ຄະນະຜູ້ແທນພັກກອມມູນິດຫວຽດນາມ ໄປຢ້ຽມຢາມ, ເຮັດວຽກ ຢູ່ຈີນ ແລະອິນເດຍ

ຄະນະຜູ້ແທນພັກກອມມູນິດຫວຽດນາມ ນຳໂດຍສະຫາຍ ຟານດິ່ງຈາກ, ຫົວໜ້າຄະນະພາຍໃນສູນກາງພັກ ໄປເຮັດວຽກ ຢູ່ຈີນ. ພາບ: ສໍານັກຂ່າວສານຫວຽດນາມ

ທີ່ການພົບປະຕ່າງໆ, ການນຳສອງຝ່າຍໄດ້ແລກປ່ຽນລົງເລິກກ່ຽວກັບທິດທາງຊຸກຍູ້ການພົວພັນຫວຽດນາມ-ຈີນ ໃນໄລຍະຈະມາເຖິງ, ປະກອບສ່ວນປະຕິບັດຄວາມຮັບຮູ້ລວມລະຫວ່າງເລຂາທິການໃຫຍ່ສອງພັກ ຢ່າງມີປະສິດທິຜົນ. ສອງຝ່າຍໄດ້ເຫັນດີຍົກສູງຄວາມໄວ້ເນື້ອເຊື່ອໃຈທາງດ້ານການເມືອງຜ່ານການແລກປ່ຽນ ແລະການພົບປະຂັ້ນສູງຢ່າງເປັນປະຈຳ, ເພີ່ມທະວີການຮ່ວມມືຜ່ານຊ່ອງທາງພັກ; ຊຸກຍູ້ບັນດາຂົງເຂດການຮ່ວມມືສອງຝ່າຍໃຫ້ນັບມື້ນັບມີປະສິດທິຜົນ ແລະແທດຈິງ; ສົມທົບກັນຢ່າງແໜ້ນແຟ້ນໃນບັນດາບັນຫາພາກພື້ນ ແລະສາກົນ; ຈັດຕັ້ງ “ປີແຫ່ງການພົບປະແລກປ່ຽນມະນຸດສະທໍາຫວຽດນາມ-ຈີນ 2025” ໃຫ້ເປັນຢ່າງດີ ເນື່ອງໃນໂອກາດສະເຫຼີມສະຫຼອງ 75 ປີແຫ່ງວັນສ້າງຕັ້ງການພົວພັນທາງການທູດລະຫວ່າງສອງປະເທດ, ເພີ່ມທະວີການພົບປະແລກປ່ຽນປະຊາຊົນ, ປັບປຸງພື້ນຖານສັງຄົມໃຫ້ການພັດທະນາການພົວພັນ ຫວຽດນາມ-ຈີນ; ພ້ອມກັນຮັກສາສັນຕິພາບ ແລະສະຖຽນລະພາບຢູ່ທະເລ, ຄວບຄຸມ ແລະແກ້ໄຂຄວາມບໍ່ລົງລອຍກັນໃຫ້ດີກວ່າເກົ່າບົນພື້ນຖານຄວາມເໝາະສົມກັບຄວາມຮັບຮູ້ລວມຂັ້ນສູງ ແລະກົດໝາຍສາກົນ.

ສອງຝ່າຍໄດ້ແບ່ງປັນໝາກຜົນ, ບົດຮຽນປະສົບການ ແລະແບບວິທີປະຕິບັດຢ່າງມີປະສິດທິຜົນຂອງສອງພັກໃນການກໍ່ສ້າງພັກ, ກວດກາ, ຕິດຕາມກວດກາ, ຕ້ານ ແລະສະກັດກັ້ນການສໍ້ລາດບັງຫຼວງ, ຟຸມເຟືອຍ, ຫຍໍ້ທໍ້ ແລະການປະຕິຮູບດ້ານຕຸລາການ.

* ໃນລະຫວ່າງວັນທີ 11-13 ພະຈິກ, ຄະນະຜູ້ແທນພັກກອມມູນິດຫວຽດນາມ ໂດຍສະຫາຍ ຫງວຽນຊວນຖັ໊ງ, ກໍາມະການກົມການເມືອງ, ຫົວໜ້າສະຖາບັນການເມືອງແຫ່ງຊາດໂຮ່ຈີມິນ, ປະທານສະພາທິດສະດີສູນກາງພັກ ໄດ້ໄປຢ້ຽມຢາມ ແລະເຮັດວຽກຢູ່ ອິນເດຍ.

ສະຫາຍ ຫງວຽນຊວນຖັ໊ງ ແລກປ່ຽນບາງບັນຫາດ້ານທິດສະດີ ກັບການນໍາພັກກອມມູນິດອິນເດຍ-ມາກຊິດ. ພາບ: vov.vn

ໃນການຢ້ຽມຢາມ, ຄະນະຜູ້ແທນໄດ້ມີການເຮັດວຽກ ແລະພົບປະ, ສອງຝ່າຍໄດ້ແຈ້ງໃຫ້ກັນຊາບກ່ຽວກັບສະພາບການຂອງແຕ່ລະພັກ ແລະແຕ່ລະປະເທດ; ແລກປ່ຽນກ່ຽວກັບບັນຫາສາກົນ ແລະພາກພື້ນທີ່ຕ່າງຝ່າຍຕ່າງມີຄວາມສົນໃຈ, ກ່ຽວກັບການກໍານົດທິດ ແລະແຜນນະໂຍບາຍໃຫຍ່, ປະກອບສ່ວນເຂົ້າໃນການເຮັດໃຫ້ການພົວພັນຄູ່ຮ່ວມມືຍຸດທະສາດຮອບດ້ານ ຫວຽດນາມ-ອິນເດຍ ເລິກເຊິ່ງຂຶ້ນຕື່ມ.

ໂດຍ: ທູຈາງ