ຄັນທຸງປ່ຽນແປງໃໝ່ ໄດ້ນໍາພາປະຊາຊົນ ໄປຜ່ານໄລຍະທາງດ້ວຍໂອກາດອັນໃຫຍ່ຫຼວງ ແຕ່ກໍປະສົບຄວາມຫຍຸ້ງຍາກລໍາບາກ, ສິ່ງທົດສອບນາໆປະການ, ເຊິ່ງສິ່ງທົດສອບອັນໃຫຍ່ຫຼວງທີ່ສຸດ ອາດຈະແມ່ນຕົ້ນຊຸມປີ 90 ຂອງສະຕະວັດກ່ອນ, “ວິກິດການການເມືອງ” ໄດ້ເຮັດໃຫ້ລະບົບສັງຄົມນິຍົມ ຢູ່ໂຊວຽດ ແລະບັນດາປະເທດເອີລົບຕາເວັນອອກ ແຕກສະຫຼາຍ. ສະພາບການພາຍໃນປະເທດ ປະສົບຄວາມຫຍຸ້ງຍາກຫຼາຍຢ່າງ, ເງິນເຟີ້ຂຶ້ນເຖິງ 700%, ເປັນປະເທດກະສິກໍາ ແຕ່ຍາມໃດກໍຂາດເຂີນສະບຽງອາຫານ, ເງິນເດືອນຂອງຜູ້ອອກແຮງງານ ບໍ່ພຽງພໍໃນສອງສາມມື້, ເຄື່ອງໃຊ້ທີ່ຈໍາເປັນລ້ວນແຕ່ຕ້ອງແຈກຢາຍ, “ທຸກແຫ່ງລຽນແຖວ, ທຸກຄົນລຽນແຖວ, ທຸກຄອບຄົວລຽນແຖວ, ທຸກມື້ລຽນແຖວ”...

ຫວນຄືນ 35 ປີແຫ່ງການປ່ຽນແປງໃໝ່, ກອງປະຊຸມໃຫຍ່ ຄັ້ງທີ XIII ຂອງພັກ ໄດ້ຢັ້ງຢືນວ່າ: “ປະເທດ ບັນລຸໄດ້ບັນດາຜົນງານອັນໃຫຍ່ຫຼວງ, ມີຄວາມໝາຍປະຫວັດສາດ, ພັດທະນາຢ່າງແຂງແຮງ, ຮອບດ້ານເມື່ອທຽບໃສ່ກັບຊຸມປີກ່ອນການປ່ຽນແປງໃໝ່. ຂະໜາດ, ລະດັບພື້ນຖານເສດຖະກິດ ໄດ້ຮັບການຍົກສູງຂຶ້ນ. ຊີວິດການເປັນຢູ່ຂອງປະຊາຊົນທາງດ້ານວັດຖຸ ແລະຈິດໃຈໄດ້ຮັບການປັບປຸງຢ່າງເຫັນໄດ້ຊັດ. ປະເທດຫວຽດນາມ ບໍ່ເຄີຍມີພາລະກິດອັນໃຫຍ່ຫຼວງ, ກໍາລັງບົ່ມຊ້ອນ, ຖານະບົດບາດທີ່ຕັ້ງ ແລະອິດທິພົນຊື່ສຽງສາກົນ ຄື ໃນປັດຈຸບັນນີ້ມາກ່ອນ”.

