ທ່ານພົນໂທ ຫວໍມິງເລືອງ ຊີ້ນໍາກອງປະຊຸມສະຫຼຸບຄະດີ A724p

ທ່ານພົນໂທ ຫວໍມິງເລືອງ ກ່າວຄໍາເຫັນຊີ້ນໍາກອງປະຊຸມ. ພາບ: qdnd.vn

ບົດລາຍງານຜົນການຕໍ່ສູ້ຄະດີ A724p ຂອງບັນດາກົມກອງຂຶ້ນກັບທະຫານຊາຍແດນ, ກະຊວງຕໍາຫຼວດ, ຕໍາຫຼວດທະເລຫວຽດນາມ ແລະກົມໃຫຍ່ພາສີ  ໃຫ້ເຫັນວ່າ ພາຍຫຼັງກຳນົດຄະດີໄດ້ສອງເດືອນກວ່າ, ກຳລັງທີ່ກ່ຽວຂ້ອງຂອງບັນດາກົມກອງໄດ້ມ້າງຄະດີສໍາເລັດຜົນ, ຈັບເປົ້າໝາຍ 10 ຄົນ, ເກັບຢາເສບຕິດທຸກປະເພດໄດ້ 211 ກິໂລກຣາມ.

ບັນຍາກາດທີ່ກອງປະຊຸມ. ພາບ: qdnd.vn

ກ່າວຄໍາເຫັນຊີ້ນໍາທີ່ກອງປະຊຸມ, ທ່ານພົນໂທ ຫວໍມິງເລືອງ ຕີລາຄາສູງຜົນງານໃນການຕໍ່ສູ້ຄະດີ A724p ຂອງທຸກກຳລັງ. ເນັ້ນໜັກວ່າ ໃນໄລຍະຈະມາເຖິງ, ການເຄື່ອນໄຫວຂອງອາດຊະຍາກໍາຢາເສບຕິດ ແລະອາດຊະຍາກໍາປະເພດຕ່າງໆຍັງຜັນແປຢ່າງສັບສົນ, ໂດຍສະເພາະແມ່ນເມື່ອບັນດາເປົ້າໝາຍທີ່ຍັງເຫຼືອໃນເຄືອຂ່າຍຄ້າຂາຍຢາເສບຕິດຂອງຄະດີ A724p ທີ່ຍັງບໍ່ທັນໄດ້ຮັບການມ້າງທຳລາຍ, ທ່ານພົນໂທ ຫວໍມິງເລືອງ ຮຽກຮ້ອງໃຫ້ອົງການສະເພາະກິດສະກັດກັ້ນ ແລະຕ້ານອາດຊະຍາກໍາຢາເສບຕິດຂຶ້ນກັບທະຫານຊາຍແດນ, ຕໍາຫຼວດທະເລຫວຽດນາມ, ກົມໃຫຍ່ພາສີ ແລະບັນດາກົມກອງຂອງກະຊວງຕໍາຫຼວດສົມທົບກັນຢ່າງຄົບຊຸດ, ຕໍ່ສູ້ຢ່າງມີປະສິດທິຜົນ, ຮັບປະກັນຄວາມເປັນລະບຽບຮຽບຮ້ອຍ, ຄວາມປອດໄພໃນສັງຄົມ; ເດັດຂາດບໍ່ໃຫ້ຫວຽດນາມ ກາຍເປັນບ່ອນສົ່ງຕໍ່ຢາເສບຕິດຂອງບັນດາເຄືອຂ່າຍອາດຊະຍາກໍາສາກົນ. ທ່ານຮອງລັດຖະມົນຕີກະຊວງປ້ອງກັນປະເທດ ສະແດງຄວາມເຊື່ອໝັ້ນວ່າ ບັນດາເຈົ້າໜ້າທີ່ຈະເສີມຂະຫຍາຍມູນເຊື້ອ, ຜ່ານຜ່າຄວາມຫຍຸ້ງຍາກ, ສ້າງຜົນງານຕ່າງໆໃນໄລຍະຈະມາເຖິງ.

ທ່ານພົນໂທ ຫວໍມິງເລືອງ ມອບໃບຍ້ອງຍໍຂອງລັດຖະມົນຕີກະຊວງປ້ອງກັນປະເທດ ໃຫ້ບັນດາໝູ່ຄະນະ ແລະບຸກຄົນທີ່ມີຜົນງານດີເດັ່ນໃນການຕໍ່ສູ້ສະກັດກັ້ນ ແລະຕ້ານອາດຊະຍາກໍາຢາເສບຕິດ. ພາບ: qdnd.vn

ເນື່ອງໃນໂອກາດນີ້, ທ່ານນາຍົກລັດຖະມົນຕີ, ທ່ານລັດຖະມົນຕີກະຊວງປ້ອງກັນປະເທດ, ການນໍາທະຫານຊາຍແດນ ໄດ້ສົ່ງຈົດໝາຍຍ້ອງຍໍສັນລະເສີນບັນດາໝູ່ຄະນະ, ບຸກຄົນທີ່ມີຜົນງານດີເດັ່ນໃນການຕໍ່ສູ້ຄະດີ A724p.

ໂດຍ: ໄຊຊະນະ