ພົນໂທ ຮວ່າງຊວນຈ໊ຽນ ພົບປະສັງສັນນັກຮົບເກົ່າລັດເຊຍ ຢູ່ ມົດສະກູ

ກ່າວຄຳເຫັນທີ່ການພົບປະສັງສັນ, ທ່ານພົນໂທ ຮວ່າງຊວນຈ໊ຽນ ອວຍພອນບັນດານັກຮົບເກົ່າລັດເຊຍ ພ້ອມດ້ວຍຍາດຕິພີ່ນ້ອງມີສຸຂະພາບເຂັ້ມແຂງ, ສືບຕໍ່ປະກອບສ່ວນໃຫ້ການພົວພັນມິດຕະພາບທີ່ເປັນມູນເຊື້ອອັນດີງາມລະຫວ່າງປະຊາຊົນສອງປະເທດ; ຫວັງວ່າ ບັນດານັກຮົບເກົ່າ ຖ້າມີເອກະສານປະຫວັດສາດໃນໄລຍະຊ່ວຍປະຊາຊົນຫວຽດນາມ ຕໍ່ສູ້ຍາດເອົາເອກະລາດ, ທ້ອນໂຮມປະເທດຊາດເປັນເອກະພາບ, ປົກປັກຮັກສາປະເທດຊາດ, ຈະສົ່ງໃຫ້ກະຊວງປ້ອງກັນປະເທດຫວຽດນາມ. ນີ້ທັງແມ່ນອະນຸສອນ, ທັງເປັນບົດຮຽນອັນລໍ້າຄ່າທີ່ຄວນຮັກສາໄວ້ ເພື່ອເຕືອນໃຫ້ຄົນລຸ້ນຫຼັງກ່ຽວກັບສາຍພົວພັນໃນຕະຫຼອດ 7 ທົດສະວັດລະຫວ່າງຫວຽດນາມ ແລະລັດເຊຍ.

ທ່ານພົນໂທ ຮວ່າງຊວນຈ໊ຽນ ແລະນັກຮົບເກົ່າລັດເຊຍ ທີ່ການພົບປະສັງສັນ. ພາບ: ກ່ຽວຈີງ

ສະແດງຄວາມສະເທືອນໃຈເມື່ອໄດ້ພົບປະກັບຄະນະຜູ້ແທນກະຊວງປ້ອງກັນປະເທດຫວຽດນາມ ຢູ່ມົດສະກູ, ທ່ານ Nikolai Nikolaevich Kolesnik - ນັກຮົບເກົ່າລັດເຊຍ ປະຕິບັດງານຢູ່ຫວຽດນາມ ແຕ່ປີ 1965-1966 ໄດ້ແບ່ງປັນວ່າທ່ານຍັງຈື່ຈໍາໄລຍະເວລາທີ່ໄດ້ຄຽງບ່າຄຽງໄຫຼ່ພ້ອມກັບບັນດາສະຫາຍຫວຽດນາມ ໃນການຕໍ່ສູ້ປົດປ່ອຍຊາດຢູ່, ນັ້ນແມ່ນຄວາມຊົງຈໍາທີ່ບໍ່ສາມາດຈາງຫາຍໄປໄດ້. ບັນດານັກຮົບເກົ່າລັດເຊຍ ກໍ່ສະແດງຄວາມຮັກແພງຕໍ່ປະເທດ, ຊາວຫວຽດນາມ ແລະປາດຖະໜາຢາກເຮັດໃຫ້ການພົວພັນຮ່ວມມືມິດຕະພາບລະຫວ່າງສອງປະເທດຈະໝັ້ນຄົງຕະຫຼອດໄປ.

ທ່ານພົນໂທ ຮວ່າງຊວນຈ໊ຽນ ແລະຄະນະຜູ້ແທນກະຊວງປ້ອງກັນປະເທດຫວຽດນາມ ພ້ອມດ້ວຍພະນັກງານ, ພາລະກອນສະຖານທູດຫວຽດນາມ ປະຈໍາ ສະຫະພັນລັດເຊຍ. ພາບ: ກ່ຽວຈີງ

ຕອນບ່າຍວັນດຽວກັນ, ທ່ານພົນໂທ ຮວ່າງຊວນຈ໊ຽນ ແລະຄະນະຜູ້ແທນກະຊວງປ້ອງກັນປະເທດຫວຽດນາມ ໄດ້ໄປຢ້ຽມຢາມສະຖານທູດຫວຽດນາມ ປະຈໍາ ສະຫະພັນລັດເຊຍ. ທ່ານພົນໂທ ຮວ່າງຊວນຈ໊ຽນ ຕີລາຄາສູງການປະກອບສ່ວນຂອງສະຖານທູດໃນການຊຸກຍູ້ການພົວພັນ ຫວຽດນາມ-ລັດເຊຍ; ພ້ອມທັງປາດຖະໜາຢາກສືບຕໍ່ໄດ້ຮັບການສະໜັບສະໜູນ, ການໜູນຊ່ວຍຂອງສະຖານທູດ ກໍ່ຄືຂອງທ່ານເອກອັກຄະລັດຖະທູດ ໃນການປັບປຸງ, ເພີ່ມທະວີການຮ່ວມມືດ້ານປ້ອງກັນຊາດ ຫວຽດນາມ-ລັດເຊຍ ໃຫ້ນັບມື້ນັບເຂົ້າສູ່ລວງເລິກ, ມີປະສິດທິຜົນ, ແທດຈິງ, ປະກອບສ່ວນຫຼາຍກວ່າອີກໃຫ້ແກ່ການພົວພັນລະຫວ່າງສອງປະເທດ.

ໂດຍ: ເຈິ່ນຮວ່ຽນ