ທີ່ງານວາງສະແດງ, ບັນດາວິສາຫະກິດປ້ອງກັນຊາດ ພາຍໃນ ແລະຕ່າງປະເທດ ຈະວາງສະແດງ, ແນະນໍາບັນດາພາຫະນະສູ້ຮົບ, ມາດຕະການເຕັກໂນໂລຊີ, ອາວຸດຍຸດໂທປະກອນທີ່ນໍາໃຊ້ໃຫ້ແກ່ກໍາລັງທະຫານເຮືອ, ທະຫານບົກ, ປ້ອງກັນອາກາດ-ທະຫານອາກາດ, ສູ້ຮົບໃນເຄືອຂ່າຍອິນເຕີແນັດ ແລະອຸປະກອນພະລາທິການ, ເຕັກນິກ. ບັນດາຜະລິດຕະພັນຂອງຫວຽດນາມ ທີ່ຈະນຳໄປວາງສະແດງ, ແນະນໍາຢູ່ໃນງານລວມມີບັນດາຜະລິດຕະພັນໂດຍບັນດາອົງການ, ກົມກອງຂອງກະຊວງປ້ອງກັນປະເທດ ແລະບັນດາບໍລິສັດການຄ້າ, ການບໍລິການຂອງກະຊວງປ້ອງກັນປະເທດ ເປັນຜູ້ຄົ້ນຄວ້າ, ຜະລິດ. ຕາມທ່ານພົນຈັດຕະວາ ເລກວາງຕວ໊ຽນ, ຮອງຫົວໜ້າກົມໃຫຍ່ອຸດສາຫະກໍາປ້ອງກັນຊາດ ແລ້ວ, ບັນຊີລາຍຊື່ອາວຸດຍຸດໂທປະກອນເຕັກນິກ ໂດຍຂະແໜງອຸດສາຫະກໍາປ້ອງກັນຊາດຫວຽດນາມ ປະດິດສ້າງ ແລະຜະລິດຈະໂດດເດັ່ນກວ່າ ເມື່ອທຽບກັບງານວາງສະແດງປ້ອງກັນຊາດສາກົນຫວຽດນາມ 2022.
    |
 |
|
ຕາງໜ້າຄະນະຈັດຕັ້ງ ເປັນປະທານການປະຊຸມຂ່າວ. ພາບ: qdnd.vn |
ງານວາງສະແດງປ້ອງກັນຊາດສາກົນຫວຽດນາມ 2024 ໄດ້ຈັດຕັ້ງໄປພ້ອມໆກັນກັບການເຄື່ອນໄຫວ, ເຫດການຕ່າງໆເນື່ອງໃນໂອກາດສະເຫຼີມສະຫຼອງ 80 ປີແຫ່ງວັນສ້າງຕັ້ງກອງທັບປະຊາຊົນຫວຽດນາມ, 35 ປີແຫ່ງວັນບຸນປ້ອງກັນຊາດທົ່ວປວງຊົນ. ເນື່ອງໃນໂອກາດນີ້, ງານວາງສະແດງ ຈະມີເຂດວັດທະນະທໍາຫວຽດນາມ, ເຂດວາງສະແດງ “ຜົນງານກໍ່ສ້າງກໍາລັງປະກອບອາວຸດປະຊາຊົນ, ກໍ່ສ້າງພື້ນຖານປ້ອງກັນຊາດທົ່ວປວງຊົນ” ແນະນໍາກ່ຽວກັບມູນເຊື້ອ, ຜົນງານ 80 ປີແຫ່ງການກໍ່ສ້າງ, ສູ້ຮົບ ແລະເຕີບໃຫຍ່ຂະຫຍາຍຕົວຂອງກອງທັບປະຊາຊົນຫວຽດນາມ, 35 ປີແຫ່ງວັນບຸນປ້ອງກັນຊາດທົ່ວປວງຊົນ; ແນະນໍາຜະລິດຕະພັນເສດຖະກິດ-ປ້ອງກັນຊາດ, ຜົນການຫັນເປັນດີຈີຕອນຂອງອົງການ, ກົມກອງ, ວິສາຫະກິດກອງທັບ; ແນະນໍາຜະລິດຕະພັນດີເດັ່ນ, ເປັນເອກະລັກຂອງກະຊວງ, ຂະແໜງການ, ທ້ອງຖິ່ນ, ອົງການຈັດຕັ້ງ, ສະມາຄົມ, ກຸ່ມບໍລິສັດເສດຖະກິດ, ວິສາຫະກິດ...
