ຫວຽດນາມ ເອົາໃຈໃສ່ໜູນຊ່ວຍປະຊາຄົມຊາວຫວຽດນາມ ອາໄສຢູ່ ກຳປູເຈຍ
ກປ.ອອນໄລ - ແຕ່ວັນທີ 26 ຫາວັນທີ 29 ທັນວາ, ຄະນະປະຕິບັດງານຂອງກະຊວງການຕ່າງປະເທດຫວຽດນາມ ນໍາໂດຍທ່ານນາງ ເລທິທູຮັ່ງ, ຮອງລັດຖະມົນຕີກະຊວງການຕ່າງປະເທດຫວຽດນາມ, ຫົວໜ້າຄະນະກຳມະການແຫ່ງລັດ ກ່ຽວກັບຊາວຫວຽດນາມ ອາໄສຢູ່ຕ່າງປະເທດ ໄດ້ເດີນທາງໄປຢ້ຽມຢາມ ແລະເຮັດວຽກຢູ່ລາຊະອານາຈັກກຳປູເຈຍ.
    |
 |
|
ບັນຍາກາດທີ່ການເຮັດວຽກຂອງກັບທ່ານ Mang Sineth ເຈົ້າແຂວງໆ Preah Sihanouk. ພາບ: ສໍານັກຂ່າວສານຫວຽດນາມ. |
ໃນຂອບເຂດການຢ້ຽມຢາມ, ທ່ານນາງ ເລທິທູຮັ່ງ ພ້ອມຄະນະໄດ້ມີການພົບປະ ແລະເຮັດວຽກກັບການນຳບັນດາອົງການ, ກະຊວງ, ຂະແໜງການ ແລະທ້ອງຖິ່ນ, ຢ້ຽມຢາມຖາມຂ່າວປະຊາຄົມຊາວກຳປູເຈຍ ເຊື້ອຊາດຫວຽດນາມ ຢູ່ນະຄອນຫຼວງພະນົມເປັນ ແລະແຂວງ Preah Sihanouk ຢູ່ທາງທິດຕາເວັນຕົກສ່ຽງໃຕ້ຂອງກຳປູເຈຍ.
ທີ່ການເຮັດວຽກກັບອົງການທີ່ກ່ຽວຂ້ອງຂອງກຳປູເຈຍ, ທ່ານນາງ ເລທິທູຮັ່ງ ຊີ້ແຈ້ງວ່າ: ປະຊາຄົມຊາວຫວຽດນາມ ອາໄສຢູ່ກຳປູເຈຍ ມີຄວາມປາດຖະໜາຢາກປະກອບສ່ວນຢ່າງຕັ້ງໜ້າໃຫ້ແກ່ການພັດທະນາເສດຖະກິດ-ສັງຄົມຂອງກຳປູເຈຍ. ບົນພື້ນຖານນັ້ນ, ທ່ານນາງ ເລທິທູຮັ່ງ ຫວັງວ່າ ບັນດາອົງການກ່ຽວຂ້ອງຂອງກຳປູເຈຍ ຈະສືບຕໍ່ເອົາໃຈໃສ່, ຜັນຂະຫຍາຍບັນດານະໂຍບາຍສ້າງເງື່ອນໄຂສະດວກໃຫ້ແກ່ຊາວຫວຽດນາມ ດຳລົງຊີວິດຢ່າງຖືກຕ້ອງຕາມກົດໝາຍ, ຮັບປະກັນໃຫ້ເດັກນ້ອຍເຊື້ອຊາດຫວຽດນາມ ໄດ້ໄປໂຮງຮຽນ, ເພີ່ມທະວີການໂຄສະນາເພື່ອໃຫ້ພໍ່ແມ່ປະຊາຊົນກຳແໜ້ນບັນດາຂໍ້ກຳນົດຂອງກຳປູເຈຍ ກ່ຽວກັບເອກະສານນິຕິກຳ ແລະການປະຕິບັດ.
ສ່ວນການນຳກະຊວງພາຍໃນ, ກະຊວງການຕ່າງປະເທດ ແລະການຮ່ວມມືສາກົນກຳປູເຈຍ, ນະຄອນຫຼວງພະນົມເປັນ ແລະແຂວງ Preah Sihanouk ຕີລາຄາສູງການພົວພັນລະຫວ່າງ ຫວຽດນາມ ແລະກຳປູເຈຍ ທີ່ພວມນັບມື້ນັບພັດທະນາຢ່າງແທດຈິງ; ຢັ້ງຢືນແຜນນະໂຍບາຍສືບຕໍ່ສ້າງເງື່ອນໄຂໃຫ້ແກ່ຊາວຕ່າງປະເທດອາໄສຢູ່ກຳປູເຈຍ, ໃນນັ້ນ ມີຊາວຫວຽດນາມ ໄດ້ດຳລົງຊີວິດເປັນປົກກະຕິ ບົນຈິດໃຈເຄົາລົບກົດໝາຍຂອງກຳປູເຈຍ...
ໂດຍ: ໄຊຊະນະ