ທ່ານປະທານປະເທດ ເລືອງເກື່ອງ ເດີນທາງໄປເຖິງ Lima, ເລີ່ມຕົ້ນການຢ້ຽມຢາມ ເປຣູ ຢ່າງເປັນທາງການ ແລະເຂົ້າຮ່ວມສັບປະດາຂັ້ນສູງ APEC
ກປ.ອອນໄລ - ໃນເວລາ 15 ໂມງ 45 ນາທີຂອງວັນທີ 12 ພະຈິກ, ຕາມເວລາທ້ອງຖິ່ນ (ຮຸ່ງເຊົ້າວັນທີ 13 ພະຈິກ, ຕາມເວລາຮ່າໂນ້ຍ), ເຮືອບິນພິເສດໂດຍສານ ທ່ານ ເລືອງເກື່ອງ ປະທານປະເທດ ພ້ອມດ້ວຍຄະນະຜູ້ແທນຂັ້ນສູງຫວຽດນາມ ໄດ້ໄປຮອດສະໜາມບິນສາກົນ Jorge Chavez ຢູ່ນະຄອນຫຼວງ Lima, ເລີ່ມຕົ້ນການຢ້ຽມຢາມ ສາທາລະນະລັດ ເປຣູ ຢ່າງເປັນທາງການ ແລະເຂົ້າຮ່ວມສັບປະດາຂັ້ນສູງເວທີປາໄສການຮ່ວມມືເສດຖະກິດ ອາຊີ-ປາຊີຟິກ (APEC) 2024 ຢູ່ Lima, ເປຣູ ຕາມຄໍາເຊີນຂອງທ່ານ Dina Ercilia Boluarte Zegarra ປະທານາທິບໍດີ ເປຣູ.
ຕ້ອນຮັບທ່ານປະທານປະເທດ ເລືອງເກື່ອງ ພ້ອມດ້ວຍຄະນະຜູ້ແທນຂັ້ນສູງຫວຽດນາມ ຢູ່ສະໜາມບິນສາກົນ Jorge Chavez, ຝ່າຍ ເປຣູ ມີລັດຖະມົນຕີລັດຖະບານ ແລະເຈົ້າໜ້າທີ່ກະຊວງການຕ່າງປະເທດ. ຝ່າຍຫວຽດນາມ ມີທ່ານ ບຸ່ຍວັນງິ້ ເອກອັກຄະລັດຖະທູດຫວຽດນາມ ປະຈໍາຢູ່ ບຣາຊິນ ທັງຄວບຕຳແໜ່ງຢູ່ ເປຣູ ແລະພະນັກງານ, ລັດຖະກອນສະຖານທູດຫວຽດນາມ.
    |
 |
|
ທ່ານປະທານປະເທດ ເລືອງເກື່ອງ ເດີນທາງໄປເຖິງສະໜາມບິນສາກົນ Jorge Chavez ຢູ່ນະຄອນຫຼວງ Lima, ເລີ່ມຕົ້ນການຢ້ຽມຢາມ ເປຣູ ຢ່າງເປັນທາງການ. ພາບ: qdnd.vn |
ນີ້ແມ່ນການຢ້ຽມຢາມຄັ້ງທໍາອິດຂອງທ່ານປະທານປະເທດຫວຽດນາມ. ດໍາເນີນກົງກັບໂອກາດສອງປະເທດສະເຫຼີມສະຫຼອງ 30 ປີແຫ່ງວັນສ້າງຕັ້ງການພົວພັນທາງການທູດ, ການຢ້ຽມຢາມໄດ້ຮັບຄວາມຫວັງວ່າຈະເປັນຂີດໝາຍປະຫວັດສາດ, ປະກອບສ່ວນປັບປຸງພື້ນຖານການພົວພັນດ້ານການເມືອງອັນດີງາມລະຫວ່າງສອງປະເທດ, ຍົກສູງປະສິດທິຜົນການຮ່ວມມືໃນບັນດາຂົງເຂດທີ່ມີຄວາມສາມາດບົ່ມຊ້ອນ, ແລະມຸ່ງໄປເຖິງນໍາການພົວພັນຂຶ້ນສູ່ລະດັບສູງໃໝ່.
