ປະກອບສ່ວນປັບປຸງ, ເຮັດໃຫ້ສາຍພົວພັນສາມັກຄີແບບພິເສດ ຫວຽດນາມ-ລາວ ເລິກເຊິ່ງກວ່າອີກ

ທ່ານ ໂຕເລິມ ເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຫວຽດນາມ ຕ້ອນຮັບທ່ານ ບຸນທອງ ຈິດມະນີ, ຜູ້ປະຈໍາການຄະນະເລຂາທິການສູນກາງພັກ, ຮອງປະທານປະເທດ ແຫ່ງ ສປປ ລາວ. ພາບ: ຟ້າມກຽນ

ທີ່ການຕ້ອນຮັບ, ທ່ານເລຂາທິການໃຫຍ່ ໂຕເລິມ ຊົມເຊີຍ ແລະຕີລາຄາວ່າ ການຢ້ຽມຢາມຂອງທ່ານ ບຸນທອງ ຈິດມະນີ ສະແດງໃຫ້ເຫັນຄວາມຖືເປັນສໍາຄັນ ແລະຄວາມໄວ້ເນື້ອເຊື່ອໃຈຍຸດທະສາດລະຫວ່າງສອງພັກ, ສອງປະເທດ, ປະກອບສ່ວນປັບປຸງ ແລະເຮັດໃຫ້ສາຍພົວພັນສາມັກຄີແບບພິເສດ ຫວຽດນາມ-ລາວ ເລິກເຊິ່ງກວ່າອີກ.

ສ່ວນທ່ານ ບຸນທອງ ຈິດມະນີ ລາຍງານຕໍ່ທ່ານເລຂາທິການໃຫຍ່ ໂຕເລິມ ກ່ຽວກັບໝາກຜົນການເຮັດວຽກກັບການນຳຂັ້ນສູງຫວຽດນາມ ໃນການຢ້ຽມຢາມ, ທ່ານ ບຸນທອງ ຈິດມະນີ ຢືນຢັນວ່າ ສອງຝ່າຍໄດ້ມີການແລກປ່ຽນຢ່າງຈິງໃຈບົນຈິດໃຈສະຫາຍ, ອ້າຍນ້ອງກ່ຽວກັບບົດຮຽນໃນວຽກງານກໍ່ສ້າງພັກ; ຕີລາຄາສະພາບການຮ່ວມມື ຫວຽດນາມ-ລາວ ແລະປຶກສາຫາລື, ເຫັນດີເປັນເອກະພາບຕໍ່ທິດທາງແນໃສ່ປະຕິບັດຂໍ້ຕົກລົງຂັ້ນສູງລະຫວ່າງສອງພັກ, ສອງລັດ ໃຫ້ມີປະສິດທິຜົນ.

ທ່ານ ໂຕເລິມ ເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຫວຽດນາມ ແລະທ່ານ ບຸນທອງ ຈິດມະນີ, ຜູ້ປະຈໍາການຄະນະເລຂາທິການສູນກາງພັກ, ຮອງປະທານປະເທດ ແຫ່ງ ສປປ ລາວ. ພາບ: ຟ້າມກຽນ

ທ່ານເລຂາທິການໃຫຍ່ ໂຕເລິມ ຢືນຢັນວ່າ ຫວຽດນາມ ຍາມໃດກໍ່ຄຽງບ່າຄຽງໄຫຼ່, ສະໜັບສະໜູນພັກ, ລັດ ແລະປະຊາຊົນລາວ ໃນການປະຕິບັດເປົ້າໝາຍພັດທະນາປະເທດ ແລະສະແດງຄວາມເຊື່ອໝັ້ນວ່າ ພາຍໃຕ້ການນຳພາຂອງພັກປະຊາຊົນປະຕິວັດລາວ, ໂດຍທ່ານ ທອງລຸນ ສີສຸລິດ ເລຂາທິການໃຫຍ່, ປະທານປະເທດລາວ ນຳໜ້ານັ້ນ, ລາວ ຈະປະຕິບັດມະຕິກອງປະຊຸມໃຫຍ່ ຄັ້ງທີ XI ຂອງພັກ ຢ່າງມີໄຊ, ກໍ່ສ້າງປະເທດລາວ ຈະເລີນຮຸ່ງເຮືອງ, ວັດທະນາຖາວອນ. ທ່ານເລຂາທິການໃຫຍ່ ໂຕເລິມ ປາດຖະໜາວ່າ ສອງຝ່າຍຈະສືບຕໍ່ເພີ່ມທະວີການຮ່ວມມືພ້ອມກັນພັດທະນາ ເພື່ອຜົນປະໂຫຍດຂອງປະຊາຊົນສອງປະເທດ, ປະກອບສ່ວນເຂົ້າໃນສັນຕິພາບ, ສະຖຽນລະພາບ ແລະການພັດທະນາຢູ່ພາກພື້ນ ແລະໃນໂລກ.

ທ່ານ ເລືອງເກືອງ ປະທານປະເທດຫວຽດນາມ ຕ້ອນຮັບທ່ານ ບຸນທອງ ຈິດມະນີ, ຜູ້ປະຈໍາການຄະນະເລຂາທິການສູນກາງພັກ, ຮອງປະທານປະເທດ ແຫ່ງ ສປປ ລາວ. ພາບ: ວຽດຈູງ

* ໃນວັນດຽວກັນ, ຢູ່ທຳນຽບປະທານປະເທດ, ທ່ານ ເລືອງເກືອງ ປະທານປະເທດຫວຽດນາມ ໄດ້ໃຫ້ການຕ້ອນຮັບທ່ານ ບຸນທອງ ຈິດມະນີ, ຜູ້ປະຈໍາການຄະນະເລຂາທິການສູນກາງພັກ, ຮອງປະທານປະເທດ ແຫ່ງ ສປປ ລາວ.

ທີ່ການຕ້ອນຮັບ, ທ່ານປະທານປະເທດ ເລືອງເກືອງ ໄດ້ຕີລາຄາສູງຜົນການຢ້ຽມຢາມຫວຽດນາມ ຂອງທ່ານ ບຸນທອງ ຈິດມະນີ; ພ້ອມທັງຢືນຢັນວ່າ ຫວຽດນາມ ຍາມໃດກໍ່ຖືເປັນສຳຄັນ ແລະໃຫ້ບຸລິມະສິດສູງສຸດແກ່ສາຍພົວພັນສາມັກຄີແບບພິເສດ ຫວຽດນາມ-ລາວ, ພ້ອມແລ້ວທີ່ຈະສະໜັບສະໜູນ ແລະຊ່ວຍເຫຼືອລາວ ໃນພາລະກິດສ້າງສາ ແລະພັດທະນາປະເທດ; ຫວັງວ່າສອງປະເທດຈະຮ່ວມມືຢ່າງແໜ້ນແຟ້ນ, ໜູນຊ່ວຍເຊິ່ງກັນ ແລະກັນເພື່ອປະຕິບັດມະຕິກອງປະຊຸມໃຫຍ່ຂອງແຕ່ລະຝ່າຍຢ່າງມີໄຊ ແລະຈັດຕັ້ງກອງປະຊຸມໃຫຍ່ອາຍຸການໃໝ່ໃຫ້ສຳເລັດຜົນ.

ໂດຍ: ເຈິ່ນຮວ່ຽນ