ເວລາ 18 ໂມງຂອງວັນທີ 12 ກັນຍາ, ຂະບວນລົດຂົນສົ່ງເຄື່ອງຊ່ວຍເຫຼືອປະຊາຊົນຢູ່ຕາແສງດານເຟື້ອງ ໄດ້ຕໍ່ກົ້ນກັນເປັນແຖວຍາວຢຽດ. ໜ່ວຍພະນັກງານ, ນັກຮົບຂອງກອງພັນໃຫຍ່ 174 (ກອງພົນ 316, ທະຫານເຂດ 2) ພວມຈັດແຖວຂຶ້ນເຮືອແຄນູ ເພື່ອໄປຊ່ວຍເຫຼືອບັນດາຄອບຄົວທີ່ຖືກຕົກຢູ່ໂດດດ່ຽວ. ສະຫາຍ ດິງຕ໊ຽນກວນ, ເລຂາຄະນະພັກ, ປະທານສະພາປະຊາຊົນຕາແສງດານເຟຶ້ອງ ແບ່ງປັນດ້ວຍຄວາມຕື້ນຕັນໃຈວ່າ: “ທົ່ວຕາແສງດານເຟື້ອງມີ 719 ຄອບຄົວພວມຖືກຕົກຢູ່ໂດດດ່ຽວ, ໄຟຟ້າບໍ່ມີຮອດມື້ທີສີ່ແລ້ວຍັງບໍ່ທັນແກ້ໄຂໄດ້, ທຸກການເຄື່ອນໄຫວຖືກຢຸດສະງັກ. ໂຊກດີທີ່ມີກຳລັງກອງທັບ, ທະຫານລາດປ້ອງກັນຕົວ, ຕຳຫຼວດມາໜູນຊ່ວຍປະຊາຊົນ”.
    |
 |
|
ພະນັກງານ, ນັກຮົບກອງພັນໃຫຍ່ 174, ກອງພົນ 316 (ທະຫານເຂດ 2) ຂົນເຄື່ອງຊ່ວຍເຫຼືອໄປຮອດປະຊາຊົນຢູ່ຕາແສງດານເຟື້ອງ, ເມືອງຮະຮວ່າ ແລ້ວ. ພາບ: qdnd.vn |
ໂດຍແມ່ນກຳລັງຕ້ານນ້ຳຖ້ວມທີ່ຢູ່ດ່ານໜ້າ, ກອງພັນໃຫຍ່ 174 ໄດ້ເຄື່ອນທັບມາຕາແສງດານເຟື້ອງ ແຕ່ຕອນເຊົ້າວັນທີ 11 ກັນຍາ. ຕາມທ່ານພັນໂທ ຫງວຽນຈ້ອງຮວ່າງຫຽບ, ຮອງຫົວໜ້າການເມືອງກອງພັນໃຫຍ່ 174 ໃຫ້ຮູ້ວ່າ ທາງກົມກອງໄດ້ລະດົມພະນັກງານ, ນັກຮົບຈຳນວນ 100 ກວ່າຄົນ ພ້ອມກັບກຳລັງທະຫານທ້ອງຖິ່ນ ເປັນເຈົ້າການໄປຮອດເຮືອນແຕ່ລະຄອບຄົວເພື່ອເອົາຜູ້ເຖົ້າ ແລະເດັກນ້ອຍໄປຢູ່ບ່ອນທີ່ປອດໄພ, ຮັກສາຊີວິດ, ຊັບສິນຂອງປະຊາຊົນ, ຕັ້ງໜ້າອະນາໄມສິ່ງແວດລ້ອມ, ກັກກັນພະຍາດ, ນຳເອົາເຄື່ອງໃຊ້ທີ່ຈຳເປັນໄປຊ່ວຍຄອບຄົວທີ່ປະສົບກັບຄວາມຫຍຸ້ງຍາກ.
|
|
 |
|
ພະນັກງານ, ນັກຮົບກອງພັນໃຫຍ່ 174, ກອງພົນ 316 (ທະຫານເຂດ 2) ຊ່ວຍປະຊາຊົນແກ້ໄຂຜົນຮ້າຍຢ້ອນຫຼັງຈາກໄພທຳມະຊາດ. ພາບ: qdnd.vn |
ເທດສະບານເມືອງຮະຮວ່າ ກໍ່ແມ່ນທ້ອງຖິ່ນທີ່ໄດ້ຮັບຜົນສະທ້ອນຢ່າງໜັກໜ່ວງຈາກພາຍຸລູກທີ 3. ຢູ່ບ້ານ 1, ພະນັກງານ, ນັກຮົບກຳລັງຊ່ວຍເຫຼືອບັນດາຄອບຄົວເຮັດອະນາໄມ, ທຳຄວາມສະອາດເຮືອນຊານ. ເຮືອນຂອງທ່ານ ຫວູເລືອງບັ່ງ ມີແຕ່ຜົວເມຍເຖົ້າ 2 ຄົນທີ່ມີອາຍຸກວ່າ 70 ປີ. ເມື່ອນ້ຳຖ້ວມໄຫຼເຂົ້າເດີນໜ້າບ້ານ, ສອງຄົນໄດ້ແຕ່ຈັບມືກັນຢືນຢູ່ແຈເຮືອນຍ້ອນຢ້ານ. ຮອດເວລານ້ຳໄຫຼນອງ, ພໍດີອ້າຍທະຫານມາຮອດ, ໄດ້ພາຜູ້ເຖົ້າສອງຄົນນັ້ນໄປຍັງບ່ອນປອດໄພ. ເມື່ອນ້ຳຫຼຸດລົງ, ທະຫານພັດໄດ້ມາຊ່ວຍຄອບຄົວແກ້ໄຂຜົນຮ້າຍຢ້ອນຫຼັງ, ເຮັດໃຫ້ຊີວິດການເປັນຢູ່ເປັນປົກກະຕິ. ວັນທີ 12 ກັນຍາ, ຢູ່ບໍລິເວນເມືອງຮະຮ່ວາ, ກອງພັນໃຫຍ່ 174 ໄດ້ຊ່ວຍ 40 ຄອບຄົວຍົກຍ້າຍຊັບສິນ, ເຮັດອະນາໄມ, ທຳຄວາມສະອາດເຮືອນຊານ ແລະທາງຄົມມະນາຄົມໄດ້ຫຼາຍສີບກິໂລແມັດ, ຂົນສົ່ງແບກຫາບ, ແຈກຢາຍເຄື່ອງຊ່ວຍເຫຼືອໃຫ້ປະຊາຊົນ ໄດ້ຈຳນວນ 1.000 ພູດ.
