    |
 |
|
ທ່ານ Javier Arévalo Vela ຜູ້ພິພາກສາສານສູງສຸດ ເປຣູ ຕ້ອນຮັບທ່ານ ເລືອງເກື່ອງ ປະທານປະເທດຫວຽດນາມ. ພາບ: ສໍານັກຂ່າວສານຫວຽດນາມ |
ເປີດໜ້າໃໝ່ໃນການຮ່ວມມືດ້ານຕຸລາການລະຫວ່າງສອງປະເທດ
ຕອນເຊົ້າວັນທີ 13 ພະຈິກ, ຢູ່ສຳນັກງານໃຫຍ່ສານສູງສຸດຢູ່ນະຄອນຫຼວງ Lima, ທ່ານ ເລືອງເກື່ອງ ປະທານປະເທດຫວຽດນາມ ໄດ້ພົບປະກັບທ່ານ Javier Arévalo Vela ຜູ້ພິພາກສາສານສູງສຸດ ເປຣູ.
ທ່ານຜູ້ພິພາກສາສານສູງສຸດເປຣູ ໄດ້ໃຫ້ການຕ້ອນຮັບທ່ານປະທານປະເທດ ເລືອງເກື່ອງ ພ້ອມດ້ວຍຄະນະຜູ້ແທນຂັ້ນສູງຫວຽດນາມ ທີ່ມາຢ້ຽມຢາມ ເປຣູ ຢ່າງເປັນທາງການ, ຕີລາຄາສູງ ແລະເນັ້ນໜັກເຖິງຄວາມໝາຍສຳຄັນຂອງການຢ້ຽມຢາມວ່າໄດ້ດຳເນີນໄປເນື່ອງໃນໂອກາດສະເຫຼີມສະຫຼອງ 30 ປີແຫ່ງວັນສ້າງຕັ້ງການພົວພັນທາງການທູດ ຫວຽດນາມ-ເປຣູ (14-11-1994 / 14-11-2024), ພ້ອມທັງສະແດງຄວາມເຊື່ອໝັ້ນວ່າ ການຢ້ຽມຢາມຈະປະກອບສ່ວນປັບປຸງ ແລະຍົກລະດັບການພົວພັນສອງປະເທດໃນໄລຍະຈະມາເຖິງ.
|
|
 |
|
ທ່ານ Javier Arévalo Vela ຜູ້ພິພາກສາສານສູງສຸດເປຣູ ແລະທ່ານ ເລືອງເກື່ອງ ປະທານປະເທດຫວຽດນາມ. ພາບ: ສໍານັກຂ່າວສານຫວຽດນາມ |
ທ່ານປະທານປະເທດ ເລືອງເກື່ອງ ສະແດງຄວາມປິຕິຊົມຊື່ນຕໍ່ການພັດທະນາຢ່າງຕັ້ງໜ້າໃນການພົວພັນ ຫວຽດນາມ-ເປຣູ ໃນໄລຍະຜ່ານມາໃນທຸກຂົງເຂດ, ພິເສດແມ່ນການຄ້າ-ການລົງທຶນ, ສະແດງອອກໃຫ້ເຫັນຜ່ານເລື່ອງປະຈຸບັນ ເປຣູ ແມ່ນຄູ່ຮ່ວມມືລົງທຶນໃຫຍ່ສຸດຂອງຫວຽດນາມ ຢູ່ອາເມລິກາລາຕິນ ໃນຂະນະທີ່ ຫວຽດນາມ ແມ່ນຄູ່ຮ່ວມມືການຄ້າອັນດັບ 1 ຂອງ ເປຣູ ໃນອາຊຽນ. ທ່ານປະທານປະເທດ ໄດ້ແຈ້ງໃຫ້ທ່ານຜູ້ພິພາກສາສານສູງສຸດເປຣູ ຊາບກ່ຽວກັບການຢ້ຽມຢາມຄັ້ງນີ້, ການນຳສອງຝ່າຍຈະແລກປ່ຽນມາດຕະການລະອຽດເພື່ອແນໃສ່ເພີ່ມທະວີການຮ່ວມມື, ຜ່ານນັ້ນສ້າງພະລັງແຮງທີ່ສຳຄັນເພື່ອນຳການພົວພັນສອງປະເທດຂຶ້ນສູ່ລະດັບສູງໃໝ່ໃນໄລຍະຈະມາເຖິງ.
