ຫວຽດນາມ ສະໜັບສະໜູນລັດທິຫຼາຍຝ່າຍ ແລະບົດບາດໃຈກາງຂອງສະຫະປະຊາຊາດ

ທີ່ການພົບປະ, ທ່ານນາຍົກລັດຖະມົນຕີ ຟ້າມມິງຈິ໊ງ ເນັ້ນໜັກວ່າ: ຫວຽດນາມ ປະຕິບັດແນວທາງພົວພັນການຕ່າງປະເທດເອກະລາດ, ເປັນເຈົ້າຕົນເອງ, ຫັນເປັນຫຼາຍຝ່າຍ, ຫຼາຍຮູບຫຼາຍແບບ; ສະໜັບສະໜູນລັດທິຫຼາຍຝ່າຍ ແລະບົດບາດໃຈກາງຂອງ ສປຊ. ທ່ານນາຍົກລັດຖະມົນຕີ ຢືນຢັນວ່າ ຫວຽດນາມ ພ້ອມແລ້ວທີ່ຈະຮ່ວມມື, ແບ່ງປັນ, ປະກອບສ່ວນ ແລະພ້ອມກັບ ສປຊ ຜັນຂະຫຍາຍບັນດາມາດຕະການທົ່ວໂລກ, ຮອບດ້ານ, ທົ່ວປວງຊົນ ເພື່ອແກ້ໄຂບັນດາສິ່ງທ້າທາຍໃນປະຈຸບັນ, ສະໜັບສະໜູນສັນຕິພາບ, ຊຸກຍູ້ການພັດທະນາແບບຍືນຍົງ, ຮັບປະກັນສິດທິມະນຸດ.

ທ່ານນາຍົກລັດຖະມົນຕີ ຟ້າມມິງຈິ໊ງ ໃຫ້ການຕ້ອນຮັບຜູ້ປະສານງານ ແລະບັນດາຫົວໜ້າຜູ້ຕາງໜ້າບັນດາອົງການສະຫະປະຊາຊາດປະຈຳຫວຽດນາມ. ພາບ: ສໍານັກຂ່າວສານຫວຽດນາມ.

ທ່ານນາຍົກລັດຖະມົນຕີ ຮຽກຮ້ອງໃຫ້ບັນດາອົງການສະຫະປະຊາຊາດປະຈໍາຫວຽດນາມ ສືບຕໍ່ຮ່ວມມືຢ່າງແໜ້ນແຟ້ນກັບບັນດາກະຊວງ, ຂະແໜງການ, ທ້ອງຖິ່ນ, ໜູນຊ່ວຍໃຫ້ຄໍາປຶກສານະໂຍບາຍ, ລະດົມແຫຼ່ງກຳລັງສາກົນ, ເປັນຕົ້ນແມ່ນດ້ານວິທະຍາສາດ, ເຕັກໂນໂລຊີ, ປ່ຽນແປງໃໝ່ປະດິດຄິດສ້າງ, ຍົກສູງກໍາລັງຄວາມສາມາດບໍລິຫານແຫ່ງຊາດ, ບໍາລຸງກໍ່ສ້າງຊັບພະຍາກອນມະນຸດ, ຕອບສະໜອງຄວາມຮຽກຮ້ອງຕ້ອງການ ແລະສອດຄ່ອງກັບບັນດາທິດທາງພັດທະນາ ແລະບຸລິມະສິດຂອງຫວຽດນາມ ໃນໄລຍະຈະມາເຖິງ, ເປັນຕົ້ນແມ່ນປະຕິບັດ 2 ເປົ້າໝາຍ 100 ປີກາຍເປັນປະເທດພັດທະນາອຸດສາຫະກຳທີ່ທັນສະໄໝ ແລະມີລາຍຮັບປານກາງສູງ ໃນປີ 2030 ແລະເປັນປະເທດທີ່ມີລາຍຮັບສູງໃນປີ 2045.

ສ່ວນທ່ານນາງ Pauline Tamesis, ຜູ້ປະສານງານ ແລະບັນດາຫົວໜ້າຜູ້ຕາງໜ້າບັນດາອົງການ ສປຊ ປະຈໍາ ຫວຽດນາມ ໄດ້ຕີລາຄາສູງບົດບາດ, ຄໍາໝັ້ນສັນຍາ ແລະບັນດາການປະກອບສ່ວນອັນຕັ້ງໜ້າຂອງຫວຽດນາມ ທີ່ບັນດາກົນໄກຂອງ ສປຊ, ພິເສດແມ່ນບັນດາຄວາມມານະພະຍາຍາມຂອງຫວຽດນາມ ໃນການຊຸກຍູ້ການປະຕິບັດບັນດາບຸລິມະສິດລວມຂອງ ສປຊ ແລະປະຊາຄົມສາກົນໃນການຮັກສາສັນຕິພາບ, ຊຸກຍູ້ການພັດທະນາແບບຍືນຍົງ.

ການນຳບັນດາອົງການສະຫະປະຊາຊາດ ຢືນຢັນຄຳໝັ້ນສັນຍາສືບຕໍ່ສົມທົບກັນຢ່າງແໜ້ນແຟ້ນກັບຫວຽດນາມ, ພິເສດແມ່ນຜັນຂະຫຍາຍບັນດາເອກະສານຂອງກອງປະຊຸມສຸດຍອດອະນາຄົດ, ຊຸກຍູ້ການຫັນເປັນດີຈີຕອນ, ນຳໃຊ້ປັນຍາປະດິດ, ປະຕິບັດ JETP ປະສົບຜົນສຳເລັດ, ຮັບມືກັບການປ່ຽນແປງຂອງດິນຟ້າອາກາດ, ປົກປັກຮັກສາສິ່ງແວດລ້ອມ, ຍົກສູງສຸຂະພາບຂອງປະຊາຊົນ...

ໂດຍ: ຈາງຫງວຽນ