leftcenterrightdel
ຄວາມຫວັງໃໝ່ເກີດຂຶ້ນຢູ່ບ້ານນູ. ພາບ: nhandan.vn

ປີ 2024 ທີ່ຫາກໍ່ຜ່ານພົ້ນໄປ, ເມື່ອພວກເຮົາ ໄດ້ກ້າວໄປໃກ້ຈະເຖິງຫຼັກໝາຍ 40 ປີແຫ່ງການປ່ຽນແປງໃໝ່, ການໃຫ້ຂໍ້ສັງເກດຂ້າງເທິງນັ້ນ ສືບຕໍ່ໄດ້ຮັບການຢັ້ງຢືນ, ດ້ວຍບັນດາຜົນງານໃໝ່. ເສດຖະກິດມະຫາພາກ ສືບຕໍ່ມີສະຖຽນລະພາບ, ເງິນເຟີ້ໄດ້ຮັບການຄວບຄຸມ, ການເຕີບໂຕເສດຖະກິດສູງກວ່າເປົ້າໝາຍທີ່ວາງອອກ, ບັນດາດຸນດ່ຽງໃຫຍ່ໄດ້ຮັບປະກັນ. ການເຕີບໂຕທົ່ວປີ ຄາດວ່າບັນລຸກວ່າ 7%, ນອນໃນກຸ່ມປະເທດທີ່ມີລະດັບການເຕີບໂຕສູງຢູ່ພາກພື້ນ ແລະໃນໂລກ, ໄດ້ຮັບການຕີລາຄາສູງຈາກອົງການຈັດຕັ້ງສາກົນທີ່ມີອິດທິພົນຊື່ສຽງ.

ໃນຍາມປະສົບຄວາມຫຍຸ້ງຍາກ, ສິ່ງທົດສອບນາໆປະການ, ຍິ່ງເຮັດໃຫ້ນໍ້າໃຈຊົນຊາດ, ນ້ຳໃຈພໍ່ແມ່ປະຊາຊົນໃສແຈ້ງຂຶ້ນ, ຍິ່ງເຮັດໃຫ້ແຜນນະໂຍບາຍຂອງພັກ, ລັດຫວຽດນາມ ໃສແຈ້ງຂຶ້ນ: ການພັດທະນາເສດຖະກິດຍາມໃດກໍໄປຄຽງຄູ່ກັບການພັດທະນາວັດທະນະທໍາ, ຮັບປະກັນຄວາມຍຸ ຕິທໍາໃນສັງຄົມ, ຮັກແພງ, ເຄົາລົບມະນຸດດ້ວຍກັນ, ຖືປະຊາຊົນ ເປັນເຈົ້າກໍາ ແລະແມ່ນເປົ້າໝາຍພັດທະນາແບບຍືນຍົງ. ຕົວເລກສະຫຼຸບປີ 2024 ຄືໜ້າປະທັບໃຈ ແທ້ນໍ: ຕົວເລກຄວາມຜາສຸກເພີ່ມຂຶ້ນ 11 ຂັ້ນ (ຕາມບົດລາຍງານຄວາມຜາສຸກໂລກ ປີ 2024 ຂອງສະຫະປະຊາຊາດ).

40 ປີນັ້ນ ບໍ່ຈັກເທົ່າໃດຄວາມຮັກ. 40 ປີນັ້ນ ດ້ວຍທ່າ ແລະກໍາລັງແຮງທີ່ສະສົມມາ, ໄດ້ສ້າງເປັນພື້ນຖານ, ເປັນບ່ອນອີງອັນໝັ້ນແກ່ນເພື່ອໃຫ້ທົ່ວພັກ, ທົ່ວປວງຊົນຫວຽດນາມ ກ້າວຂຶ້ນບົນເສັ້ນທາງໃຫຍ່, ເຊື່ອມໂຍງ, ຄຽງບ່າຄຽງໄຫຼ່ກັບເພື່ອນມິດໃນໂລກ. ດຽວນີ້ແມ່ນຈຸດເວລາເລັ່ງມືປະຕິບັດວຽກງານອັນໃຫຍ່ຫຼວງ, ຫັນຄວາມຄາດຫວັງຢາກພັດທະນາປະເທດໃຫ້ຈະເລີນຮຸ່ງເຮືອງສີວິໄລໃຫ້ປະກົດຜົນເປັນຈິງ. ຄວາມຄາດຫວັງນັ້ນຂອງແຕ່ລະຄົນ ແລະຕ້ອງແມ່ນການສົມທົບຄວາມຄາດຫວັງຢາກບືນຕົວຂຶ້ນຂອງວົງຄະນາຍາດ, ຂອງປະຊາຊົນຫວຽດນາມ ທຸກຄົນ. ຄວາມຄາດຫວັງນັ້ນໄດ້ສ້າງເປັນແຫຼ່ງພະລັງພາຍໃນອັນມະຫາສານ, ມີຊີວິດຊີວາ ແລະກໍາລັງແຮງທີ່ບໍ່ສາມາດປຽບທຽບໄດ້ ເພື່ອກ້າວຂຶ້ນສັງກາດໃໝ່ຢ່າງໝັ້ນຄົງ.

