ຕ້ອນຮັບທ່ານນາຍົກລັດຖະມົນຕີ ຟ້າມມິງຈີ້ງ ພ້ອມດ້ວຍພັນລະຍາ ແລະຄະນະຜູ້ແທນຂັ້ນສູງຫວຽດນາມ ຢູ່ສະໜາມບິນມີຜູ້ຕາງໜ້າກະຊວງການຕ່າງປະເທດ ບຣາຊິນ, ທ່ານ ບຸ່ຍວັນງິ ເອກອັກຄະລັດຖະທູດຫວຽດນາມ ປະຈໍາ ບຣາຊິນ; ພະນັກງານ, ລັດຖະກອນສະຖານທູດ ແລະຜູ້ຕາງໜ້າປະຊາຄົມຊາວຫວຽດນາມ ອາໄສຢູ່ ບຣາຊິນ.
ຕອນເຊົ້າວັນທີ 17 ພະຈິກ, ທ່ານນາຍົກລັດຖະມົນຕີ ຟ້າມມິງຈີ້ງ ໄດ້ເຂົ້າຮ່ວມພິທີເປີດນໍາໃຊ້ການຕິດປ້າຍລະນຶກປະທານ ໂຮ່ຈີມິນ ຢູ່ຄຸ້ມ Santa Teresa, ນະຄອນ Rio de Janeiro ເຊິ່ງເປັນບ່ອນທີ່ປະທານ ໂຮ່ຈີມິນ ເຄີຍເຮັດວຽກເມື່ອຢຸດພັກການເດີນທາງໄປຊອກຫາເສັ້ນທາງກູ້ຊາດ ໃນປີ 1912.
    |
 |
|
ທ່ານນາຍົກລັດຖະມົນຕີ ຟ້າມມິງຈີ້ງ ກ່າວຄໍາເຫັນທີ່ພິທີຕິດປ້າຍລະນຶກປະທານ ໂຮ່ຈີມິນ ຢູ່ຄຸ້ມ Santa Teresa, ນະຄອນ Rio de Janeiro, Brazil. ພາບ: ສໍານັກຂ່າວສານຫວຽດນາມ. |
ປ້າຍລະນຶກທີ່ຕິດຕັ້ງໃສ່ບ່ອນທີ່ ປະທານ ໂຮ່ຈີມິນ ພັກອາໄສ ແລະເຮັດວຽກຢູ່ຄຸ້ມ Santa Teresa ມີສະຖານທີ່ກວ້າງຂວາງ, ມີຕົ້ນໄມ້ໃຫຍ່ຫຼາຍ ແລະໃກ້ສະຖານີລົດໄຟ ສະນັ້ນຈຶ່ງມີຄົນໄປມາເປັນຈໍານວນຫຼວງຫຼາຍ, ສະດວກແກ່ທຸກຄົນທີ່ຢາກມາຢ້ຽມຢາມ. ປ້າຍລະນຶກ ໄດ້ຄວັດເປັນສອງພາສາ ຫວຽດນາມ - ປອກຕຸຍການ, ໂດຍຂຽນແຈ້ງວ່າ: “ປະທານ ໂຮ່ຈີມິນ (1890-1969), ຜູ້ນໍາປະຕິວັດຫວຽດນາມ ໄດ້ອ່ານຖະແຫຼງການເອກະລາດ ໃນວັນທີ 2 ກັນຍາ 1945, ສະຖາປະນາ ສາທາລະນະລັດ ປະຊາທິປະໄຕ ຫວຽດນາມ. ປີ 1987, ອົງການ UNESCO ໄດ້ຮັບຮອງເອົາມະຕິເລກທີ 24C/18.65, ເຊີດຊູ ປະທານ ໂຮ່ຈີມິນ ເປັນ “ນັກວິລະຊົນປົດປ່ອຍຊາດ, ນັກວັດທະນະທໍາທີ່ດີເລີດຂອງຫວຽດນາມ”. ມະຕິຢັ້ງຢືນວ່າ ປະທານ ໂຮ່ຈີມິນ ເປັນສັນຍາລັກທີ່ດີເລີດກ່ຽວກັບການຕັດສິນໃຈປົດປ່ອຍຊາດຫວຽດນາມ, ປະກອບສ່ວນເຂົ້າໃນການຕໍ່ສູ້ລວມຂອງປະຊາຊາດໃນໂລກ. ປີ 1912, ເພິ່ນ ໄດ້ໄປນະຄອນ Rio de Janeiro ແລະມີໜ້າຢູ່ຄຸ້ມ Santa Teresa ໃນຂະນະທີ່ເດີນທາງໄປຊອກຫາເສັ້ນທາງກູ້ຊາດ”.