|
|
 |
|
ນ້ຳໃຈທະຫານ ແລະປະຊາຊົນຢູ່ເຂດນ້ຳຖ້ວມ ຮະຮວ່າ. ພາບ: qdnd.vn |
ກ່ອນໜ້ານັ້ນ, ຍ້ອນຝົນຕົກໜັກຕິດຕໍ່ກັນຫຼາຍວັນ, ລະດັບນ້ຳຢູ່ແມ່ນ້ຳທາວ ຍຶ່ງຂຶ້ນໄວ. ດ້ວຍຈິດໃຈຟ້າວຟັ່ງ, ໃນຕອນບ່າຍວັນທີ 10 ກັນຍາ, ທະຫານກອງພັນໃຫຍ່ 316 ພ້ອມກັບກຳລັງເວນຍາມຢູ່ສຳນັກງານກອງບັນຊາການທະຫານເມືອງຮະຮວ່າ ແລະແຂວງຝູເທາະ ພ້ອມກັບກຳລັງທະຫານລາດທ້ອງຖິ່ນ ໄດ້ຍົກຍ້າຍ 1.980 ຄອບຄົວຈາກເຂດອັນຕະລາຍໄປຍັງບ່ອນປອດໄພ; ພ້ອມກັບທ້ອງຖິ່ນຜັນຂະຫຍາຍວິທີການກັນນ້ຳບໍ່ໃຫ້ໄຫຼຜ່ານຄັນຄູ...
ຄຽງບ່າຄຽງໄຫຼ່ພ້ອມກັບພະນັກງານ, ນັກຮົບຢູ່ບ່ອນຖືກນ້ຳຖ້ວມໃນບໍລິເວນ, ທ່ານພັນເອກພິເສດ ຫງວຽນຈູງດັ໊ກ, ຫົວໜ້າການເມືອງກອງພົນ 316 ໄດ້ລະດົມກຳລັງໃຈພະນັກງານ, ນັກຮົບ: “ບໍ່ວ່າຢູ່ໃນເງື່ອນໄຂ, ສະພາບການໃດກໍ່ຕາມຊີວິດ ແລະສຸຂະພາບຂອງປະຊາຊົນກໍ່ຕ້ອງມາກ່ອນໝູ່ໝົດ. ນ້ຳຖ້ວມຈະສືບຕໍ່ມີການຜັນແປຢ່າງສັບສົນ, ປະຊາຊົນຮະຮວ່າ ຍັງຕ້ອງການບັນດາສະຫາຍຊ່ວຍເຫຼືອ, ຈົ່ງເສີມຂະຫຍາຍມູນເຊື້ອຂອງກົມກອງ, ຮັກແພງພໍ່ແມ່ປະຊາຊົນຄືຍາດຕີພີ່ນ້ອງໃນຄອບຄົວ”.
ທະຫານ ເຮັດວຽກແຕ່ເຊົ້າຈົນຮອດເດິກ, ແຂ່ງຂັນກັບນ້ຳຖ້ວມ. ເອື້ອຍຄູ ເຈິ່ນທິບິກແຮ້ງ, ຫົວໜ້າໂຮງຮຽນປະຖົມເທດສະບານເມືອງຮະຮວ່າ ມີຄວາມຕື້ນຕັນໃຈຕໍ່ນ້ຳໃຈເພື່ອປະຊາຊົນຂອງພະນັກງານ, ນັກຮົບ. ໄດ້ຮັບຟັງຄວາມໃນໃຈຂອງເອື້ອຍອ້າຍຄູ ແລະປະຊາຊົນເມືອງຮະຮວ່າ, ພວກຂ້າພະເຈົ້າ ໄດ້ເຫັນຢ່າງຈະແຈ້ງກ່ຽວກັບຄວາມໄວ້ເນື້ອເຊື່ອໃຈ ແລະຄວາມຮັກແພງຂອງປະຊາຊົນທີ່ມີຕໍ່ອ້າຍທະຫານລຸງໂຮ່. ພາຍຸລູກທີ 3 ແລະຝົນຕົກໜັກໄດ້ກໍ່ຜົນຮ້າຍຢ່າງໜັກໜ່ວງໃຫ້ປະຊາຊົນ. ແຕ່ວ່າເມື່ອປະສົບກັບຄວາມຫຍຸ້ງຍາກ, ອັນຕະລາຍ, ຄຽງບ່າຄຽງໄຫຼ່ໄປພ້ອມກັບພໍ່ແມ່ປະຊາຊົນໄດ້ເຮັດໃຫ້ຮູບພາບ, ຄຸນທາດທະຫານລຸງໂຮ່ ຍິ່ງສະຫວ່າງສະໄຫວຂຶ້ນຕື່ມ.
ໂດຍ: ແສງເດືອນ