ເຮັດໃຫ້ການພົວພັນ ຫວຽດນາມ - ເປຣູ ເລິກເຊິ່ງຂຶ້ນຕື່ມ

ທ່ານນາງ Dina Ercilia Boluarte Zegarra ປະທານາທິບໍດີ ເປຣູ ເປັນປະທານພິທີຕ້ອນຮັບທ່ານ ເລືອງເກື່ອງ ປະທານປະເທດຫວຽດນາມ ຢ້ຽມຢາມ ສາທາລະນະລັດ ເປຣູ ຢ່າງເປັນທາງການ. ພາບ: qdnd.vn

ຕັດສິນໃຈນຳການພົວພັນສອງຝ່າຍຂຶ້ນສູ່ລະດັບສູງໃໝ່

ທີ່ທຳນຽບປະທານາທິບໍດີ Casa de Pizarro, ພາຍຫຼັງພິທີຕ້ອນຮັບ ແລະການພົບປະສ່ວນຕົວ, ທ່ານປະທານປະເທດ ເລືອງເກື່ອງ ໄດ້ມີການພົບປະເຈລະຈາກັບທ່ານນາງ ປະທານາທິບໍດີ  Dina Boluarte ຢ່າງເປັນທາງການ.

ທີ່ການພົບປະ, ການນຳສອງທ່ານໄດ້ຢັ້ງຢືນເຈດຈໍານົງຂອງສອງປະເທດໃນການຍົກລະດັບການພົວພັນສອງຝ່າຍຂຶ້ນສູ່ລະດັບສູງໃໝ່; ເຫັນດີເປັນເອກະພາບຄວນສືບຕໍ່ສຸມໃສ່ການຊຸກຍູ້ການຮ່ວມມືໃນບັນດາຂົງເຂດທີ່ສອງຝ່າຍມີທ່າແຮງ, ຄື: ເສດຖະກິດ-ການຄ້າ-ການລົງທຶນ, ໃນນັ້ນມີການເປີດຕະຫຼາດຂອງກັນໃຫ້ບັນດາຜະລິດຕະພັນກະເສດ, ຕັ້ງໜ້າເຈລະຈາ, ລົງນາມໃນເອກະສານຮ່ວມມືສອງຝ່າຍສະບັບຕ່າງໆແນໃສ່ປັບປຸງຂອບນິຕິກຳ ເພື່ອໃຫ້ການພົວພັນສອງປະເທດພັດທະນາແບບຍືນຍົງ. ການນຳສອງທ່ານ ກໍ່ໄດ້ເຫັນດີເປັນເອກະພາບສ້າງເງື່ອນໄຂສະດວກໃຫ້ປະຊາຄົມວິສາຫະກິດສອງປະເທດເພີ່ມທະວີການແລກປ່ຽນ, ຮ່ວມມືດຳເນີນທຸລະກິດເພື່ອຍົກສູງວົງເງິນສອງຝ່າຍໃຫ້ສົມກັບຄວາມສາມາດບົ່ມຊ້ອນຂອງສອງປະເທດ; ເພີ່ມທະວີການສົມທົບ, ການຮ່ວມມື ແລະສະໜັບສະໜູນເຊິ່ງກັນ ແລະກັນຢູ່ອົງການຈັດຕັ້ງສາກົນ, ເວທີປາໄສຫຼາຍຝ່າຍ ແລະລະຫວ່າງພາກພື້ນ, ໃນນັ້ນມີການຮ່ວມມືລະຫວ່າງ ເປຣູ ແລະອາຊຽນ, ການຮ່ວມມື ໃຕ້-ໃຕ້.