ສໍາລັບຂົງເຂດຕຸລາການ, ທ່ານປະທານປະເທດ ເລືອງເກື່ອງ ຫວັງວ່າ ໃນໄລຍະຈະມາເຖິງ, ຂະແໜງສານຫວຽດນາມ ແລະເປຣູ ຈະມີການເຄື່ອນໄຫວຮ່ວມມື, ແລກປ່ຽນຄະນະຜູ້ແທນ ເພື່ອຖອດຖອນບົດຮຽນເຊິ່ງກັນ ແລະກັນ. ນອກຈາກນັ້ນ, ທ່ານປະທານປະເທດ ເລືອງເກື່ອງ ຍັງປາດຖະໜາວ່າ ຂະແໜງຕຸລາການເປຣູ ຈະຕັ້ງໜ້າສ້າງເງື່ອນໄຂສະດວກໃຫ້ວິສາຫະກິດຫວຽດນາມ ເພີ່ມທະວີການລົງທຶນຢູ່ ເປຣູ ກໍ່ຄືສະເໜີໃຫ້ຂະແໜງຕຸລາການສອງປະເທດຍູ້ແຮງການສົມທົບກັນຢູ່ເວທີປາໄສຕຸລາການລະຫວ່າງພາກພື້ນ ແລະສາກົນ.
|
|
 |
|
ທ່ານ ເລືອງເກື່ອງ ປະທານປະເທດຫວຽດນາມ ພົບປະກັບທ່ານ Javier Arévalo Vela ຜູ້ພິພາກສາສານສູງສຸດ ເປຣູ. ພາບ: ສໍານັກຂ່າວສານຫວຽດນາມ |
ທ່ານຜູ້ພິພາກສາສານສູງສຸດເປຣູ ຢືນຢັນວ່າ ເປຣູ ເວົ້າລວມ ແລະຂະແໜງຕຸລາການປະເທດນີ້ເວົ້າສະເພາະຍາມໃດກໍ່ຖືເປັນສໍາຄັນ ແລະພ້ອມແລ້ວທີ່ຈະຊຸກຍູ້ການພົວພັນຮ່ວມມື, ມິດຕະພາບກັບຫວຽດນາມ. ທ່ານຜູ້ພິພາກສາສານສູງສຸດເປຣູ ໄດ້ເຫັນດີເປັນເອກະພາບຕໍ່ການຕີລາຄາຂອງທ່ານປະທານປະເທດ ເລືອງເກື່ອງ ກ່ຽວກັບຄວາມສາມາດບົ່ມຊ້ອນ ແລະຄວາມຈໍາເປັນເພື່ອຊຸກຍູ້ການຮ່ວມມືດ້ານຕຸລາການລະຫວ່າງສອງປະເທດ, ພ້ອມທັງສະເໜີກ່ຽວກັບເລ່ືອງຂະແໜງສານຫວຽດນາມ ແລະເປຣູ ລົງນາມໃນເອກະສານຮ່ວມມືແມ່ນແນໃສ່ກໍານົດທິດໃຫ້ແກ່ການເຄື່ອນໄຫວຮ່ວມມືລະອຽດໃນໄລຍະຈະມາເຖິງໂດຍໄວ. ທ່ານຜູ້ພິພາກສາສານສູງສຸດເປຣູ ຢືນຢັນວ່າ ບັນດາວິສາຫະກິດຫວຽດນາມ ທີ່ລົງທຶນຢູ່ ເປຣູ ຈະໄດ້ຮັບການປົກປ້ອງດ້ວຍກົດໝາຍຂອງ ເປຣູ, ພ້ອມທັງເນັ້ນໜັກວ່າ ຫວຽດນາມ ແລະເປຣູ ລ້ວນແຕ່ແມ່ນສອງປະເທດທີ່ເຄົາລົບກົດໝາຍ, ຕາມນັ້ນແລ້ວ, ການພົວພັນຮ່ວມມືລະຫວ່າງອົງການຕຸລາການສອງປະເທດຍັງມີຄວາມສາມາດບົ່ມຊ້ອນຫຼາຍຢ່າງ.
ສອງຝ່າຍສະແດງຄວາມເຊື່ອໝັ້ນວ່າ ດ້ວຍຄວາມຕັດສິນໃຈ ແລະຄວາມມານະພະຍາຍາມຂອງທັງສອງຝ່າຍ, ການພົວພັນ ຫວຽດນາມ-ເປຣູ ເວົ້າລວມ ແລະການຮ່ວມມືດ້ານຕຸລາການລະຫວ່າງສອງປະເທດເວົ້າສະເພາະ ຈະກ້າວເຂົ້າສູ່ໜ້າປະຫວັດສາດໃໝ່ນັບມື້ນັບດີງາມກວ່າ, ປະກອບສ່ວນເຂົ້າໃນສັນຕິພາບ, ສະຖຽນລະພາບ ແລະການພັດທະນາຂອງສອງປະເທດ, ສອງພາກພື້ນ.
