ການເຄື່ອນໄຫວຂອງປະທານສະພາແຫ່ງຊາດຫວຽດນາມ ຢູ່ ຍີ່ປຸ່ນ

ທ່ານ ເຈີ່ນແທັງເໝິນ ປະທານສະພາແຫ່ງຊາດ ແລະພັນລະຍາ ພ້ອມດ້ວຍຄະນະຜູ້ແທນຂັ້ນສູງສະພາແຫ່ງຊາດຫວຽດນາມ  ອາໄລຫາຜູ້ປະສົບເຄາະຮ້າຍຈາກລະເບີດປະລະມານູ Nagasaki. ພາບ: ຢວ໊ານເຕິນ

ທ່ານ ເຈີ່ນແທັງເໝິນ ປະທານສະພາແຫ່ງຊາດ ແລະພັນລະຍາ ພ້ອມດ້ວຍຄະນະຜູ້ແທນຂັ້ນສູງສະພາແຫ່ງຊາດຫວຽດນາມ ຢ້ຽມຊົມຫໍພິພິທະພັນເອກະສານລະເບີດປະລະມານູ Nagasaki.ພາບ: ຢວ໊ານເຕິນ

ຕໍ່ຈາກນັ້ນ, ທ່ານ ເຈີ່ນແທັງເໝິນ ແລະພັນລະຍາ ພ້ອມດ້ວຍຄະນະຜູ້ແທນຂັ້ນສູງຂອງສະພາແຫ່ງຊາດຫວຽດນາມ ພົບປະກັບພະນັກງານ, ພາລະກອນສະຖານກົງສູນໃຫຍ່ຫວຽດນາມ ປະຈຳ Fukuoka ແລະ ຜູ້ຕາງໜ້າປະຊາຄົມຊາວຫວຽດນາມ ອາໄສຢູ່ຍີ່ປຸ່ນ. ຕີລາຄາສູງການປະກອບສ່ວນຂອງປະຊາຄົມຊາວຫວຽດນາມ ອາໄສຢູ່ຍີ່ປຸ່ນ ໃນໄລຍະທີ່ຜ່ານມາ, ທ່ານ ເຈີ່ນແທັງເໝິນ ຫວັງວ່າປະຊາຄົມຈະສືບຕໍ່ເສີມຂະຫຍາຍຈິດໃຈສາມັກຄີ, ອຸ້ມຊູຊ່ວຍເຫຼືອເຊິ່ງກັນ ແລະກັນ, ປະຕິບັດລະບຽບກົດໝາຍຂອງປະເທດປະຈໍາຖິ່ນ; ຢືນຢັນນະໂຍບາຍສະເໝີຕົ້ນສະເໝີປາຍຂອງພັກ ແລະ ລັດ ແມ່ນຍາມໃດກໍ່ເອົາໃຈໃສ່ ແລະເບິ່ງແຍງດູແລປະຊາຄົມຊາວຫວຽດນາມ ອາໄສຢູ່ຕ່າງປະເທດ - ເປັນພາກສ່ວນໜຶ່ງທີ່ບໍ່ອາດຕັດແຍກອອກຂອງຊົນຊາດຫວຽດນາມ.

ທ່ານ ເຈີ່ນແທັງເໝິນ ປະທານສະພາແຫ່ງຊາດ ແລະພັນລະຍາ ພ້ອມກັບປະຊາຄົມຊາວຫວຽດນາມ ອາໄສຢູ່ ຢີ່ປຸ່ນ. ພາບ: ສໍານັກຂ່າວສານຫວຽດນາມ

* ຕອນບ່າຍວັນທີ 7 ທັນວາ, ຢູ່ແຂວງ Nagasaki, ທ່ານ ເຈີ່ນແທັງເໝິນ ໄດ້ຕ້ອນຮັບທ່ານ Tomioka Tsutomu ປະທານສະມາຄົມມິດຕະພາບ Nagasaki - ຫວຽດນາມ ແລະ ບັນດາສະມາຊິກຂອງສະມາຄົມ.

ທີ່ການຕ້ອນຮັບ, ທ່ານ Tomioka Tsutomu ໄດ້ແບ່ງປັນຂໍ້ມູນກ່ຽວກັບໂຄງການທີ່ສະມາຄົມພວມຜັນຂະຫຍາຍປະຕິບັດໃນຂົງເຂດສາທາລະນະສຸກ, ຄື: ການບົ່ງມະຕິພະຍາດ, ການເບິ່ງແຍງດູແລດ້ານການແພດ, ເຕັກນິກ ແລະເຕັກໂນໂລຢີປິ່ນປົວມະເຮັງ.

ທ່ານ ເຈີ່ນແທັງເໝິນ ປະທານສະພາແຫ່ງຊາດ ແລະທ່ານ Tomioka Tsutomu ປະທານສະມາຄົມມິດຕະພາບ Nagasaki-ຫວຽດນາມ. ພາບ: ສໍານັກຂ່າວສານຫວຽດນາມ

ສ່ວນທ່ານ ເຈີ່ນແທັງເໝິນ ກໍຊີ້ແຈ້ງວ່າ: ຫວຽດນາມ ສົ່ງເສີມ ແລະສ້າງເງື່ອນໄຂສະດວກເພື່ອໃຫ້ແຂວງ Nagasaki ເປີດກວ້າງການພົບປະແລກປ່ຽນ ແລະການຮ່ວມມືກັບທ້ອງຖິ່ນຕ່າງໆຂອງຫວຽດນາມ, ເພື່ອແນໃສ່ເສີມຂະຫຍາຍການພົວພັນທີ່ເປັນມູນເຊື້ອລະຫວ່າງແຂວງ Nagasaki ກັບຫວຽດນາມ, ນໍາເອົາຜົນປະໂຫຍດທີ່ແທດຈິງມາໃຫ້ປະຊາຊົນສອງປະເທດ; ສະເໜີໃຫ້ສະມາຄົມສືບຕໍ່ເອົາໃຈໃສ່ຂົນຂວາຍ ແລະຊຸກຍູ້ອໍານາດການປົກຄອງທ້ອງຖິ່ນຢູ່ເຂດ Nagasaki ຈັດຕັ້ງການເຄື່ອນໄຫວພົບປະແລກປ່ຽນວັດທະນະທຳ-ປະຊາຊົນໃຫ້ຫຼາຍກວ່າອີກ; ຕັ້ງໜ້າໜູນຊ່ວຍປະຊາຄົມຊາວຫວຽດນາມ ທີ່ພວມດຳລົງຊີວິດ, ຮ່ຳຮຽນ ແລະເຮັດວຽກຢູ່ເຂດ Nagasaki; ສະໜັບສະໜູນ, ຊ່ວຍເຫຼືອ ແລະ ຕັ້ງໜ້າເຂົ້າຮ່ວມການເຄື່ອນໄຫວຂອງສະຖານກົງສູນໃຫຍ່ຫວຽດນາມ ປະຈຳ Fukuoka.

ໂດຍ: ທູຈາງ