ຄຽງຂ້າງນັ້ນ, ເລື່ອງປະທານປະເທດ ເຂົ້າຮ່ວມສັບປະດາຂັ້ນສູງ APEC 2024 ກົງກັບໂອກາດສະເຫຼີມສະຫຼອງ 35 ປີແຫ່ງວັນສ້າງຕັ້ງເວທີປາໄສ, ສືບຕໍ່ຢັ້ງຢືນການປະກອບສ່ວນຢ່າງຕັ້ງໜ້າ, ມີຄວາມຮັບຜິດຊອບຂອງຫວຽດນາມ ເຂົ້າໃນການແກ້ໄຂບັນດາບັນຫາພາກພື້ນ ແລະທົ່ວໂລກ, ພິເສດແມ່ນຊຸກຍູ້ວິວັດການເຊື່ອມຈອດເສດຖະກິດສາກົນ, ສ້າງກໍາລັງໜູນໃໝ່ໃຫ້ແກ່ການເຕີບໂຕຂອງພາກພື້ນ; ສືບຕໍ່ປັບປຸງບົດບາດຂອງ APEC ແມ່ນເວທີປາໄສເສດຖະກິດແຖວໜ້າ.
ໃນໄລຍະ 25 ກວ່າປີ ທີ່ເຂົ້າຮ່ວມ APEC, ຫວຽດນາມ ໄດ້ສ້າງຄວາມປະທັບໃຈອັນພົ້ນເດັ່ນໃນການຮ່ວມມື APEC ແລະຍາມໃດກໍໄດ້ຮັບການຕີລາຄາວ່າ ເປັນສະມາຊິກທີ່ມີການປະກອບສ່ວນຢ່າງຕັ້ງໜ້າ, ມີຄວາມຮັບຜິດຊອບ ແລະມີປະສິດທິຜົນເຂົ້າໃນການຫັນເປົ້າໝາຍ, ວິໄສທັດຮ່ວມມືຂອງ APEC ກໍຄືຍົກສູງບົດບາດຂອງເວທີປາໄສໃຫ້ປະກົດຜົນເປັນຈິງ. ດ້ານໜຶ່ງ, ການ ເຂົ້າຮ່ວມສັບປະດາຂັ້ນສູງ APEC ແມ່ນໂອກາດເພື່ອໃຫ້ທ່ານປະທານປະເທດ ໄດ້ພົບປະກັບບັນດາຜູ້ນໍາ APEC, ໃນນັ້ນມີຫຼາຍຄູ່ຮ່ວມມືຍຸດທະສາດຮອບດ້ານ, ຄູ່ຮ່ວມມືຍຸດທະສາດ, ປະກອບສ່ວນເຮັດໃຫ້ການພົວພັນກັບບັນດາສະມາຊິກ APEC ເລິກເຊິ່ງຂຶ້ນຕື່ມຢ່າງບໍ່ຢຸດຢັ້ງ.
ຄາດວ່າ ໃນໄລຍະເຮັດວຽກຢູ່ ເປຣູ, ທ່ານປະທານປະເທດ ຈະເຂົ້າຮ່ວມພິທີຕ້ອນຮັບຢ່າງເປັນທາງການໂດຍປະທານາທິບໍດີ ເປຣູ ເປັນປະທານ; ມີການພົບປະເຈລະຈາສອງຝ່າຍ, ພົບປະກັບການນໍາລັດຖະບານ ແລະສະພາແຫ່ງຊາດ ເປຣູ. ພ້ອມກັນນັ້ນ, ທ່ານປະທານປະເທດ ຈະພ້ອມກັບການນໍາ ບັນດາພື້ນຖານເສດຖະກິດສະມາຊິກ ເຂົ້າຮ່ວມກອງປະຊຸມຂັ້ນສູງ APEC; ເຂົ້າຮ່ວມ ແລະມີບົດກ່າວຄໍາເຫັນສໍາຄັນທີ່ກອງປະຊຸມສຸດຍອດວິສາຫະກິດ APEC – CEO Summit, ກອງປະຊຸມປຶກສາຫາລືບໍ່ເປັນທາງການລະຫວ່າງບັນດາຜູ້ນໍາ APEC ແລະແຂກຖືກເຊີນ; ພ້ອມກັບການເຄື່ອນໄຫວສອງຝ່າຍຕ່າງໆ.
ໂດຍ: ໄຊຊະນະ