Viettel ເປຣູ - ຈຸດທີ່ພົ້ນເດັ່ນຂອງການເຄື່ອນໄຫວຮ່ວມມືລົງທຶນຢູ່ຕ່າງປະເທດ
ກ່ອນໜ້ານັ້ນ, ຕອນບ່າຍວັນທີ 12 ພະຈິກ, ທ່ານ ເລືອງເກື່ອງ ປະທານປະເທດ ພ້ອມດ້ວຍຄະນະຜູ້ແທນຂັ້ນສູງຫວຽດນາມ ໄດ້ໄປຢ້ຽມຢາມ, ເຮັດວຽກກັບບໍລິສັດ Viettel ເປຣູ (Bitel) ຂຶ້ນກັບກຸ່ມບໍລິສັດອຸດສາຫະກໍາ-ໂທລະຄົມມະນາຄົມກອງທັບ (Viettel).
|
|
 |
|
ທ່ານ ເລືອງເກື່ອງ ປະທານປະເທດ ພ້ອມດ້ວຍຄະນະຜູ້ແທນຂັ້ນສູງຫວຽດນາມ ຢ້ຽມຢາມ ແລະເຮັດວຽກຢູ່ບໍລິສັດ Viettel ເປຣູ. ພາບ: qdnd.vn |
ກ່າວຄຳເຫັນທີ່ການເຮັດວຽກ, ທ່ານປະທານປະເທດ ເລືອງເກື່ອງ ໄດ້ຍ້ອງຍໍຊົມເຊີຍຄວາມມານະພະຍາຍາມ ແລະໝາກຜົນທີ່ກຸ່ມບໍລິສັດບັນລຸໄດ້ນັບແຕ່ລົງທຶນເຂົ້າຕະຫຼາດ ເປຣູ ເມື່ອປີ 2011. ທ່ານປະທານປະເທດ ຊີ້ແຈ້ງວ່າ ພາຍໃຕ້ການນຳພາຂອງພັກ, ລັດ, ຄະນະພັກການທະຫານສູນກາງ, ກະຊວງປ້ອງກັນປະເທດ, ກຸ່ມບໍລິສັດໄດ້ຜ່ານຜ່າຄວາມຫຍຸ້ງຍາກ, ສິ່ງທ້າທາຍຫຼາຍຢ່າງ, Bitel ໄດ້ຄວບຄຸມເຄືອຂ່າຍໂທລະຄົມມະນາຄົມກວ້າງຂວາງໄປທົ່ວປະເທດເປຣູ, ເປັນຕົ້ນແມ່ນຢູ່ເຂດຫ່າງໄກສອກຫຼີກ; ລາຍຮັບຂອງປີຕໍ່ໄປແມ່ນສູງກວ່າປີຜ່ານມາ ແລະປະຕິບັດບັນດາໂຄງການໜູນຊ່ວຍສັງຄົມຢູ່ ເປຣູ. Bitel ບໍ່ພຽງແຕ່ປະກອບສ່ວນລາຍຮັບໃຫ້ແກ່ Viettel ເທົ່ານັ້ນ, ຫາກຍັງຢືນຢັນເຖິງຄຸນທາດ, ສະຕິປັນຍາຂອງຊາວຫວຽດນາມ ອີກດ້ວຍ...
ທ່ານປະທານປະເທດ ເລືອງເກື່ອງ ເນັ້ນໜັກວ່າ ບັນດາໝາກຜົນດັ່ງກ່າວນັ້ນໄດ້ເຮັດໃຫ້ Viettel ໂດດເດັ່ນໃນບັນດາການເຄື່ອນໄຫວຮ່ວມມືລົງທຶນຂອງວິສາຫະກິດຫວຽດນາມ ຢູ່ອາເມລິກາລາຕິນ ເວົ້າລວມ ແລະເປຣູ ເວົ້າສະເພາະ ຜ່ານນັ້ນເປັນການຢືນຢັນຄວາມສາມາດບົ່ມຊ້ອນຮ່ວມມືຂອງຫວຽດນາມ ກັບຕ່າງປະເທດໃນຂົງເຂດໂທລະຄົມມະນາຄົມ. ພ້ອມກັນນັ້ນ, ບັນດາການເຄື່ອນໄຫວສັງຄົມຂອງກຸ່ມບໍລິສັດຢູ່ ເປຣູ ກໍ່ໄດ້ປະກອບສ່ວນໂຄສະນາຮູບພາບປະເທດຫວຽດນາມ ປ່ຽນແປງໃໝ່, ຕັ້ງໜ້າເຊື່ອມໂຍງເຂົ້າກັບເສດຖະກິດສາກົນ, ມິດຕະພາບ ແລະການຮ່ວມມື.