ຈິນຕະນາການທິດສະດີ ກ່ຽວກັບສັງກາດໃໝ່, ສັງກາດບືນຕົວຂຶ້ນຂອງຊົນຊາດ ນັ້ນແມ່ນການສືບທອດ, ຂະຫຍາຍຄວາມຮັບຮູ້, ຈິນຕະນາການທິດສະດີ ກ່ຽວກັບໄລຍະພັດທະນາໃໝ່. ໃນບົດໂອ້ລົມ, ບົດຂຽນຫຼາຍບົດໃນມໍ່ໆມານີ້, ທ່ານ ໂຕເລິມ ເລຂາທິການໃຫຍ່ ເນັ້ນໜັກວ່າ: ສັງກາດໃໝ່, ສັງກາດບືນຕົວຂຶ້ນຂອງຊົນຊາດຫວຽດນາມ, ນັ້ນແມ່ນສັງກາດພັດທະນາ, ສັງກາດ ຮັ່ງມີເຂັ້ມແຂງພາຍໃຕ້ການນໍາພາ, ກໍາອໍານາດຂອງພັກກອມມູນິດຫວຽດນາມ, ກໍ່ສ້າງປະເທດຫວຽດນາມສັງຄົມນິຍົມ, ປະຊາຊົນຮັ່ງມີ, ປະເທດຊາດເຂັ້ມແຂງ, ສັງຄົມປະຊາທິປະໄຕ, ຍຸຕິທໍາ, ສີວິໄລໃຫ້ສຳເລັດ ໄປຄຽງຂ້າງກັບບັນດາປະເທດມະຫາອໍານາດຫ້າທະວີບໃນໂລກ.

ຕາມບັນດານັກຄົ້ນຄວ້າປະຫວັດສາດ, ໃນສະຕະວັດທີ 20, ຊົນຊາດຫວຽດນາມ, ປະເທດຫວຽດນາມ ໄດ້ສ້າງເປັນສອງສັງກາດຍິ່ງໃຫຍ່ທີ່ສຸດ: ນັ້ນແມ່ນສັງກາດເອກະລາດແຫ່ງຊາດ, ກໍ່ສ້າງສັງຄົມນິຍົມ (1930-1975) ແລະສັງກາດທ້ອນໂຮມປະເທດຊາດເປັນເອກະພາບ, ປ່ຽນແປງໃໝ່ (1975-2025). ຈາກລະດູບານໃໝ່ນີ້ແມ່ນໄລຍະເລັ່ງຄວາມໄວເພື່ອໃຫ້ພວກເຮົາ ກ້າວສູ່ “ສັງກາດບືນຕົວຂຶ້ນ”, ເລີ່ມຕົ້ນແຕ່ກອງປະຊຸມໃຫຍ່ຄັ້ງທີ XIV ຂອງພັກ. ບັນດາສັງກາດແມ່ນສັດຈະວິພາກຂອງການພັດທະນາ, ແມ່ນການ ສືບຕໍ່ກັນທີ່ສອດຄ່ອງກັບກົດເກນປະຕິວັດຫວຽດນາມ ພາຍໃຕ້ການນໍາພາຂອງພັກ, ເຮັດໃຫ້ເອກະລາດແຫ່ງຊາດ ແລະສັງຄົມນິຍົມພັດທະນາ, ສົມບູນແບບ.

