ປະທານປະເທດ ເລືອງເກື່ອງ ຕ້ອນຮັບປະທານສະພາແຫ່ງຊາດ ອາກເມນີ

ກ່າວຄຳເຫັນທີ່ການຕ້ອນຮັບ, ທ່ານປະທານປະເທດ ເລືອງເກື່ອງ ເຊື່ອໝັ້ນວ່າ ການຢ້ຽມຢາມຈະປະກອບສ່ວນປັບປຸງການພົວພັນລະຫວ່າງສອງອົງການນິຕິບັນຍັດເພື່ອການພັດທະນາ ເພື່ອຜົນປະໂຫຍດຂອງປະຊາຊົນສອງປະເທດ. ພ້ອມທັງຢືນຢັນວ່າ ຫວຽດນາມ ສະເໝີຕົ້ນສະເໝີປາຍຖືເປັນສຳຄັນການພົວພັນມິດຕະພາບທີ່ເປັນມູນເຊື້ອ ແລະການຮ່ວມມືຫຼາຍດ້ານກັບ ອາກເມນີ ທີ່ໄດ້ຮັບການເພີ່ມພູນຄູນສ້າງຈາກການນຳຫຼາຍລຸ້ນຄົນຂອງສອງປະເທດ.

ທ່ານ ເລືອງເກື່ອງ ປະທານປະເທດຫວຽດນາມ ແລະທ່ານ Alen Simonyan ປະທານສະພາແຫ່ງຊາດ ອາກເມນີ. ພາບ: ຫງວຽນແອັງຕ໊ວນ

ທ່ານປະທານປະເທດ ສະແດງຄວາມປິຕິຊົມຊື່ນຕໍ່ການພົວພັນຮ່ວມມືດ້ານການເມືອງອັນດີງາມລະຫວ່າງສອງປະເທດ; ການຮ່ວມມືດ້ານເສດຖະກິດ, ການຄ້າ ແລະການລົງທຶນໃນຊຸມປີມໍ່ໆມານີ້ມີການພັດທະນາຢ່າງຕັ້ງໜ້າ, ໃນຊຸມເດືອນຕົ້ນປີ 2024, ວົງເງິນການຄ້າສອງສົ້ນລະຫວ່າງສອງປະເທດບັນລຸກວ່າ 400 ລ້ານໂດລາສະຫະລັດ. ທ່ານປະທານປະເທດ ຖືວ່າ ສອງປະເທດຄວນເພີ່ມທະວີການແລກປ່ຽນຄະນະຜູ້ແທນທຸກຂັ້ນ, ເປັນຕົ້ນແມ່ນຂັ້ນສູງ; ເພີ່ມທະວີການພົບປະແລກປ່ຽນປະຊາຊົນ, ການທ່ອງທ່ຽວ ແລະການເຊື່ອມຕໍ່ທ້ອງຖິ່ນລະຫວ່າງສອງຝ່າຍ. ບົນພື້ນຖານທ່າແຮງຂອງແຕ່ລະປະເທດ, ຄວາມຕ້ອງການຂອງປະເທດຄູ່ຮ່ວມມື, ຄວນຕັ້ງໜ້າແລກປ່ຽນ, ຍູ້ແຮງການຮ່ວມມືດ້ານເສດຖະກິດ, ການຄ້າ, ການລົງທຶນ, ການສຶກສາ ແລະບຳລຸງສ້າງ.

ທ່ານ ເລືອງເກື່ອງ ປະທານປະເທດຫວຽດນາມ ຕ້ອນຮັບທ່ານ Alen Simonyan ປະທານສະພາແຫ່ງຊາດ ອາກເມນີ. ພາບ: ຫງວຽນແອັງຕ໊ວນ

ສ່ວນທ່ານປະທານສະພາແຫ່ງຊາດ ອາກເມນີ  Alen Simonyan ຢືນຢັນວ່າ ອາກເມນີ ຖືຫວຽດນາມ ແມ່ນຄູ່ຮ່ວມມືສຳຄັນ ແລະປາດຖະໜາຢາກຮ່ວມມືໃນຫຼາຍຂົງເຂດລະຫວ່າງສອງປະເທດ. ເນັ້ນໜັກວ່າ, ນີ້ແມ່ນຄັ້ງທຳອິດທີ່ທ່ານມາຫວຽດນາມ ແຕ່ມີຄວາມປະທັບໃຈທີ່ດີຫຼາຍຢ່າງ, ທ່ານປະທານສະພາແຫ່ງຊາດ ອາກເມນີ  ປາດຖະໜາວ່າ ຜ່ານການຢ້ຽມຢາມຄັ້ງນີ້, ສອງປະເທດຈະຍູ້ແຮງການຮ່ວມມືດ້ານການເມືອງ ແລະການທູດ, ສ້າງຕັ້ງກົນໄກຮ່ວມມືໃໝ່ໃນອະນາຄົດຕື່ມອີກ.

ໂດຍ: ເຈິ່ນຮວ່ຽນ