ກະກຽມໃຫ້ການຝຶກຊ້ອມຮ່ວມກູ້ໄພ-ກູ້ຊີບ ລະຫວ່າງກອງທັບ ຫວຽດນາມ-ກຳປູເຈຍ-ລາວ

ໂດຍປະຕິບັດຕາມແຜນການເຂົ້າຮ່ວມການຝຶກຊ້ອມຮ່ວມກູ້ໄພ-ກູ້ຊີບ ລະຫວ່າງກອງທັບຫວຽດນາມ-ກຳປູເຈຍ-ລາວ, ໃນໄລຍະຜ່ານມາ, ທະຫານເຂດ 5 ໄດ້ສົມທົບກັບບັນດາອົງການຂອງກະຊວງປ້ອງກັນປະເທດເພື່ອຊີ້ນຳ, ແນະນໍາບັນດາອົງການ, ກົມກອງປະຕິບັດການກະກຽມເປັນຢ່າງດີ; ຈັດຕັ້ງການຝຶກແອບຢູ່ພາຍໃນປະເທດກ່ອນທີ່ເຂົ້າຮ່ວມການຝຶກຊ້ອມຢູ່ກຳປູເຈຍ ຢ່າງແໜ້ນແຟ້ນ ແລະມີຄຸນນະພາບ. ເປັນຕົ້ນແມ່ນໄດ້ສ້າງລະບົບເອກະສານໃຫ້ສົມບູນແບບ, ໄດ້ຮັບການຮັບຮອງຈາກທຸກຂັ້ນຕາມການກໍານົດ; ຄັດເລືອກກຳລັງ ແລະພາຫະນະ, ສ້າງແຜນການ, ສະໜາມຈັດການຝຶກແອບເພີ່ມເຕີມໃຫ້ແກ່ບັນດາກົມກອງໃຫ້ໃກ້ຊິດຕິດແທດກັບລັກສະນະ ແລະຄວາມຮຽກຮ້ອງຕ້ອງການຂອງໜ້າທີ່ທີ່ໄດ້ຮັບມອບໝາຍ.

ທ່ານພົນຕີ ຖ໊າຍດ້າຍຫງອກ, ຜູ້ບັນຊາການທະຫານເຂດ 5 ພົບປະລະດົມກໍາລັງໃຈ, ມອບຂອງຂວັນໃຫ້ພົນທະຫານຍິງເຂົ້າຮ່ວມການຝຶກຊ້ອມ. ພາບ: qdnd.vn

ຕາມນັ້ນແລ້ວ, ໃນໂອກາດນີ້, ທະຫານເຂດ 5 ຈະເຂົ້າຮ່ວມການຝຶກຊ້ອມຮ່ວມກັບກອງທັບກຳປູເຈຍ ແລະລາວ ຢູ່ແຂວງ Kampong Chhnang (ກໍາປູເຈຍ) ລວມມີເນື້ອໃນ, ຄື: ການເຄື່ອນໄຫວຂອງກອງກູ້ໄພ-ກູ້ຊີບ ທີ່ປະຕິບັດໜ້າທີ່ຮັບມືກັບໂຄງການກໍ່ສ້າງຖືກພັງທະລາຍ; ໂຮງໝໍກາງສະໜາມຂັ້ນ 1 ແລະ 2 ເຂົ້າຮ່ວມການຈັດປະເພດຜູ້ຖືກເຄາະຮ້າຍຕາມລະດັບການບາດເຈັບເບົາ, ປານກາງ ແລະໜັກ; ຮັບເອົາ, ປະຖົມພະຍາບານ, ເບິ່ງແຍງດູແລ, ປິ່ນປົວພະຍາດ ແລະນຳສົ່ງຜູ້ປະສົບເຄາະຮ້າຍດ້ວຍພາຫະນະສຸກເສີນ, ໃນນັ້ນມີການນຳສົ່ງດ້ວຍຍົນເຮລິຄອບເຕີ; ການຝຶກແອບຮ່າງກາຍລວມ, ການຝຶກແອບດ້ວຍອາວຸດຍຸດໂທປະກອນ...

ບັນດາຜູ້ແທນເຂົ້າຮ່ວມກອງປະຊຸມ. ພາບ: qdnd.vn

ກ່າວຄຳເຫັນທີ່ກອງປະຊຸມ, ທ່ານພົນຕີ ຖ໊າຍດ້າຍຫງອກ ເນັ້ນໜັກວ່າ ນີ້ບໍ່ພຽງແຕ່ແມ່ນການປະຕິບັດໜ້າທີ່ພົວພັນຕ່າງປະເທດດ້ານປ້ອງກັນຊາດຂອງກອງທັບປະຊາຊົນຫວຽດນາມ ເວົ້າລວມ ແລະທະຫານເຂດ 5 ເວົ້າສະເພາະເທົ່ານັ້ນ, ຫາກຍັງສະແດງໃຫ້ເຫັນພາບພົດ, ຖານະບົດບາດຂອງປະເທດ ແລະຂອງຊາດອີກດ້ວຍ. ຍ້ອນເຫດນັ້ນ, ທະຫານແຕ່ລະຄົນຕ້ອງກຳນົດແນວຄິດ, ຄວາມຮັບຜິດຊອບຢ່າງຈະແຈ້ງ, ກໍາແໜ້ນໜ້າທີ່, ມານະພະຍາຍາມປະຕິບັດສໍາເລັດທຸກໜ້າທີ່ທີ່ໄດ້ຮັບມອບໝາຍໃຫ້ເປັນຢ່າງດີ; ປະຕິບັດຕາມຂໍ້ກໍານົດໃນການພົວພັນຕ່າງປະເທດຢ່າງເຂັ້ມງວດ; ຈັດຕັ້ງກໍາລັງເຄື່ອນທີ່ເພື່ອເຂົ້າຮ່ວມການປະຕິບັດໜ້າທີ່ຢູ່ປະເທດເພີື່ອນຢ່າງແໜ້ນແຟ້ນ ແລະຮອບຄອບ, ຮັບປະກັນຄວາມປອດໄພໃນທຸກດ້ານ ຢ່າງເດັດຂາດ. ຜ່ານນັ້ນປະກອບສ່ວນຮັດແໜ້ນສາຍພົວພັນສາມັກຄີ, ມິດຕະພາບລະຫວ່າງສາມປະເທດ ຫວຽດນາມ-ລາວ-ກໍາປູເຈຍ; ແຜ່ຂະຫຍາຍພາບພົດທີ່ດີງາມຂອງທະຫານປະຕິວັດ ແລະຄຸນທາດຂອງທະຫານລຸງໂຮ່ ໃນຍຸກໃໝ່.

ຕາມແຜນການ, ການຝຶກຊ້ອມຮ່ວມ ຈະດຳເນີນໃນລະຫວ່າງວັນທີ 17-25 ພະຈິກ ປີນີ້.

ໂດຍ: ທູຈາງ