ທ່ານລັດຖະມົນຕີ ຟານວັນຢາງ ເນັ້ນໜັກວ່າ ຫວຽດນາມ ແລະຈີເລ ຍາມໃດກໍ່ຮັກສາການພົວພັນຮ່ວມມືທີ່ເປັນມູນເຊື້ອອັນດີງາມ, ໃກ້ຊິດຕິດແທດ, ທັງໃນສະໄໝປະຊາຊົນຫວຽດນາມ ຕໍ່ສູ້ຍາດເອົາເອກະລາດແຫ່ງຊາດກ່ອນນີ້ ກໍ່ຄືໃນພາລະກິດແຫ່ງການສ້າງສາ, ພັດທະນາປະເທດຊາດໃນປະຈຸບັນ; ຢືນຢັນວ່າ ຫວຽດນາມ ຍາມໃດກໍ່ເຄົາລົບຈີເລ, ເຊິ່ງແມ່ນປະເທດໃນພາກພື້ນອາເມລິກາໃຕ້ທໍາອິດທີ່ໄດ້ສ້າງຕັ້ງການພົວພັນທາງການທູດກັບຫວຽດນາມ (25 ມິນາ 1971).
    |
 |
|
ທ່ານ ຟານວັນຢາງ ລັດຖະມົນຕີປ້ອງກັນປະເທດຫວຽດນາມ ແລະທ່ານນາງ Maya Fernández Allende ລັດຖະມົນຕີກະຊວງປ້ອງກັນປະເທດຈີເລ. ພາບ: qdnd.vn |
ແຈ້ງໃຫ້ທ່ານນາງ Maya Fernández Allende ຮັບຊາບກ່ຽວກັບນະໂຍບາຍການທູດ ແລະນະໂຍບາຍປ້ອງກັນຊາດຂອງຫວຽດນາມ, ທ່ານລັດຖະມົນຕີ ຟານວັນຢາງ ຢັ້ງຢືນວ່າ ຫວຽດນາມ ຍາມໃດກໍ່ສະເໝີຕົ້ນສະເໝີປາຍຕໍ່ແນວທາງການຕ່າງປະເທດ “ເອກະລາດ, ເປັນເຈົ້າຕົນເອງ, ສັນຕິພາບ, ມິດຕະພາບ ແລະການຮ່ວມມືພັດທະນາ, ຫັນການພົວພັນເປັນຫຼາຍຝ່າຍ, ຫຼາຍຮູບຫຼາຍແບບ; ແມ່ນເພື່ອນມິດ, ແມ່ນຄູ່ຮ່ວມມືທີ່ໄວ້ເນື້ອເຊື່ອໃຈ ແລະແມ່ນສະມາຊິກທີ່ຕັ້ງໜ້າ, ມີຄວາມຮັບຜິດຊອບໃນປະຊາຄົມສາກົນ”. ພ້ອມດຽວກັນນັ້ນທ່ານລັດຖະມົນຕີ ຟານວັນຢາງ ກໍ່ໄດ້ເນັ້ນໜັກເຖິງທັດສະນະ ແລະນະໂຍບາຍປ້ອງກັນຊາດ “4 ບໍ່” ຂອງຫວຽດນາມ ເພື່ອເປົ້າໝາຍສັນຕິພາບ, ປົກປ້ອງຕົນເອງ, ປົກປັກຮັກສາປະເທດຊາດແຕ່ຫົວທີ, ແຕ່ໄກ.
|
|
 |
|
ລັດຖະມົນຕີກະຊວງປ້ອງກັນປະເທດສອງປະເທດ ແລກປ່ຽນທີ່ການພົບປະສອງຝ່າຍ. ພາບ: qdnd.vn |
ທີ່ການພົບປະສອງຝ່າຍ, ລັດຖະມົນຕີສອງທ່ານໄດ້ແລກປ່ຽນກ່ຽວກັບສະພາບການໂລກ, ພາກພື້ນ, ສະພາບການປະເທດ, ກອງທັບຂອງແຕ່ລະປະເທດ. ລັດຖະມົນຕີສອງທ່ານໄດ້ເຫັນດີເປັນເອກະສັນໂດຍຕີລາຄາວ່າ ສອງຝ່າຍຍັງມີຄວາມສາມາດບົ່ມຊ້ອນເພື່ອຊຸກຍູ້ການຮ່ວມມືດ້ານປ້ອງກັນຊາດສອງຝ່າຍ, ສອດຄ່ອງກັບຄວາມຕ້ອງການ ແລະຄວາມສາມາດຂອງແຕ່ລະປະເທດ.