ບັນຍາກາດທີ່ການພົບປະເຈລະຈາ. ພາບ: qdnd.vn

ທ່ານປະທານປະເທດ ເລືອງເກື່ອງ ເນັ້ນໜັກວ່າ ຫວຽດນາມ ຖືເປັນສຳຄັນບົດບາດ, ທີ່ຕັ້ງຂອງ ເປຣູ ແລະປາດຖະໜາຢາກເຮັດໃຫ້ການພົວພັນສອງປະເທດໃນໄລຍະຈະມາເຖິງ ເລິກເຊິ່ງຂຶ້ນຕື່ມ. ທ່ານປະທານປະເທດ ຊົມເຊີຍ ເປຣູ ເປັນເຈົ້າພາບຈັດເວທີປາໄສຮ່ວມມືເສດຖະກິດ ອາຊີ-ປາຊີຟິກ (APEC) ຄັ້ງທີ 3, ເຊື່ອໝັ້ນວ່າ ຜົນສຳເລັດຂອງກອງປະຊຸມສຸດຍອດ APEC ຈະປະກອບສ່ວນເຂົ້າໃນການພັດທະນາ, ຮ່ວມສໍາພັນ ແລະຄວາມວັດທະນາຖາວອນຢູ່ ອາຊີ-ປາຊີຟິກ ກໍ່ຄືສືບຕໍ່ຍົກສູງບົດບາດ, ທີ່ຕັ້ງຂອງເປຣູ. ເນື່ອງໃນໂອກາດນີ້, ທ່ານນາງ ປະທານາທິບໍດີເປຣູ ປາດຖະໜາຢາກໃຫ້ຫວຽດນາມ ເປີດອົງການຜູ້ຕາງໜ້າການທູດຢູ່ Lima ໂດຍໄວ.

ທ່ານ ເລືອງເກື່ອງ ປະທານປະເທດຫວຽດນາມ  ແລະທ່ານນາງ Dina Ercilia Boluarte Zegarra ປະທານາທິບໍດີ ເປຣູ ພົບປະກັບສື່ມວນຊົນພາຍຫຼັງການພົບປະເຈລະຈາ. ພາບ: qdnd.vn

ພາຍຫຼັງການພົບປະເຈລະຈາ, ການນຳສອງທ່ານ ໄດ້ປະກາດຖະແຫຼງການຮ່ວມ ວ່າດ້ວຍການເພີ່ມທະວີການພົວພັນສອງຝ່າຍລະຫວ່າງສາທາລະນະລັດ ສັງຄົມນິຍົມ ຫວຽດນາມ ແລະສາທາລະນະລັດ ເປຣູ.

ສະຖານທີ່ລົງທຶນສຳຄັນທີ່ສຸດຂອງຫວຽດນາມ ຢູ່ ອາເມລິກາລາຕິນ

ຕອນບ່າຍວັນທີ 13 ພະຈິກ, ໃນຂອບເຂດການຢ້ຽມຢາມ ສາທາລະນະລັດ ເປຣູ ຢ່າງເປັນທາງການ, ທ່ານ ເລືອງເກື່ອງ ປະທານປະເທດຫວຽດນາມ ໄດ້ມີການພົບປະກັບທ່ານ Gustavo Adrianzén ປະທານສະພາລັດຖະມົນຕີເປຣູ.

ທີ່ການພົບປະ, ທ່ານປະທານປະເທດ ເລືອງເກື່ອງ ຕີລາຄາວ່າ ການພົວພັນມິດຕະພາບ ແລະການຮ່ວມມືຫຼາຍດ້ານລະຫວ່າງ ຫວຽດນາມ ແລະເປຣູ ມີບາດກ້າວພັດທະນາທີ່ໜ້າປະທັບໃຈໃນໄລຍະຜ່ານມາ, ເປັນຕົ້ນແມ່ນໃນຂົງເຂດການຄ້າ-ການລົງທຶນ. ປະຈຸບັນ, ເປຣູ ແມ່ນຄູ່ຮ່ວມມືລົງທຶນອັນດັບ 1 ແລະຄູ່ຮ່ວມມືການຄ້າໃຫຍ່ອັນດັບ 6 ຂອງຫວຽດນາມ ຢູ່ ອາເມລິກາລາຕິນ, ໃນຂະນະທີ່ ຫວຽດນາມ ແມ່ນຄູ່ຮ່ວມມືການຄ້າໃຫຍ່ທີ່ສຸດຂອງ ເປຣູ ໃນອາຊຽນ. ເຖິງຢ່າງໃດກໍ່ຕາມ, ທ່ານປະທານປະເທດ ຢືນຢັນວ່າ ການພົວພັນ ຫວຽດນາມ-ເປຣູ ຍັງມີຄວາມສາມາດບົ່ມຊ້ອນຫຼາຍຢ່າງເພື່ອເປີດກວ້າງການຮ່ວມມືກວ່າອີກ, ຕາມນັ້ນແລ້ວ, ບົນພື້ນຖານການພົວພັນດ້ານການເມືອງທີ່ດີໃນປະຈຸບັນ, ທ່ານປະທານປະເທດຫວຽດນາມ ແລະທ່ານນາງ ປະທານາທິບໍດີ  ເປຣູ ໄດ້ເຫັນດີເປັນເອກະພາບຮັບຮອງເອົາຖະແຫຼງການຮ່ວມວ່າດ້ວຍການເພີ່ມທະວີການພົວພັນສອງຝ່າຍລະຫວ່າງຫວຽດນາມ ແລະ ເປຣູ ດ້ວຍບັນດາມາດຕະການລະອຽດ, ເນື້ອແທ້ເພື່ອຂຸດຄົ້ນຄວາມສາມາດບົ່ມຊ້ອນຮ່ວມມືຢ່າງຄົບຖ້ວນ, ມຸ່ງໄປເຖິງການນຳການພົວພັນ ຫວຽດນາມ-ເປຣູ ຂຶ້ນສູ່ລະດັບສູງໃໝ່. 