|
|
 |
|
ທ່ານພັນເອກພິເສດ ດັ້ງແທັງມິງ ຮອງຫົວໜ້າກົມພົວພັນຕ່າງປະເທດ, ກະຊວງປ້ອງກັນປະເທດຫວຽດນາມ ກ່າວຄໍາເຫັນທີ່ການປະຊຸມຂ່າວ. ພາບ: qdnd.vn |
ທີ່ການປະຊຸມຂ່າວ, ທ່ານພັນເອກພິເສດ ດັ້ງແທັງມິງ ຮອງຫົວໜ້າກົມພົວພັນຕ່າງປະເທດ, ກະຊວງປ້ອງກັນປະເທດຫວຽດນາມ ເນັ້ນໜັກວ່າ ງານວາງສະແດງໄດ້ຈັດຕັ້ງດ້ວຍຂອບຂະໜາດໃຫຍ່, ເນື້ອໃນມີລັກສະນະປະສິດທິຜົນ ແລະຮອບດ້ານ, ມີການເຂົ້າຮ່ວມຂອງວິສາຫະກິດອຸດສາຫະກໍາປ້ອງກັນຊາດບັນດາປະເທດ ເປັນຈໍານວນຫຼວງຫຼາຍ, ບັນດາຄະນະແຂກສາກົນ, ຄະນະຜູ້ແທນປ້ອງກັນປະເທດຂັ້ນສູງ, ນັກຄຸ້ມຄອງອຸດສາຫະກໍາປ້ອງກັນຊາດ ດ້ວຍຈໍານວນຫຼາຍກວ່າ ເມື່ອທຽບໃສ່ກັບປີ 2022.
ໃນຂອບເຂດເຫດການມີການເຄື່ອນໄຫວຢູ່ນອກງານວາງສະແດງ ເຊິ່ງບໍ່ພຽງແຕ່ຊຸກຍູ້ການຮ່ວມມືດ້ານອຸດສາຫະກໍາປ້ອງກັນຊາດເທົ່ານັ້ນຫາກຍັງປະກອບສ່ວນຊຸກຍູ້ການພົວພັນຕ່າງປະເທດດ້ານປ້ອງກັນຊາດ, ການຮ່ວມມືສາກົນດ້ານປ້ອງກັນຊາດໃນບັນດາຂົງເຂດອີກດ້ວຍ. ສໍາລັບແຂກຖືກເຊີນສາກົນ, ໄລ່ຮອດຈຸດເວລານີ້ ໄດ້ມີ 42 ຄະນະ ລົງທະບຽນມາຫວຽດນາມ ແລະເຂົ້າຮ່ວມງານວາງສະແດງຢ່າງເປັນທາງການ; ມີເກືອບ 200 ຫົວໜ່ວຍ, ວິສາຫະກິດພາຍໃນ ແລະຕ່າງປະເທດ ທີ່ມາຈາກ 27 ປະເທດໃນອາຊຽນ, ອາຊີ, ເອີລົບ, ທະວີບອາເມລິກາ ລົງທະບຽນວາງສະແດງທີ່ງານວາງສະແດງ.
ເຂດວາງສະແດງ ມີເນື້ອທີ່ທັງໝົດກວ່າ 100.000 ຕາແມັດດ້ວຍເນື້ອທີ່ວາງສະແດງໃນຮົ່ມ ແມ່ນ 15.000 ຕາແມັດ (ທົບສອງເທົ່າເມື່ອທຽບໃສ່ກັບງານວາງສະແດງໃນປີ 2022) ແລະກາງແຈ້ງ ແມ່ນກວ່າ 20.000 ຕາແມັດ. ພິເສດ, ທີ່ພິທີເປີດງານວາງສະແດງ ຈະມີກໍາລັງທະຫານອາກາດຫວຽດນາມ ບິນສະແດງ, ກໍາລັງຕີພິເສດ ແລະໝາວິຊາສະເພາະທະຫານຊາຍແດນກອງທັບປະຊາຊົນຫວຽດນາມ ສະແດງ.
ໂດຍ: ໄຊຊະນະ