|
|
 |
|
ທ່ານນາຍົກລັດຖະມົນຕີ ຟ້າມມິງຈີ້ງ ແລະພັນລະຍາ ພ້ອມກັບບັນດາຜູ້ແທນເຂົ້າຮ່ວມພິທີເປີດນໍາໃຊ້ການຕິດປ້າຍລະນຶກປະທານ ໂຮ່ຈີມິນ ຢູ່ຄຸ້ມ Santa Teresa, ນະຄອນ Rio de Janeiro, Brazil. ພາບ: ສໍານັກຂ່າວສານຫວຽດນາມ. |
ກ່າວຄໍາເຫັນທີ່ເຫດການ, ທ່ານນາຍົກລັດຖະມົນຕີ ເນັ້ນໜັກວ່າ, ປ້າຍເຊີດຊູ ປະທານ ໂຮ່ຈີມິນ ຢູ່ນະຄອນ Rio de Janeiro ຈະກາຍເປັນສະຖານທີ່ທີ່ມີຄວາມໝາຍທາງດ້ານປະຫວັດສາດ, “ເປັນສະຖານທີ່ສຶກສາອົບຮົມ” ເພື່ອໃຫ້ຄົນຮຸ່ນໜຸ່ມສອງປະເທດຮຽນຮູ້ປະຫວັດສາດ, ສືບຕໍ່ ແລະຮັກສາບັນດາຄຸນຄ່າອັນດີງາມທີ່ ເພິ່ນ ໄດ້ປະໄວ້ໃຫ້; ເຊື່ອໝັ້ນວ່າດ້ວຍບັນດາປັດໄຈສະໜິດຕິດພັນທີ່ມີຢູ່ແລ້ວ, ນະຄອນ Rio de Janeiro ເວົ້າສະເພາະ, ເວົ້າລວມແມ່ນບັນດາທ້ອງຖິ່ນອື່ນຂອງບຣາຊິນ ຈະຮ່ວມມືນັບມື້ນັບໜັກແໜ້ນກັບບັນດາທ້ອງຖິ່ນຂອງຫວຽດນາມ ກວ່າອີກ, ປະກອບສ່ວນປັບປຸງການຮ່ວມມືຫຼາຍດ້ານໃນລະດັບຕ່າງໆ, ເພີ່ມທະວີການພົບປະແລກປ່ຽນປະຊາຊົນ ແລະແລກປ່ຽນວັດທະນະທໍາລະຫວ່າງສອງປະເທດ.
ທ່ານນາຍົກລັດຖະມົນຕີ ປາດຖະໜາ ແລະເຊື່ອໝັ້ນວ່າ ບັນດາຄົນຮຸ່ນໃນປັດຈຸບັນ ແລະພາຍພາກໜ້າຂອງສອງປະເທດ ຈະສືບຕໍ່ເສີມຂະຫຍາຍບັນດາຄຸນຄ່າ, ມໍລະດົກທີ່ປະທານ ໂຮ່ຈີມິນ ຜູ້ນໍາທີ່ຍິ່ງໃຫຍ່ ແລະຄົນຮຸ່ນກ່ອນ ໄດ້ປະໄວ້, ພ້ອມກັນຕັດສິນໃຈຊຸກຍູ້ການພົວພັນ ຫວຽດນາມ - ບຣາຊິນ ໃຫ້ຂຶ້ນສູ່ລະດັບສູງໃໝ່ ເພື່ອສັນຕິພາບ ແລະການຮ່ວມມືພັດທະນາ, ເພື່ອຊີວິດທີ່ອີ່ມໜໍາສໍາລານ, ຄວາມຜາສຸກຂອງປະຊາຊົນຢູ່ແຕ່ລະປະເທດ, ແຕ່ລະພາກພື້ນ ແລະໃນໂລກ, ຄືດັ່ງຄວາມປາຖະໜາຂອງປະທານ ໂຮ່ຈີມິນ ໃນຄາວຍັງມີຊີວິດຢູ່.