ທ່ານ ເລືອງເກື່ອງ ປະທານປະເທດຫວຽດນາມ ພົບປະກັບທ່ານ Gustavo Adrianzén ປະທານສະພາລັດຖະມົນຕີ ເປຣູ. ພາບ: qdnd.vn

ສ່ວນທ່ານປະທານສະພາລັດຖະມົນຕີເປຣູ ໄດ້ຕີລາຄາສູງບັນດາການເຄື່ອນໄຫວລົງທຶນຂອງວິສາຫະກິດຫວຽດນາມ ຢູ່ ເປຣູ, ພິເສດແມ່ນໂຄງການໂທລະຄົມມະນາຄົມຂອງ Viettel ປະສົບຜົນສຳເລັດ, ຢືນຢັນສະໜັບສະໜູນ ແລະສ້າງເງື່ອນໄຂສະດວກເພື່ອໃຫ້ Viettel ເປີດກວ້າງບັນດາໂຄງການຮ່ວມມືກ່ຽວກັບການຫັນເປັນດີຈີຕອນ, ເຕັກໂນໂລຢີດີຈີຕອນ, ນະຄອນອັດສະລິຍະ... ປະກອບສ່ວນເຂົ້າໃນການພັດທະນາຂອງເປຣູ ແລະນຳມາເຊິ່ງຜົນປະໂຫຍດອັນຍາວນານໃຫ້ວິສາຫະກິດ ແລະປະຊາຊົນສອງປະເທດ.

ສອງຝ່າຍເຫັນດີເປັນເອກະພາບຊຸກຍູ້ການເພີ່ມທະວີການເຄື່ອນໄຫວພົບປະ ແລະການຢ້ຽມຢາມຂອງການນຳຂັ້ນສູງສອງປະເທດພ້ອມກັນແລກປ່ຽນທຸກຂັ້ນ, ກະຊວງ, ຂະແໜງການໃນຊຸມປີຕໍ່ໜ້າ, ພ້ອມທັງໃຫ້ຄຳໝັ້ນສັນຍາຜັນຂະຫຍາຍບັນດາກົນໄກການເຈລະຈາດ້ານການເມືອງ-ການທູດ ແລະເສດຖະກິດ-ການຄ້າຢ່າງເປັນປະຈໍາ ແລະມີປະສິດທິຜົນເພື່ອນໍາການພົວພັນຮ່ວມມືລະຫວ່າງສອງປະເທດໃຫ້ນັບມື້ນັບແທດຈິງ ແລະມີປະສິດທິຜົນ.

ການພົວພັນລັດຖະສະພາ ແມ່ນເສົາຄໍ້າສຳຄັນຂອງການທູດສອງປະເທດ

ຕອນບ່າຍວັນທີ 13 ພະຈິກ, ໃນຂອບເຂດການຢ້ຽມຢາມ ສາທາລະນະລັດ ເປຣູ ຢ່າງເປັນທາງການ, ຢູ່ສຳນັກງານສະພາແຫ່ງຊາດທີ່ນະຄອນຫຼວງ Lima, ທ່ານ ເລືອງເກື່ອງ ປະທານປະເທດຫວຽດນາມ ໄດ້ມີການພົບປະກັບທ່ານ Eduardo Salhuana ປະທານສະພາແຫ່ງຊາດເປຣູ.