ວິໄສທັດ ແລະເປົ້າໝາຍ ໄດ້ຈະແຈ້ງ. ບັນຫາຢູ່ບ່ອນວ່າ, ຕ້ອງມີຍຸດທະສາດ ເພື່ອປະຕິບັດຢ່າງທັນການ, ຄົບຊຸດ, ເພື່ອຫັນເຈດຈໍານົງ ເປັນການກະທໍາປະຕິວັດ. ນັ້ນແມ່ນຍຸດທະສາດຫັນປະເທດ ເປັນອຸດສາຫະກໍາ ແລະທັນສະໄໝ ໃນສະພາບການຍູ້ແຮງການປະຕິວັດອຸດສາຫະກໍາ ຄັ້ງທີສີ່, ໃນສະພາບການຫັນເປັນໂລກາພິວັດ ບໍ່ໃຫ້ໃຜ “ຄົນໜຶ່ງຕະຫຼາດໜຶ່ງ”, ໃຜກໍຕ້ອງຊອກຫາວິທີບືນຕົວຂຶ້ນ. ນັ້ນແມ່ນຍຸດທະສາດພັດທະນາວິທະຍາສາດ-ເຕັກໂນໂລຊີ, ນະວັດຕະກໍາ, ຮຽກຮ້ອງຕ້ອງນໍາໃຊ້ຜູ້ທີ່ມີຄວາມຮູ້, ຄວາມສາມາດ, ຄວາມຮູ້ແມ່ນເຂັມທິດເຍືອງທາງໃຫ້ຊີວິດ, ໂດຍອີງໃສສາມຂົງເຂດນໍາໜ້າ: ພັດທະນາເສດຖະກິດດີຈີຕອນ, ເສດຖະກິດສີຂຽວ, ເສດຖະກິດໝູນວຽນ, ເສດຖະກິດພູມປັນຍາ; ນະວັດຕະກໍາ, ເລີ່ມທຸລະກິດ ແລະການປະຕິວັດອຸດສາຫະກໍາຄັ້ງທີສີ່; ພັດທະນາແຫຼ່ງຊັບພະຍາກອນມະນຸດໃຫ້ມີຄຸນນະພາບສູງ ແລະປັນຍາປະດິດ (AI). ນັ້ນແມ່ນຍຸດທະສາດພັດທະນາໄວ ແລະຍືນຍົງ.

ພັດທະນາໄວ ຮຽກຮ້ອງໃຫ້ມີລະດັບສູງໃນການເຕີບໂຕເສດຖະກິດ, ຮັດແຄບໄລຍະຫ່າງການພັດທະນາກັບບັນດາປະເທດຢູ່ພາກພື້ນ ແລະໃນໂລກ. ພັດທະນາແບບຍືນຍົງ ຮຽກຮ້ອງໃຫ້ຕ້ອງມີປະສິດທິຜົນ ແລະສະມັດຕະພາບແຮງງານສູງ, ບໍ່ເອົາຄວາມຍຸຕິທໍາ, ຄວາມກ້າວໜ້າທາງສັງຄົມ, ສະພາບແວດລ້ອມນິເວດໄປ “ແລກປ່ຽນ” ເອົາການເຕີບໂຕເສດຖະກິດ. ປະຕິບັດສໍາເລັດບັນດາຍຸດທະສາດເຫຼົ່ານັ້ນ, ຫວຽດນາມ ຈະຫຼີກເວັ້ນໄດ້ກັບດັກລາຍຮັບປານກາງ, ໝາຍຄວາມວ່າແມ່ນສະພາບຢຸດຕິແກ່ຍາວໃນຮອບສາມທົດສະວັດ ພາຍຫຼັງຫຼຸດພົ້ນອອກຈາກຄວາມທຸກຍາກ.

leftcenterrightdel
ທ່ານເລຂາທິການໃຫຍ່ ໂຕເລິມ ເປັນປະທານກອງປະຊຸມ ຄັ້ງທີ 27, ຄະນະຊີ້ນໍາຂັ້ນສູນກາງກ່ຽວກັບການສະກັດກັ້ນ ແລະຕ້ານການສໍ້ລາດບັງຫຼວງ, ຟຸມເຟືອຍ, ປະກົດການຫຍໍ້ທໍ້. ພາບ: ດັງຄວາ.