ໃນຕອນເຊົ້າຂອງວັນດຽວກັນ, ຢູ່ທີ່ Rio de Janeiro, ທ່ານນາຍົກລັດຖະມົນຕີ ຟ້າມມິງຈີ້ງ ໄດ້ຕ້ອນຮັບການນໍາ 4 ກຸ່ມບໍລິສັດແຖວໜ້າຂອງບຣາຊິນ, ລວມມີ: ກຸ່ມບໍລິສັດການບິນ-ອາວະກາດ Embraer, ກຸ່ມບໍລິສັດຜະລິດຊີ້ນແຖວໜ້າໂລກ JBS, ກຸ່ມບໍລິສັດການຄ້າແຖວໜ້າທະວີບອາເມລິກາ Oceanside One Trading ແລະກຸ່ມບໍລິສັດ Alterosa ທີ່ເຄື່ອນໄຫວໃນຂົງເຂດບັດອັດສະລິຍະ.
|
|
 |
|
ທ່ານນາຍົກລັດຖະມົນຕີ ຟ້າມມິງຈີ້ງ ຕ້ອນຮັບທ່ານ José Serrador ຮອງປະທານທົ່ວໂລກຂອງກຸ່ມບໍລິສັດການບິນ-ອາວະກາດ Embraer. ພາບ: Baochinhphu.vn |
ທີ່ການຕ້ອນຮັບຄັ້ງຕ່າງໆ, ທ່ານນາຍົກລັດຖະມົນຕີ ໃຫ້ຮູ້ວ່າ ການພົວພັນ ຫວຽດນາມ - ບຣາຊິນ ພວມພັດທະນາອັນດີງາມດ້ວຍຄວາມໄວ້ເນື້ອເຊື່ອໃຈດ້ານການເມືອງສູງ, ພິເສດເມື່ອສອງປະເທດ ພວມກະກຽມຍົກລະດັບການ ພົວພັນຂຶ້ນຕື່ມ. ທ່ານ ຟ້າມມິງຈີ້ງ ສະເໜີໃຫ້ບັນດາກຸ່ມບໍລິສັດມາຮ່ວມມື, ລົງທຶນກັບຫວຽດນາມ ໃຫ້ຫຼາຍກວ່າ. ລັດຖະບານຫວຽດນາມ ໃຫ້ຄໍາໝັ້ນສັນຍາ ຈະສ້າງເງື່ອນໄຂອໍານວຍຄວາມສະດວກ, ສອດຄ່ອງກັບຂໍ້ກໍານົດຂອງກົດໝາຍ ເພື່ອໃຫ້ບັນດາກຸ່ມບໍລິສັດ, ນັກລົງທຶນ ບຣາຊິນ ລົງທຶນດໍາເນີນທຸລະກິດຢ່າງມີປະສິດທິຜົນ ແລະຍືນຍົງຍາວນານ.
ທີ່ການຕ້ອນຮັບທ່ານ José Serrador, ຮອງປະທານທົ່ວໂລກຂອງກຸ່ມບໍລິສັດການບິນ-ອາວະກາດ Embraer, ທ່ານນາຍົກລັດຖະມົນຕີ ສະເໜີໃຫ້ກຸ່ມບໍລິສັດ Embraer ໃຫ້ຄໍາປຶກສາກັບຝ່າຍຫວຽດນາມ ໃນການພັດທະນາຂົງເຂດການບິນ; ສືບຕໍ່ແລກປ່ຽນກັບຄູ່ຮ່ວມມືຫວຽດນາມ, ຄື: Vietnam Airlines, Vietjet... ເພື່ອກ້າວໄປເຖິງການເຄື່ອນໄຫວຮ່ວມມືລະອຽດ, ຄື ຜັນຂະຫຍາຍ ບັນດາສັນຍາການຄ້າ, ຊ່ວຍບັນດາບໍລິສັດການບິນຫວຽດນາມ ຂະຫຍາຍເຮືອບິນແບບຍືນຍົງ, ຍົກສູງປະສິດທິຜົນການຂຸດຄົ້ນ, ຮັບປະກັນຄວາມປອດໄພ.