ເນື່ອງໃນໂອກາດນິ້, ທ່ານລັດຖະມົນຕີ ຟານວັນຢາງ ໄດ້ເຊື້ອເຊີນທ່ານນາງ Maya Fernández Allende ແລະການນໍາກະຊວງປ້ອງກັນປະເທດ, ບັນດາວິສາຫະກິດປ້ອງກັນຊາດຂອງ ຈີເລ ມາຢ້ຽມຢາມຫວຽດນາມ ເຂົ້າຮ່ວມງານວາງສະແດງປ້ອງກັນຊາດສາກົນ ຄັ້ງທີ 2, ຄາດວ່າດໍາເນີນຢູ່ຮ່າໂນ້ຍ ໃນເດືອນ ທັນວາ 2024 ນີ້.
ສ່ວນທ່ານນາງ Maya Fernández Allende ເຊື່ອໝັ້ນວ່າ ເລື່ອງທ່ານລັດຖະມົນຕີ ຟານວັນຢາງ ໄປຢ້ຽມຢາມຈີເລ ຄັ້ງທໍາອິດນີ້ຈະເປີດກາລະໂອກາດໃໝ່ລະຫວ່າງກະຊວງປ້ອງກັນປະເທດສອງປະເທດ, ສົມກັບຄວາມສາມາດບົ່ມຊ້ອນການຮ່ວມມືລະຫວ່າງສອງຝ່າຍ; ເຫັນດີເປັນເອກະພາບກັບການຕີລາຄາຂອງທ່ານລັດຖະມົນຕີ ຟານວັນຢາງ, ທ່ານນາງ Maya Fernández Allende ປາດຖະໜາຢາກຊຸກຍູ້ການຮ່ວມມືກັບຫວຽດນາມ ໃນຂົງເຂດປ້ອງກັນຊາດ, ປະກອບສ່ວນເພີ່ມທະວີການພົວພັນຮ່ວມມືລະຫວ່າງສອງປະເທດເວົ້າລວມ.
|
|
 |
|
ລັດຖະມົນຕີສອງທ່ານ ເຊັນບົດບັນທຶກຊ່ວຍຈໍາວ່າດ້ວຍການຮ່ວມມືດ້ານປ້ອງກັນຊາດລະຫວ່າງກະຊວງປ້ອງກັນປະເທດສອງປະເທດ ຕໍ່ໜ້າການເປັນສັກຂີພິຍານຂອງທ່ານ ເລືອງເກື່ອງ ປະທານປະເທດຫວຽດນາມ ແລະທ່ານ Gabriel Boric ປະທານາທິບໍດີຈີເລ. ພາບ: qdnd.vn |
ກ່ອນໜ້ານັ້ນ, ໃນຕອນເຊົ້າວັນດຽວກັນ, ລັດຖະມົນຕີສອງທ່ານ ໄດ້ເຊັນບົດບັນທຶກຊ່ວຍຈໍາວ່າດ້ວຍການຮ່ວມມືດ້ານປ້ອງກັນຊາດລະຫວ່າງກະຊວງປ້ອງກັນປະເທດສອງປະເທດ ຕໍ່ໜ້າການເປັນສັກຂີພິຍານຂອງທ່ານ ເລືອງເກື່ອງ ປະທານປະເທດຫວຽດນາມ ແລະ ທ່ານ Gabriel Boric ປະທານາທິບໍດີຈີເລ. ນີ້ແມ່ນບົດບັນທຶກຊ່ວຍຈໍາ ວ່າດ້ວຍການຮ່ວມມືດ້ານປ້ອງກັນຊາດສະບັບທໍາອິດ ລະຫວ່າງສອງປະເທດ, ເປັນຂີດໝາຍໃນການພົວພັນດ້ານປ້ອງກັນຊາດສອງຝ່າຍ, ເປີດກາລະໂອກາດຮ່ວມມືດ້ານປ້ອງກັນຊາດ, ປະກອບສ່ວນຕັ້ງໜ້າເຂົ້າໃນການພົວພັນສອງປະເທດ, ເພື່ອສັນຕິພາບ, ສະຖຽນລະພາບ ແລະພັດທະນາລວມຂອງພາກພື້ນ ແລະໂລກ, ປະກອບສ່ວນຊຸກຍູ້ການພົວພັນຄູ່ຮ່ວມມືຮອບດ້ານລະຫວ່າງຫວຽດນາມ-ຈີເລ.
ໂດຍ: ໄຊນີດາ