ທ່ານ ເລືອງເກື່ອງ ປະທານປະເທດຫວຽດນາມ ພົບປະກັບທ່ານ Eduardo Salhuana ປະທານສະພາແຫ່ງຊາດເປຣູ. ພາບ: ສໍານັກຂ່າວສານຫວຽດນາມ

ຢູ່ທີ່ນີ້, ທ່ານປະທານປະເທດ ເລືອງເກື່ອງ ຢືນຢັນວ່າ ເປຣູ ແມ່ນໜຶ່ງໃນບັນດາຄູ່ຮ່ວມມືສຳຄັນແຖວໜ້າໃນນະໂຍບາຍການຕ່າງປະເທດຂອງຫວຽດນາມ ທີ່ມີຕໍ່ພາກພື້ນອາເມລິກາລາຕິນ ແລະສະແດງຄວາມເຊື່ອໝັ້ນວ່າ ການຢ້ຽມຢາມ ເປຣູ ໃນຄັ້ງນີ້ຈະສ້າງພະລັງແຮງນຳການພົວພັນສອງປະເທດກ້າວເຂົ້າສູ່ໄລຍະໃໝ່, ພັດທະນາຢ່າງແຂງແຮງກວ່າ. ພ້ອມທັງປາດຖະໜາວ່າ ສະພາແຫ່ງຊາດ ເປຣູ ຈະໃຫ້ຄວາມເອົາໃຈໃສ່ເປັນພິເສດ, ສ້າງເງື່ອນໄຂເພື່ອໃຫ້ບັນດາໂຄງການລົງທຶນໃນຂົງເຂດໂທລະຄົມມະນາຄົມ, ນໍ້າມັນອາຍແກັດຂອງວິສາຫະກິດຫວຽດນາມ ໄດ້ຮັບການຜັນຂະຫຍາຍຢ່າງມີປະສິດທິຜົນຢູ່ ເປຣູ, ປະກອບສ່ວນເຂົ້າໃນການພັດທະນາເສດຖະກິດຂອງສອງປະເທດ.

ສ່ວນທ່ານປະທານສະພາແຫ່ງຊາດເປຣູ ປາດຖະໜາວ່າ ໃນໄລຍະຈະມາເຖິງ, ສອງປະເທດຍູ້ແຮງການແລກປ່ຽນຄະນະຜູ້ແທນ, ເພີ່ມທະວີການປຶກສາຫາລື, ແລກປ່ຽນບົດຮຽນເຊິ່ງກັນ ແລະກັນໃນທຸກຂົງເຂດ. ທ່ານປະທານສະພາແຫ່ງຊາດເປຣູ ຢັ້ງຢືນວ່າ ຂະແໜງຕຸລາການເປຣູ ສະໜັບສະໜູນ ແລະຈະເອົາໃຈໃສ່ສ້າງເງື່ອນໄຂໃຫ້ໂຄງການລົງທຶນຂອງວິສາຫະກິດຫວຽດນາມ ຢູ່ ເປຣູ ໃນປະຈຸບັນ, ພ້ອມທັງຫວັງວ່າຈະນັບມື້ນັບມີຫຼາຍວິສາຫະກິດຫວຽດນາມ ມາລົງທຶນຢູ່ ເປຣູ.

* ຕອນທ່ຽງວັນທີ 14 ພະຈິກ (ຕາມເວລາທ້ອງຖິ່ນ), ຢູ່ນະຄອນຫຼວງ Lima, ໃນຂອບເຂດການຢ້ຽມຢາມ ເປຣູ ຢ່າງເປັນທາງການ ແລະເຂົ້າຮ່ວມສັບປະດາຂັ້ນສູງ APEC, ທ່ານປະທານປະເທດ ເລືອງເກື່ອງ ໄດ້ໃຫ້ການຕ້ອນຮັບການນໍາບັນດາວິສາຫະກິດຂອງເປຣູ. ນີ້ລ້ວນແຕ່ແມ່ນວິສາຫະກິດໃຫຍ່ຂອງ ເປຣູ ໃນຂົງເຂດຕ່າງໆ, ຄື: ບໍ່ແຮ່, ພະລັງງານ, ການລົງທຶນທ່າເຮືອ, ການບໍລິການການເງິນ, ໄຟຟ້າ ແລະປະກັນໄພ...

ໂດຍ: ເຈິ່ນຮວ່ຽນ