ສ່ວນທ່ານ José Serrador ຢັ້ງຢືນວ່າ Embraer ປາດຖະໜາຢາກຊຸກຍູ້ການຮ່ວມມືຮອບດ້ານກັບຫວຽດນາມ. ການນໍາກຸ່ມບໍລິສັດ ຕີລາຄາວ່າ ການພົວພັນສອງປະເທດເວົ້າລວມ ແລະການຮ່ວມມືຂອງ Embraer ກັບຄູ່ຮ່ວມມືຫວຽດນາມ ໄດ້ຮັບການຊຸກຍູ້ຢ່າງແຂງແຮງ ພາຍຫຼັງການຢ້ຽມຢາມ ບຣາຊິນ ຂອງທ່ານນາຍົກລັດຖະມົນຕີ ເມື່ອເດືອນ ກັນຍາ ປີ 2023.
ທີ່ການຕ້ອນຮັບທ່ານ Celso Nunes, ຫົວໜ້ານະວັດຕະກໍາກຸ່ມບໍລິສັດ Alterosa, ທ່ານນາຍົກລັດຖະມົນຕີ ສະເໜີໃຫ້ Alterosa ເປີດກວ້າງການຮ່ວມມືກັບຫວຽດນາມ ທັງຂອບເຂດ ແລະເປົ້າໝາຍ, ເປັນຕົ້ນແມ່ນໃນເຕັກໂນໂລຊີມາດຕະການຢືນຢັນຮັກສາຄວາມລັບດີຈີຕອນ ແລະບັດອັດສະລິຍະ, ປະກອບສ່ວນກໍ່ສ້າງພື້ນຖານໂຄງລ່າງ, ຊຸກຍູ້ເສດຖະກິດດີຈີຕອນ, ກໍ່ສ້າງສັງຄົມດີຈີຕອນ, ລັດຖະບານດີຈີຕອນ, ພົນລະເມືອງດີຈີຕອນ, ພັດທະນາບັນດາຂົງເຂດປັນຍາປະດິດ, Cloud Computing, IoT, ຮ່ວມມືກັບສູນນະວັດຕະກໍາແຫ່ງຊາດຂອງຫວຽດນາມ, ຊຸກຍູ້ນະວັດຕະກໍາ, ພັດທະນາສູນການເງິນ.
ທີ່ການຕ້ອນຮັບທ່ານ Marcio Rodrigues ຜູ້ອໍານວຍການບໍລິຫານ JBS, ທ່ານນາຍົກລັດຖະມົນຕີ ສະເໜີໃຫ້ການນໍາກຸ່ມບໍລິສັດ ມາຫວຽດນາມ ໂດຍໄວເພື່ອຊອກຫາໂອກາດຮ່ວມມື, ເພີ່ມທະວີການຮ່ວມມືເປີດກວ້າງລະບົບຕ່ອງໂສ້, ນໍາຜະລິດຕະພັນກະເສດທີ່ອຸດົມສົມບູນຂອງຫວຽດນາມ ໄປຍັງຕະຫຼາດບຣາຊິນ ແລະຕະຫຼາດທົ່ວໂລກໃຫ້ຫຼາຍກວ່າເກົ່າ, ພ້ອມທັງລົງທຶນກໍ່ສ້າງໂຮງຈັກໂຮງງານຢູ່ຫວຽດນາມ ໃນບັນດາຂົງເຂດໜັງ, ຜະລິດ, ປຸງແຕ່ງ, ສົ່ງອອກຊີ້ນສັດລ້ຽງ, ສັດປີກ.
ທີ່ການຕ້ອນຮັບທ່ານ Roger Zen, ປະທານ ທັງເປັນ CEO ກຸ່ມບໍລິສັດ Oceanside One Trading, ທ່ານນາຍົກລັດຖະມົນຕີ ຫວັງວ່າ ກຸ່ມບໍລິສັດ ຈະປະກອບຄໍາເຫັນກັບຝ່າຍຫວຽດນາມ ໃນການກໍ່ສ້າງ, ປັບປຸງລະບອບລະບຽບການໃຫ້ສົມບູນແບບ, ຕອບສະໜອງນະໂຍບາຍຢ່າງທັນການ, ມີປະສິດທິຜົນກັບສະພາບການ; ສືບຕໍ່ຍູ້ແຮງການຮ່ວມມືດ້ານການຄ້າ ແລະຄົ້ນຄວ້າລົງທຶນ, ນໍາຫຼາຍຜະລິດຕະພັນ, ສິນຄ້າຂອງຫວຽດນາມ ເຂົ້າເຖິງຜູ້ບໍລິໂພກທົ່ວໂລກ ແລະນໍາຫວຽດນາມ ເຂົ້າຮ່ວມລະບົບຕ່ອງໂສ້ການສະໜອງທົ່ວໂລກຢ່າງເລິກເຊິ່ງກວ່າ; ເສີມຂະຫຍາຍທ່າແຮງເພີ່ມເຕີມໃຫ້ກັນ.
