົມທົບກັບແພດທະຫານ ໃນຮູບແຖວກົມກອງເຂົ້າຮ່ວມການເຄື່ອນໄຫວຮັກສາສັນຕິພາບ ສປຊ” ແຕ່ວັນທີ 3-24 ພະຈິກ ຢູ່ອິນເດຍ, ກໍາລັງຮັກສາສັນຕິພາບຂອງສອງປະເທດ ໄດ້ສົມທົບກັນຝຶກແອບປະຕິບັດບັນດາທັກສະປະຕິບັດໜ້າທີ່ ເມື່ອເກີດສະພາວະການໃຫ້ແທດເໝາະກັບສະພາບຕົວຈິງຂອງຄະນະປະຕິບັດງານ.
ໃນໄລຍະຝຶກແອບປະຕິບັດທັກສະວິຊາສະເພາະ, ກອງຊ່າງແສງຮັກສາສັນຕິພາບຫວຽດນາມ ແລະອິນເດຍ ສົມທົບກັນຝຶກແອບປະຕິບັດທັກສະເກັບກູ້ລະເບີດບໍ່ທັນແຕກ, ຮັບປະກັນຄວາມປອດໄພໃຫ້ກຳລັງຮັກສາສັນຕິພາບ ສປຊ. ເນື້ອໃນໄດ້ຈັດຂຶ້ນໂດຍອີງໃສ່ສະພາວະການສົມມຸດຖານທີ່ເກີດຂຶ້ນຢູ່ຖານທັບ AKOKA ຂອງ ສປຊ. ກອງຊ່າງແສງມີໜ້າທີ່ສືບສວນ, ເກັບກູ້ລະເບີດບໍ່ທັນແຕກທີ່ຕົກຄ້າງໃນບໍລິເວນ. ສໍານັກບັນຊາ ຄະນະປະຕິບັດງານຮຽກຮ້ອງໃຫ້ໜ້າທີ່ດັ່ງກ່າວຕ້ອງປະຕິບັດສຳເລັດກ່ອນ 24 ຊົ່ວໂມງ ກ່ອນທີ່ກຳລັງຕົ້ນຕໍອອກເດີນທາງ.
    |
 |
|
ຝຶກແອບທັກສະເກັບກູ້ລະເບີດບໍ່ທັນແຕກ. ພາບ: qdnd.vn |
ຕາມຄໍາສະເໜີຂອງກົມກອງ, ອົງການປະຕິບັດງານດ້ານລະເບີດຝັງດິນຂອງສະຫະປະຊາຊາດ (UNMAS) ສົມທົບກັນຈັດສົ່ງນັກຊ່ຽວຊານທີ່ມີປະສົບການ ແລະອຸປະກອນທໍາລາຍລະເບີດຢ່າງວ່ອງໄວພາຍຫຼັງນຳໃຊ້ເຕັກນິກວິຊາສະເພາະ, ນັກຊ່ຽວຊານໄດ້ທໍາລາຍລະເບີດສຳເລັດຜົນ, ຮັບປະກັນຄວາມປອດໄພໃຫ້ກຳລັງຮັກສາສັນຕິພາບ ສປຊ.
ການຮັບມືກັບສະພາວະການໄດ້ປະຕິບັດສໍາເລັດຜົນ, ບັນລຸຕາມຄວາມຮຽກຮ້ອງຕ້ອງການ ແລະຮັບປະກັນຄວາມປອດໄພ. ເຖິງວ່າເຂົ້າຮ່ວມການຝຶກແອບໃນໄລຍະສັ້ນ, ແຕ່ກອງຊ່າງແສງຫວຽດນາມ ໄດ້ສະແດງໃຫ້ເຫັນຄວາມສາມາດໃນການກຳແໜ້ນ ແລະແກ້ໄຂສະພາວະການ ດ້ວຍທັກສະ, ປະສົບການ ແລະຄຸນນະທາດ.
|
|
 |
|
ກອງຊ່າງແສງຫວຽດນາມ ແລະອິນເດຍ ສົມທົບກັນປະຕິບັດທັກສະຕິດຕັ້ງເຮືອນເຫຼັກ, ຄ້າຍສັງເກດ. ພາບ: qdnd.vn |
VINBAX 2024 ພວມຢູ່ໃນໄລຍະຝຶກແອບທັກສະລົງເລິກວິຊາສະເພາະ, ກ່ອນທີ່ຈະເຂົ້າສູ່ໄລຍະຝຶກຊ້ອມສົມທົບ. ໃນໄລຍະນີ້, ກໍາລັງຊ່າງແສງ ໄດ້ຮັບການຝຶກແອບກ່ຽວກັບຮູບແບບຖານທັບຢູ່ຄະນະປະຕິບັດງານຮັກສາສັນຕິພາບ ສະຫະປະຊາຊາດ, ໂຄງປະກອບ ແລະວິທີການກໍ່ສ້າງໂຄງການຈຳນວນໜຶ່ງເພື່ອຮັບປະກັນຄວາມປອດໄພ ແລະຄວາມໝັ້້ນຄົງຢູ່ຄະນະປະຕິບັດງານ; ຝຶກແອບການກໍ່ສ້າງສາງລູກປືນ, ຕິດຕັ້ງເຮືອນເຫຼັກ, ລະບົບຮົ້ວປ້ອງກັນ, ຄ້າຍສັງເກດ ຢູ່ຖານທັບຂອງ ສປຊ.
|
|
 |
|
ກໍາລັງແພດທະຫານ ເຂົ້າຮ່ວມການຝຶກແອບ. ພາບ: qdnd.vn |
|
|
 |
|
ຝຶກແອບປະຖົມພະຍາບານ ໃຫ້ຜູ້ຖືກບາດເຈັບ. ພາບ: qdnd.vn |
|
|
 |
|
ຍົນເຮລີກົບແຕຂອງກໍາລັງທະຫານອາກາດອິນເດຍ ເຂົ້າຮ່ວມການຝຶກແອບ. ພາບ: qdnd.vn |
ກຳລັງແພດທະຫານ ເຂົ້າຮ່ວມການຝຶກແອບກ່ຽວກັບຂ້ັນຕອນປະຖົມພະຍາບານທາງອາກາດ ແລະຂົນສົ່ງຄົນເຈັບຢູ່ກາງສະໜາມ, ໂຄງປະກອບການຈັດຕັ້ງຂອງໂຮງໝໍກາງສະໜາມຂັ້ນ 2 ແລະກອງຂົນສົ່ງຄົນເຈັບນອກໂຮງໝໍ; ສັງເກດການຝຶກຊ້ອມໃນພູມສາດຕົວຈິງ; ປະຕິບັດການແກ້ໄຂກໍລະນີຫຼາຍຄົນຖືກບາດເຈັບ.
ກໍາລັງທະຫານອາກາດເຂົ້າຮ່ວມການສຳຫຼວດສະໜາມ ໃຫ້ເຮລີກົບແຕລົງຈອດ ແລະສັງເກດຂັ້ນຕອນລົງ ແລະບິນຂຶ້ນສະໜາມຂອງຍົນເຮລີກົບແຕ HAL Prachand ຂອງຝ່າຍອິນເດຍ.
ໂດຍ: ທູຈາງ