ຈົດໝາຍສົ່ງເຖິງພະນັກງານ, ນັກຮົບກອງທັບປະຊາຊົນຫວຽດນາມ ແລະກໍາລັງທະຫານລາດປ້ອງກັນຕົວປະຕິບັດໜ້າທີ່ສະກັດກັ້ນ, ຕ້ານ, ແກ້ໄຂຜົນຮ້າຍຢ້ອນຫຼັງຈາກພາຍຸ ຫົວທີ 3.
ບັນດາສະຫາຍທີ່ຮັກແພງທັງຫຼາຍ!
ໃນຊຸມວັນຜ່ານມາ, ພາຍຸ ຫົວທີ 3, ພາຍຸແຮງກວ່າໝູ່ໃນຮອບ 30 ປີຜ່ານມາ, ໄດ້ສົ່ງຜົນສະທ້ອນຢ່າງໜັກໜ່ວງໃຫ້ບັນດາແຂວງ, ນະຄອນທາງພາກເໜືອ, ພິເສດແມ່ນຫາຍຟ່ອງ, ກວາງນິງ, ຮວ່າບິ່ງ, ບັ໊ກຢາງ, ໄທງວຽນ, ກາວບັງ, ລ້າງເຊີນ, ຟູທໍ້, ອຽນບ໊າຍ, ລາວກາຍ...
    |
 |
|
ທ່ານພົນເອກ ຟານວັນຢາງ, ກໍາມະການກົມການເມືອງ, ຮອງເລຂາຄະນະພັກການທະຫານສູນກາງ, ລັດຖະມົນຕີກະຊວງປ້ອງກັນປະເທດຫວຽດນາມ. ພາບ: qdnd.vn |
ຕໍ່ໜ້າການຜັນແປຢ່າງສັບສົນຂອງພາຍຸ ຫົວທີ 3, ໂດຍຊາບຊຶມ, ປະຕິບັດຕາມຄໍາສັ່ງຊີ້ນໍາຂອງກົມການເມືອງ, ຄະນະເລຂາທິການ, ລັດຖະບານ, ນາຍົກລັດຖະມົນຕີ, ຄະນະພັກການທະຫານສູນກາງ, ກະຊວງປ້ອງກັນປະເທດ ແລະຄຳສັ່ງຂອງຜູ້ບັນຊາການຢ່າງເຂັ້ມງວດ; ພະນັກງານ, ນັກຮົບບັນດາກົມກອງກອງທັບ ແລະກໍາລັງທະຫານລາດປ້ອງກັນຕົວຢູ່ທ້ອງຖິ່ນພາກເໜືອໄດ້ຜັນຂະຫຍາຍມາດຕະການສະກັດກັ້ນ, ຕ້ານພາຍຸຢູ່ກົມກອງ ແລະໃນບໍລິເວນຕັ້ງທັບຢ່າງວ່ອງໄວ; ໂຄສະນາ, ຂົນຂວາຍ, ໜູນຊ່ວຍປະຊາຊົນເຄື່ອນຍ້າຍ; ແນະນໍາໃຫ້ກໍາປັ່ນ, ເຮືອແພ ແລະປະຊາຊົນໄປຍັງເຂດຫຼົບໄພ. ດ້ວຍຈິດໃຈ “ຖືຊີວິດຂອງມະນຸດເປັນສໍາຄັນກ່ອນໝູ່”, “ບ່ອນໃດປະສົບຄວາມຫຍຸ້ງຍາກ, ອັນຕະລາຍ, ບ່ອນນັ້ນມີທະຫານ” ແລະທິດນຳ “4 ຢູ່ກັບທີ່”; ບັນດາສະຫາຍທັງຮັກສາລະບອບກຽມພ້ອມສູ້ຮົບຢ່າງເຂັ້ມງວດ, ທັງຈັດກຳລັງ, ພາຫະນະ, ມີໜ້າຢູ່ສະຖານທີ່ສຳຄັນ, ຫຍຸ້ງຍາກ, ລຳບາກ ແລະອັນຕະລາຍ, ປະຈັນບານນໍາໜ້າໃນການສະກັດກັ້ນ, ຕ້ານພາຍຸນ້ຳຖ້ວມ, ຊອກຫາກູ້ໄພກູ້ຊີບ, ຊ່ວຍປະຊາຊົນແກ້ໄຂຜົນຮ້າຍຢ້ອນຫຼັງຈາກພາຍຸ ຫົວທີ 3.
ຕາງໜ້າຄະນະພັກການທະຫານສູນກາງ, ກະຊວງປ້ອງກັນປະເທດຫວຽດນາມ ຂ້າພະເຈົ້າ ຂໍຍ້ອງຍໍຊົມເຊີຍຄວາມມານະພະຍາຍາມ, ຄວາມຕັດສິນໃຈສູງຂອງບັນດາສະຫາຍໃນການສະກັດກັ້ນ, ຕ້ານ ແລະແກ້ໄຂຜົນຮ້າຍຢ້ອນຫຼັງຈາກພາຍຸ ຫົວທີ 3. ໃນຊຸມວັນຈະມາເຖິງ, ການຜັນແປພາຍຫຼັງພາຍຸຍັງສັບສົນ, ຄາດເດົາໄດ້ຍາກ; ຊີວິດ ແລະຊັບສິນຂອງປະຊາຊົນສືບຕໍ່ຖືກຂົ່ມຂູ່; ຄະນະພັກການທະຫານສູນກາງ, ກະຊວງປ້ອງກັນປະເທດ ເຊື່ອໝັ້ນ ແລະຫວັງວ່າບັນດາສະຫາຍຍົກສູງຄຸນນະທາດ, ເຈດຈໍານົງ, ຄວາມຕັດສິນໃຈ, ເສີມຂະຫຍາຍລັດທິວິລະຊົນປະຕິວັດ, ມູນເຊື້ອເດັດດ່ຽວສູ້ຮົບ, ເດັດຂາດມີໄຊຂອງກອງທັບປະຊາຊົນຫວຽດນາມ ວິລະຊົນ, ສາມັກຄີ, ປະສານສົມທົບກັນປົກປັກຮັກສາຄວາມປອດໄພ ຮັບປະກັນຊີວິດ, ຊັບສິນຂອງລັດ ແລະປະຊາຊົນຢ່າງແທ້ຈິງ, ຕັ້ງໜ້າຊ່ວຍເຫຼືອປະຊາຊົນຢູ່ບັນດາແຂວງພາກເໜືອ ແກ້ໄຂຜົນຮ້າຍຢ້ອນຫຼັງຈາກພາຍຸຢ່າງທັນການ, ເຮັດໃຫ້ຊີວິດການເປັນຢູ່ຂອງປະຊາຊົນກັບຄືນສູ່ສະພາບເປັນປົກກະຕິໂດຍໄວ; ພ້ອມທັງຮັບປະກັນຄວາມປອດໄພຢ່າງເດັດຂາດໃນການປະຕິບັດໜ້າທີ່.
ອວຍພອນໃຫ້ບັນດາສະຫາຍ ຈົ່ງມີສຸຂະພາບເຂັ້ມແຂງ, ມີຄວາມຜາສຸກ, ປອດໄພ ແລະໄຊຊະນະ.
ດ້ວຍຄວາມຮັກແພງ ແລະເດັດຂາດມີໄຊ!
ທ່ານພົນເອກ ຟານວັນຢາງ