ກ່ອນໜ້ານັ້ນ, ຕອນຄໍ່າວັນທີ 16 ພະຈິກ ຕາມເວລາທ້ອງຖິ່ນ, ທ່ານນາຍົກລັດຖະມົນຕີ ແລະພັນລະຍາ ໄດ້ມີການພົບປະໂອ້ລົມກັບພະນັກງານ, ລັດຖະກອນສະຖານທູດ ແລະປະຊາຄົມຊາວຫວຽດນາມ ອາໄສຢູ່ ບຣາຊິນ
|
|
 |
|
ທ່ານນາຍົກລັດຖະມົນຕີ ຟ້າມມິງຈີ້ງ ແລະພັນລະຍາ ພ້ອມກັບພະນັກງານ, ລັດຖະກອນສະຖານທູດ ແລະຜູ້ຕາງໜ້າປະຊາຄົມຊາວຫວຽດນາມ ອາໄສຢູ່ ບຣາຊິນ. ພາບ: ສໍານັກຂ່າວສານຫວຽດນາມ. |
ທີ່ການພົບປະໂອ້ລົມ, ທ່ານນາຍົກລັດຖະມົນຕີ ຫວັງວ່າ ພໍ່ແມ່ປະຊາຊົນຈະເສີມຂະຫຍາຍນໍ້າໃຈສາມັກຄີ, ກໍ່ຮ່າງສ້າງຕົວ, ສ້າງອາຊີບ; ຮັກສາສີສັນວັດທະນະທໍາຂອງຊາດ; ປະຕິບັດຕາມກົດໝາຍ ແລະເຊື່ອມຕົວເຂົ້າກັບການດຳລົງຊີວິດປະຈໍາວັນຂອງປະເທດປະຈໍາຖິ່ນ; ຍາມໃດກໍມຸ່ງໄປຫາບ້ານເກີດເມືອງນອນ, ປະເທດຊາດ; ແຕ່ລະຄົນແມ່ນທູດຜູ້ໜຶ່ງ, ແມ່ນຂົວຕໍ່ເພີ່ມພູນຄູນສ້າງການພົວພັນຫວຽດນາມ-ບຣາຊິນ. ທ່ານນາຍົກລັດຖະມົນຕີ ຮຽກຮ້ອງໃຫ້ພະນັກງານ, ລັດຖະກອນສະຖານທູດ ຕ້ອງເບິ່ງແຍງດູແລສະໜິດຕິດພັນ, ພັດທະນາປະຊາຄົມ ໃຫ້ເຕີບໃຫຍ່ເຂັ້ມແຂງ; ໜູນຊ່ວຍ, ແກ້ໄຂບັນດາຄໍາສະເໜີ, ຮັບປະກັນສິດ, ຜົນປະໂຫຍດອັນຊອບທໍາຂອງພໍ່ແມ່ປະຊາຊົນ; ພິເສດແມ່ນຊ່ວຍເຫຼືອ, ສ້າງເງື່ອນໄຂໃຫ້ແກ່ພໍ່ແມ່ປະຊາຊົນ, ເປັນຕົ້ນແມ່ນຍາມປະສົບຄວາມຫຍຸ້ງຍາກ. ນອກຈາກນີ້, ທ່ານນາຍົກລັດຖະມົນຕີ ກໍຮຽກຮ້ອງໃຫ້ສະຖານທູດ, ບັນດາອົງການຜູ້ຕາງໜ້າຫວຽດນາມ ປະຈໍາຢູ່ ບຣາຊິນ ມານະພະຍາຍາມຊຸກຍູ້ປະຕິບັດບັນດາຂໍ້ຕົກລົງຂັ້ນສູງ ເພື່ອໃຫ້ການພົວພັນ ຫວຽດນາມ-ບຣາຊິນ ນັບມື້ນັບເຂົ້າສູ່ລວງເລິກ, ຍືນຍົງ.
ໂດຍ: ໄຊຊະນະ