ວິທີດີທີ່ສຸດ ເພື່ອຄາດຄະເນອະນາຄົດແມ່ນສ້າງອະນາຄົດ. ສິ່ງນັ້ນຮຽກຮ້ອງໃຫ້ແຕ່ລະຄົນ, ແຕ່ລະວົງຄະນາຍາດ, ຄິດໃຫ້ກວ້າງອອກແມ່ນທົ່ວປວງຊົນທັງຊາດ ຍາມໃດກໍມີສະຕິ, ເຮັດໃຫ້ຕົນເອງມີໂສມໜ້າໃໝ່ໃນແຕ່ລະບາດກ້າວເດີນຂອງມວນມະນຸດ, ຂອງຍຸກສະໄໝ, ເພື່ອຫຼີກເວັ້ນການຊໍ້າຄືນຄວາມຜິດພາດ, ບາດກ້າວຖອຍຫຼັງຂອງປະຫວັດສາດ. ໃນນັ້ນມີການຊັກຊ້າ, ອ່ອນດ້ອຍ, ມີບາດກ້າວຖອຍຫຼັງໃນເສັ້ນທາງທີ່ໄປຜ່ານບໍ່ດົນ. ບັນດາຄວາມສ່ຽງຖອຍຫຼັງດ້ານເສດຖະກິດ, ເຂວທິດສັງຄົມຍິນົມ, ການຜັນແປໂດຍສັນຕິ, ສໍ້ລາດບັງຫຼວງ-ຟຸມເຟືອຍ-ປະກົດການຫຍໍ້ທໍ້ຍັງຄົງມີຢູ່, ມີບາງຈຸດເວລາແມ່ນຮ້າຍແຮງທີ່ສຸດ.

ພັກ ໄດ້ປ່ຽນແປງຕົນເອງ, ປັບປຸງຕົນເອງຢ່າງເປັນປະຈໍາ, ຢຶດໝັ້ນ, ເດັດດ່ຽວຕ້ານການສໍ້ລາດບັງຫຼວງ, ບໍ່ມີເຂດຫ້າມ, ບໍ່ມີກໍລະນີພິເສດ, ລົງໂທດຄົນໜຶ່ງເພື່ອເຕືອນສະຕິທົ່ວພາກ, ທົ່ວເຂດ. ບັນດາບົດຮຽນທີ່ບັງເອີນ, ເຈັບແສບ ແຕ່ໄດ້ປຸກສະຕິມະໂນທໍາ, ລົງໂທດຄົນໜຶ່ງເພື່ອຊ່ວຍທຸກຄົນ, ປະກອບສ່ວນປັບປຸງຄວາມເຊື່ອໝັ້ນຂອງປະຊາຊົນທີ່ມີຕໍ່ພັກ.

ພັກ ເຂັ້ມແຂງ, ປະເທດພັດທະນາ, ຊົນຊາດຍືນຍົງ, ນັ້ນທັງແມ່ນເປົ້າໝາຍທັງແມ່ນກໍາລັງໜູນໃນສັງກາດໃໝ່. ນັ້ນແມ່ນແຮງບັນດານໃຈປະຕິວັດອັນໃຫຍ່ຫຼວງ, ຍາວເລິກ ແລະສວຍງາມໃນລະດູບານໃໝ່ຂອງພັກກອມມູນິດຫວຽດນາມ ຄົບຮອບ 95 ປີ.

ໂດຍ: ໄຊຊະນະ