ຫວຽດນາມ ເຂົ້າຮ່ວມກອງປະຊຸມ COP13 ແລະກອງປະຊຸມ MOP36 ກ່ຽວກັບການປົກປ້ອງຊັ້ນ ໂອໂຊນ
ກປ.ອອນໄລ - ແຕ່ວັນທີ 27 ຕຸລາ ຫາວັນທີ 1 ພະຈິກ, ກອງປະຊຸມຄັ້ງທີ 13 ຂອງບັນດາຝ່າຍເຂົ້າຮ່ວມສົນທິສັນຍາ ວຽນນາ ກ່ຽວກັບການປົກປ້ອງຊັ້ນໂອໂຊນ (COP13), ກອງປະຊຸມຄັ້ງທີ 36 ຂອງບັນດາຝ່າຍເຂົ້າຮ່ວມອະນຸສັນຍາ Montreal ກ່ຽວກັບທາດທີ່ເຮັດຊັ້ນໂອໂຊນຫຼຸດລົງ (MOP36) ແລະກອງປະຊຸມສຳມະນາກ່ຽວກັບການຄຸ້ມຄອງວົງຈອນຊີວິດຂອງທາດເຢັນ ໄດ້ຈັດຂຶ້ນຢູ່ຫໍປະຊຸມ ສະຫະປະຊາຊາດ ບາງກອກ, ປະເທດໄທ.
ທ່ານ ຫງວຽນຕວນກວາງ, ຮອງຫົວໜ້າກົມການປ່ຽນແປງຂອງດິນຟ້າອາກາດ, ກະຊວງຊັບພະຍາກອນທຳມະຊາດ ແລະສິ່ງແວດລ້ອມ - ຫົວໜ້າຄະນະຜູ້ແທນຫວຽດນາມ ກ່າວຄຳເຫັນທີ່ກອງປະຊຸມ.
ຕາມທ່ານ ຫງວຽນຕວນກວາງ ແລ້ວ, ຫວຽດນາມ ໄດ້ອະນຸມັດຜ່ານແຜນການຄຸ້ມຄອງ, ກຳຈັດບັນດາທາດທີ່ເຮັດໃຫ້ຊັ້ນໂອໂຊນຫຼຸດລົງ, ທາດທີ່ກໍ່ໃຫ້ເກີດມີຜົນກະທົບຕໍ່ເຮືອນແກ້ວ ໃນມະຕິຕົກລົງເລກທີ 496/QD-TTg ຂອງນາຍົກລັດຖະມົນຕີ ເມື່ອເດືອນມິຖຸນາ ປີ 2024.
    |
 |
|
ບັນຍາກາດທີ່ກອງປະຊຸມ COP13-MOP36. ພາບ: vov.vn |
ແຜນການດັ່ງກ່າວໄດ້ວາງອອກບັນດາໜ້າທີ່, ມາດຕະການທີ່ສຳຄັນ ແຕ່ນີ້ຮອດປີ 2045, ບໍ່ພຽງແຕ່ສຸມໃສ່ຄຸ້ມຄອງ ແລະລົບລ້າງທາດທີ່ໄດ້ຮັບການຄວບຄຸມເທົ່ານັ້ນ, ຫາກຍັງລວມເຖິງການເຄື່ອນໄຫວອື່ນໆ, ເຊັ່ນ: ການຄຸ້ມຄອງອຸປະກອນທີ່ບັນຈຸທາດທີ່ໄດ້ຮັບການຄວບຄຸມ, ປະສິດທິຜົນພະລັງງານ, ການລະບາຍຄວາມຮ້ອນແບບ Passive ກໍ່ຄືກັນກັບການເກັບໂຮມ, ການຣີໄຊເຄີນ ແລະລະລາຍທາດຕ່າງໆ ອີກດ້ວຍ.
ໃນຂອບເຂດກອງປະຊຸມ COP13 - ກອງປະຊຸມ MOP36, ຄະນະຜູ້ແທນຫວຽດນາມ ໄດ້ຕັ້ງໜ້າ, ເປັນເຈົ້າການເຂົ້າຮ່ວມບັນດາວາລະປະຊຸມຄົບຄະນະ; ໄດ້ພົບປະ, ປຶກສາຫາລືກັບທ່ານນາງ Megumi Seki, ເລຂາທິການບໍລິຫານງານອົງການໂອໂຊນສາກົນ ແລະໄດ້ມີການພົບປະສອງຝ່າຍກັບບັນດາຄູ່ຮ່ວມມືຂອງໂຄງການສິ່ງແວດລ້ອມສະຫະປະຊາຊາດ (UNEP); ກະຊວງສິ່ງແວດລ້ອມຍີ່ປຸ່ນ; ສູນທຳຄວາມເຢັນຂອງອາກາດ ແລະອາກາດສະອາດ (CCAC); ສູນການຮ່ວມມືດ້ານສິ່ງແວດລ້ອມຍີ່ປຸ່ນ (OECC).
ພ້ອມດຽວກັນນັ້ນ, ບັນດາສະມາຊິກຄະນະຜູ້ແທນໄດ້ເຂົ້າຮ່ວມ ແລະປະກອບຄຳເຫັນທີ່ກອງປະຊຸມກຸ່ມເຮັດວຽກກ່ຽວກັບບັນດາເນື້ອໃນທີ່ກ່ຽວຂ້ອງຂອງສົນທິສັນຍາວຽນນາ, ອະນຸສັນຍາ Montreal. ຕາມສະຖິຕິ, ການຕີລາຄາຂອງຄະນະເລຂາທິການໂອໂຊນສາກົນ, ຫວຽດນາມ ໄດ້ຫຼຸດປະລິມານ CO2 ລົງ 220 ລ້ານໂຕນ ເທົ່າກັບການລົບລ້າງການຊົມໃຊ້ທາດທີ່ໄດ້ຮັບການຄວບຄຸມນັບແຕ່ໄດ້ເຂົ້າຮ່ວມສົນທິສັນຍາວຽນນາ ແລະອະນຸສັນຍາ Montreal ຈົນຮອດປະຈຸບັນ.
ໂດຍ: ຈາງຫງວຽນ