|
|
 |
|
ທ່ານ ເລືອງເກື່ອງ ປະທານປະເທດ ພ້ອມດ້ວຍຄະນະຜູ້ແທນຂັ້ນສູງຫວຽດນາມ ທີ່ການເຮັດວຽກກັບບໍລິສັດ Viettel ເປຣູ (Bitel). ພາບ: qdnd.vn |
ທ່ານປະທານປະເທດ ເລືອງເກື່ອງ ຮຽກຮ້ອງໃຫ້ Bitel ຍາມໃດກໍ່ຮັກສາຄວາມສາມັກຄີ, ເຫັນດີເປັນເອກະພາບ, ເອົາໃຈໃສ່, ເບິ່ງແຍງດູແລຊີວິດທາງດ້ານວັດຖຸ ແລະຈິດໃຈໃຫ້ພາລະກອນ, ຜູ້ອອກແຮງງານ. ນອກຈາກດໍາເນີນທຸລະກິດແລ້ວ, Viettel ເປຣູ ຍັງຕ້ອງເປັນຂົວຕໍ່ໃນການດຳເນີນທຸລະກິດລະຫວ່າງຫວຽດນາມ ແລະເປຣູ, ເສີມຂະຫຍາຍຜົນງານ, ຍົກສູງຄຸນນະພາບການບໍລິການຢ່າງບໍ່ຢຸດຢັ້ງ, ຢືນຢັນຄວາມເຊື່ອໝັ້ນກັບປະຊາຊົນປະເທດປະຈຳຖິ່ນ, ປະຕິບັດກົດໝາຍ, ຂໍ້ກຳນົດຂອງປະເທດເພື່ອນຢ່າງເຂັ້ມງວດ.
ທ່ານປະທານປະເທດ ເລືອງເກື່ອງ ສະເໜີໃຫ້ກຸ່ມບໍລິສັດ Viettel ເສີມຂະຫຍາຍໝາກຜົນທີ່ບັນລຸໄດ້, ເພີ່ມທະວີມາດຕະການເປີດກວ້າງອັດຕາສ່ວນຕະຫຼາດບໍລິການຢູ່ ເປຣູ, ຊຸກຍູ້ການເປີດກວ້າງການເຄື່ອນໄຫວໄປຍັງຕະຫຼາດອື່ນໃນພາກພື້ນ; ສືບຕໍ່ຕິດພັນການເຄື່ອນໄຫວດຳເນີນທຸລະກິດກັບການເຄື່ອນໄຫວສັງຄົມເພື່ອແນໃສ່ຍົກສູງພາບພົດ, ການມີອິດທິພົນຊື່ສຽງຂອງວິສາຫະກິດຫວຽດນາມ ເວົ້າລວມ, ຂົງເຂດໂທລະຄົມມະນາຄົມເວົ້າສະເພາະຢູ່ ເປຣູ ແລະພາກພື້ນ.
|
|
 |
|
ທ່ານພົນເອກ ຟານວັນຢາງ ລັດຖະມົນຕີກະຊວງປ້ອງກັນປະເທດຫວຽດນາມ ມອບໃບຍ້ອງຍໍຂອງນາຍົກລັດຖະມົນຕີ ໃຫ້ແກ່ບໍລິສັດ Viettel ເປຣູ. ພາບ: qdnd.vn |
ເນື່ອງໃນໂອກາດນີ້, ທ່ານພົນເອກ ຟານວັນຢາງ, ກໍາມະການກົມການເມືອງ, ຮອງເລຂາຄະນະພັກການທະຫານສູນກາງ, ລັດຖະມົນຕີກະຊວງປ້ອງກັນປະເທດຫວຽດນາມ ໄດ້ມອບໃບຍ້ອງຍໍຂອງນາຍົກລັດຖະມົນຕີ ໃຫ້ແກ່ບໍລິສັດ Viettel ເປຣູ.
ໂດຍ: ເຈິ່ນຮວ່ຽນ